Te mähyoni gä pe̱fihu̱ mu̱ di pe̱ꞌtsihu̱ yä duda

1, 2. a) ¿Te mä duda dä za gä pe̱ꞌtsihu̱? b) ¿Te ma gä handihu̱ ha nunä ntꞌudi di nxadihu̱?

GATꞌHO nuju̱ rꞌabu̱ xtä pe̱ꞌtsihu̱ yä duda.a Por ejemplo, imäjinä ge nꞌa rä bäsjäꞌi senti ge rä Zi Dada Jeoba hingi mädi ndunthi hänge tobe hinxä desidi dä nxixtehe. O imäjinä ge mä nꞌa rä bäsjäꞌi bi desidi bi zopu̱ nꞌa rä ꞌme̱fi habu̱ mi tähä ndunthi rä bojä pa bi hñutsꞌi mꞌe̱tꞌo rä Zi Dada Jeoba ha rä bida; pe mi thogi rä tiempo, nubye̱ pe̱ꞌtsi nꞌa rä familia ꞌne senti ge hingi huadi näꞌä rä bojä tähä pa dä mäntene, hänge rꞌabu̱ di ñꞌanise̱ mu̱ bi me̱fi xä ñho ora bi zopu̱ näꞌä rä ꞌme̱fi mi pe̱ꞌtsi o hinä. Ma gä hutsꞌihu̱ mä nꞌa rä ejemplo: nꞌa rä zi nju näꞌä ya rä zi däta jäꞌi ꞌmu̱i desanimäda ngeꞌä ya hingi tsa dä me̱päbi rä Zi Dada Jeoba ja ngu mi ja mä mꞌe̱tꞌo. Xi nuꞌi, ¿gi thogi ꞌnehe yä xuñha ꞌne rꞌabu̱ gi ñꞌani mu̱ rä Zi Dada Jeoba tobe turämu̱i po geꞌi, mu̱ nuꞌu̱ yä sacrificio xkä ja po Geꞌä xä bale rä penä o gi ñꞌani mu̱ tobe di numäñho näꞌä gi pe̱fi po Geꞌä?

² Nuꞌu̱ yä mfeniꞌu̱ dä za dä japäbi rꞌamätsꞌu̱ dä käni ri komfiansa po rä Zi Dada Jeoba ꞌne asta dä za gi hye̱gi de gi pe̱päbi. Ha nunä ntꞌudi di nxadihu̱, ma gä handihu̱ hanja rä Mäkä Tꞌofo dä za dä maxkägihu̱ ora di sentihu̱ ge rä Zi Dada Jeoba hingi turämu̱i po gekhu̱, ora di ñꞌanihu̱ mu̱ näꞌä dä pe̱fihu̱ mä mꞌe̱tꞌo po rä Zi Dada Jeoba bi bale rä penä o hinä o nuꞌmu̱ di sentihu̱ ge ya hindi numäñho näꞌä di pe̱fihu̱ po Geꞌä.

HANJA DÄ ZA GÄ HÄKIHU̱ DE MÄ MFENIHU̱ NUꞌU̱ YÄ DUDA DI PE̱ꞌTSIHU̱

3. ¿Te ma dä maxkägihu̱ pa gä häkihu̱ yä duda de mä mfenihu̱?

³ Ora tso̱kägihu̱ yä duda, rä Mäkä Tꞌofo dä za dä maxkägihu̱ pa gä japäbihu̱ dä ze̱di näꞌä ntsitsꞌi ꞌne rä komfiansa di pe̱ꞌtsuäbihu̱ rä Zi Dada Jeoba. Hää, ko rä mfatsꞌi rä Mäkä Tꞌofo dä za gä japhu̱ dä ze̱di mä jamfrihu̱ (1 Cor. 16:13).

4. Ja ngu di handihu̱ ha 1 Tesalonicenses 5:​21, ¿te di debe gä pe̱fihu̱ pa gä hanthu̱ mu̱ mäjuäni näꞌä di mbenihu̱ de gekhu̱ o hinä?

