RÄ NTꞌUDI PA GÄ NXADIHU̱ 4
RÄ JÄHÑÄ 18 Jamädi po näꞌä rä njutꞌi
¿Te utkägihu̱ näꞌä rä njutꞌi bi tꞌuni po gekhu̱?
«Äjuä bi ꞌñutkägihu̱ ge xi mäjuäni nuꞌä mädigihu̱» (1 JUAN 4:9).
TE MA GÄ HANTHU̱
Ma gä pädihu̱ te utkägihu̱ de rä Zi Dada Jeoba ꞌne de Ñhesukristo näꞌä rä njutꞌi bi uni po gekhu̱.
1. ¿Por hanja xä ñho gä ntinihu̱ tatꞌä je̱ya ha rä Fenäte de rä du rä Hesu?
RÄ ZI DADA JEOBA bi rꞌakägihu̱ nꞌa rä däta regalo nuꞌmu̱ bä pe̱hni rä Tꞌu̱ pa bi du po gekhu̱ (2 Cor. 9:15). Ko näꞌä rä te bi uni Ñhesukristo, dä za gä pe̱ꞌtsihu̱ nꞌa rä hogä ntsitsꞌi ko rä Zi Dada Jeoba ꞌne dä za gä pe̱ꞌtsihu̱ nꞌa rä te pa nzäntho. ¡Hängu di jamädibihu̱ rä Zi Dada Jeoba ngeꞌä xa di mäkägihu̱, hänge po geꞌä bä pe̱hni rä Tꞌu̱ pa bi du po gekhu̱! (Rom. 5:8). Pa dä maxkägihu̱ nunka gä pumfrihu̱ näꞌä bi me̱fi rä Zi Dada Jeoba ꞌne rä Hesu po gekhu̱ ꞌne nzäntho gä umbäbihu̱ njamädi, rä Hesu bi mända gä jahu̱ nꞌa rä fenäte de rä du tatꞌä je̱ya (Luc. 22:19, 20, TNM).
2. ¿Te ma gä handihu̱ ha nunä ntꞌudi di nxadihu̱?
2 Nunä je̱ya, rä Fenäte de rä du rä Hesu ma dä tꞌo̱tꞌe näꞌä nsabdo 12 de abril de rä 2025. Hinte mä duda ja ge gatꞌho ma gä o̱tꞌehu̱ ntsꞌe̱di pa gä ntinihu̱ ha nunä pa. Xa ma dä maxkägihu̱ ndunthi mu̱ durante nuya yä pa de rä Fenäte, gä ꞌuekehu̱ rä tiempo pa gä hudi gä ntso̱ꞌmihu̱ ꞌne gä handihu̱ gatꞌho näꞌä xä me̱fi po gekhu̱ rä Zi Dada Jeoba ꞌne rä Tꞌu̱. Ha nunä ntꞌudi di nxadihu̱, ma gä pädihu̱ te utkägihu̱ de rä Zi Dada Jeoba ꞌne de rä Hesu näꞌä rä njutꞌi bi uniꞌu̱ po gekhu̱. Ha näꞌä rä ntꞌudi xä ꞌñepu̱, ma gä handihu̱ hanja di benefisiagihu̱ näꞌä rä njutꞌi ꞌne te dä za gä pe̱fihu̱ pa gä udihu̱ ge di jamädihu̱.
¿POR HANJA JEOBA BÄ PE̱HNI RÄ TꞌU̱ PA BI DU PO GEKHU̱?
3. ¿Por hanja rä bida de nꞌadä rä ñꞌo̱ho̱ näꞌä rä perfecto xä za xä ñäni yä miyontho yä jäꞌi? (Hyandi ꞌnehe yä kꞌoi).
