¿Gi pädi gi da ngue̱nda ndaꞌä mäjuäni ꞌne ndaꞌä hinä?

1. Xi nuꞌi, ¿te gi senti po näꞌä udi rä Mäkä Tꞌofo?

NUJU̱ di pe̱päbihu̱ rä Zi Dada Jeoba di mädihu̱ näꞌä udi rä Mäkä Tꞌofo. Ko rä mfatsꞌi rä Mäkä Tꞌofo xtä tedehu̱ mä komfiansahu̱ po rä Zi Dada Jeoba (Rom. 10:17). Di pädihu̱ xä ñho ge rä Zi Dada Jeoba go xä hñutsꞌi yä mhuntsꞌi pa dä ꞌñudi näꞌä xa mäjuäni (1 Tim. 3:15). Hänge nuju̱ ko ndunthi rä johya, di o̱tehu̱ nuꞌu̱ gu̱tꞌi rä ꞌñuu ha yä mhuntsꞌi ngeꞌä nuꞌu̱ utkägihu̱ näꞌä xa mäjuäni de rä Mäkä Tꞌofo, rꞌakägihu̱ yä tsꞌofo ꞌne rä gia näꞌä di faxkägihu̱ pa gä pe̱päbihu̱ rä bolunta rä Zi Dada Jeoba (Heb. 13:17).

2. Ja ngu di handihu̱ ha Santiago 5:​19, ¿de te mä peligro di debe gä nsuhu̱ nuju̱ di pe̱päbihu̱ rä Zi Dada Jeoba?

² Mäske ya xtä aseptahu̱ näꞌä udi rä Mäkä Tꞌofo ꞌne di pädihu̱ ge xa mähyoni gä o̱tehu̱ rä hnini rä Zi Dada Jeoba, mu̱ hingä nsuhu̱ dä za gä ꞌuegehu̱ de näꞌä mäjuäni (hñeti Santiago 5:19). Rä Zithu ya dä nehmä dä hyandi gä dudahu̱ de rä Mäkä Tꞌofo ꞌne de rä hnini Zi Dada Jeoba (Efes. 4:14).

3. ¿Por hanja xa mähyoni gä mpe̱ntꞌihu̱ de näꞌä mäjuäni ꞌne hingä ꞌuegehu̱ de geꞌä? (Efesios 6:​13, 14).

³ (Hñeti Efesios 6:​13, 14, TNM). Mänꞌitꞌho rä Zithu ma dä xani ndunthi yä nkꞌuamba pa njabu̱ yä dähni dä nju̱tsꞌi kontra rä Zi Dada Jeoba (Apoc. 16:​13, 14). ꞌNehe di pädihu̱ ge rä Zithu xi ma dä yꞌo̱tꞌe ntsꞌe̱di pa dä hyoni rä forma hanja dä hyatꞌi nuꞌu̱ pe̱päbi rä Zi Dada Jeoba (Apoc. 12:9). Po geꞌä xa mähyoni gä pädihu̱ gä dahu̱ ngue̱nda ndaꞌä mäjuäni ꞌne ndaꞌä hinä. ꞌNehe xa mähyoni gä jamäsuhu̱ ꞌne gä pe̱fihu̱ näꞌä di mända rä Mäkä Tꞌofo ꞌne rä hnini rä Zi Dada Jeoba (Rom. 6:17; 1 Ped. 1:22). Hää, xa mähyoni gä pe̱fihu̱ njabu̱ mu̱ di ne gä pongihu̱ xti ꞌñepu̱ näꞌä rä däta mbidi o däta tribulación.

4. ¿Te ma gä pädihu̱ ha nunä ntꞌudi di nxadihu̱?

