Nuꞌu̱ yä ntꞌani o̱tꞌe rꞌa yä jäꞌi
¿Toꞌo nuꞌu̱ «yä e̱nxe̱ Äjuä [ . . . ] xä thahni» mää ha 1 Timoteo 5:21?
Nuꞌmu̱ rä apostol Pablo bi yꞌopäbi Timoteo —näꞌä bäsjäꞌi mi faxte ꞌnehe de gä anciano ha rä mhuntsꞌi— bi ꞌñembäbi: «Di ꞌme̱pꞌäꞌi ge gi yꞌo̱tꞌä njabu̱ mähye̱gi ko ngatꞌho yä me̱fi Äjuä. Hingi hñäꞌmtho nuꞌu̱ toꞌo gi yꞌo̱ꞌtuä rä tsꞌu̱tꞌhui. ꞌNehe pädi mꞌe̱tꞌo xä ñho nuꞌä te xä nja pa njabu̱ geꞌä gi mäñꞌä. Njabu̱ di ꞌme̱pꞌäꞌi ha rä thandi Äjuä ꞌne ha rä thandi [ . . . ] Ñhesukristo ꞌne ha rä thandi yä e̱nxe̱ Äjuä nuꞌu̱ xä thahni pa dä me̱päbiꞌä» (1 Tim. 5:21). Pe, ¿xi toꞌo nuꞌu̱ «yä e̱nxe̱ Äjuä [ . . . ] xä thahni»?
Mꞌe̱tꞌo ma gä handihu̱ nuꞌu̱ toꞌo hingo geꞌu̱. Rä apostol Pablo himbi ne bi mää ge go mi geꞌu̱ nuꞌu̱ 144.000 xä thahni pa dä ma ha mähetsꞌi. Ngeꞌä pa näꞌä tiempoꞌä tobe hixki mu̱di dä ma ha mähetsꞌi ninꞌa de geꞌu̱. Yä apostol ꞌne märꞌa yä kristianu de näꞌä tiempoꞌä, tobe hixki nuhu de rä du pa dä ma ha mähetsꞌi ngu yä e̱nxe̱. Hänge hingo mi gehyu̱ nuꞌu̱ «yä e̱nxe̱ Äjuä [ . . . ] xä thahni» mi mää rä apostol Pablo ha 1 Timoteo 5:21 (1 Cor. 15:50-54; 1 Tes. 4:13-17; 1 Juan 3:2).
Nixi mi geꞌu̱ nuꞌu̱ yä e̱nxe̱ bi ꞌuege de rä Zi Dada Jeoba ha nuꞌu̱ yä pa rä Noé. Ngeꞌä nuyu̱ yä tsꞌo e̱nxe̱ bi mfaxhui rä Zithu ꞌne gehyu̱ tꞌembi yä u̱xjua. Gehyu̱ ꞌnehe bi nkontraui rä Hesu mi mꞌu̱kua ha rä Xiꞌmhai (Gén. 6:2; Luc. 8:30, 31; 2 Ped. 2:4). Xti mända rä Hesu nuua ha rä Xiꞌmhai, ma dä gotꞌi nuyu̱ yä u̱xjua po 1.000 yä je̱ya ꞌne mꞌe̱fa ma dä huati pa nzäntho mähye̱gi ko rä Zithu (Jud. 6; Apoc. 20:1-3, 10).
Pe ora rä apostol Pablo bi mää ha 1 Timoteo 5:21 de nuꞌu̱ «yä e̱nxe̱ Äjuä [ . . . ] xä thahni», ꞌnehe bi no̱ni mähye̱gi ko Äjuä ꞌne rä Kristo. Hänge nuꞌu̱ yä e̱nxe̱ꞌu̱, go geꞌu̱ di mfaxhui Äjuä ꞌne rä Kristo pa di mpe̱fi mähye̱gi.