3 Näꞌä rä bida bi uni Ñhesukristo, utkägihu̱ hängu di mädi rä justisia rä Zi Dada Jeoba (Deut. 32:4). ¿Por hanja di mäñhu̱ njabu̱? Ngeꞌä nuꞌmu̱ Adán bi desidi himbi yꞌo̱te rä Zi Dada Jeoba, bi zogägihu̱ rä pekado ꞌne geꞌä tsixkägihu̱ ha rä du (Rom. 5:12). Po geꞌä rä Zi Dada Jeoba bä pe̱hni rä Tꞌu̱ pa dä ñängägihu̱ de rä pekado ꞌne de rä du. ¿Pe hanja rä bida de ho̱nse̱ nꞌatho rä ñꞌo̱ho̱ xä za xä ñäni yä miyontho yä jäꞌi? Rä apostol Pablo bi ꞌñenä: «Ngeꞌä ja ngu ko ho̱nse̱ nꞌa rä ñꞌo̱ho̱ [Adán], näꞌä himbi yꞌo̱de, ndunthi bi zo̱ho̱ bi me̱ꞌtsä rä pekado. Njabu̱ ꞌnehe, ko ho̱nse̱ nꞌa rä ñꞌo̱ho̱ [rä Hesu], näꞌä bi yꞌo̱de, ndunthi ma dä zo̱ho̱ dä thandi ngu yä hojäꞌi» (Rom. 5:19, TNM; 1 Tim. 2:6). Hää, koꞌmu̱ Adán mrä perfecto pe bi desidi himbi yꞌo̱te rä Zi Dada Jeoba, bi japäbi yä jäꞌi bi zo ha rä pekado ꞌne ha rä du. Po geꞌä mi ja mꞌe̱di rä bida de nꞌadä rä ñꞌo̱ho̱ näꞌä drä perfecto ꞌne drä yꞌo̱de, pa xä uni rä bida ꞌne xä za xä ñängägihu̱.
Nꞌadä rä ñꞌo̱ho̱ näꞌä bi jakägihu̱ gatꞌho dä tsohu̱ ha rä pekado ꞌne ha rä du. Hänge bi ja mꞌe̱di nꞌatho rä ñꞌo̱ho̱ näꞌä mrä perfecto pa bi ñängägihu̱. (Hyandi rä parrafo 3).
4. ¿Por hanja rä Zi Dada Jeoba bi hyandi ge mi ja mꞌe̱di dä me̱hni rä Tꞌu̱ pa dä du po gekhu̱?
4 Zäi ge rꞌabu̱ dä za gä enähu̱: «¿Pe xa mi ja mꞌe̱di dä uni rä bida rä Hesu pa dä ñängägihu̱? ¿Xiꞌmu̱ rä Zi Dada Jeoba hinxä me̱hni rä Tꞌu̱ ꞌne ho̱nse̱ xä hye̱gi xä mꞌu̱i pa nzäntho nuꞌu̱ yä bätsi Adán xä yꞌo̱te Jeoba?». Pa gekhu̱ zäi ge geꞌä rä solusio mänꞌa xä ñho. Pe mähyoni gä benihu̱ ge rä Zi Dada Jeoba udi näꞌä xa mäjuäni rä justisia. Hänge mu̱ rä Zi Dada Jeoba hixpä pe̱hni rä Tꞌu̱ pa xä du po gekhu̱ ꞌne xä hyopäbi yä jäꞌi dä mꞌu̱i pa nzäntho, ma xä ꞌñudi ꞌñenä go hinte mä tsꞌo tꞌo̱tꞌe xki me̱fi Adán.
5. ¿Por hanja hinte mä duda di pe̱ꞌtsihu̱ ge rä Zi Dada Jeoba nzäntho ma dä me̱fi näꞌä xä ñho?
