¿Hanja di benefisiagihu̱ rä mhäte Jeoba?

1. ¿Te dä za gä pe̱fihu̱ pa dä johya rä Zi Dada Jeoba?

IMÄJINÄ ge gi umbäbi nꞌa rä jäꞌi nꞌa rä regalo xa mähotho näꞌä gi handi ge di japäbi mꞌe̱di. ¿Te ma gi senti mu̱ gi hyandi ge näꞌä jäꞌi ma dä hñäni näꞌä regalo ꞌne ho̱nse̱ dä me̱ꞌtsi ꞌne hindä usa? Zäi ge xa ma dä u̱ ri mfeni. Pe mu̱ gi hyandi ge näꞌä jäꞌiꞌä xa ma dä jamädi po näꞌä regalo gä umbäbi ꞌne ma dä usa, zäi ge xa ma gi johya. Njabu̱ ꞌnehe rä Zi Dada Jeoba. ¿Dä za gi imäjinä hängu rä johya di senti ora handi ge xa di jamädibihu̱ ngeꞌä xa bi mäkägihu̱ ꞌne bä pe̱hni rä Tꞌu̱ pa bi du po gekhu̱? (Juan 3:16; Rom. 5:​7, 8).

2. ¿Te ma gä handihu̱ ha nunä ntꞌudi di nxadihu̱?

² Pe ngu thogi yä je̱ya, näꞌä rä njutꞌi bi uni rä Zi Dada Jeoba po gekhu̱, dä za ya hingä balorahu̱ ja ngu ndi balorahu̱ mä mꞌe̱tꞌo. Zäi ge mäske hää di johyahu̱ ngeꞌä di pe̱ꞌtsihu̱ näꞌä regaloꞌä, pe ꞌñenä go ho̱nse̱ dä ju̱hu̱ näꞌä rä regaloꞌä ꞌne dä pe̱ꞌtsihu̱. Hänge pa hindä käni näꞌä rä jamädi di sentihu̱ po geꞌä, mähyoni ge njatꞌä gä hudihu̱ gä ntso̱ꞌmihu̱ pa gä handihu̱ gatꞌho näꞌä xä me̱fi po gekhu̱ rä Zi Dada Jeoba ꞌne rä Hesu. Geꞌä ma dä maxkägihu̱ nunä ntꞌudi di nxadihu̱. Ma gä handihu̱ hanja di benefisiagihu̱ mäpaya näꞌä rä njutꞌi bi uni rä Zi Dada Jeoba po gekhu̱ ꞌne hanja ma dä benefisiagihu̱ xudi ndämäni. ꞌNehe, ma gä handihu̱ hanja dä za gä utihu̱ rä Zi Dada Jeoba ge xa di jamädibihu̱ po näꞌä rä mhäte bi ꞌñudi po gekhu̱, ꞌne te dä za gä pe̱fihu̱ pa näꞌä mhäteꞌä tobe mänꞌa dä te durante nuꞌu̱ yä pa ma dä nja rä Fenäte de rä du rä Hesu.

HANJA DI BENEFISIAGIHU̱ MÄPAYA NÄꞌÄ RÄ NJUTꞌI BI UNI JEOBA

3. ¿Hanja dä za gä eñhu̱ ge dende nubye̱ ya di benefisiahu̱ de näꞌä rä njutꞌi bi uni rä Zi Dada Jeoba?

³ Dende nubye̱, di benefisiahu̱ de näꞌä rä njutꞌi bi uni rä Zi Dada Jeoba. Por ejemplo, koꞌmu̱ bä pe̱hni rä Tꞌu̱ pa bi du po gekhu̱, nubye̱ rä Zi Dada Jeoba dä za dä punꞌgägihu̱ mä pekadohu̱. Pe hindi punꞌgägihu̱ por obligasio, sino ngeꞌä xa di mäkägihu̱ hänge ne dä punꞌgägihu̱. Ha nꞌa rä jähñä, rä rey David bi ꞌñudi hängu xa mi jamädibi rä Zi Dada Jeoba ora bi ꞌñembäbi: «Nuꞌi, oh Jeoba, grä hojäꞌi ꞌne ya xkä ñhoki pa gi uni rä mpumbäte» (Sal. 86:5; 103:​3, 10-13).

