Pädi de nuꞌu̱ yä konseho bi uni rꞌa yä zi däta jäꞌi änte de xä du

1. ¿Por hanja dä za dä ꞌñutkägihu̱ ndunthi nuꞌu̱ yä zi däta jäꞌi?

HA MÄ bidahu̱, gatꞌho di jakägihu̱ mꞌe̱di yä hogä konseho ꞌne rä gia pa gä ju̱hu̱ nꞌa rä ꞌñuu xä ñho. Hänge yä anciano ꞌne märꞌa yä ku nuꞌu̱ pe̱ꞌtsi ndunthi rä esperiensia dä za dä maxkägihu̱. Rꞌabu̱, mäske nuyu̱ yä ku ya yä zi däta jäꞌi hindi debe gä ja goguhu̱ nuꞌu̱ yä konseho rꞌakägihu̱ nixi gä mbenihu̱ ge nuꞌu̱ yä tsꞌofo uni ya hingi ja rä muui mäpaya. Rä Zi Dada Jeoba ne gä pädihu̱ ndunthi de nuꞌu̱ yä zi däta jäꞌi. ¿Por hanja? Ngeꞌä nuꞌu̱ mänꞌa xä mꞌu̱i ndunthi yä je̱ya ꞌne ko rä tiempo xä me̱ꞌtsi ndunthi rä esperiensia ꞌne mänꞌa ja yä juisio ꞌne yä mfädi (Job 12:12).

2. ¿Te ma gä handihu̱?

² Mäyaꞌmu̱, rä Zi Dada Jeoba bi usa rꞌa yä zi däta jäꞌi ngu Moisés, David ꞌne rä apostol Juan pa bi gu̱hni ꞌne bi nupäbi yä mfeni rä hnini. Nuyu̱ bi mꞌu̱i ha rꞌa nꞌañꞌo rä tiempo, mi pe̱ꞌtsi rꞌa nꞌañꞌo yä ofisio ꞌne rꞌa nꞌañꞌo yä mꞌu̱i. Änte de xä du nuya yä zi däta jäꞌi, bi umbäbi rꞌa yä hogä konseho nuꞌu̱ myä bäsjäꞌi. Tanto Moisés, David ꞌne rä apostol Juan bi bembäbiꞌu̱ ge xa mähyoni dä yꞌo̱tuäbi yä mhända rä Zi Dada Jeoba. Ha rä Mäkä Tꞌofo di tinihu̱ nuꞌu̱ yä konseho bi uni. Hänge hindi mporta ua dyä bäsjäꞌihu̱ o dyä däta jäꞌihu̱, ma dä maxkägihu̱ ndunthi mu̱ gä jamäsuhu̱ nuꞌu̱ yä konseho (Rom. 15:4; 2 Tim. 3:16). Ha nunä ntꞌudi di nxadihu̱, ma gä handihu̱ nuꞌu̱ yä konseho bi uni Moisés, David ꞌne rä apostol Juan änte de xä du ꞌne ma gä handihu̱ te dä za gä pädihu̱ de geꞌu̱.

«MA DÄ ZA GI ꞌMU̱IHU̱ NDUNTHI RÄ TIEMPO»

3. ¿Te mä ꞌme̱fi bi hñäni Moisés de rä Zi Dada Jeoba?

³ Durante gatꞌho rä bida, Moisés bi me̱päbi rä Zi Dada Jeoba ꞌne bi ñꞌo mänjuäntho ha rä ꞌñuu. Bi me̱päbi Jeoba de gä profeta, de gä nzaya, de gä yꞌofo ꞌne bi gu̱tꞌi rä ꞌñuu ha rä hnini rä Zi Dada Jeoba. Po geꞌä, Moisés mi pe̱ꞌtsi ndunthi rä mfädi ꞌne rä esperiensia. Moisés bi gu̱ki yä israelita de rä hnini Egipto ꞌne bi hyandi hanja rä Zi Dada Jeoba bi ja ndunthi yä milagro. ꞌNehe, rä Zi Dada Jeoba bi usa Moisés pa bi yꞌofo nuꞌu̱ ku̱tꞌa yä mu̱di mfistꞌofo de rä Mäkä Tꞌofo. ꞌNehe bi usa pa bi yꞌofo rä Salmo 90 ꞌne tal vez ꞌnehe rä Salmo 91. Po̱de Moisés go geꞌä bi yꞌofo rä mfistꞌofo Job.