⁴ (Hñeti 1 Tesalonicenses 5:​21, TNM). Rä Mäkä Tꞌofo engägihu̱: «Hyanthu̱ mu̱ mäjuäni gatꞌho yä tꞌo̱tꞌe». ¿Te dä za gä pe̱fihu̱ pa gä jamäsuhu̱ nunä konseho? Mähyoni gä handihu̱ mu̱ näꞌä di mbenihu̱ di nthe̱ ko näꞌä udi rä Mäkä Tꞌofo. Por ejemplo, ¿te di debe dä me̱fi nꞌa rä bäsjäꞌi mu̱ senti ge rä Zi Dada Jeoba hingi turämu̱i po geꞌä? ¿Debe dä asepta näꞌä di mbeni? Hinä, mähyoni dä nxadi rä Mäkä Tꞌofo pa dä hyandi te di mbeni rä Zi Dada Jeoba de geꞌä.

5. Ora di pe̱ꞌtsihu̱ nꞌa rä duda o nꞌa rä ntꞌani, ¿te dä za gä pe̱fihu̱ pa gä o̱dehu̱ näꞌä di mbeni rä Zi Dada Jeoba?

⁵ Ora di nxadihu̱ rä Mäkä Tꞌofo, ja rä ue̱nda ge rä Zi Dada Jeoba ñä kongekhu̱. Pe mu̱ di pe̱ꞌtsihu̱ nꞌa rä duda ꞌne di ne gä pädihu̱ näꞌä di mbeni de geꞌä, mähyoni gä honihu̱ nuꞌu̱ yä testo de rä Mäkä Tꞌofo ñä de näꞌä mä duda di pe̱ꞌtsihu̱, de näꞌä jakägihu̱ gä tumämu̱ihu̱ ꞌne mähyoni gä usahu̱ nuꞌu̱ yä erramienta rꞌakägihu̱ rä hnini rä Zi Dada Jeoba pa gä pädihu̱ mä nꞌa tu̱i de näꞌä rä asuntoꞌä (Prov. 2:​3-6). Ora ma gä fu̱dihu̱ gä nxadihu̱ rä Mäkä Tꞌofo xa mähyoni gä apäbihu̱ rä mfatsꞌi rä Zi Dada Jeoba, pa näꞌä ma gä tinihu̱ ha rä Mäkä Tꞌofo dä maxkägihu̱ gä täpäbihu̱ nuꞌu̱ yä duda ꞌne dä maxkägihu̱ gä timbäbihu̱ rä mpengi nuꞌu̱ yä ntꞌani di pe̱ꞌtsihu̱. Ora di nxadihu̱ rä Mäkä Tꞌofo, mähyoni gä ꞌuekehu̱ nuꞌu̱ yä tsꞌofo di handihu̱ ge ma dä maxkägihu̱ ko näꞌä rä duda di pe̱ꞌtsihu̱. ꞌNehe dä hogi gä handihu̱ te bi me̱fi rꞌa de nuꞌu̱ yä amigo rä Zi Dada Jeoba mäyaꞌmu̱ ora bi ñhandui näꞌä rä xuñha di pe̱ꞌtsihu̱.

6. ¿Hanja faxkägihu̱ yä mhuntsꞌi ora di pe̱ꞌtsihu̱ yä duda o yä ntꞌani nuꞌu̱ jakägihu̱ gä tumämu̱ihu̱?