4. ¿Pa te bä pe̱hni rä Zi Dada Jeoba rä Tꞌu̱? (Lucas 5:32; 1 Timoteo 1:15).

⁴ Rꞌa yä jäꞌi senti ge hindi meresebi rä mpumbäte rä Zi Dada Jeoba. Pe gi pädi, ninꞌa de gekhu̱ hindi meresegihu̱. Rä apostol Pablo bi ꞌñenä: «Ni tsꞌu̱ hiri ꞌñepkägi dä tꞌengägi ge drä apostol [ . . . ]. Pe nugi di pädi ge Äjuä xi rä dängi rä mhäte pa gekägi» (1 Cor. 15:​9, 10). Ora xa mäjuäni di arrepentihu̱ de mä pekadohu̱, rä Zi Dada Jeoba di punꞌgägihu̱. ¿Por hanja? Hingä ngeꞌä di meresegihu̱, sino ke ngeꞌä xa di mäkägihu̱. Hänge mu̱ rꞌabu̱ gi senti ge hindi mereseꞌi ge rä Zi Dada Jeoba dä punꞌäꞌi, mähyoni gi beni ge näꞌä himbä pe̱hni rä Tꞌu̱ pa bi du po nuꞌu̱ yä jäꞌi hinte mä tsꞌoki tu, sino ke bä pe̱hni po gatꞌho nuꞌu̱ yä yꞌo̱tꞌä tsꞌoki xa mäjuäni di arrepenti (hñeti Lucas 5:32;a 1 Timoteo 1:​15, TNM).

5. ¿Toꞌo dä za dä mää ge di meresebi rä nhuekäte rä Zi Dada Jeoba?

⁵ Mu̱ ya di pe̱ꞌtsihu̱ ndunthi yä je̱ya de di pe̱päbihu̱ rä Zi Dada Jeoba, hinte mä duda ja ge näꞌä handi ko ndunthi rä muui gatꞌho näꞌä xtä pe̱fihu̱ po Geꞌä (Heb. 6:10). Pe nunka di debe gä mbenihu̱ ge di meresegihu̱ dä rꞌakägihu̱ rä nhuekäte ꞌne dä punꞌgägihu̱ mä pekadohu̱. Rä Zi Dada Jeoba himbä pe̱hni rä Tꞌu̱ pa dä gutkägihu̱ po nuꞌu̱ yä hogä tꞌo̱tꞌe di pe̱fihu̱ po Geꞌä, sino ke po näꞌä rä mhäte senti po gekhu̱. Mu̱ di mbenihu̱ ge di meresegihu̱ dä punꞌgägihu̱ mä pekadohu̱ rä Zi Dada Jeoba po gatꞌho näꞌä xtä pe̱fihu̱ po Geꞌä, signifika ge di mbenihu̱ ge himi jakägihu̱ mꞌe̱di dä du rä Kristo pa dä ñängägihu̱ de rä pekado ꞌne de rä du (hyandi ꞌnehe te mää Gálatas 2:21).

6. ¿Por hanja xa bi yꞌo̱tꞌe ntsꞌe̱di rä apostol Pablo po bi me̱päbi rä Zi Dada Jeoba?

⁶ Rä apostol Pablo mi pädi xä ñho ge himi meresebi näꞌä rä mpumbäte xki hñäni de rä Zi Dada Jeoba. Nuꞌmu̱, ¿por hanja xa mi o̱tꞌe ntsꞌe̱di po dä me̱päbi? Ngeꞌä mi ne dä ꞌñuti hängu mi jamädibi po näꞌä rä nhuekäte xki umbäbi (Efes. 3:7). Njabu̱ ꞌnehe mäpaya. Nuju̱ di sigi di pe̱päbihu̱ rä Zi Dada Jeoba ko ndunthi rä johya, hingä pa gä tähähu̱ rä mpumbäte, sino pa gä utihu̱ hängu di jamädibihu̱ ngeꞌä xa huegägihu̱.

