Jeoba «o̱the nuꞌu̱ toꞌo xä ñꞌu̱ yä koraso»

1. ¿Te senti rä Zi Dada Jeoba po yä amigo?

¿POR HANJA rä Zi Dada Jeoba nzäntho handi te pe̱fi yä amigo nuua ha rä Xiꞌmhai? Pa dä hyandi ora di johyahu̱ ꞌne ora di tumämu̱ihu̱ (Sal. 37:18). Hängu rä johya di umbäbi ora handi ge di pe̱päbihu̱ ko ngatꞌho mä ganähu̱ mäske di thogihu̱ yä sufrimiento o di ntsauihu̱ yä dumu̱i. Pe hingä ho̱nse̱ꞌä, Jeoba ꞌmu̱i dispuesto dä maxkägihu̱, dä hotkägihu̱ ꞌne dä hñubgä mä mu̱ihu̱.

2. ¿Te pe̱fi rä Zi Dada Jeoba po nuꞌu̱ yä amigo di sufri yä mfeni ꞌne yä koraso?

² Ha rä Salmo 147:3 enä ge rä Zi Dada Jeoba «bendabi habu̱ xä xe̱gi» yä koraso nuꞌu̱ yä amigo. Hää, ora handi ge nuꞌu̱ yä amigo di sufri, Näꞌä ko rä mhäte ya xä ñhoki pa dä hñuꞌmpäbi yä mu̱i ꞌne dä nupäbi yä mfeni. ¿Pe te dä za gä pe̱fihu̱ pa njabu̱ gä benefisiahu̱ de näꞌä rä mfatsꞌi uni rä Zi Dada Jeoba? Ma gä hutsꞌihu̱ nꞌa rä kꞌoi. Mu̱ nꞌa rä jäꞌi dä hye̱ni rä yꞌe̱, zäi ge pe̱ꞌtsi te dä ma rä mediko. Pe zäi ge rä mediko ma dä xipäbi te debe dä me̱fi pa njabu̱ dä ñäni habu̱ xä hye̱ni. Ha nunä ntꞌudi di nxadihu̱, ma gä handihu̱ hanja rä Zi Dada Jeoba ko ndunthi rä mhäte xipäbi nuꞌu̱ yä amigo di sufri te debe dä me̱fi, pa njabu̱ dä me̱ꞌtsi rä alibio ha yä mfeni ꞌne ha yä koraso.

PA RÄ ZI DADA JEOBA XA DI MUUIHU̱ NDUNTHI

3. ¿Por hanja rꞌaa di senti ge hinte di bale?

³ Mäpaya di handihu̱ hanja yä jäꞌi ya kasi hingi udi rä mhäte. Ndunthi yä jäꞌi xrä japäbi xä senti ge hinte di bale. Nꞌa rä zi nju rä thuhu Helena enä: «Dä te ha nꞌa rä familia habu̱ himi ja rä mhäte. Mä dada xa mrä tsꞌomꞌu̱i ꞌne hyaxtho mi xikägihe ge hinte ndi balehe». Xi nuꞌi, ¿xkä thogi njabu̱ ꞌnehe? Ja ngu rä zi nju Helen nuꞌi zäi ge ꞌnehe bri maltrataꞌi, bri siꞌi nuꞌu̱ yä noya bi u̱ñꞌäꞌi ri mfeni o himbi tꞌaꞌi rä mhäte. Mu̱ gä thogi njabu̱, zäi ge di jaꞌi xä ñhei gi kamfri ge ꞌmu̱i toꞌo turämu̱i po geꞌi.

4. ¿Te xikägihu̱ rä Zi Dada Jeoba ha Salmo 34:18?

⁴ Mäske xä maltrataꞌi yä jäꞌi, rä Zi Dada Jeoba ne gi pädi hängu di mäꞌäꞌi ꞌne di baloraꞌi. Rä Mäkä Tꞌofo enä: «Jeoba ꞌmu̱i getbu̱ de nuꞌu̱ xa tuyämu̱i» (hñeti Salmo 34:18). Mu̱ nuꞌi ꞌnehe xa gi «ꞌmu̱i desanimädo», beni ge rä Zi Dada Jeoba xa di numäñhoꞌi hänge xä mbitaꞌi pa gi ñꞌamigoui (Juan 6:44). Hää, rä Zi Dada Jeoba nzäntho ma dä ꞌmu̱i al tanto pa dä maxꞌäꞌi ngeꞌä xa di mäꞌi.