⁶ ꞌNehe ora di ntinihu̱ ha yä mhuntsꞌi ja gehni di o̱dehu̱ te di mbeni rä Zi Dada Jeoba de nuꞌu̱ yä asunto jakägihu̱ gä dudahu̱ o gä tumämu̱ihu̱. Ha nuya yä mhuntsꞌi rꞌabu̱ di o̱dehu̱ nꞌa rä discurso o nꞌa rä komentario näꞌä xa mi jakägihu̱ mꞌe̱di pa gä täpäbihu̱ näꞌä rä duda ndi pe̱ꞌtsihu̱ o pa gä timbäbihu̱ rä mpengi nuꞌu̱ yä ntꞌani mi jakägihu̱ gä tumämu̱ihu̱ (Prov. 27:17). Pe nubye̱ ma gä handihu̱ ngu te mä duda dä za gä pe̱ꞌtsihu̱ ꞌne hanja dä za gä täpäbihu̱.

¿RꞌABU̱ GI DUDA GE JEOBA TURÄMU̱I PO GEꞌI?

7. ¿Rꞌabu̱ te mä duda dä za gä pe̱ꞌtsihu̱?

⁷ Zäi ge xä zo̱ho̱ nꞌa rä pa habu̱ xkä ñꞌani mu̱ rä Zi Dada Jeoba handi näꞌä gi pe̱fi ꞌne turämu̱i po geꞌi. Ora gi pädi ge rä Zi Dada Jeoba go geꞌä rä Hmuu de gatꞌho mähetsꞌi ꞌne rä Xiꞌmhai; tal vez geꞌä japi xä ñhei gi kamfri ge nꞌa rä pa dä za gi ñꞌamigoui. Zäi ge rä rey David njabu̱ bi senti nꞌa rä pa ꞌnehe. Näꞌä himi tsa dä gamfri ora mi handi ge rä Zi Dada Jeoba mi turämu̱i po yä mexiꞌmhai hänge bi ꞌñenä: «Oh Jeoba, ¿te rä me̱ꞌä rä mexiꞌmhai pa go gi yꞌo̱tꞌe ngue̱nda. ꞋNe te rä me̱ꞌu̱ nuꞌu̱ yä bätsi pa go gi jamäsuꞌu̱?» (Sal. 144:3). Mu̱ ꞌnehe rꞌabu̱ di o̱tꞌehu̱ nuya yä ntꞌani, ma gä handihu̱ hanja dä za gä timbäbihu̱ rä mpengi.

8. Ja ngu di handihu̱ ha 1 Samuel 16:​6, 7, 10-12, ¿te o̱tꞌe ngue̱nda rä Zi Dada Jeoba pa dä numäñho nꞌa rä jäꞌi?

⁸ Rä Mäkä Tꞌofo utkägihu̱ ge rä Zi Dada Jeoba handi ko ndunthi rä muui nuꞌu̱ yä zi jäꞌi senti ge hinte di bale. Por ejemplo, rä Zi Dada Jeoba bi me̱hni rä profeta Samuel ha rä nguu nꞌa rä zi jäꞌi mrä thuhu Jesé, pa de gatꞌho nuꞌu̱ yä tꞌu̱ mi pe̱ꞌtsi, xä huahni nꞌa de geꞌu̱ pa xä thutsꞌi de gä rey ha rä dähni Israel. Jesé bi zofo yoto yä tꞌu̱ pa dä ehe dä zu̱di Samuel, pe näꞌä rä tꞌu̱ mi mbätsi mrä thuhu David,b näꞌä hingo bi zofo. ¿Pe gi pädi? ¡Rä Zi Dada Jeoba go bi huahni David pa dä nrey! (Hñeti 1 Samuel 16:​6, 7, 10-12). ¿Por hanja? Ngeꞌä rä Zi Dada Jeoba bi hyandi te mi ja mbo rä koraso David ꞌne bi dini ge nuni mi nꞌa rä bäsjäꞌi näꞌä mi udi hängu rä mhäte mi pe̱ꞌtsuäbi.

9. ¿Por hanja dä za gi ꞌmu̱i seguro ge rä Zi Dada Jeoba di mäꞌi ꞌne turämu̱i po geꞌi? (Hyandi ꞌnehe rä kꞌoi).