7. ¿Ndaꞌä mä nꞌa rä benefisio di pe̱ꞌtsihu̱ po näꞌä rä njutꞌi bi uni rä Zi Dada Jeoba? (Romanos 5:1; Santiago 2:23).

⁷ Näꞌä rä njutꞌi bi uni rä Zi Dada Jeoba ꞌnehe rꞌakägihu̱ rä oportunida de gä pe̱ꞌtsihu̱ nꞌa rä hogä ntsitsꞌi kongeꞌä.b Ja ngu dä handihu̱ ha näꞌä rä ntꞌudi pa gä nxadihu̱ 4, gatꞌho dä mꞌu̱ihu̱ ko rä pekado. Pe koꞌmu̱ rä Zi Dada Jeoba bä pe̱hni rä Tꞌu̱ pa bi du po gekhu̱, nubye̱ dä za gä «ꞌmu̱ihu̱ en paz» Kongeꞌä ꞌne dä za gä pe̱ꞌtsihu̱ rä amista (hñeti Romanos 5:​1, TNM; Santiago 2:23).c

8. ¿Por hanja xa di jamädibihu̱ rä Zi Dada Jeoba ngeꞌä rꞌakägihu̱ rä däta nsu de gä xatuäbihu̱?

⁸ ¿Gi pädi te mä däta nsu rꞌakägihu̱ rä Zi Dada Jeoba ngeꞌä di pe̱ꞌtsihu̱ nꞌa rä hogä ntsitsꞌi kongeꞌä? Di pe̱ꞌtsihu̱ rä däta nsu de gä xatuäbihu̱. Rä Zi Dada Jeoba hingä ho̱nse̱ o̱de nuꞌu̱ yä sadi di tꞌo̱tꞌe ha yä mhuntsꞌi, sino ke ꞌnehe o̱de ora di xatuäbihu̱ kada nꞌa de gekhu̱. Mäjuäni ge ora di xatuäbihu̱ rä Zi Dada Jeoba, rꞌakägihu̱ nꞌa rä tsaya ha mä mfenihu̱ ꞌne ha mä korasohu̱. Pe näꞌä rä benefisio mänꞌa rä dängi, eske ora di xatuäbihu̱ mänꞌa di ze̱di näꞌä rä hogä ntsitsꞌi di pe̱ꞌtsihu̱ kongeꞌä (Sal. 65:2; Sant. 4:8; 1 Juan 5:14). Mi mꞌu̱kua rä Hesu ha rä Xiꞌmhai, njatꞌä xa mi xatuäbi rä Zi Dada Jeoba ngeꞌä näꞌä mi pädi xä ñho ge Näꞌä mi o̱de ꞌne ge nuꞌu̱ yä sadiꞌu̱, geꞌä mi japäbi mänꞌa dä ze̱di näꞌä rä hogä ntsitsꞌi mi pe̱ꞌtsi kongeꞌä (Luc. 5:16). ¡Hängu di jamädibihu̱ rä Zi Dada Jeoba ngeꞌä ko näꞌä rä bida bi uni rä Tꞌu̱, nubye̱ dä za gä pe̱ꞌtsihu̱ nꞌa rä hogä ntsitsꞌi Kongeꞌä ꞌne dä za gä xatuäbihu̱!