5. ¿Hanja bi trata rä Hesu nuꞌu̱ yä zi jäꞌi mi tꞌu̱tsa ꞌne te dä za gä pädihu̱ de geꞌä?

⁵ Näꞌä bi me̱fi rä Hesu mi mꞌu̱kua ha rä Xiꞌmhai faxkägihu̱ pa gä ntiendehu̱ xä ñho te di senti rä Zi Dada Jeoba ora handi ge di sufrihu̱. Rä Hesu bi hyandi nuꞌu̱ yä zi jäꞌi mi sufri ꞌne nuꞌu̱ mi tꞌu̱tsa ꞌne xa bi hueki (Mat. 9:​9-12). Nꞌa rä pa, nꞌa rä zi ꞌme̱hñä näꞌä mi pe̱ꞌtsi nꞌa rä tsꞌo hñeni bi dambäbi rä hee rä Hesu pa dä ꞌme̱di näꞌä rä hñeni mi pe̱ꞌtsi. ¿Te bi me̱fi rä Hesu? Näꞌä bi felisita ngeꞌä xa mi pe̱ꞌtsi nꞌa rä däta jamfri ꞌne bi hñuꞌmpäbi rä mu̱i (Mar. 5:​25-34). Rä Hesu bi ꞌñutkägihu̱ xä ñho tengu rä mꞌu̱i rä Dada (Juan 14:9). Hänge ogi duda ge rä Zi Dada Jeoba xa di mäꞌi, di baloraꞌi ꞌne di numäñhoꞌi. Näꞌä handi ꞌne di balora näꞌä rä komfiansa ꞌne rä mhäte gi pe̱ꞌtsuäbi.

6. ¿Te dä za gä pe̱fihu̱ mu̱ di sentihu̱ ge hinte di balehu̱?

⁶ ¿Te dä za gi pe̱fi mu̱ njatꞌä gi senti ge hinte gi bale? Hñeti ꞌne ntso̱ꞌmi nuꞌu̱ yä testo de rä Mäkä Tꞌofo habu̱ xiꞌi rä Zi Dada Jeoba hängu di baloraꞌi ꞌne di mäꞌi (Sal. 94:19).b Mu̱ hingä logra gä pe̱päbi rä Zi Dada Jeoba ja ngu ngi to̱ꞌmi, ogi kompara näꞌä gi pe̱fi ko näꞌä pe̱fi märꞌaa nixi oxa gi e̱ntꞌä ha ri mfeni näꞌä hingi tsa gi pe̱fi. Rä Zi Dada Jeoba hingi adi gi pe̱fi näꞌä hingi tsa (Sal. 103:​13, 14). Mu̱ toꞌo bi maltrataꞌi o te bi yꞌo̱tꞌäꞌi, rä Zi Dada Jeoba ne gi beni ge nuꞌi hingo gi tu rä tsꞌoki ꞌne ge go ma dä yꞌapäbi ngue̱nda nuꞌu̱ yä tsꞌomꞌu̱i jäꞌi, hingo nuꞌi (1 Ped. 3:12). Nꞌa rä zi nju rä thuhu Sandra bri maltrata nuꞌmu̱ mrä zi tꞌu̱kä nxutsi ꞌne nuni enä: «Njatꞌä di apäbi rä Zi Dada Jeoba dä maxkägi pa gä handi nuꞌu̱ yä hogä mꞌu̱i di pe̱ꞌtsi ja ngu xä hyandiꞌä».

7. ¿Hanja dä za dä maxkägihu̱ pa mänꞌa gä pe̱päbihu̱ xä ñho rä Zi Dada Jeoba nuꞌu̱ yä dumu̱i ꞌne yä sufrimiento xtä thogihu̱?