⁹ Beni te xä me̱fi rä Zi Dada Jeoba pa xä ꞌñudi ge di mäꞌi ꞌne turämu̱i po geꞌi. Näꞌä xä rꞌaꞌi yä konseho nuꞌu̱ xä jaꞌi mꞌe̱di pa njabu̱ dä maꞌi xä ñho (Sal. 32:8). Pe änte de xä rꞌaꞌi yä konseho pe̱ꞌtsi te mꞌe̱tꞌo xä konoseꞌi xä ñho pa njabu̱ dä hyandi te mä konseho di jaꞌäꞌi mꞌe̱di (Sal. 139:1). Ora gi jamäsu nuꞌu̱ yä konseho, gi handi hanja di benefisiaꞌi ꞌne geꞌä mänꞌa di kombenseꞌi hängu rä Zi Dada Jeoba turämu̱i po geꞌi ꞌne di mäꞌi (1 Crón. 28:9; Hech. 17:​26, 27). Rä Zi Dada Jeoba xa di numäñho ora handi ge gi o̱tꞌe ntsꞌe̱di po gi yꞌo̱te, gi pe̱päbi ꞌne po nuꞌu̱ yä hogä mꞌu̱i gi udi (Jer. 17:10). Rä Zi Dada Jeoba xa ne dä yꞌo̱tꞌäꞌi rä amigo ꞌne to̱ꞌmi ge nuꞌi gi asepta näꞌä rä imbitasio (1 Juan 4:19).

¿RꞌABU̱ GI DUDA GE XÄ BALE RÄ PENÄ NÄꞌÄ XKÄ PE̱FI PO RÄ ZI DADA JEOBA?

10. Ngu thogi yä je̱ya, ¿rꞌabu̱ te di ñꞌani rꞌa yä zi ku?

¹⁰ Ngu thogi yä je̱ya, rꞌa yä ku zäi ge di ñꞌani mu̱ näꞌä bi me̱fi po rä Zi Dada Jeoba xä bale rä penä o hinä. ¿Por hanja? Tal vez pa bi za bi me̱päbi xä ñho rä Zi Dada Jeoba, bi zopu̱ nꞌa rä ꞌme̱fi o nꞌa rä negosio habu̱ mi tähä xä ñho. Pe ngu xä thogi yä je̱ya, tal vez ꞌnehe pädi rꞌa yä jäꞌi nuꞌu̱ bi dedika bi dähä rä bojä ꞌne ꞌñenä xa ꞌmu̱i xä ñho. Hänge zäi ge rꞌabu̱ nuꞌu̱ yä ku di ñꞌani: «¿Di bale rä penä gatꞌho nuꞌu̱ yä sacrificio dä ja po rä Zi Dada Jeoba? O xiꞌmu̱ hixtä pe̱fi njabu̱, ¿grä ꞌmu̱i mänꞌa xä ñhobye̱?».

11. ¿Te bi zo̱ho̱ bi senti näꞌä rä yꞌofo de rä Salmo 73?

¹¹ Mu̱ nꞌa rä pa xkä senti njabu̱ ꞌnehe, dä hogi gi beni näꞌä bi senti ꞌnehe näꞌä rä jäꞌi bi yꞌofo rä Salmo 73. Ora mi handi ge nuꞌu̱ himi pe̱päbi rä Zi Dada Jeoba ꞌñenä xa mäjuäni ge nuꞌu̱ mänꞌa mi ꞌmu̱i xä ñho, himi hñeni, mi ja yä bojä ꞌne ꞌñenä mi ꞌmu̱i ko rä johya (Sal. 73:​3-5, 12). Koꞌmu̱ mi handi ge ꞌñenä mänꞌa mi pabi xä ñho nuꞌu̱ yä jäꞌiꞌu̱, näꞌä bi senti ge himi bale rä penä gatꞌho näꞌä xki me̱fi po dä me̱päbi rä Zi Dada Jeoba. Kasi «gatꞌho rä pa» ho̱nse̱ꞌä mi odä rä mfeni (Sal. 73:​13, 14). ¿Pe te bi matsꞌi pa bi paati näꞌä mi mbeni?