4. Änte de xä du Moisés, ¿te bi dupäbi rä mu̱i ꞌne por hanja?

⁴ Änte de xä du Moisés nuꞌmu̱ ya mi pe̱ꞌtsi 120 yä je̱ya, bi muntsꞌi gatꞌho yä israelita ꞌne bi bembäbi gatꞌho näꞌä xki me̱fi rä Zi Dada Jeoba po geꞌu̱. Rꞌa de geꞌu̱, dende nuꞌmu̱ mi bäsjäꞌi bi hyandi hanja rä Zi Dada Jeoba bi ja ndunthi yä milagro ꞌne hanja bi kastiga rä hnini Egipto (Éx. 7:​3, 4). Rꞌa de geꞌu̱ bi tokabi bi rꞌani ha näꞌä rä ndehe bi hyeke rä Zi Dada Jeoba ꞌne bi hyandi hanja bi huati faraón ꞌne gatꞌho nuꞌu̱ yä soldado (Éx. 14:​29-31). ꞌNehe bi tokabi bi ñꞌo po ndunthi yä je̱ya ha nuꞌu̱ yä yꞌotꞌä hai ꞌne bi hyandi hanja rä Zi Dada Jeoba bi umbäbi gatꞌho näꞌä mi japäbi mꞌe̱di ꞌne bi su de yä nkontra (Deut. 8:​3, 4). Pe nubye̱, ¿gi pädi te mi thogi? Ya himi ꞌme̱di ndunthi pa dä tso̱ni ha näꞌä rä Hogä Hai xki prometebi rä Zi Dada Jeoba dä umbäbi, ꞌne koꞌmu̱ Moisés ya ma xä du, bi durämu̱i po bi nupäbi yä mfeni yä israelita ꞌne bi umbäbi yä konseho.a

5. ¿Te bi mää Moisés ge mi to̱ꞌmpäbi rä hnini Israel? (Deuteronomio 30:​19, 20).

⁵ ¿Te mä konseho bi umbäbi Moisés yä israelita? (Hñeti Deuteronomio 30:​19, 20). Gatꞌho rä hnini Israel, mi to̱ꞌmi nꞌa rä hogä ꞌmu̱i ko ndunthi yä jäpi. Ko rä jäpi rä Zi Dada Jeoba, nuꞌu̱ ma xä za xä mꞌu̱i po ndunthi rä tiempo ha näꞌä rä Hogä Hai bi prometebi dä umbäbi. ¿Mi tenguꞌä näꞌä Hogä Hai? ¡Xa mi mähotho ꞌne xa mi uni ndunthi yä sofo! Moisés bi ꞌñenä: «Nꞌa rä hai näꞌä pe̱ꞌtsi yä hogä däta hnini näꞌä hingä handi hanja bi thoki, habu̱ ja ndunthi yä hogä nguu ꞌne ñuxä yä hogä tꞌo̱tꞌe nuꞌu̱ hingo gä hoki, ꞌne pe̱ꞌtsi yä cisterna nuꞌu̱ hingo gä xei, ꞌne yä uä obxi ꞌne yä uä olibo nuꞌu̱ hingo gä u̱tꞌi» (Deut. 6:​10, 11).

6. ¿Por hanja rä Zi Dada Jeoba bi hyopäbi ge märꞌa yä dähni bi huati näꞌä rä Hogä Hai xki umbäbi yä israelita?

⁶ Pe Moisés hingä ho̱nse̱ bi bembäbi te mä jäpi ma xä hñäni yä israelita. ꞌNehe bi xipäbi ge mu̱ mi ne dä dura ha näꞌä rä Hogä Hai, mi debe dä yꞌo̱te yä mhända rä Zi Dada Jeoba. Hää, Moisés bi ꞌñembäbi gatꞌho rä hnini ge mi debe dä huahni rä te po mädee de dä yꞌo̱te rä Zi Dada Jeoba, dä mpe̱ntꞌi de Geꞌä ꞌne hindä hye̱gi. Pe mi yu̱tꞌi yä israelita ha nunä Hogä Hai, himbi jamäsu näꞌä konsehoꞌä. Hänge ko rä tiempo, rä Zi Dada Jeoba bi hyopäbi ge yä me Asiria, mꞌe̱fa yä me Babilonia, bi yu̱tꞌi ha nunä Hogä Hai pa bi huati ꞌne bi zitsꞌi yä israelita de gä esclavo (2 Rey. 17:​6-8, 13, 14; 2 Crón. 36:​15-17, 20).