⁴ Ha nunä ntꞌudi di nxadihu̱, ma gä pädihu̱ ndaꞌu̱ nuꞌu̱ yä hogä mꞌu̱i di debe gä potꞌihu̱ pa geꞌä dä maxkägihu̱ gä dahu̱ ngue̱nda ndaꞌä näꞌä xa mäjuäni bi ehe de rä Mäkä Tꞌofo. Nuya yä hogä mꞌu̱i, ꞌnehe ma dä maxkägihu̱ pa gä aseptahu̱ näꞌä rä gia rꞌakägihu̱ rä hnini rä Zi Dada Jeoba. ꞌNehe ma gä pädihu̱ ndaꞌu̱ nuꞌu̱ hñuu yä tꞌo̱tꞌe ma dä maxkägihu̱ pa gä mpe̱ntꞌihu̱ ꞌne hingä ꞌuegehu̱ de näꞌä mäjuäni.

YOHO YÄ HOGÄ MꞌU̱I MA DÄ MAXKÄGIHU̱ GÄ DAHU̱ NGUE̱NDA NDAꞌÄ MÄJUÄNI

5. ¿Hanja ma dä maxkägihu̱ mu̱ gä pe̱ꞌspäbihu̱ nꞌa rä hogä ntsu rä Zi Dada Jeoba?

⁵ Mähyoni gä pe̱ꞌspäbihu̱ nꞌa rä hogä ntsu rä Zi Dada Jeoba. Gä pe̱ꞌspäbihu̱ nꞌa rä hogä ntsu rä Zi Dada Jeoba, signifika xa gä mädihu̱. Näꞌä rä mhäte geꞌä ma dä maxkägihu̱ pa hingä pe̱fihu̱ nꞌa rä tꞌo̱tꞌe näꞌä ma dä u̱mbäbi rä mfeni Jeoba. Hänge xa mähyoni gä pädihu̱ gä dahu̱ ngue̱nda ndaꞌä xä ñho ꞌne ndaꞌä xä ntsꞌo ꞌne ndaꞌä mäjuäni ꞌne ndaꞌä rä nkꞌuamba (Prov. 2:​3-6; Heb. 5:14). Nunka di debe gä hopäbihu̱ go dä dominägihu̱ näꞌä rä ntsu di sentihu̱ po yä jäꞌi, sino ke go ma gä hopäbihu̱ go dä ntäte näꞌä rä hogä ntsu di pe̱ꞌspäbihu̱ rä Zi Dada Jeoba. ¿Por hanja? Ngeꞌä ndunthi yä mꞌiki näꞌä di ho dä me̱fi yä jäꞌi hingä geꞌä di ho rä Zi Dada Jeoba.

6. De nuꞌu̱ 12 yä ñꞌo̱ho̱ bi mꞌe̱hni pa dä nuu mi tengu näꞌä rä hai de Canaán, ¿te bi thogi ko 10 de geꞌu̱ ꞌne por hanja?