5 ¿Te ma xä mbeni yä jäꞌi mu̱ rä Zi Dada Jeoba hixpä pe̱hni rä Tꞌu̱ pa xä du po gekhu̱ ꞌne ho̱nse̱ xä hye̱gi ge nuꞌu̱ yä bätsi Adán xä mꞌu̱i pa nzäntho mäske xki zo ha rä pekado? Yä jäꞌi xä za xä mbeni ge rä Zi Dada Jeoba uni yä mhända de näꞌä xä ñho ꞌne de näꞌä hinä pe Näꞌä hingo pe̱fi näꞌä di mända. Hänge ora rä Zi Dada Jeoba bi me̱fi näꞌä adi rä justisia —mäske pa geꞌä pe̱ꞌtsi te bä pe̱hni näꞌä rä Tꞌu̱ xa mi mädi— nubye̱ hinte mä duda di pe̱ꞌtsihu̱ ge Näꞌä nzäntho ma dä me̱fi näꞌä xä ñho ꞌne ge ma dä kumpli gatꞌho näꞌä xä promete.
6. ¿Te mä nꞌa bi japäbi rä Zi Dada Jeoba bä pe̱hni rä Tꞌu̱ pa bi du po gekhu̱? (1 Juan 4:9, 10).
6 Gä pädihu̱ ge rä Zi Dada Jeoba bä pe̱hni rä Tꞌu̱ pa bi du po gekhu̱, faxkägihu̱ pa gä ntiendehu̱ ge Näꞌä nzäntho o̱tꞌe rä justisia. ꞌNehe faxkägihu̱ pa gä handihu̱ hängu xa di mäkägihu̱ (Juan 3:16; hñeti 1 Juan 4:9, 10).a Rä Zi Dada Jeoba bä pe̱hni rä Tꞌu̱ pa bi du po gekhu̱, ngeꞌä näꞌä hingi ne dä hyandi gä tuhu̱, sino ke näꞌä ne dä hyandi gä mꞌu̱ihu̱ pa nzäntho ꞌne näꞌä ne dä hyanꞌgägihu̱ gä mꞌu̱ihu̱ mbo de rä familia. ¿Por hanja di mäñhu̱ njabu̱? Ngeꞌä nuꞌmu̱ Adán bi zo ha rä pekado bi bo̱ni de rä familia rä Zi Dada Jeoba, po geꞌä gatꞌho yä jäꞌi ya himbi mꞌu̱i mbo de rä familia rä Zi Dada Jeoba. Pe ko näꞌä rä bida bi uni Ñhesukristo, nubye̱ yä jäꞌi dä za dä me̱ꞌtsuäbi rä jamfri rä Zi Dada Jeoba ꞌne mu̱ dä yꞌo̱te, nꞌa rä pa ma dä za dä yu̱tꞌi mbo ha rä familia. Dende nubye̱, rä Zi Dada Jeoba dä za dä punꞌgägihu̱ mä pekadohu̱ ꞌne dä za gä pe̱ꞌtsihu̱ nꞌa rä hogä ntsitsꞌi kongeꞌä ꞌne ko gatꞌho yä zi ku. ¡Hängu di mäkägihu̱ rä Zi Dada Jeoba! (Rom. 5:10, 11).
7. ¿Te faxkägihu̱ gä ntiendehu̱ ora di dahu̱ ngue̱nda hängu bi sufri rä Hesu?