7. ¿Te dä za gä pädihu̱ de näꞌä rä konseho bi uni Moisés? (Hyandi ꞌnehe yä kꞌoi).

⁷ ¿Te dä za gä pädihu̱ de näꞌä rä konseho bi uni Moisés? Ge mu̱ gä o̱tehu̱ rä Zi Dada Jeoba, geꞌä ma dä maxkägihu̱ gä pe̱ꞌtsihu̱ rä te. Ja ngu yä israelita ya kasi mi ꞌmai ha yä goxthi de näꞌä rä Hogä Hai xki prometebi rä Zi Dada Jeoba dä umbäbi; nuju̱ ꞌnehe ya kasi di ꞌmaihu̱ ha näꞌä rä goxthi de näꞌä rꞌayꞌo Xiꞌmhai xä prometegihu̱ rä Zi Dada Jeoba dä rꞌakägihu̱ (Is. 35:1; Luc. 23:43). Hää, gatꞌho rä Xiꞌmhai ma dä mparaiso ꞌne rä Zithu ꞌne nuꞌu̱ yä u̱xjua, ya hingä ma dä ñꞌoua pa dä hyatꞌi yä jäꞌi (Apoc. 20:​2, 3). ¡Pe ja mä nꞌa rä hogä notisia! Nuꞌu̱ yä relijion hingi udi näꞌä mäjuäni, ya hingä ma dä ꞌueke yä jäꞌi de rä Zi Dada Jeoba (Apoc. 17:16). Yä jäꞌi ya hingo ma dä mända ha rä Xiꞌmhai, hänge ya hingä ma dä nja rä sufrimiento (Apoc. 19:​19, 20). Nuua ha rä Xiꞌmhai, ya hingä ma dä mꞌu̱i nuꞌu̱ yä jäꞌi hingi ne dä yꞌo̱te rä Zi Dada Jeoba (Sal. 37:​10, 11). Po gatꞌho rä Xiꞌmhai, yä jäꞌi ma dä yꞌo̱te yä mhända rä Zi Dada Jeoba ꞌne geꞌä ma dä japäbi dä mädi ꞌne dä ntsitsꞌi nꞌa ngu mänꞌaa ꞌne ma dä nja nꞌa rä mꞌu̱i temäꞌentho (Is. 11:9). ¿Hänge xi nꞌa rä däta jäpi näꞌä di ñätkägihu̱ rä Zi Dada Jeoba? Pe hingä ho̱nse̱ꞌä. Mu̱ ha näꞌä rä rꞌayꞌo Xiꞌmhai ma gä sigihu̱ gä o̱tehu̱ rä Zi Dada Jeoba, ma gä pe̱ꞌtsihu̱ rä oportunida de gä ꞌmu̱ihu̱ hingä ho̱nse̱ yä nthebetho yä je̱ya, sino ke ma gä pe̱ꞌtsihu̱ nꞌa rä te pa nzäntho (Sal. 37:29; Juan 3:16).

8. ¿Hanja bi matsꞌi nꞌa rä misionero dä yꞌe̱ntꞌi ha rä mfeni näꞌä rä te pa nzäntho xä ñätkägihu̱ rä Zi Dada Jeoba? (Judas 20, 21).