⁷ Ogi duda nunka ge nuꞌi gi muui ndunthi pa rä Zi Dada Jeoba ꞌne näꞌä ne dä usaꞌi pa gi fatsꞌi märꞌaa. Näꞌä xä rꞌaꞌi rä däta nsu de gi mpe̱fi mähye̱gi kongeꞌä pa gi ungä ntꞌo̱de rä Noya (1 Cor. 3:​9, TNM). Po näꞌä xkä thogi, zäi ge geꞌä faxꞌäꞌi pa dä za gi ntiendebi te di senti nuꞌu̱ thogi nuꞌu̱ yä xuñhaꞌu̱ ꞌne geꞌä jaꞌi gi ne gi fatsꞌi ꞌne gi nupäbi yä mfeni. Helen, näꞌä rä zi nju dä no̱nihu̱ ha rä parrafo 3 bi hñäni rä mfatsꞌi ꞌne nubye̱ tsa dä matsꞌi märꞌaa. Nunä zi nju enä: «Mä mꞌe̱tꞌo ndi senti ge hinte ndi bale. Pe rä Zi Dada Jeoba xä ꞌñutkägi ge xa di bale ndunthi, ge di mäkägi ꞌne di usagi pa gä fatsꞌi märꞌaa». Rä zi nju Helen pe̱päbi rä Zi Dada Jeoba de gä precursora regular ꞌne xä dini ndunthi rä johya.

JEOBA NE GÄ KAMFRIHU̱ GE NÄꞌÄ YA XÄ PUNꞌGÄGIHU̱

8. Ja ngu di handihu̱ ha Isaías 1:​18, ¿te ne rä Zi Dada Jeoba gä benihu̱?

⁸ Rꞌaa tobe xa tuyämu̱i ꞌne u̱mbäbi yä mfeni nuꞌu̱ yä pekado bi yꞌo̱tꞌe änte o mꞌe̱fa de xä nxixtehe. Pe rä Zi Dada Jeoba ne gä benihu̱ ge näꞌä bi uni rä Tꞌu̱ po näꞌä rä mhäte pe̱skägihu̱. Hänge ora di o̱tꞌehu̱ nꞌa rä pekado rä Zi Dada Jeoba engägihu̱: «Guä ehu̱ ꞌne ma gä resolbehu̱ nuꞌu̱ yä xuñha ja entre nuju̱».c Ora ya dä resolbehu̱ nuꞌu̱ yä asunto ndi pe̱ꞌtsihu̱ kongeꞌä, rä Zi Dada Jeoba ne gä benihu̱ ge ora engägihu̱ ge ya bi punꞌgägihu̱, signifika ge xa mäjuäni ya bi punꞌgägihu̱ ꞌne näꞌä hingi ne gä pe̱ꞌtsihu̱ rä duda de geꞌä (hñeti Isaías 1:18). ¡Hängu di umbäbihu̱ njamädi rä Zi Dada Jeoba ngeꞌä näꞌä ꞌmu̱i dispuesto dä pumfri mä pekadohu̱ pe nunka di pumfri nuꞌu̱ yä hogä tꞌo̱tꞌe di pe̱fihu̱ po geꞌä! (Sal. 103:​9, 12; Heb. 6:10).

9. ¿Por hanja mänꞌa dä hogi gi yꞌe̱ntꞌä ha ri mfeni näꞌä dä za gi pe̱fi dende nubye̱ pa ndelante ꞌne hingä nuꞌu̱ yä tꞌo̱tꞌe ya bi thogi?