7 Dä za gä dahu̱ ngue̱nda hängu di mäkägihu̱ rä Zi Dada Jeoba mu̱ gä hudihu̱ ꞌne gä ntso̱ꞌmihu̱ hängu bi mꞌu̱i dispuesto dä gutꞌi pa dä ñängägihu̱. Rä Zithu xä mää ge yä amigo rä Zi Dada Jeoba ma dä hye̱gi de dä me̱päbi mu̱ dä thogi yä xuñha o yä sufrimiento. Pa dä ꞌñudi ge hingä mäjuäni näꞌä xä mää rä Zithu, rä Zi Dada Jeoba bi hye̱gi rä Tꞌu̱ dä sufri änte de xä tho (Job 2:1-5; 1 Ped. 2:21). Dende mähetsꞌi rä Zi Dada Jeoba bi hyandi hanja yä jäꞌi mi burla ꞌne mi theni rä Hesu ꞌne ora yä ndaro bi umbäbi yä mfe̱i ꞌne bi tsu̱ti ha nꞌa rä zaa habu̱ xa bi sufri asta xa bi du (Mat. 27:28-31, 39). Rä Zi Dada Jeoba pe̱ꞌtsi gatꞌho rä tsꞌe̱di pa xä ñänihmä rä Tꞌu̱. Por ejemplo, ora rä Hesu ya mi zu̱di ha rä zaa yä jäꞌi mi enä: «Dä ñänibye̱ Äjuä mu̱ ge xi mäjuäni Äjuä di mädi» (Mat. 27:42, 43). Ora bi yꞌo̱de njabu̱ Jeoba, zäi ge xä zahmä xä ñäni rä Tꞌu̱. Pe mu̱ rä Zi Dada Jeoba xä ñäni rä Tꞌu̱ pa hinxä tho, nuꞌmu̱ hinto ma xä uni näꞌä rä njutꞌi mi ja mꞌe̱di pa drä ñängägihu̱ de rä pekado ꞌne nubye̱ gatꞌho yä jäꞌi dri ꞌmu̱i kondenädo dä du pa nzäntho ꞌne hinte mä humu̱i grä pe̱ꞌtsihu̱. ¿Gi da ngue̱nda por hanja rä Zi Dada Jeoba bi hye̱gi ge rä Tꞌu̱ xa bi sufri asta xa bi du?
8. ¿Por hanja di pädihu̱ ge rä Zi Dada Jeoba xa bi u̱ rä mfeni ꞌne rä koraso ora bi hyandi hanja bi sufri rä Tꞌu̱ ꞌne bi tho? (Hyandi ꞌnehe rä kꞌoi).
8 Rä Zi Dada Jeoba himbi usa rä tsꞌe̱di pa bi ñäni rä Tꞌu̱. ¿Pe signifika ge himbi senti gatꞌho näꞌä rä sufrimiento bi hyandi ge bi thogi rä Tꞌu̱? Ja ngu di pädihu̱, nuju̱ di sentihu̱ rä johya, rä dumu̱i o rä u̱gi. Koꞌmu̱ rä Mäkä Tꞌofo enä ge rä Zi Dada Jeoba bi hyogägihu̱ ja nguꞌä, dä za gä handihu̱ ge näꞌä ꞌnehe di senti rä johya, rä dumu̱i o rä u̱gi ha rä mfeni. Rä Mäkä Tꞌofo udi ge mäyaꞌmu̱ bi mꞌu̱i rꞌa yä jäꞌi «nuꞌu̱ xa bi u̱mbäbi rä mfeni. Njatꞌä mi po̱mpäbi rä kue̱ ꞌne xa bi japäbi bi durämu̱i» (Sal. 78:40, 41). Ma gä imäjinähu̱ gatꞌho näꞌä bi thogi Abrahán nuꞌmu̱ rä Zi Dada Jeoba bi ꞌñembäbi ge dä hyo näꞌä rä tꞌu̱ mrä thuhu Isaac pa dä umbäbi de gä ofrenda (Gén. 22:9-12; Heb. 11:17-19). ¿Dä za gi imäjinä gatꞌho näꞌä bi senti Abrahán mentä mi hoki gatꞌho näꞌä mi ja mꞌe̱di pa dä hyo rä tꞌu̱ ngu nꞌa rä ofrenda? Njabu̱ ꞌnehe rä Zi Dada Jeoba, zäi ge xa bi u̱ rä mfeni ꞌne rä koraso ora bi hyandi hanja mri maltratabi rä Tꞌu̱ asta xa bi tho. Hindä za gä imäjinähu̱ hängu rä dumu̱i ꞌne rä u̱gi bi senti. (Ku̱ꞌti ha jw.org pa gi hyandi rä bideo Ejemplos de fe: Abrahán [parte 2]).