⁸ Mu̱ nzäntho gä e̱ntꞌihu̱ ha mä mfenihu̱ ꞌne hingä pumfrihu̱ näꞌä rä te pa nzäntho xä ñätkägihu̱ rä Zi Dada Jeoba, geꞌä ma dä maxkägihu̱ pa hindi mporta te mä xuñha o te mä tentasio dä ꞌñekägihu̱, ma gä o̱tehu̱ rä Zi Dada Jeoba, ma gä mpe̱ntꞌihu̱ de geꞌä ꞌne nunka gä he̱gihu̱ (hñeti Judas 20, 21, TNM). Mu̱ hingä pumfrihu̱ näꞌä rä te pa nzäntho xä ñätkägihu̱ rä Zi Dada Jeoba, geꞌä ꞌnehe ma dä rꞌakägihu̱ rä tsꞌe̱di pa gä täpäbihu̱ nꞌa rä bisio o nꞌa rä tentasio. Nꞌa rä ku näꞌä xki me̱päbi rä Zi Dada Jeoba de gä misionero ha nuꞌu̱ yä luga bi kohi ha África, näꞌä bi ꞌñenä: «Ora dä da ngue̱nda ge ma xä za xtä mꞌe̱di näꞌä rä te pa nzäntho xä ñätkägihu̱ rä Zi Dada Jeoba, dä desidi ko ngatꞌho mä tsꞌe̱di gä ntsaꞌme näꞌä rä xuñha ndi ñhantꞌmee ꞌne dä bäntebi rä Zi Dada Jeoba ge dä maxkägi. Ko rä mfatsꞌiꞌä, bi za dä sigi dä pe̱päbi ko nꞌa rä konsiensia xä ntꞌaxi».

PA «NJABU̱ DÄ MAꞌI XÄ ÑHO»

9. ¿Te mä xuñha bi ñhandui David durante rä bida?

⁹ David bi nrey ha rä hnini Israel. ꞌNehe mrä músico, bi yꞌofo yä poesía ꞌne yä thuhu, mrä ndaro ꞌne bi me̱päbi Jeoba de gä profeta. Pe durante rä bida, David bi ñhandui ndunthi yä xuñha. Nꞌa rä pa, koꞌmu̱ rä rey Saúl xa mi pe̱ꞌtsuäbi rä embidia näꞌä mi ne dä hyo, hänge David pe̱ꞌtsi te bi ꞌmatꞌi bi ma. Mꞌe̱fa, nuꞌmu̱ ya bi nrey, David pe̱ꞌtsi te bi ꞌmatꞌi mänꞌaki. ¿Por hanja? Ngeꞌä näꞌä rä tꞌu̱ mrä thuhu Absalón mi ne go dä nrey hänge po geꞌä mi ne dä hyo rä dada. Pe mäske David bi ñhandui xi ndunthi yä xuñha ꞌne rꞌabu̱ bi yꞌo̱tꞌe rꞌa yä däta pekado, näꞌä nunka bi ꞌuengi de rä ꞌñuu rä Zi Dada Jeoba asta xa bi du. Hänge rä Zi Dada Jeoba bi ꞌñenä ge David mi nꞌa rä ñꞌo̱ho̱ näꞌä xa mi mädi ꞌne mi numäñho. Po geꞌä, mäpaya xa xä ñho gä jamäsuhu̱ nuꞌu̱ yä konseho bi uni David änte de xä du (Hech. 13:22; 1 Rey. 15:5).

10. ¿Por hanja rä rey David bi hyandi ge xa mi ja mꞌe̱di dä umbäbi yä konseho näꞌä rä tꞌu̱ mrä thuhu Salomón ?

¹⁰ Nuꞌmu̱ rä rey David ya ma xä du, mi pädi ge näꞌä rä tꞌu̱ mrä thuhu Salomón go ma xä gohi ha rä luga. Rä Zi Dada Jeoba mismo go geꞌä bi huahni Salomón pa dä nrey ꞌne dä sigi dä matsꞌi rä hnini Israel dä xo̱kämbenibi ꞌne dä hyokuäbi nꞌa rä templo (1 Crón. 22:5). Pe Salomón ma xä ñhandui xi ndunthi yä xuñha. ¿Hänge te mä konseho bi umbäbi rä rey David näꞌä rä tꞌu̱?

11. Ja ngu di handihu̱ ha 1 Reyes 2:​2, 3, ¿te mä konseho bi umbäbi David näꞌä rä tꞌu̱ ꞌne por hanja di handihu̱ ge hindi faya nuꞌu̱ yä noyaꞌu̱? (Hyandi ꞌnehe yä kꞌoi).