⁶ Mu̱ gä hopäbihu̱ go dä ntäte näꞌä rä ntsu di sentihu̱ po yä jäꞌi ke näꞌä rä hogä ntsu di pe̱ꞌspäbihu̱ rä Zi Dada Jeoba, geꞌä dä za dä jakägihu̱ gä ꞌuegehu̱ de näꞌä mäjuäni. Rä Mäkä Tꞌofo pede ge nꞌa rä pa, bi ꞌme̱hni 12 yä ñꞌo̱ho̱ pa dä ma duä handi mi tenguꞌä näꞌä rä hai xki promete rä Zi Dada Jeoba dä umbäbi yä israelita. Pe 10 de nuꞌu̱ yä ñꞌo̱ho̱ xa bi ntsu mi hyandi mi tenguꞌu̱ yä mꞌai nuꞌu̱ yä jäꞌi de Canaán. Rä ntsu po yä cananeo mänꞌa go bi ntäte ke näꞌä rä hogä ntsu mi pe̱ꞌspäbi rä Zi Dada Jeoba. Nuꞌu̱ 10 yä ñꞌo̱ho̱ bi ꞌñenä: «Hindä za gä po̱tsꞌehu̱ pa gä ntuhnihu̱ kontra geꞌu̱. Ngeꞌä nuꞌu̱ yä ñꞌo̱ho̱ mänꞌa xa tse̱di ke nuju̱» (Núm. 13:​27-31). Mäjuäni ge nuꞌu̱ yä me Canaán mänꞌa mi tse̱di ke yä israelita, pe ora nuꞌu̱ 10 yä ñꞌo̱ho̱ bi mää ge hingä ma xä za xä däpäbi nuꞌu̱ yä nkontra, bi ꞌñudi ge himi o̱tꞌe ngue̱nda rä Zi Dada Jeoba. Nuꞌu̱ yä ñꞌo̱ho̱ nunka mi debe xä pumfri näꞌä xki promete rä Zi Dada Jeoba dä me̱fi ko yä israelita. ꞌNehe mi debe dä beni näꞌä ya xki me̱fi rä Zi Dada Jeoba po geꞌu̱. Mu̱ nuꞌu̱ 10 yä ñꞌo̱ho̱ xä me̱fi njabu̱, nunka ma xä pumfri ge rä Zi Dada Jeoba mänꞌa mi tse̱di ke nuꞌu̱ yä nkontra. Pe Josué ꞌne Caleb himbi mbeni ngu nuꞌu̱ mä 10 yä ñꞌo̱ho̱. Hänge nuyu̱ bi ꞌñembäbi yä israelita: «Mu̱ rä Zi Dada Jeoba di numäñhogihu̱, otho rä duda ge näꞌä ma dä zixkägihu̱ ꞌne ma dä rꞌakägihu̱ näꞌä rä hai xä prometegihu̱» (Núm. 14:​6-9).

7. ¿Te dä za dä maxkägihu̱ pa gä japäbihu̱ mänꞌa dä ze̱di näꞌä rä hogä ntsu di pe̱ꞌspäbihu̱ rä Zi Dada Jeoba? (Hyandi ꞌnehe rä foto).

⁷ Mu̱ nzäntho gä o̱tꞌehu̱ ngue̱nda te di ho rä Zi Dada Jeoba änte de gä tomähu̱ nꞌa rä desision, geꞌä ma dä maxkägihu̱ pa mänꞌa gä japäbihu̱ dä ze̱di näꞌä rä hogä ntsu di pe̱ꞌspäbihu̱ (Sal. 16:8). Ora gi nxadi rä Mäkä Tꞌofo ꞌne gi handi te bi thogi ꞌne te bi me̱fi rꞌa yä jäꞌi mäyaꞌmu̱, dä hogi gi ñꞌanise̱: «Xiꞌmu̱ go di geki, ¿te xtä pe̱fi?». Por ejemplo, imäjinä ge gi o̱de näꞌä bi mää nuꞌu̱ 10 yä ñꞌo̱ho̱ dä no̱nihu̱ ha näꞌä rä parrafo bi thogi. Mu̱ go di geꞌi xkä o̱de näꞌä bi mäñꞌu̱, ¿ma xkä kamfribi? ¿Ma xkä hopäbi ge xä dominäꞌi rä ntsu o xkä hopäbi xä ntäte näꞌä rä hogä ntsu gi pe̱ꞌspäbi rä Zi Dada Jeoba? Xi ndunthi nuꞌu̱ yä israelita himbi gamfribi Josué ꞌne Caleb ꞌne go bi gamfribi nuꞌu̱ mä 10 yä ñꞌo̱ho̱. Hänge hingä gatꞌho yä israelita bi za bi yu̱tꞌi ha näꞌä rä hogä hai bi umbäbi rä Zi Dada Jeoba (Núm. 14:​10, 22, 23).

8. ¿De te di debe gä nsuhu̱ ꞌne por hanja?