Rä Zi Dada Jeoba xa bi u̱ rä mfeni ꞌne rä koraso ora bi hyandi hanja bi sufri rä Tꞌu̱. (Hyandi rä parrafo 8).
9. Ja ngu di handihu̱ ha Romanos 8:32, 38, 39, ¿hängu näꞌä rä mhäte senti rä Zi Dada Jeoba po nuꞌi ꞌne po gatꞌho nuꞌu̱ pe̱päbi?
9 Gä pädihu̱ hängu bi gutꞌi rä Zi Dada Jeoba pa bi ñängägihu̱ de rä pekado ꞌne de rä du, faxkägihu̱ pa gä dahu̱ ngue̱nda ge joꞌo mä nꞌa rä jäꞌi näꞌä xa di mäkägihu̱ ja ngu di mäkägihu̱ꞌä, nisikiera mä amigohu̱ o mä familiahu̱ mäske di pädihu̱ ge hää di mäkägihu̱ (hñeti Romanos 8:32,b 38, 39).c ¿Gi pädi? Rä Zi Dada Jeoba mänꞌa senti ndunthi rä mhäte po gekhu̱ ke näꞌä rä mhäte di sentihu̱ po gekhu̱se̱. Por ejemplo, mu̱ nuꞌi ja ri ganä gi mꞌu̱i pa nzäntho, ¡rä Zi Dada Jeoba mänꞌa ja rä ganä dä hyandi ge nuꞌi gi mꞌu̱i pa nzäntho! ¿Gi ne ge rä Zi Dada Jeoba dä punꞌäꞌi gatꞌho nuꞌu̱ ri pekado? ¡Rä Zi Dada Jeoba mänꞌa ja rä ganä dä punꞌäꞌi! Pa geꞌä, näꞌä ho̱nse̱ to̱ꞌmi gä jamädibihu̱ ngeꞌä bä pe̱hni rä Tꞌu̱ pa bi du po gekhu̱, gä pe̱ꞌtsuäbihu̱ rä jamfri ꞌne gä o̱tehu̱. Hää, rä Zi Dada Jeoba bä pe̱hni rä Tꞌu̱ pa bi ñängägihu̱ ꞌne njabu̱ bi ꞌñudi hängu di mäkägihu̱. Ha näꞌä rä rꞌayꞌo Xiꞌmhai di to̱ꞌmihu̱ ge ma dä ꞌñepu̱ mänꞌitꞌho, mänꞌa ma gä pädihu̱ mä ndunthi de rä mhäte rä Zi Dada Jeoba (Ecl. 3:11).
¿POR HANJA RÄ HESU BI MꞌU̱I DISPUESTO BI UNI RÄ BIDA?
10. a) Änte de xä tho rä Hesu, ¿te mä nꞌa xa mi tupäbi rä mu̱i? b) ¿Hanja bi logra rä Hesu bi ꞌñeꞌtsuäbi rä nsu rä Dada? (Hyandi rä recuadro «Rä Hesu himbi fayabi rä Zi Dada Jeoba ꞌne njabu̱ bi ꞌñeꞌtsuäbi rä nsu»).
10 Rä Hesu xa turämu̱i te di mbeni yä jäꞌi de rä Dada (Juan 14:31). Mi mꞌu̱kua rä Hesu ha rä Xiꞌmhai, mi pädi ge ma xä tho ngu nꞌa rä rä jäꞌi näꞌä xki komete yä delito o ngu nꞌa rä jäꞌi näꞌä xki zani Äjuä. Po geꞌä, rä Hesu xa mi tupäbi rä mu̱i te ma xä mbeni yä jäꞌi de rä Zi Dada Jeoba. Hänge bi xatuäbi ꞌne bi ꞌñembäbi: «Mä Dadaꞌi, nuꞌmu̱ dä zahmä, dä thogitho nunä tsꞌo thogi ma gä thogi» (Mat. 26:39). Pe asta xa bi du rä Hesu, bi me̱päbi rä bolunta rä Dada ꞌne himbi fayabi. Njabu̱, bi ꞌñeꞌtsuäbi rä nsu rä Dada.