Rä Mäkä Tꞌofo udi ge ha mähetsꞌi bi ꞌmu̱i yä mꞌotho yä e̱nxe̱ nuꞌu̱ pe̱päbi rä Zi Dada Jeoba (Heb. 12:22, 23). Hindi debe gä mbenihu̱ ge yä e̱nxe̱ di ja nꞌadä rä ꞌme̱fi, sino ke nuꞌu̱ di ja rꞌa nꞌañꞌo yä ꞌme̱fi (Apoc. 14:17, 18). Rä Mäkä Tꞌofo udi ge nꞌa rä pa, ho̱nse̱ nꞌatho rä e̱nxe̱ bi nkargo de dä huati 185.000 yä ndaro yä me Asiria (2 Rey. 19:35). Mi mꞌu̱kua rä Hesu ha rä Xiꞌmhai bi ꞌñenä ge ma dä nkargobi rꞌa yä e̱nxe̱ «pa go gehyu̱ dä gu̱ki de rä Tsꞌu̱tꞌhui gatꞌho nuꞌu̱ yä tꞌo̱tꞌe japi dä mfetse märꞌaa ꞌne pa dä gu̱ki nuꞌu̱ yä jäꞌi hingi pe̱fi näꞌä di mända rä ley Äjuä» (Mat. 13:39-41, TNM). ꞌNehe, po̱de xä nkargobi märꞌa yä e̱nxe̱ pa go geꞌu̱ «dä muntsꞌä gatꞌho nuꞌu̱ xä huahniꞌä» pa dä ma ha mähetsꞌi (Mat. 24:31). Rä Salmo 91:11 enä ge märꞌa yä e̱nxe̱ xrä nkargobi dä sugägihu̱ (Mat. 18:10; hyandi ꞌnehe te mää Mateo 4:11 ꞌne Lucas 22:43).
Ja ngu di handihu̱, nuꞌu̱ «yä e̱nxe̱ Äjuä [ . . . ] xä thahni» bi mää rä apostol Pablo ha 1 Timoteo 5:21, mi geꞌu̱ rꞌa yä e̱nxe̱ nuꞌu̱ xkri nkargobi dä mfaxte ko rꞌa de nuꞌu̱ yä ꞌme̱fi mi ja ha yä mhuntsꞌi. Ha rꞌa de nuꞌu̱ yä testo ehe änte de 1 Timoteo 5:21, di handihu̱ ge rä apostol Pablo bi ꞌñembäbi nuꞌu̱ yä ku de rä mhuntsꞌi ge mi debe dä me̱ꞌtsuäbi rä tꞌekꞌei yä anciano. ꞌNehe bi umbäbi yä hogä konseho yä anciano. Bi ꞌñembäbi ge himi debe dä huahnitho toꞌo dä trata xä ñho, nixi mi debe mäntꞌä dä juzga o dä tomä nꞌa rä desision, sino ke mꞌe̱tꞌo mi debe dä mbeni xä ñho. ¿Por hanja? Rä apostol Pablo bi mää ge yä anciano pe̱päbi yä ku ante «rä thandi Äjuä ꞌne ha rä thandi [ . . . ] Ñhesukristo ꞌne ha rä thandi yä e̱nxe̱ Äjuä nuꞌu̱ xä thahni». Kongehnä rä apostol Pablo bi ꞌñudi ge rä Zi Dada Jeoba, rä Hesu ꞌne nuꞌu̱ «yä e̱nxe̱ Äjuä [ . . . ] xä thahni» handi hanja yä anciano di kumpli ko yä responsabilida ꞌne hanja di su rä mhuntsꞌi. Ja ngu di handihu̱, ꞌmu̱i rꞌa yä e̱nxe̱ nuꞌu̱ dri nkargobi rꞌa yä ꞌme̱fi ha rä mhuntsꞌi ngu dä su yä ku, dä diriji rä predicación ꞌne dä xipäbi rä Zi Dada Jeoba näꞌä handi (Mat. 18:10; Apoc. 14:6).