HANJA MA DÄ BENEFISIAGIHU̱ XUDI NDÄMÄNI NÄꞌÄ RÄ NJUTꞌI BI UNI JEOBA

9. Ko näꞌä rä njutꞌi bi uni rä Zi Dada Jeoba po gekhu̱, ¿te mä benefisio pe̱ꞌtsi pa xudi ndämäni gatꞌho nuꞌu̱ yä amigo?

⁹ Ko näꞌä rä njutꞌi bi uni rä Zi Dada Jeoba, ¿te mä benefisio to̱ꞌmpäbi pa xudi ndämäni nuꞌu̱ yä amigo? Rä Zi Dada Jeoba ma dä umbäbi nꞌa rä te pa nzäntho. Ndunthi yä jäꞌi hingi kamfri ge nꞌa rä pa ma dä za gä mꞌu̱ihu̱ pa nzäntho. Pe rä Zi Dada Jeoba bi hyoki yä jäꞌi pa dä mꞌu̱i pa nzäntho hingä pa dä du. Hänge mäske xä ñhei toꞌo dä gamfri ge nꞌa rä pa hää ma dä za gä mꞌu̱ihu̱ pa nzäntho, hindi debe gä dudahu̱ ngeꞌä pa geꞌä rä Zi Dada Jeoba bi gutꞌi xa xä mädi nuꞌmu̱ bä pe̱hni rä Tꞌu̱ pa bi du po gekhu̱ (Rom. 8:32).

10. ¿Te mä regalo to̱ꞌmi ko ndunthi rä johya gatꞌho nuꞌu̱ pe̱päbi rä Zi Dada Jeoba?

¹⁰ Mäske tobe hindi pe̱ꞌtsihu̱ näꞌä rä te pa nzäntho, rä Zi Dada Jeoba ne ge dende nubye̱ gä to̱ꞌmihu̱ ko ndunthi rä johya näꞌä rä jäpiꞌä. Nuꞌu̱ xä thahni pa dä ma ha mähetsꞌi ꞌne dä mända ko rä Kristo, to̱ꞌmi ko ndunthi rä johya näꞌä rä däta nsuꞌä (Apoc. 20:6). Gatꞌho nuꞌu̱ märꞌa yä amigo rä Zi Dada Jeoba, nuꞌu̱ to̱ꞌmi dä mꞌu̱i nuua ha rä Xiꞌmhai xti mparaiso habu̱ hinte mä u̱gi, hinte mä dumu̱i nixi hinte mä sufrimiento ma dä nja (Apoc. 21:​3, 4). Xi nuꞌi, ¿gi pe̱ꞌtsi näꞌä rä humu̱i de gi mꞌu̱i pa nzäntho nuua ha rä Xiꞌmhai? Beni ge tanto nuꞌu̱ ma dä ma ha mähetsꞌi ngu nuꞌu̱ ma dä gohi nuua ha rä Xiꞌmhai, mähye̱gi rä muui nunä däta regalo. Dä za gä kamfrihu̱ ge ma gä mꞌu̱ihu̱ ko ndunthi rä johya ha rä Paraiso, ngeꞌä rä Zi Dada Jeoba pa geꞌä bi hyoki yä jäꞌi, pa dä mꞌu̱i pa nzäntho ha rä Xiꞌmhai ko ndunthi rä johya.

11, 12. ¿Te mä jäpi ma gä handihu̱ xti mparaiso nunä Xiꞌmhai? (Hyandi ꞌnehe yä kꞌoi).

¹¹ ¿Dä za gi imäjinä te mä mꞌu̱i ma gi pe̱ꞌtsi xti mparaiso rä Xiꞌmhai? Ya hingä ma dä jakägihu̱ gä tumämu̱ihu̱ yä ñheni nixi rä du (Is. 25:8; 33:24). Rä Zi Dada Jeoba ma dä rꞌaꞌi gatꞌho näꞌä go gi ne. ¿Te gi hohmä gi pädi ha rä Paraiso? ¿Gi hohmä gi estudia mä ndunthi de yä planta, de yä zi zuꞌue o de yä zi tsꞌintsꞌu̱? ¿Gi hohmä gi ntuhu, gi pe̱i yä ꞌmida o gi estudia tengu ꞌmu̱i nunä Xiꞌmhai habu̱ di ꞌmu̱ihu̱? Ha rä Paraiso ma dä ja mꞌe̱di yä arquitecto, yä hyokä nguu, toꞌo dä mpotꞌi, toꞌo dä hyoki yä ñhuni, toꞌo dä hyoki yä jardin ꞌne toꞌo dä hyoki yä erramienta. Pe hingä ho̱nse̱ꞌä, ma xi dä nja mä ndunthi rä ꞌme̱fi ꞌne ma dä ja mꞌe̱di rä mfatsꞌi (Is. 35:1; 65:21). ¡Ha rä Paraiso ma gä pe̱ꞌtsihu̱ nꞌa rä te pa nzäntho pa gi estudia näꞌä go gi ne!