11. ¿Por hanja dä za gä eñhu̱ ge rä Hesu xa di mädi yä jäꞌi? (Juan 13:1).
11 Rä Hesu bi mꞌu̱i dispuesto dä uni rä bida ngeꞌä xa di mädi yä jäꞌi, mänꞌa nuꞌu̱ yä de̱ni (Prov. 8:31; hñeti Juan 13:1).d Rä Hesu mi pädi xä ñho ge mentä ma xä mꞌu̱kua ha rä Xiꞌmhai, ma xä thogi ndunthi yä sufrimiento ꞌne ma xä tho. Pe mäske njabu̱, himbi me̱päbi rä Zi Dada Jeoba por obligasio, sino ke ko ngatꞌho rä koraso bi ungä ntꞌo̱de de rä Noya Äjuä, bi ꞌñuti ꞌne bi matsꞌi yä zi jäꞌi. Mi zo̱ho̱ näꞌä rä pa pa dä tho, tobe bi mꞌu̱i dispuesto dä xu̱kuäbi yä ua yä apostol, bi nupäbi yä mfeni ꞌne bi umbäbi märꞌa yä tsꞌofo (Juan 13:12-15). Ora ya mi zu̱di ha rä zaa, mäske xa mi tsa ndunthi rä u̱gi, tobe bi hñuꞌmpäbi rä mu̱i näꞌä mä nꞌa rä jäꞌi xki tsꞌu̱ti ꞌnehe ha nꞌa rä zaa, ꞌne bi xipäbi ge ma dä me̱ꞌtsi rä oportunida de dä mꞌu̱i ha rä Paraiso. ꞌNehe, tobe bi durämu̱i po rä mämä ꞌne bi yꞌapäbi näꞌä rä de̱ni mrä thuhu Juan ge dä supäbi (Luc. 23:42, 43; Juan 19:26, 27). Hää, durante näꞌä rä tiempo bi mꞌu̱kua rä Hesu ha rä Xiꞌmhai, bi trata yä jäꞌi ko ndunthi rä mhäte ꞌne rä ñhojäꞌi, ꞌne pa ri uadi bi mꞌu̱i dispuesto dä uni rä bida po gatꞌho yä jäꞌi.
12. ¿Por hanja dä za gä eñhu̱ ge mäpaya rä Hesu sigi di mpe̱fi pa faxkägihu̱?
12 Rä Hesu «bi du nꞌakitho» po gatꞌho yä jäꞌi, pe mäpaya tobe pe̱fi ndunthi yä hogä tꞌo̱tꞌe po gekhu̱ (Rom. 6:10). ¿Por hanja di mäñhu̱ njabu̱? Ngeꞌä mäpaya, ha mähetsꞌi rä Hesu bi sigi bi mpe̱fi ꞌne nubye̱ bi usa näꞌä rä muui pe̱ꞌtsi näꞌä rä bida bi uni pa dä me̱fi ndunthi yä hogä tꞌo̱tꞌe po gekhu̱. ¿Dä za gi imäjinä hängu rä ꞌme̱fi bi pe̱ꞌtsi? Näꞌä bi atiende rä responsabilida de gä Rey, de gä Ndä gä Makhä ꞌne de gä ñäxu de gatꞌho yä mhuntsꞌi (1 Cor. 15:25; Efes. 5:23; Heb. 2:17). Rä Hesu ꞌnehe di nkargo de dä muntsꞌi gatꞌho nuꞌu̱ ma dä ma ha mähetsꞌi ꞌne gatꞌho nuꞌu̱ ma da mꞌu̱i ha rä Xiꞌmhai. Nunä ꞌme̱fi, pe̱ꞌtsi te dä uadi änte de dä uadi näꞌä rä däta mbidi ma dä nja fädi ꞌnehe ngu rä däta tribulación (Mat. 25:32; Mar. 13:27).e Pe hingä ho̱nse̱ꞌä, rä Hesu ꞌnehe usa «näꞌä rä ꞌme̱go, rä hogä yꞌo̱de ꞌne xa ja rä mfeni», pa dä rꞌakägihu̱ gatꞌho näꞌä di jakägihu̱ mꞌe̱di pa dä za gä pe̱päbihu̱ rä Zi Dada Jeoba ha nuya yä gäxä pa (Mat. 24:45,TNM). ꞌNehe, durante näꞌä 1.000 yä je̱ya ma dä mända rä Hesu de gä Rey, ma dä sigi dä me̱fi ndunthi yä hogä tꞌo̱tꞌe po gekhu̱. Ja ngu di handihu̱, rä Zi Dada Jeoba hingä ho̱nse̱ bi uni rä Tꞌu̱ pa dä du po yä jäꞌi, sino ke pa dä sigi dä mpe̱fi ꞌne dä me̱fi ndunthi yä hogä tꞌo̱tꞌe po gekhu̱.