⁸ Mähyoni hingä exä mä nsuhu̱ nixi gä ñꞌorgullosohu̱. Rä Zi Dada Jeoba japäbi dä bädi näꞌä mäjuäni ho̱nse̱ nuꞌu̱ yä jäꞌi hingä yä ꞌñexmänsu nixi yä orgulloso (Mat. 11:25). Nuꞌmu̱ dä fu̱di dä nxadihu̱ rä Mäkä Tꞌofo, hingä ndyä ꞌñexmänsuhu̱ ꞌne dä hopäbihu̱ ge märꞌaa dä maxkägihu̱ pa dä ꞌñutkägihu̱ näꞌä mäjuäni (Hech. 8:​30, 31). Pe mäske njabu̱, xa mähyoni gä sigi gä nsuhu̱ pa njabu̱ hingä ñꞌorgullosohu̱. Mu̱ gä ñꞌorgullosohu̱ ꞌne gä ꞌñexmänsuhu̱, dä za dä jakägihu̱ gä mbenihu̱ ge mä opinionhu̱ di bale mähye̱gi ke nuꞌu̱ yä konseho uni rä Mäkä Tꞌofo o näꞌä rä gia rꞌakägihu̱ rä hnini rä Zi Dada Jeoba.

9. ¿Te mä uso di debe gä ebitahu̱?

⁹ ¿Te ma dä maxkägihu̱ pa hingä ñꞌexmänsuhu̱ ꞌne pa hingä ñꞌorgullosohu̱? Mähyoni gä benihu̱ ge rä Zi Dada Jeoba pe̱ꞌtsi gatꞌho rä tsꞌe̱di ꞌne nuju̱ ho̱nse̱ dyä mexiꞌmhaihu̱ (Sal. 8:​3, 4). Dä za gä xatuäbihu̱ rä Zi Dada Jeoba ꞌne gä apäbihu̱ ge dä maxkägihu̱ pa hingä ñꞌorgullosohu̱ ꞌne pa gä hopäbihu̱ märꞌaa dä ꞌñutkägihu̱. Rä Zi Dada Jeoba ma dä maxkägihu̱ pa gä o̱tꞌehu̱ ngue̱nda mꞌe̱tꞌo näꞌä di mbeniꞌä ꞌne hingä näꞌä go di mbenihu̱ o di sentihu̱. Ora gi nxadi rä Mäkä Tꞌofo, hyandi nuꞌu̱ yä testo habu̱ udi ge rä Zi Dada Jeoba xa di ho ora handi ge dyä umildehu̱. ꞌNehe hyandi nuꞌu̱ yä testo habu̱ udi ge näꞌä xa di u̱tsa rä ntꞌexmänsu. Mu̱ bi tꞌaꞌi nꞌa rä responsabilida habu̱ märꞌa yä ku handi näꞌä gi pe̱fi, xa dä nsu pa njabu̱ hingi ꞌñexä ri nsu nixi gi ñꞌorgulloso.

¿TE MÄHYONI GÄ PE̱FIHU̱ PA NJABU̱ GÄ MPE̱NTꞌIHU̱ ꞌNE HINGÄ ꞌUEGEHU̱ DE NÄꞌÄ MÄJUÄNI?

10. ¿Toꞌo xä usa rä Zi Dada Jeoba pa dä gia rä hnini?

¹⁰ Pe̱ꞌspäbi rä komfiansa ꞌne ogi duda de näꞌä rä gia rꞌakägihu̱ rä hnini rä Zi Dada Jeoba. Mäyaꞌmu̱, rä Zi Dada Jeoba bi usa Moisés ꞌnepu̱ Josué, pa bi umbäbi rä gia yä israelita (Jos. 1:​16, 17). Yä israelita mi pabi xä ñho ora mi handi ꞌne mi o̱te nuyu̱ yä ñꞌo̱ho̱ ngu yä representante rä Zi Dada Jeoba. Ha yä pa nuꞌu̱ yä mu̱di kristianu, rä Zi Dada Jeoba nubye̱ bi usa yä apostol pa bi umbäbi rä gia yä mhuntsꞌi (Hech. 8:​14, 15). Mꞌe̱fa, nuꞌu̱ yä apostol bi hñäni ꞌnehe rä mfatsꞌi de nuꞌu̱ yä anciano de Jerusalén. Koꞌmu̱ yä ku myä yꞌo̱de ꞌne mi asepta näꞌä rä gia mi tꞌumbäbi «ngu bi thogi yä pa mänꞌa bi te yä mhuntsꞌi» (Hech. 16:​4, 5, TNM). Mäpaya, rä Zi Dada Jeoba ꞌnehe rꞌakägihu̱ ndunthi yä jäpi ora di jamäsuhu̱ näꞌä rä gia rꞌakägihu̱ po mäde de rä hnini. Pe, ¿te gi kamfri ge ma dä senti rä Zi Dada Jeoba mu̱ hingä o̱tehu̱ nuꞌu̱ yä ku xä hñutsꞌi pa dä gu̱tꞌi rä ꞌñuu? Pa gä thädihu̱ nunä ntꞌani, ma gä handihu̱ te bi thogi yä israelita nuꞌmu̱ bi rꞌani ha yä yꞌotꞌä hai pa xä zo̱ni asta ha näꞌä rä Hogä Hai xki prometebi rä Zi Dada Jeoba dä umbäbi.