⁹ ¿Te dä za gi pe̱fi mu̱ tobe u̱ñꞌäꞌi ri mfeni nuꞌu̱ ri error gä o̱tꞌe mä mꞌe̱tꞌo? Xa dä yꞌo̱tꞌe ntsꞌe̱di po gi yꞌe̱ntꞌä ha ri mfeni te dä za gi pe̱fi dende nubye̱ pa ndelante. Beni rä ejemplo rä apostol Pablo. Näꞌä xa bi arrepenti ngeꞌä änte de dä bädi näꞌä xa mäjuäni de rä Zi Dada Jeoba, näꞌä xki maltrata nuꞌu̱ yä mu̱di kristianu. Pe näꞌä mi pädi xä ñho ge rä Zi Dada Jeoba ya xki pumbäbi (1 Tim. 1:​12-15). Koꞌmu̱ rä apostol Pablo mi pädi xä ñho ge ya himi tsa dä paati näꞌä xki thogi, bi yꞌo̱tꞌe ntsꞌe̱di po bi gu̱ki de rä mfeni tanto nuꞌu̱ yä error ꞌne yä pekado xki yꞌo̱tꞌe ngu gatꞌho näꞌä xki logra mä mꞌe̱tꞌo (Filip. 3:​4-8, 13-15). Nubye̱ mi usa rä mfeni ꞌne rä tiempo pa ko ndunthi rä johya mi ungä ntꞌo̱de de rä Noya Äjuä ꞌne mi e̱ntꞌä ha rä mfeni näꞌä ma xä me̱fi näꞌä oraꞌä pa ndelante. Ja ngu rä apostol Pablo, xa mähyoni gi beni ge ya hindä za te gi pe̱fi po näꞌä ya xä thogi; pe hää dä za gi pe̱fi ndunthi pa gi ꞌñeꞌspäbi rä nsu rä Zi Dada Jeoba dende nubye̱ pa ndelante ꞌne mänꞌa dä hogi gi yꞌe̱ntꞌä ha ri mfeni näꞌä xä prometeꞌi.

10. ¿Te dä za gä pe̱fihu̱ mu̱ näꞌä rä error dä kometehu̱ bi u̱ni märꞌa yä jäꞌi?

¹⁰ ¿Te dä za gi pe̱fi mu̱ gi handi ge näꞌä error gä komete bi u̱ni märꞌa yä jäꞌi? Mu̱ tobe ja te dä za gi pe̱fi pa gi korreji näꞌä errorꞌä pe̱fi ꞌne yꞌadi rä mpumbäte (2 Cor. 7:11). Xatuäbi rä Zi Dada Jeoba ꞌne yꞌapäbi ge dä matsꞌi nuꞌu̱ toꞌo gä u̱ni. Rä Zi Dada Jeoba dä za dä maxꞌäꞌi tanto nuꞌi ngu nuꞌu̱ gä u̱ni, pa njabu̱ dä za gi sigihu̱ ndelante ꞌne gi pe̱ꞌtsihu̱ rä tsaya ha ri mfenihu̱.

11. ¿Te dä za gä pädihu̱ de näꞌä bi me̱fi Jonás? (Hyandi ꞌnehe rä kꞌoi).

¹¹ Hyandi te dä za gi pädi de nuꞌu̱ yä error gä o̱tꞌe ꞌne hyopäbi rä Zi Dada Jeoba dä usaꞌi ja ngu neꞌä. Ma gä benihu̱ näꞌä bi me̱fi rä profeta Jonás. En lugar de xä ma ha rä hnini Nínive ja ngu xki mändabi rä Zi Dada Jeoba, näꞌä go bi ma ha mä nꞌa rä luga ꞌne rä Zi Dada Jeoba bi zu̱i po geꞌä (Jon. 1:​1-4, 15-17; 2:​7-10). Ora bi hyandi Jeoba ge Jonás bi ma ha mä nꞌa rä luga himbi rechaza, sino bi umbäbi mä nꞌa rä oportunida. Rä profeta Jonás bi korreji näꞌä rä error ꞌne nubye̱ hää himbi duda dä ma ha rä hnini Nínive. Mäske bi u̱mbäbi rä mfeni näꞌä xki yꞌo̱tꞌe, pe hingä ho̱nse̱ꞌä bi yꞌe̱ntꞌi ha rä mfeni ꞌne mäntꞌä bi asepta näꞌä rä ꞌme̱fi bi umbäbi rä Zi Dada Jeoba (Jon. 3:​1-3).

JEOBA RꞌAKÄGIHU̱ RÄ ESPIRITU SANTO PA HOTKÄGIHU̱ ꞌNE HUBGÄ MÄ MU̱IHU̱

12. ¿Hanja faxkägihu̱ rä Zi Dada Jeoba ora di ñhanduihu̱ nꞌa rä tsꞌo thogi o nꞌa rä däta dumu̱i? (Filipenses 4:​6, 7).