¿TE DÄ ZA GI PE̱FI PA GI SIGI GI PÄDI DE RÄ ZI DADA JEOBA ꞌNE DE RÄ HESU?
13. ¿Hanja ma dä maxꞌäꞌi mu̱ gi nzäi gi ꞌueke rä tiempo pa gi hñudi gi ntso̱ꞌmi?
13 Mu̱ gi nzäi gi ꞌueke rä tiempo pa gi hñudi gi ntso̱ꞌmi de gatꞌho näꞌä xä me̱fi rä Zi Dada Jeoba ꞌne rä Hesu, mänꞌa ma gi sigi gi pädi de näꞌä rä mhäte udi po gekhu̱. De nuꞌu̱ yä mfistꞌofo Mateo, Marcos, Lucas ꞌne Juan dä za gi hñeti nꞌaa o rꞌaa de gehya rꞌa yä semänä änte ꞌne mꞌe̱fa de näꞌä rä Fenäte de rä du rä Hesu. Ogi trata gi hñeti ndunthi yä capítulo kada gi hñudi gi nxadi rä Mäkä Tꞌofo. En lugar de geꞌä, dä za ge rꞌamätsꞌu̱u̱ gi hñeti ꞌne gi yꞌo̱tꞌe ntsꞌe̱di po gi tini te mä raso di pe̱ꞌtsihu̱ pa gä mädihu̱ rä Zi Dada Jeoba ꞌne rä Hesu. ꞌNehe, ogi pumfri gi xipäbi märꞌaa näꞌä gä pädi.
14. Ja ngu di handihu̱ ha Salmo 119:97, ¿te mähyoni gä pe̱fihu̱ pa gä pädihu̱ mä ndunthi de rä Mäkä Tꞌofo ꞌne de näꞌä rä njutꞌi bi uni rä Zi Dada Jeoba? (Hyandi ꞌnehe rä kꞌoi).
14 Mu̱ ya o̱tꞌe ndunthi yä je̱ya de gi pe̱päbi rä Zi Dada Jeoba, zäi ge rꞌabu̱ gi ñꞌani mu̱ jabu̱ te gi pädi mä rꞌayꞌo de rä justisia rä Zi Dada Jeoba, de rä mhäte ꞌne de näꞌä rä njutꞌi bi uni pa bi ñängägihu̱ de rä pekado ꞌne de rä du. ¿Pe gi pädi? Nunka ma gä huadihu̱ gä pädihu̱ de rä Zi Dada Jeoba ꞌne de rä Noya. Hänge, ¿te dä hogi gi pe̱fi pa gi probecha xä ñho gatꞌho nuꞌu̱ yä he̱ꞌmi ꞌne näꞌä rä imformäsio xä rꞌakägihu̱ rä hnini rä Zi Dada Jeoba? Ora gi nxadi rä Mäkä Tꞌofo ꞌne gi tini nꞌa rä testo näꞌä hingi ntiende te ri bo̱ni, dä hogi gi usa nuꞌu̱ yä he̱ꞌmiꞌu̱ ꞌne näꞌä imformäsio pa gi hyoni te ri bo̱ni näꞌä testoꞌä. ꞌNepu̱, durante rä pa, dä hogi gi ntso̱ꞌmi ꞌne gi hyandi te bi ꞌñutꞌäꞌi de rä Zi Dada Jeoba, de rä Hesu ꞌne de näꞌä rä mhäte pe̱tsꞌäꞌi (hñeti Salmo 119:97).