11. ¿Te bi me̱fi rä Zi Dada Jeoba ko nuꞌu̱ bi no̱ꞌtuäbi nuꞌu̱ yä representante xki hñutsꞌi? (Hyandi ꞌnehe rä foto).

¹¹ Nꞌa rä pa, nuꞌmu̱ yä israelita mi yꞌo ha rä ꞌñuu, rꞌa yä ñꞌo̱ho̱ nuꞌu̱ mi ja yä däta nsu bi no̱ꞌtuäbi Moisés ꞌne himi ne dä asepta ngu rä representante rä Zi Dada Jeoba. Nuꞌu̱ yä ñꞌo̱ho̱ bi ꞌñenä: «Pa rä Zi Dada Jeoba gatꞌho rä hnini xä nsunda [hingä ho̱nse̱ Moisés] ꞌne Näꞌä ꞌmu̱i entre rä hnini» (Núm. 16:​1-3). Mäjuäni ge pa rä Zi Dada Jeoba gatꞌho rä hnini xmä nsunda, pe ꞌnehe mäjuäni ge näꞌä xki huahni Moisés pa dä gu̱hni rä hnini (Núm. 16:28). Hänge nuꞌmu̱ nuꞌu̱ yä ñꞌo̱ho̱ bi kritika ꞌne bi no̱ꞌtuäbi Moisés, go mi no̱ꞌtuäbi rä Zi Dada Jeoba. Nuꞌu̱ yä ñꞌo̱ho̱ mi ne dä me̱ꞌtsi rä autorida ꞌne yä däta nsu ꞌne hingo bi jamäsu näꞌä mi ne rä Zi Dada Jeoba. Hänge rä Zi Dada Jeoba bi huati gatꞌho nuꞌu̱ mi no̱ꞌtuäbi Moisés (Núm. 16:​30-35, 41, 49). Mäpaya, rä Zi Dada Jeoba hingi numäñho nuꞌu̱ hingi asepta näꞌä rä gia uni po mäde de rä hnini ꞌne nuꞌu̱ yä representante.

12. ¿Por hanja dä za gä pe̱ꞌspäbihu̱ rä komfiansa näꞌä rä gia rꞌakägihu̱ rä hnini rä Zi Dada Jeoba?

¹² Rä Zi Dada Jeoba xä rꞌakägihu̱ ndunthi yä raso pa gä pe̱ꞌspäbihu̱ rä komfiansa rä hnini. Ora rä Cuerpo Gobernante handi claro ge di ja mꞌe̱di dä ja nꞌa rä mpadi de näꞌä rä forma hanja di ntiendehu̱ nꞌa rä ntꞌudi de rä Mäkä Tꞌofo, o de hanja di jahu̱ mä mäkä ꞌme̱fihu̱, nuꞌu̱ yä ku mäntꞌä di ja nuꞌu̱ yä mpadiꞌu̱ (Prov. 4:18). Nuꞌu̱ yä ku pe̱fi njabu̱ ngeꞌä xa ne dä johyabi rä koraso rä Zi Dada Jeoba. Pe änte de dä tomä nꞌa rä desision, nuꞌu̱ yä ku nzäntho o̱tꞌe ngue̱nda te mää rä Mäkä Tꞌofo. Nuju̱ ꞌnehe di debe gä o̱tꞌehu̱ ngue̱nda te mää rä Mäkä Tꞌofo änte de gä tomähu̱ nꞌa rä desision.