¹¹ ¿Te mä konseho bi umbäbi David rä tꞌu̱? (Hñeti 1 Reyes 2:​2, 3). Rä rey David bi ꞌñembäbi Salomón ge mu̱ xä yꞌo̱te rä Zi Dada Jeoba, ma xä mabi xä ñho. ꞌNe po ndunthi yä je̱ya geꞌä bi thogi (1 Crón. 29:​23-25). Rä rey Salomón bi hyokuäbi rä Zi Dada Jeoba nꞌa rä däta templo xa mähotho ꞌne bi yꞌofo rꞌa yä mfistꞌofo de rä Mäkä Tꞌofo. Salomón bi me̱ꞌtsi ndunthi rä famä po näꞌä rä mfädi mi pe̱ꞌtsi ꞌne ngeꞌä xa mrä riko (1 Rey. 4:34). Pe David xki xipäbi Salomón ge ma xä mabi xä ñho ho̱nse̱ mu̱ xä yꞌo̱te rä Zi Dada Jeoba ꞌne hinxä ꞌuege de geꞌä. Mäske Salomón bi me̱fi njabu̱ po ndunthi yä je̱ya, mꞌe̱fa bi ꞌuengi de rä ꞌñuu rä Zi Dada Jeoba ꞌne bi xo̱kämbeni nuꞌu̱ yä hyate zidada. Po geꞌä, rä Zi Dada Jeoba ya himbi numäñho ꞌne Salomón ya himbi me̱ꞌtsi rä mfädi pa dä mända xä ñho rä hnini Israel (1 Rey. 11:​9, 10; 12:4).

12. ¿Te dä za gä pädihu̱ de nuꞌu̱ yä konseho bi umbäbi rä rey David rä tꞌu̱?

¹² ¿Te dä za gä pädihu̱ de näꞌä rä konseho bi umbäbi David rä tꞌu̱? Ge mu̱ gä o̱tehu̱ rä Zi Dada Jeoba, ma dä magihu̱ xä ñho (Sal. 1:​1-3). Mäjuäni ge rä Zi Dada Jeoba hindi prometegihu̱ gä nrikohu̱ ja ngu bi nriko Salomón, nixi ma gä pe̱ꞌtsihu̱ näꞌä rä mfädi bi me̱ꞌtsiꞌä. Pe hää di prometegihu̱ ge mu̱ gä o̱tehu̱, Näꞌä ma dä rꞌakägihu̱ rä mfädi pa gä pädihu̱ gä huahnihu̱ yä hogä desision ꞌne pa gä ju̱hu̱ nꞌa rä ꞌñuu xä ñho (Prov. 2:​6, 7; Sant. 1:5). Nuꞌu̱ yä tsꞌofo rꞌakägihu̱ rä Zi Dada Jeoba, faxkägihu̱ ndunthi pa gä tomähu̱ yä hogä desision ha mä ꞌme̱fihu̱, ha rä skuela, nuꞌmu̱ di honihu̱ konte gä dibertihu̱ o nuꞌmu̱ di tratahu̱ yä asunto de gä bojä. Hää, mu̱ gä jamäsuhu̱ nuꞌu̱ yä konseho rꞌakägihu̱ rä Zi Dada Jeoba, geꞌä ma dä maxkägihu̱ pa gä suhu̱ näꞌä rä ntsitsꞌi di pe̱ꞌtsihu̱ Kongeꞌä, ꞌne njabu̱ näꞌä ma dä rꞌakägihu̱ rä oportunida de gä pe̱ꞌtsihu̱ rä te pa nzäntho (Prov. 2:​10, 11). ꞌNehe ma gä pe̱ꞌtsihu̱ yä hogä amigo ꞌne ma gä pe̱ꞌtsihu̱ näꞌä rä gia di jakägihu̱ mꞌe̱di pa dä nja rä johya ha mä familiahu̱.

13. ¿Te bi me̱fi rä zi nju Carmen pa bi mabi xä ñho?