¹² Ora di ñhanduihu̱ nꞌa rä tsꞌo thogi o nꞌa rä däta dumu̱i rä Zi Dada Jeoba usa rä espiritu santo pa hotkägihu̱ ꞌne hubgä mä mu̱ihu̱. Geꞌä bi thogi rä zi ku Ron ꞌne rä zi ꞌme̱hñä rä thuhu Carol ora nꞌa rä tꞌu̱ bi ñhose̱. Nuyu̱ yä zi ku enä: «Nunä xi nꞌa rä däta dumu̱i näꞌä dä thogihe ke gatꞌho näꞌä xti thogihe änte. Bi thogi ndunthi yä xui himi tsa gä ähähe. Pe dä handihe ge ora xa ndi xatuäbihe rä Zi Dada Jeoba mi rꞌakägihe nꞌa rä däta tsaya ha mä mfenihe ꞌne ha mä korasohe ja ngu mängä rä Mäkä Tꞌofo» (hñeti Filipenses 4:​6, 7, TNM). Mu̱ nuꞌi ꞌnehe gi thogi nꞌa rä däta dumu̱i ꞌne gi senti ndunthi rä u̱gi ꞌne rä dumu̱i ha ri mfeni ꞌne ha ri koraso, xatuäbi rä Zi Dada Jeoba ꞌne xipäbi gatꞌho näꞌä gi senti. Hindi mporta hängu mꞌiki ma gi xipäbi rä Zi Dada Jeoba nunka ma dä zabi de dä yꞌo̱xꞌäꞌi (Sal. 86:3; 88:1). Hänge hindi debe dä zabiꞌi pa gi yꞌapäbi rä espiritu santo. Gi nuhmä ge ma gi hyandi hanja ma dä dädi ri sadi (Luc. 11:​9-13).

13. ¿Hanja dä za dä maxkägihu̱ rä espiritu santo rä Zi Dada Jeoba pa gä sigi gä pe̱päbihu̱ dä thogiꞌä dä thogi? (Efesios 3:16).

¹³ ¿Gi senti ge ya otho ri tsꞌe̱di po näꞌä rä däta xuñha o dumu̱i xkä ñhandui? Rä Zi Dada Jeoba dä za dä rꞌaꞌi rä tsꞌe̱di pa gi sigi gi pe̱päbi (hñeti Efesios 3:​16, TNM). Ma gä handihu̱ te bi thogi nꞌa rä zi nju rä thuhu Flora. Nunä zi nju ko rä däme mi pe̱päbi rä Zi Dada Jeoba de gä misionero pe näꞌä ñꞌo̱ho̱ bi hyatꞌi ko mä nꞌa rä ꞌme̱hñä ꞌne bi diborsia. Rä zi nju Flora enä: «Mä pa rä xui ndi senti rä u̱gi ha mä mfeni ꞌne ha mä koraso po näꞌä bi me̱fi mä däme. Hänge dä apäbi rä Zi Dada Jeoba ge dä rꞌakägi rä espiritu santo pa gä sigi ndelante. Dä handi hanja rä Zi Dada Jeoba bi maxkägi ꞌne bi rꞌakägi näꞌä rä tsꞌe̱di ndi honi pa dä täpäbi näꞌä dumu̱i ꞌne bi za dä sigi ndelante». Rä zi nju Flora handi ge nubye̱ mänꞌa pe̱ꞌtsuäbi rä komfiansa rä Zi Dada Jeoba ꞌne hinte mä duda pe̱ꞌtsi ge dä thogiꞌä dä thogi, näꞌä ya xä ñhoki pa dä matsꞌi. Nunä zi nju sigi enä: «Rä Zi Dada Jeoba bi me̱fi kongeki näꞌä mää rä Salmo 119:32 ora enä: “Xa ma gä o̱tꞌe ntsꞌe̱di pa gä yꞌo ha näꞌä rä ꞌñuu habu̱ ja nuꞌu̱ ri mhända, ngeꞌä nuꞌi gi japäbi mä koraso dä me̱tsꞌäꞌi rä komfiansa”».

14. ¿Te dä za gä pe̱fihu̱ pa gä hänihu̱ rä espiritu santo rä Zi Dada Jeoba?