13. ¿Ndaꞌu̱ «nuꞌu̱ yä hogä noya xä ntꞌaxi» ꞌne te di debe gä pe̱fihu̱ kongeꞌu̱?

¹³ «Ogi he̱gi nuꞌu̱ yä hogä noya xä ntꞌaxi» (2 Tim. 1:​13, TNM). ¿Ndaꞌu̱ «nuꞌu̱ yä hogä noya xä ntꞌaxi»? Geꞌu̱ gatꞌho nuꞌu̱ yä ntꞌudi di tinihu̱ ha rä Mäkä Tꞌofo (Juan 17:17). Näꞌä rä modo de hanja di xo̱kämbenihu̱ Äjuä, geꞌä di mända rä Mäkä Tꞌofo gä pe̱fihu̱. Rä hnini rä Zi Dada Jeoba, utkägihu̱ hanja gä pe̱fihu̱ ja ngu di mända rä Mäkä Tꞌofo. Ora di jamäsuhu̱ ꞌne di pe̱fihu̱ «nuꞌu̱ yä hogä noya xä ntꞌaxi» rä Zi Dada Jeoba di jäpigihu̱.

14. ¿Te bi thogi rꞌa yä mu̱di kristianu?

¹⁴ ¿Te ma gä thogihu̱ mu̱ gä ꞌuegehu̱ de «nuꞌu̱ yä hogä noya xä ntꞌaxi»? Ma gä handihu̱ te bi thogi rꞌa de nuꞌu̱ yä mu̱di kristianu. Rꞌa de gehyu̱ mi mää ge rä pa rä Zi Dada Jeoba ya xki zo̱ho̱. Po̱de asta mi ja nꞌa rä karta näꞌä segun go xki yꞌofo rä apostol Pablo pe hingä mäjuäni go xki yꞌofo. Rꞌa yä kristianu de Tesalónica bi gamfri nuya yä nkꞌuamba ꞌne asta bi mu̱di bi mete märꞌaa. Nuyu̱ yä kristianu hinto xä za xä hyatꞌi mu̱ xä yꞌe̱ntꞌihmä xä ñho ha yä mfeni näꞌä xki ꞌñuti rä apostol Pablo (2 Tes. 2:​1-5). Hänge rä apostol Pablo pe̱ꞌtsi te bi yꞌopäbi mä nꞌa rä karta pa bi xipäbi ge hindä gamfri gatꞌho näꞌä mi o̱de ꞌne bi umbäbi yä konseho pa mꞌe̱fa hinto xä hyatꞌi mänꞌaki. Ha nunä karta bi ꞌñembäbi: «Nuga drä Pablo di opꞌähu̱ rä nze̱njua ko mä yꞌe̱se̱, gehnä nꞌa rä seña ha gatꞌho nuꞌu̱ yä karta di ofo. Njaua di ofo» (2 Tes. 3:17).

15. ¿Te dä za gä pe̱fihu̱ pa hinto dä komfundigihu̱? Hñutsꞌi nꞌa rä ejemplo. (Hyandi ꞌnehe yä foto).