¹³ Nꞌa rä zi nju rä thuhu Carmen —bi ꞌmu̱i ha rä dähni Mozambique—, mi mbeni ge pa dä mabi xä ñho ꞌne dä me̱ꞌtsi rä johya mi debe dä ma ha rä universidad. Hänge geꞌä bi me̱fi ngeꞌä mi ne dä ñꞌarquitecto. Nuni zi nju enä: «Xa ndi ho näꞌä mi tꞌutkägi. Pe mi tege gatꞌho mä tiempo, mä tsꞌe̱di ꞌne mä mfeni. Ndi ku̱tꞌi ha rä skuela dende yoto mädee xudi asta nzu̱ngä rꞌato ndee. Ya himi kohi rä tiempo pa gä ma yä mhuntsꞌi ꞌne rꞌamätsꞌu̱u̱ bi käni näꞌä rä hogä ntsitsꞌi ndi pe̱ꞌtsi ko rä Zi Dada Jeoba. Ndi pädi xä ñho ge ndi trata gä pe̱päbi yoho yä hmuu» (Mat. 6:24). Nuni zi nju pede hanja xa bi xatuäbi rä Zi Dada Jeoba ꞌne bi hyoni yä tsꞌofo ha nuꞌu̱ yä he̱ꞌmi rꞌakägihu̱ rä hnini. Rä zi nju Carmen sigi enä: «Nuꞌu̱ yä ku pe̱ꞌtsi rä esperiensia ꞌne mä nänä, bi rꞌakägi yä hogä konseho. Hänge dä desidi dä tsopu̱ rä universidad ꞌne dä umbäbi mäxo̱ge de mä tiempo rä Zi Dada Jeoba pa gä pe̱päbi. Hindi arrepenti po näꞌä dä pe̱fi ngeꞌä di pädi ge xa nꞌa rä hogä desision näꞌä dä huahni dä pe̱fi ko mä bida».

14. ¿Te mä tsꞌofo bi uni Moisés ꞌne David?

¹⁴ Tanto Moisés ngu David xa mi mädi rä Zi Dada Jeoba ꞌne mi pädi xä ñho ge mi meresebi dä tꞌo̱ꞌtuäbi yä mhända. Nuꞌu̱ yä konseho bi uniꞌu̱ änte de xä du, bi nupäbi yä mfeni nuꞌu̱ toꞌo bi yꞌo̱de pa dä me̱fi ja ngu xki me̱fiꞌu̱ ꞌne dä ñꞌo mänjuäntho ha rä ꞌñuu rä Zi Dada Jeoba. Moisés ꞌne David ꞌnehe bi mää ge nuꞌu̱ toꞌo dä zopu̱ rä Zi Dada Jeoba o hindä me̱päbi yä mhända ma dä mꞌe̱di näꞌä rä hogä ntsitsꞌi pe̱ꞌtsi Kongeꞌä ꞌne ya hingä ma dä hñäni nuꞌu̱ yä jäpi xä prometebi. Nuyu̱ yä tsꞌofo xa ja ndunthi rä muui pa gekägihu̱ mäpaya. Mi thogi yä nthebetho yä je̱ya, mä nꞌa rä amigo rä Zi Dada Jeoba ꞌnehe bi mää ge xa mähyoni gä o̱tehu̱ rä Zi Dada Jeoba ꞌne gä yꞌohu̱ mänjuäntho ha rä ꞌñuu.

«XI DI JOHYA NDUNTHI»

15. ¿Te mä esperiensia bi me̱ꞌtsi rä apostol Juan durante rä bida?

¹⁵ Rä Hesu xa bi ñꞌamigoui ꞌne xa bi zo̱ho̱ bi mädi rä apostol Juan (Mat. 10:2; Juan 19:26). Rä apostol Juan bi kompañä rä Hesu durante nuꞌu̱ yä je̱ya bi predika, bi hyandi nuꞌu̱ yä milagro bi ja ꞌne bi ꞌmu̱i kongeꞌä nuꞌmu̱ bi thogi yä däta xuñha. ꞌNehe, rä apostol Juan bi hyandi hanja rä Hesu bi nhaꞌmpäbi ꞌne bi tsꞌu̱ti ha nꞌa rä zaa ꞌne mꞌe̱fa bi hyandi nuꞌmu̱ ya xki nuhu de rä du. ꞌNehe bi hyandi hanja yä mhuntsꞌi bi te. Bi hyandi nuꞌmu̱ ho̱nse̱ mi nꞌa hängutho nuꞌu̱ yä de̱ni rä Hesu ꞌne bi me̱ꞌtsi rä oportunida de bi hyandi nuꞌmu̱ rä Noya Äjuä bi «ntꞌo̱de mäxo̱ge rä ngu̱ni rä Xiꞌmhai» (Col. 1:23).

16. ¿Toꞌo xä benefisia de nuꞌu̱ yä karta bi yꞌofo rä apostol Juan?