¹⁴ Mu̱ ya gä apäbi rä Zi Dada Jeoba ge dä rꞌaꞌi rä espiritu santo, ¿te dä hogi gi pe̱fibye̱? Xa dä yꞌo̱tꞌe ntsꞌe̱di pa gi ja nuꞌu̱ yä ꞌme̱fi habu̱ gi handi ge ma gi hñäni rä espiritu santo rä Zi Dada Jeoba. ¿Ngu te mä ꞌme̱fiꞌu̱? Yä mhuntsꞌi ꞌne rä tꞌungä ntꞌo̱de. ꞌNehe, hñeti rä Mäkä Tꞌofo hyaxtho pa njabu̱ gi ñuꞌtsi ha ri mfeni nuꞌu̱ yä mfeni rä Zi Dada Jeoba (Filip. 4:​8, 9). Mentä gi heti rä Mäkä Tꞌofo, hyandi te bi thogi rꞌa yä jäꞌi mäyaꞌmu̱ ꞌne hanja rä Zi Dada Jeoba bi matsꞌi pa bi ze̱ti nuꞌu̱ yä xuñhaꞌu̱. Näꞌä rä zi nju dä no̱nihu̱ ha rä parrafo 6 rä thuhu Sandra, bi thogi xa ndunthi yä xuñha. Nunä zi nju enä: «Ora di heti ha rä Mäkä Tꞌofo näꞌä bi thogi José, tso̱ni mbo ha mä koraso. Nuꞌu̱ yä xuñha ꞌne yä injustisia bi ñhandui, himbi hyopäbi bi tsꞌombäbi näꞌä rä hogä ntsitsꞌi mi pe̱ꞌtsi ko rä Zi Dada Jeoba» (Gén. 39:​21-23).

RÄ ZI DADA JEOBA USA MÄ KUHU̱ PA DÄ HÑUBGÄ MÄ MU̱IHU̱

15. ¿De te mä forma usa rä Zi Dada Jeoba mä kuhu̱ pa dä hñubgä mä mu̱ihu̱? (Hyandi ꞌnehe rä kꞌoi).

¹⁵ Ora di sufrihu̱, mä kuhu̱ dä za dä hubgä mä mu̱ihu̱ (Col. 4:11). Rä Zi Dada Jeoba udi hängu di mäkägihu̱ ora usa mä kuhu̱ ꞌne mä zi njuhu̱ pa dä maxkägihu̱. Nuyu̱ mä zi kuhu̱ o̱xkägihu̱, trata dä senti näꞌä di sentihu̱ ꞌne honi rä modo hanja dä hñubgä mä mu̱ihu̱. ꞌNehe, rꞌabu̱ udi ge faxkägihu̱ ko ho̱nse̱ dä ꞌmu̱i kongekhu̱. Rꞌabu̱, honi nꞌa rä testo de rä Mäkä Tꞌofo pa dä nupkägihu̱ mä mfenihu̱ o jaa nꞌa rä sadi mähye̱gi kongekhu̱ (Rom. 15:4).d Märꞌa yä mꞌiki rä Zi Dada Jeoba di usa mä kuhu̱ pa dä benꞌgägihu̱ te di mbeni ko näꞌä di thogihu̱ ꞌne geꞌä faxkägihu̱ pa hingä tagihu̱. ꞌNehe, yä zi ku dä za dä maxkägihu̱ ora häskägihu̱ nꞌa rä zi ñhuni o faxkägihu̱ ko nꞌa rä mändado.

16. ¿Te mähyoni gä pe̱fihu̱ pa dä za gä hänihu̱ rä mfatsꞌi de mä zi kuhu̱?

¹⁶ Ndunthi yä mꞌiki yä zi ku hingi pädi näꞌä gi thogi (Prov. 14:10). Hänge dä hogi gi yꞌapäbi rä mfatsꞌi ora di jaꞌäꞌi mꞌe̱di. Beni ge yä zi ku di mäꞌi ꞌne ꞌmu̱i dispuesto dä maxꞌäꞌi (Prov. 17:17). Mu̱ jabu̱ te u̱ñꞌäꞌi ha ri mfeni ꞌne ha ri koraso, hyoni nuꞌu̱ yä zi ku xä ñätsꞌi yä jamfri ꞌne xipäbi näꞌä gi senti. Dä hogi gi xipäbi hanja gi ne dä maxꞌäꞌi. ꞌNehe dä za gi ñäui nꞌaa o yoho yä anciano. Rꞌa yä zi nju di ho dä xipäbi te tupäbi yä mu̱i mä nꞌa rä zi nju näꞌä pe̱ꞌtsi rä esperiensia.