¹⁵ ¿Te dä za gä pädihu̱ de näꞌä bi yꞌopäbi rä apostol Pablo nuꞌu̱ yä kristianu mi ꞌmu̱i ha Tesalónica? Mu̱ dä sikägihu̱ nꞌa rä esperiensia o dä ꞌmetkägihu̱ näꞌä hingi pa mähye̱gi ko näꞌä xtä pädihu̱ de rä Mäkä Tꞌofo, mähyoni gä usahu̱ mä juisiohu̱ ꞌne mä mfenihu̱ pa hingä kamfrihu̱. Ha nuꞌu̱ yä dähni mi fädi mä mꞌe̱tꞌo ngu rä Unión Soviética, nuꞌu̱ mä nkontrahu̱ bi yꞌofo nꞌa rä karta pa dä hyatꞌi yä ku ge go xki yꞌofo rä Cuerpo Gobernante. Ha nunä karta mi animäbi nuꞌu̱ yä ku ge dä mu̱di dä organisase̱ ꞌne ge ya hindä do̱ꞌmi näꞌä rä gia mi uni rä Cuerpo Gobernante. Pe nuꞌu̱ yä ku xki yꞌe̱ntꞌi xä ñho ha yä mfeni ꞌne ha yä koraso näꞌä xki bädi de rä Mäkä Tꞌofo, bi da ngue̱nda ge nunä karta mi nꞌa rä trampa näꞌä xki yꞌofo nuꞌu̱ mä nkontrahu̱. Mäpaya, nuꞌu̱ mä nkontrahu̱ usa rä radio, rä telebision ꞌne rä internet pa xani yä imformäsio hingä mäjuäni. ¿Por hanja pe̱fi njabu̱? Pa dä komfundigihu̱ ꞌne dä dibidigihu̱. Pe pa hindä thogi njabu̱, ma gä jamäsuhu̱ nunä konseho uni rä Mäkä Tꞌofo: «Ogi hopäbihu̱ toꞌo nguntꞌä dä komfundiꞌihu̱». Mähyoni gä asegurahu̱ ge näꞌä di o̱dehu̱ o näꞌä di hetihu̱ hindi nkontra ko näꞌä xtä pädihu̱ de rä Mäkä Tꞌofo (2 Tes. 2:​2, TNM; 1 Juan 4:1).

16. Ja ngu udi Romanos 16:​17, 18, ¿te mähyoni gä pe̱fihu̱ ko nuꞌu̱ di ꞌuengi de näꞌä mäjuäni?

¹⁶ Ogi ꞌuege de nuꞌu̱ yä ku yꞌo mänjuäntho ha rä ꞌñuu rä Zi Dada Jeoba. Kada nꞌa de gekhu̱ ma gä mfaxtehu̱ dä nja nꞌa rä hogä ntsitsꞌi ha rä hnini rä Zi Dada Jeoba mu̱ xa gä mpe̱ntꞌihu̱ ꞌne hingä ꞌuegehu̱ de näꞌä mäjuäni. Nuꞌu̱ toꞌo di ꞌuengi de näꞌä mäjuäni ja yä dibisio mbo ha rä mhuntsꞌi. Po geꞌä, rä Zi Dada Jeoba enä ge gä ꞌuegehu̱ de geꞌu̱ pa njabu̱ hindä ꞌuegägihu̱ ꞌnehe (hñeti Romanos 16:​17, 18).

17. ¿Te mä benefisio ma gä hänihu̱ mu̱ gä mpe̱ntꞌihu̱ de näꞌä mäjuäni ꞌne hingä ꞌuegehu̱ de geꞌä?

¹⁷ Mu̱ di dahu̱ ngue̱nda ndaꞌä mäjuäni ꞌne xa di mpe̱ntꞌihu̱ pa hingä ꞌuegehu̱ de geꞌä, mä jamfrihu̱ ma dä mꞌu̱i xä ñho ꞌne ma gä pe̱ꞌtsihu̱ nꞌa rä hogä ntsitsꞌi ko rä Zi Dada Jeoba (Efes. 4:​15, 16). ꞌNehe, mu̱ xa gä mpe̱ntꞌihu̱ de näꞌä mäjuäni, hingä ma gä hopäbihu̱ dä hyakägihu̱ rä Zithu ko nuꞌu̱ yä nkꞌuamba ꞌne yä ntꞌudi di xani. Mu̱ gä pe̱fihu̱ njabu̱, rä Zi Dada Jeoba ma dä sugägihu̱ xti ꞌñepu̱ näꞌä rä däta mbidi fädi ngu rä däta tribulación (Filip. 4:​8, 9).