¹⁶ Nuꞌmu̱ rä apostol Juan ya mrä zi däta jäꞌi, bi me̱ꞌtsi rä däta nsu de dä yꞌofo näꞌä rä gäxä mfistꞌofo de rä Mäkä Tꞌofo rä thuhu Apocalipsis (Apoc. 1:1). ꞌNehe bi yꞌofo rä Evangelio de Juan ꞌne hñuu yä karta näꞌä hätsꞌi ꞌnehe rä thuhu: 1 Juan, 2 Juan ꞌne 3 Juan. Nunä karta de 3 Juan, bi yꞌofo pa bi me̱mpäbi nꞌa rä kristianu mrä thuhu Gayo. Rä apostol Juan mi handi Gayo ngu nꞌa rä tꞌu̱ (3 Juan 1). Pa näꞌä tiempoꞌä, ndunthi de nuꞌu̱ yä ku mi handi ngu yä bätsi ngeꞌä xki hyandi hanja xki mu̱di xki me̱päbi rä Zi Dada Jeoba. Näꞌä bi yꞌofo rä apostol Juan nuꞌmu̱ ya mrä zi däta jäꞌi, xä nupäbi yä mfeni yä kristianu asta mäpaya.

17. Ja ngu di handihu̱ ha 3 Juan 4, ¿te uni ndunthi rä johya?

¹⁷ ¿Te bi yꞌofo rä apostol Juan? (Hñeti 3 Juan 4). Rä apostol Juan bi mää hängu rä johya uni toꞌo dä yꞌo̱te rä Zi Dada Jeoba. Pa näꞌä rä tiempo bi yꞌofo 3 Juan, rꞌa yä jäꞌi mi udi näꞌä hingä mäjuäni ꞌne mi japäbi yä ku dä ꞌmu̱i dibidido. Pe rä apostol Juan bi mää hängu rä johya mi umbäbi ora bi hyandi ge märꞌa yä kristianu mi sigi mi pe̱päbi yä mhända rä Zi Dada Jeoba ꞌne mi ꞌmu̱i ja ngu di mändaꞌä (2 Juan 4, 6). Nuyu̱ yä kristianu hingä ho̱nse̱ mi hämpäbi rä johya rä apostol Juan, sino ke ꞌnehe mi johyabi rä koraso rä Zi Dada Jeoba (Prov. 27:11).

18. ¿Te dä za gä pädihu̱ de näꞌä bi yꞌofo rä apostol Juan?

¹⁸ ¿Te dä za gä pädihu̱ de näꞌä bi yꞌofo rä apostol Juan? Ge ora di o̱tehu̱ rä Zi Dada Jeoba ꞌne di yꞌohu̱ mänjuäntho ha rä ꞌñuu, rꞌakägihu̱ ndunthi rä johya ꞌne di japihu̱ dä johya märꞌaa (1 Juan 5:3). Por ejemplo, rꞌakägihu̱ ndunthi rä johya ora di pädihu̱ ge di johyabihu̱ rä koraso rä Zi Dada Jeoba. Näꞌä ꞌnehe xa di johya ndunthi ora handi ge di rechazahu̱ yä tentasio ꞌne ge di ꞌmu̱ihu̱ ja ngu di mändaꞌä (Prov. 23:15). Ora di pe̱fihu̱ njabu̱, ꞌnehe xa bi johya yä e̱nxe̱ ha mähetsꞌi (Luc. 15:10). Nuju̱ ꞌnehe xa di johyahu̱ ndunthi ora di handihu̱ ge mä zi kuhu̱ tse̱ti yä prueba, yä xuñha, yä tentasio ꞌne yꞌo mänjuäntho ha rä ꞌñuu rä Zi Dada Jeoba (2 Tes. 1:4). Nuꞌmu̱ xti zo̱ho̱ näꞌä rä pa habu̱ ma drä thäki gatꞌho nuꞌu̱ yä tꞌo̱tꞌe xä me̱fi rä Zithu, xa ma gä sentihu̱ ndunthi rä johya ngeꞌä ma gä handihu̱ ge xä bale rä penä gä yꞌohu̱ mänjuäntho ha rä ꞌñuu rä Zi Dada Jeoba.

19. ¿Te senti rä zi nju Rachel po gatꞌho näꞌä xä me̱fi pa dä matsꞌi yä zi jäꞌi dä mädi rä Zi Dada Jeoba? (Hyandi ꞌnehe yä kꞌoi).