12. Ja ngu di handihu̱ ha rä Salmo 73:​16-18, ¿te bi matsꞌi näꞌä rä yꞌofo de rä Salmo pa bi paati näꞌä mi mbeni?

¹² (Hñeti Salmo 73:​16-18). ¿Te bi me̱fi näꞌä rä yꞌofo de rä Salmo? Bi ma ha rä templo rä Zi Dada Jeoba. Ha mbo rä templo, bi senti nꞌa rä tsaya ha rä mfeni ꞌne geꞌä bi hyopäbi bi mbeni xä ñho. Bi ntiende ge mäske rꞌa yä jäꞌi ꞌñenä tsitsꞌi nꞌa rä mꞌu̱i xä ñho pe hingi pe̱päbi rä Zi Dada Jeoba, hingä ma dä uadi xä ñho. Nuni rä yꞌofo de rä Salmo bi hyandi hanja mu̱ toꞌo dä hñutsꞌi mꞌe̱tꞌo rä Zi Dada Jeoba ha rä bida, geꞌä mänꞌa rä desision xa xä ñho näꞌä bi hä nꞌa rä mꞌu̱i temäꞌentho ꞌne geꞌä umbäbi rä tsꞌe̱di pa dä sigi dä me̱päbi (Sal. 73:​23-28).

13. Ora gi ñꞌani mu̱ xä bale rä penä nuꞌu̱ yä sacrificio xkä ja po rä Zi Dada Jeoba, ¿te ma dä maxꞌäꞌi pa gi pe̱ꞌtsi mänꞌaki rä johya ꞌne rä tsaya ha ri mfeni? (Hyandi ꞌnehe yä kꞌoi).

¹³ Ja ngu näꞌä rä yꞌofo de rä Salmo, nuꞌi ꞌnehe dä za gi pe̱ꞌtsi mänꞌaki rä johya ꞌne rä tsaya ha ri mfeni. ¿Te dä za gi pe̱fi? Hyandi gatꞌho nuꞌu̱ yä jäpi gi pe̱ꞌtsibye̱ ꞌne näꞌä rä hogä ntsitsꞌi gi pe̱ꞌtsi ko rä Zi Dada Jeoba. Nuya yä hogä tꞌo̱tꞌe di bale rä penä hingi pe̱ꞌtsi nuꞌu̱ yä jäꞌi hingi pe̱päbi rä Zi Dada Jeoba. Nuꞌu̱ pe̱ꞌtsi ho̱nse̱ nuꞌu̱ yä tꞌo̱tꞌe di ofrese mäpaya rä xiꞌmhai, pe ho̱nse̱ꞌä. Nuꞌu̱ ho̱nse̱ o yä mfeni te dä za dä me̱ꞌtsi ha nunä xiꞌmhai, pe hingi mbeni te ma dä thogi kongeꞌu̱ pa xudi ndämäni. Pe rä Zi Dada Jeoba di prometegihu̱ ge mu̱ gä sigi gä pe̱päbihu̱, ma dä rꞌakägihu̱ ndunthi yä jäpi (Sal. 145:16). Pe ꞌnehe hñudi gi ntso̱ꞌmi ꞌne beni te mä bida gri pe̱ꞌtsi mu̱ hixkä desidi xkä pe̱päbi rä Zi Dada Jeoba. ꞌNehe, ogi pumfri nunka ge toꞌo po rä mhäte pe̱päbi rä Zi Dada Jeoba ꞌne rä mikꞌei, nunka te ma dä mꞌe̱päbi ꞌne ma dä me̱ꞌtsi nzäntho nuꞌu̱ yä tꞌo̱tꞌe xa mäjuäni di bale rä penä.