17. ¿Te dä za dä hñägägihu̱ de gä hänihu̱ näꞌä rä mfatsꞌi rꞌakägihu̱ märꞌaa ꞌne te dä hogi gä pe̱fihu̱?

¹⁷ Ogi ꞌuege de yä ku. Mu̱ gi thogi nꞌa rä xuñha o däta dumu̱i, zäi gi nehmä hinto gi hyandi. Rꞌabu̱ yä ku dä za dä mää nꞌa rä noya nuꞌu̱ en lugar dä maxꞌi, mänꞌa dä u̱ñꞌäꞌi (Sant. 3:2). Pe mäske njabu̱, ogi rechaza ora nupꞌäꞌi ri mfeni ꞌne asepta näꞌä rä mfatsꞌi di ofreseꞌi. Nꞌa rä anciano rä thuhu Gavin, pe̱ꞌtsi nꞌa rä ñheni habu̱ ho̱nse̱ rä ntso̱ꞌmi senti ntsꞌe̱di. Nuni zi ku enä: «Ndunthi yä mꞌiki hindi ne toꞌo gä handi nisikiera nuꞌu̱ mä amigo». Pe mäske näꞌä zi ku di senti njabu̱, o̱tꞌe ntsꞌe̱di po dä hyoni märꞌa yä ku ꞌne dä thogi rä tiempo kongeꞌu̱. Xä da ngue̱nda ge geꞌä xä japi dä za mä ñho. Nꞌa rä zi nju rä thuhu Amy enä: «Po näꞌä xtä thogi, jakägi xä ñhei gä pe̱ꞌtsuäbi rä komfiansa märꞌaa. Pe rä Zi Dada Jeoba utkägi hanja gä mädi mä ku ꞌne gä pe̱ꞌtsuäbi rä komfiansa. Di pädi ge ora di pe̱fi njabu̱, di johyabi rä koraso rä Zi Dada Jeoba ꞌne di johya mä koraso ꞌnehe».

NÄꞌÄ XÄ PROMETE DÄ ME̱FI RÄ ZI DADA JEOBA PA XUDI NDÄMÄNI GEꞌÄ HUBGÄGIHU̱ MÄ MU̱IHU̱

18. ¿Te mä humu̱i di to̱ꞌmihu̱ pa xudi ndämäni ꞌne te dä za gä pe̱fihu̱ dende nubye̱?

¹⁸ Hängu rä johya di rꞌakägihu̱ gä pädihu̱ ge rä Zi Dada Jeoba di prometegihu̱ ge mänꞌitꞌho ma dä hñäki gatꞌho yä ñheni nuꞌu̱ u̱ni mä ndoyꞌohu̱ ꞌne mä mfenihu̱ ꞌne ge ma dä hñäki gatꞌho nuꞌu̱ yä tꞌo̱tꞌe jakägihu̱ gä sufrihu̱ (Apoc. 21:​3, 4). Hää, ha rä rꞌayꞌo Xiꞌmhai ya ninꞌa de nuꞌu̱ yä tsꞌo tꞌo̱tꞌe ja mäpaya hingä ma dä ehe ha mä mfenihu̱ nixi ma dä bo̱xä ha mä korasohu̱ (Is. 65:17). Ja ngu ya dä pädihu̱, ora di sentihu̱ ge xä xe̱gi mä korasohu̱ po nuꞌu̱ yä dumu̱i ꞌne yä xuñha di thogihu̱ rä Zi Dada Jeoba hotkägihu̱, o̱the ꞌne benda mä korasohu̱. ꞌNehe ya dä handihu̱ te mä mfatsꞌi usa rä Zi Dada Jeoba pa dä hubgä mä mu̱ihu̱ ꞌne dä nupkägihu̱ mä mfenihu̱. Hänge mähyoni xa gä probechahu̱ nuya yä mfatsꞌi uni. ¡Ogi duda nunka ge rä Zi Dada Jeoba xa di mäꞌi ꞌne nuꞌi xa gi muui ndunthi pa geꞌä! (1 Ped. 5:7).