¹⁹ Nuju̱ di tinihu̱ ndunthi rä johya ora di utihu̱ de rä Mäkä Tꞌofo märꞌaa. Nꞌa rä zi nju rä thuhu Rachel, —näꞌä bi ꞌmu̱i ha rä dähni fädi ngu rä República Dominicana—, mää ge pa geꞌä xi nꞌa rä däta nsu dä ꞌñuti märꞌaa de mä Zi Dadahu̱ Jeoba. Rä zi nju Rachel enä: «Hindi tini yä noya pa gä mää hängu rä johya di senti ora di handi ge nuꞌu̱ di uti de rä Mäkä Tꞌofo di te yä mhäte ꞌne yä komfiansa po rä Zi Dada Jeoba ꞌne di paati yä mꞌu̱i pa dä johyabi rä koraso. Nunä johya di senti xi ndunthi ꞌne hindi kompara ko nuꞌu̱ yä sacrificio xtä ja po geꞌu̱».

JAMÄSU NUꞌU̱ YÄ KONSEHO BI UNI NUꞌU̱ YÄ ZI DÄTA JÄꞌI

20. Mäske nuꞌu̱ yä tiempo habu̱ bi ꞌmu̱i Moisés, David ꞌne rä apostol Juan di nꞌañꞌo de näꞌä rä tiempo di ꞌmu̱ihu̱bye̱, ¿hanja dä za gä eñhu̱ ge mähye̱gi näꞌä rä mꞌu̱i bi zitsꞌiꞌu̱ ko näꞌä di tsitsꞌihu̱ mäpaya?

²⁰ Moisés, David ꞌne rä apostol Juan bi mꞌu̱i ha nꞌa rä tiempo habu̱ yä mꞌu̱i yä jäꞌi mi nꞌañꞌo de nunä tiempo di ꞌmu̱ihu̱ mäpaya. Pe mäske njabu̱, nuju̱ di tsitsꞌihu̱ nꞌa rä mꞌu̱i ngu näꞌä bi zitsꞌiꞌu̱. Ja ngu Moisés, David ꞌne rä apostol Juan, nuju̱ ꞌnehe di pe̱päbihu̱ rä Zi Dada Jeoba. Hää, nuju̱ ꞌnehe di xatuäbihu̱ rä Zi Dada Jeoba, di pe̱ꞌtsuäbihu̱ rä komfiansa ꞌne di o̱thu̱ ngue̱nda nuꞌu̱ yä tsꞌofo rꞌakägihu̱ pa gä huahnihu̱ yä hogä desision. ꞌNe ja ngu nuꞌu̱, ꞌnehe di pe̱ꞌtsuäbihu̱ rä komfiansa rä Zi Dada Jeoba ge di jäpigihu̱ ora di o̱tehu̱ yä mhända ꞌne di yꞌohu̱ mänjuäntho ha rä ꞌñuu.

21. ¿Te mä jäpi to̱ꞌmpäbi nuꞌu̱ jamäsu nuꞌu̱ yä konseho bi uni Moisés, David ꞌne rä apostol Juan?

²¹ Ma gä jamäsuhu̱ nuꞌu̱ yä konseho bi uni Moisés, David ꞌne rä apostol Juan änte de xä du. Hää, ma gä o̱thu̱ ntsꞌe̱di po gä o̱tehu̱ yä mhända rä Zi Dada Jeoba ꞌne gä yꞌohu̱ mänjuäntho ha rä ꞌñuu pa njabu̱ dä bo̱ni xä ñho gatꞌho näꞌä gä pe̱fihu̱ ꞌne dä za gä «ꞌmu̱ihu̱ ndunthi rä tiempo» ha näꞌä rä rꞌayꞌo Xiꞌmhai xä prometegihu̱ rä Zi Dada Jeoba (Deut. 30:20). Mu̱ gä jamäsuhu̱ nuꞌu̱ yä konseho, ma gä tinihu̱ ndunthi rä johya de gä pädihu̱ ge di johyabihu̱ rä koraso rä Zi Dada Jeoba, ꞌne ge Näꞌä ma dä kumpli ko gatꞌho näꞌä xä prometegihu̱. Mäske mäpaya ya di hänihu̱ ndunthi yä jäpi, ¡hindä za gä imäjinähu̱ mä hängu nuꞌu̱ yä jäpi ma dä rꞌakägihu̱ rä Zi Dada Jeoba! (Efes. 3:20).