¿RꞌABU̱ GI DUDA GE JEOBA HINGI NUMÄÑHO NÄꞌÄ GI PE̱FI PO GEꞌÄ?

14. ¿Te senti rꞌa yä zi ku ꞌne por hanja?

¹⁴ Rꞌa yä zi ku ya yä zi däta jäꞌi, di hñeni ꞌne ya hingi tsa dä me̱päbi rä Zi Dada Jeoba ja ngu dä nehmä. Zäi ge geꞌä di japi dä desanimä nuyu̱ yä zi ku ꞌne rꞌabu̱ di ñꞌanise̱: «¿Tobe di numäñho rä Zi Dada Jeoba näꞌä di pe̱fi?».

15. ¿Te mi pädi xä ñho näꞌä rä jäꞌi bi yꞌofo rä Salmo 71?

¹⁵ Näꞌä jäꞌi bi yꞌofo rä Salmo 71 ꞌnehe rꞌabu̱ bi senti njabu̱, hänge bi ꞌñembäbi rä Zi Dada Jeoba: «Ora gi hyandi dä mꞌe̱kägi rä tsꞌe̱di, ogi bandonägi» (Sal. 71:​9, 18). Pe näꞌä mi ꞌmu̱i kombensido ge mu̱ xä me̱päbi rä Zi Dada Jeoba ja ngu di hoꞌä näꞌä ma xä gu̱hni ꞌne ma xä matsꞌi. ꞌNehe, bi ntiende ge rä Zi Dada Jeoba xa di numäñho nuꞌu̱ yä amigo ora handi ge o̱tꞌe näꞌä tsu̱päbi pa dä sigi dä me̱päbi (Sal. 37:​23-25).

16. ¿Te di mbeni rä Zi Dada Jeoba de nuꞌu̱ yä zi ku ya yä zi däta jäꞌi? (Salmo 92:​12-15).

¹⁶ Mu̱ nuꞌi ya grä zi däta jäꞌi, mbeni ja ngu di mbeni rä Zi Dada Jeoba de geꞌi. Mäske gi senti ge ya yꞌo ri gätꞌi ri tsꞌe̱di, pe rä Zi Dada Jeoba ma dä sigi dä rꞌaꞌi rä mfatsꞌi pa dä sigi dä te näꞌä ri ntsitsꞌi gi pe̱ꞌtsi kongeꞌä (hñeti Salmo 92:​12-15). Hänge en lugar de gi turimu̱i ꞌne gi yꞌe̱ntꞌi ha ri mfeni näꞌä hingi tsa gi pe̱fibye̱, go dä yꞌe̱ntꞌi ha ri mfeni näꞌä hää tobe dä za gi pe̱fi. Ogi pumfri ge dä za gi nupäbi yä mfeni märꞌaa ora handi ge gi pe̱päbi rä Zi Dada Jeoba ko näꞌä tsu̱ꞌäꞌi ꞌne ora gi turimu̱i po geꞌu̱ ꞌne gi honi rä modo hanja gi nupäbi yä mfeni. ꞌNehe, dä za gi nupäbi yä mfeni märꞌaa ora gi pete hanja rä Zi Dada Jeoba xä maxꞌäꞌi durante nuya yä je̱ya xä thogi ꞌne ora gi pete hängu rä komfiansa gi pe̱ꞌtsuäbi ge ma dä kumpli gatꞌho näꞌä xä promete pa xudi ndämäni. Pe hingä ho̱nse̱ꞌä, ¿gi pädi te mä nꞌa dä za gi pe̱fi? Beni ge ora gi xatuäbi rä Zi Dada Jeoba ꞌne gi apäbi ge dä matsꞌi märꞌaa, nuꞌu̱ ri sadi xa ja ndunthi rä tsꞌe̱di ꞌne rä Zi Dada Jeoba o̱de (1 Ped. 3:12). Hänge hindi mporta ua grä zi däta jäꞌi o gi thogi nꞌa rä ñheni, gatꞌho dä za gä pe̱fihu̱ rꞌa yä tꞌo̱tꞌe po rä Zi Dada Jeoba ꞌne po mä zi kuhu̱.