¹² ¿Dä za gi imäjinä hängu rä johya ma gä pe̱ꞌtsihu̱ ora gä umbäbihu̱ rä hogä ꞌñehe nuꞌu̱ ma dä nuhu de rä du? (Hech. 24:15). ꞌNehe ma gä pe̱ꞌtsihu̱ ndunthi rä johya de gä sigihu̱ gä pädihu̱ de rä Zi Dada Jeoba ꞌne de gatꞌho näꞌä xä hyoki (Sal. 104:24; Is. 11:9). Pe ndaꞌä mänꞌa xä ñho, ¡eske ma dä za gä pe̱päbihu̱ rä Zi Dada Jeoba ko nꞌa rä konsiensia xä ntꞌaxi! ¿Por hanja? Koꞌmu̱ ya hinte mä pekado ma gä o̱tꞌehu̱, ya hinte ma dä u̱ngägihu̱ mä konsiensiahu̱. ¿Di bale rä penä gä paatihu̱ nuꞌu̱ yä jäpi di prometegihu̱ rä Zi Dada Jeoba ko nuꞌu̱ yä tꞌo̱tꞌe segun uni rä johya mäpaya pe hinte di dura? ¡Hinä, hindi bale rä penä! (Heb. 11:25). Pe hää di bale rä penä gatꞌho nuꞌu̱ yä sacrificio dä za gä jahu̱ mäpaya. ¿Por hanja? Ngeꞌä näꞌä rä Paraiso ma dä nja ha rä Xiꞌmhai, ya hingä ma gä sigihu̱ gä to̱ꞌmihu̱ ngu nꞌa rä promesa, sino ke ma gä handihu̱ ko mä dahu̱ hanja ma dä kumpli. Nuya yä jäpi ma gä handihu̱, ngeꞌä rä Zi Dada Jeoba xa bi mäkägihu̱ ꞌne bä pe̱hni rä Tꞌu̱ pa bi du po kada nꞌa de gekhu̱.

MA GÄ JAMÄDIBIHU̱ RÄ ZI DADA JEOBA PO NÄꞌÄ RÄ MHÄTE XÄ ꞋÑUDI PO GEKHU̱

13. ¿Hanja dä za gä udihu̱ ge di jamädibihu̱ rä Zi Dada Jeoba po näꞌä rä njutꞌi bi uni po gekhu̱? (2 Corintios 6:1).

¹³ ¿Hanja dä za gä udihu̱ ge di jamädibihu̱ rä Zi Dada Jeoba po näꞌä rä njutꞌi bi uni po gekhu̱? Mu̱ gä usahu̱ mä bidahu̱ pa gä prokurahu̱ mꞌe̱tꞌo gä pe̱päbihu̱ rä Zi Dada Jeoba, ma gä udihu̱ ge di jamädibihu̱ ngeꞌä bä pe̱hni rä Tꞌu̱ pa bi du po gekhu̱ (Mat. 6:33). Rä Mäkä Tꞌofo enä ge rä Hesu bi du pa ya hingä pe̱fihu̱ näꞌä go di nehu̱, sino ke nubye̱ di debe gä «ꞌmu̱hu̱ pa gä o̱ꞌtuähu̱ rä paha nuꞌä toꞌo bi du po ma tsꞌokihu̱» (2 Cor. 5:15). Nuju̱ hindi ne gä fe̱ꞌtsithohu̱ nuꞌu̱ yä benefisio bi hä näꞌä rä njutꞌi bi uni rä Zi Dada Jeoba po gekhu̱ (hñeti 2 Corintios 6:1).d

14. ¿Hanja dä za gä udihu̱ ge di pe̱ꞌtsuäbihu̱ rä komfiansa nuꞌu̱ yä konseho ꞌne näꞌä rä gia rꞌakägihu̱ rä Zi Dada Jeoba?

¹⁴ ꞌNehe ma gä udihu̱ ge di jamädibihu̱ rä Zi Dada Jeoba po näꞌä rä njutꞌi bi uni po gekhu̱ mu̱ di aseptahu̱ ꞌne di pe̱ꞌtsuäbihu̱ rä komfiansa nuꞌu̱ yä konseho ꞌne näꞌä rä gia rꞌakägihu̱. Por ejemplo, ora di honihu̱ nꞌa rä ꞌme̱fi ꞌne di handihu̱ te mä ꞌme̱fi ma gä aseptahu̱, o nuꞌmu̱ di handihu̱ mu̱ ma gä sigihu̱ gä estudiahu̱ o hinä ha yä ngunsadi, di o̱tꞌehu̱ ngue̱nda te ne rä Zi Dada Jeoba gä pe̱fihu̱ (1 Cor. 10:31; 2 Cor. 5:7). ¿Gi pädi te thogi ora di pe̱fihu̱ nuꞌu̱ yä konseho rꞌakägihu̱ rä Zi Dada Jeoba? ¡Mä komfiansahu̱ po Geꞌä ꞌne näꞌä rä ntsitsꞌihu̱ di pe̱ꞌtsihu̱ kongeꞌä mänꞌa di ze̱di! ꞌNehe, faxkägihu̱ pa hinte mä duda gä pe̱ꞌtsihu̱ ge näꞌä rä te pa nzäntho xä prometegihu̱, hää xa mäjuäni ma dä kumpli (Rom. 5:​3-5; Sant. 2:​21, 22).

15. Änte, durante ꞌne mꞌe̱fa de rä Fenäte de rä du rä Hesu, ¿hanja dä za gä udihu̱ ge di jamädibihu̱ rä Zi Dada Jeoba po näꞌä rä njutꞌi bi uni po gekhu̱?

¹⁵ Pa gä udihu̱ ge di jamädibihu̱ rä Zi Dada Jeoba po näꞌä rä njutꞌi bi uni po gekhu̱, ꞌnehe xa dä hogi gä probechahu̱ ndunthi nuꞌu̱ yä pa änte, durante ꞌne mꞌe̱fa de rä Fenäte de rä du rä Hesu. ¿Te dä hogi gä pe̱fihu̱? Mähyoni gä ñhokihu̱ pa hingä ꞌme̱dihu̱ näꞌä paꞌä ꞌne gä mbitabihu̱ märꞌaa dä ntini ꞌnehe ha nunä Fenäte (1 Tim. 2:4). Esplikabi nuꞌu̱ yä zi jäꞌi ma gi mbitabi por hanja di tꞌo̱tꞌe näꞌä Fenäteꞌä. Dä za gi ku̱tꞌi ha jw.org pa gi ꞌñuti rä bideo ¿Por hanja bi du rä Hesu? ꞌne rä bideo Rä Fenäte de rä du rä Hesu. Mähyoni ge yä anciano hindä pumfri dä mbitabi nuꞌu̱ xä hye̱gi de dä ntini ha yä mhuntsꞌi ꞌne dä me̱päbi rä Zi Dada Jeoba. ¿Dä za gi imäjinä hängu rä johya ma dä nja ha mähetsꞌi ꞌne ha rä Xiꞌmhai, mu̱ nꞌa de geꞌu̱ dä mengi mänꞌaki ha rä taxo rä Zi Dada Jeoba pa dä me̱päbi mänꞌaki? (Luc. 15:​4-7). Xti tꞌo̱tꞌe näꞌä rä Fenäte de rä du rä Hesu, dä hogi gä o̱thu̱ ntsꞌe̱di po gä ze̱njuahu̱ gatꞌho yä ku. Pe mänꞌa ma gä o̱tꞌehu̱ ntsꞌe̱di po gä ze̱njuahu̱ nuꞌu̱ ja xä ntini po ri mu̱di o nuꞌu̱ ya o̱tꞌe ndunthi rä tiempo hinxä ntini ha yä mhuntsꞌi. ¡Ma gä o̱thu̱ ntsꞌe̱di pa gatꞌho nuꞌu̱ dä ntso̱nte dä zamäñho ꞌne dä senti näꞌä rä mhäte de gatꞌho rä mhuntsꞌi! (Rom. 12:13).