17. ¿Por hanja xa dä hogi gi yꞌo̱tꞌe ntsꞌe̱di po hingi komparase̱ ko märꞌaa?

¹⁷ Mu̱ nuꞌi gi ꞌmu̱i desanimädo ngeꞌä hingi tsa gi pe̱päbi rä Zi Dada Jeoba ja ngu gi hohmä, beni ge näꞌä xa di mäꞌi ꞌne di balora ora gi umbäbi näꞌä tsu̱ꞌi. Pe ꞌnehe, zäi ge rꞌabu̱ mäske hingi ne rꞌabu̱ gi kompara näꞌä gi pe̱fi ko näꞌä pe̱fi märꞌaa. Pe yꞌo̱tꞌe ntsꞌe̱di po hingi pe̱fi njabu̱. ¿Por hanja? Ngeꞌä rä Zi Dada Jeoba nunka di komparaꞌi ko märꞌaa (Gál. 6:4). ¿Por hanja di mäñhu̱ njabu̱? Rä Mäkä Tꞌofo pede ge nꞌa rä pa, María bi goꞌtsuäbi ha yä ua rä Hesu nꞌa rä aseite näꞌä xa xmä mädi (Juan 12:​3-5). Pe ꞌnehe, rä Mäkä Tꞌofo pede ge nꞌa rä pa nꞌa rä zi biuda näꞌä xa mrä zi hyoya bi uni rä zi ꞌmo̱ñhä nuꞌmu̱ bi ma ha rä templo. ¿Hängu näꞌä bi uni? Yoho yä zi tꞌu̱kä bojä nuꞌu̱ kasi hinte mrä muui (Luc. 21:​1-4). Pe pa rä Hesu, tanto näꞌä bi me̱fi María ngu näꞌä rä zi biuda xa mi ja ndunthi rä muui ngeꞌä nuyu̱ bi uni gatꞌho näꞌä mi tsu̱päbi. Kongehnä udi ge rä Zi Dada Jeoba xa di balora ora handi ge ko ndunthi rä mhäte gi umbäbi gatꞌho näꞌä tsu̱ꞌäꞌi mäske gi senti ge hingä ndunthi.

18. ¿Te ma dä maxꞌäꞌi pa gi täpäbi yä duda? (Hyandi ꞌnehe rä recuadro «Rä Noya Äjuä ma dä maxꞌäꞌi pa gi täpäbi yä duda»).

¹⁸ Gatꞌho xtä pe̱ꞌtsihu̱ yä duda. Pe ja ngu ya dä pädihu̱, rä Noya Äjuä faxkägihu̱ gä e̱nihu̱ de ha mä mfenihu̱ nuꞌu̱ yä dudaꞌu̱ ꞌne faxkägihu̱ gä timbäbihu̱ yä mpengi nuꞌu̱ yä ntꞌani di pe̱ꞌtsihu̱. Hänge ora gi pe̱ꞌtsi yä duda o yä ntꞌani, hyombäbi rä mpengi ha rä Mäkä Tꞌofo. Gi nuhmä ge nuꞌu̱ yä duda ma dä mꞌe̱di ꞌne ri koraso ma dä ñutsꞌi de näꞌä rä komfiansa gi pe̱ꞌtsuäbi rä Zi Dada Jeoba. Ogi pumfri ge rä Zi Dada Jeoba di numäñhoꞌi, di balora gatꞌho nuꞌu̱ yä sacrificio gi ja po geꞌä ꞌne di promete dä gutꞌäꞌi. Hää, rä Zi Dada Jeoba xa di mädi ꞌne di su kada nꞌa de nuꞌu̱ yä amigo pe̱päbi.