16. ¿Por hanja dä hogi gi hyandi hanja dä za gi pe̱päbi mä nꞌa tu̱i rä Zi Dada Jeoba durante nuꞌu̱ yä zänä de rä Fenäte de rä du rä Hesu?

¹⁶ ¿Dä za gä probechahu̱ nuꞌu̱ yä zänä de rä Fenäte de rä du rä Hesu pa mänꞌa gä umbäbihu̱ de mä tiempohu̱ rä Zi Dada Jeoba? Gehnä mä nꞌa rä modo hanja dä za gä utihu̱ rä Zi Dada Jeoba ꞌne rä Hesu ge di jamädibihu̱ po näꞌä xä me̱fi po gekhu̱. Entremäs gä umbäbihu̱ ntꞌo̱de de rä Noya Äjuä yä zi jäꞌi, mänꞌa ma gä handihu̱ hängu rä mfatsꞌi rꞌakägihu̱ rä Zi Dada Jeoba, ꞌne geꞌä ma dä japi dä ze̱di näꞌä rä komfiansa di pe̱ꞌtsuäbihu̱ (1 Cor. 3:9). Ha rä foyeto Nxadi hyaxtho rä Noya Äjuä ꞌne ha rä Programä pa yä mhuntsꞌi ehe nuꞌu̱ yä testo xä thahni pa nuꞌu̱ yä paꞌu̱. ¡Ogi pumfri gi hñeti nuya yä testo! Asta dä za gi ꞌueke rä tiempo pa gi imbestiga mä nꞌa tu̱i nꞌa de nuꞌu̱ yä testo gä ho o nꞌa de nuꞌu̱ yä testo gi handi ge xä ñhei.

17. ¿Te mähyoni gi beni mu̱ hingi tsa gi pe̱päbi mä nꞌa tu̱i rä Zi Dada Jeoba mäske xa gi nehmä? (Hyandi ꞌnehe rä recuadro «¿De te mä forma dä za gi jamädibi rä Zi Dada Jeoba?»).

¹⁷ ¿Pe xiꞌmu̱ hindä za gi umbäbi mä nꞌa tu̱i de ri tiempo rä Zi Dada Jeoba mäske xa gi nehmä? Ogi turimu̱i nixi ogi desanimä. Beni ge rä Zi Dada Jeoba hindi kompara näꞌä gi pe̱fi ko näꞌä pe̱fi märꞌa yä ku. Rä Zi Dada Jeoba handi näꞌä ja mbo ha ri koraso, ꞌne xa di johya ora handi hängu gi mädi ꞌne hängu gi jamädibi ngeꞌä bä pe̱hni rä Tꞌu̱ pa bi du po geꞌi (1 Sam. 16:7; Mar. 12:​41-44).

18. ¿Por hanja xa di jamädibihu̱ rä Zi Dada Jeoba ꞌne rä Hesu?

¹⁸ ¿Te di logra näꞌä rä njutꞌi bi uni rä Zi Dada Jeoba po gekhu̱? Rä mpumbäte de mä pekadohu̱, nꞌa rä hogä ntsitsꞌi kongeꞌä, ꞌne rä oportunida de gä ꞌmu̱ihu̱ pa nzäntho. Ma gä utihu̱ hyaxtho rä Zi Dada Jeoba hängu di jamädibihu̱ ngeꞌä xä mäkägihu̱ ndunthi ꞌne xä rꞌakägihu̱ gatꞌho nuya yä jäpi (1 Juan 4:19). ꞌNehe, ma gä udihu̱ hängu xa di mädihu̱ rä Hesu ngeꞌä bi mꞌu̱i dispuesto bi uni rä bida po kada nꞌa de gekhu̱ (Juan 15:13).