Mäske ya di pe̱ꞌtsihu̱ ndunthi yä je̱ya de di pe̱päbihu̱ rä Zi Dada Jeoba, dä za gä japäbihu̱ dä te näꞌä rä jamädi di sentihu̱ po näꞌä rä njutꞌi bi tꞌuni po gekhu̱. (Hyandi rä parrafo 14).
15. ¿Por hanja xa mähyoni hingi desanimä ꞌne gi sigi gi hyoni nuꞌu̱ yä tesoro ehe ha rä Mäkä Tꞌofo?
15 Mu̱ gi nxadi rä Mäkä Tꞌofo ꞌne ngu gi handi ge hinte mä rꞌayꞌo gä pädi, ogi desanimä. Ora di nxadihu̱ rä Mäkä Tꞌofo, ꞌñenä go di honihu̱ nꞌa rä tesoro. Ndunthi yä jäꞌi ꞌmu̱i dispuesto dä thogi ndunthi yä ora o ndunthi yä pa pa dä hyoni rä oro. Nuyu̱ pe̱ꞌtsi rä pasensia ꞌne hindi desanimä asta xa dä dini mädi nꞌa rä zi tꞌu̱kä do de gä oro. Pe nuꞌu̱ yä tesoro ehe ha rä Mäkä Tꞌofo, mänꞌa ja ndunthi rä muui ke gatꞌho rä oro (Sal. 119:127; Prov. 8:10). Hänge, pe̱ꞌtsä rä pasensia ꞌne ogi he̱gi de gi hñeti ꞌne gi nxadi rä Mäkä Tꞌofo (Sal. 1:2).
16. ¿Hanja dä za gä de̱mbäbihu̱ rä mꞌu̱i rä Zi Dada Jeoba ꞌne rä Hesu?
16 Mentä gi nxadi rä Mäkä Tꞌofo, dä hogi gi hyandi de te mä forma dä za gi pe̱fi ha ri bida näꞌä utꞌäꞌi. Por ejemplo, dä za gi de̱mbäbi rä justisia rä Zi Dada Jeoba ora gi yꞌo̱tꞌe ntsꞌe̱di po gi trata xä ñho gatꞌho mähye̱gi. ꞌNehe, ora gi nxadi rä Mäkä Tꞌofo ꞌne gi handi hanja rä Hesu xa di mädi rä Dada, dä hogi gi hyandi de te forma dä za gi mꞌu̱i dispuesto ꞌnehe gi sufri po rä thuhu rä Zi Dada Jeoba, ꞌne po gi fatsꞌi yä zi ku mäske pa geꞌä ma dä ja mꞌe̱di gi ja yä sacrificio. ꞌNehe, ma gi de̱mbäbi rä mꞌu̱i rä Hesu mu̱ gi yꞌo̱tꞌe ntsꞌe̱di po gi ꞌñuti yä zi jäꞌi de rä Noya Äjuä pa njabu̱ ꞌnehe dä me̱ꞌtsä rä oportunida de dä hñäni nuꞌu̱ yä benefisio de näꞌä rä njutꞌi bi tꞌuni po gekhu̱.
17. ¿Te ma gä pädihu̱ ha näꞌä rä ntꞌudi xä ꞌñepu̱?
17 Entremäs gä ntiendehu̱ hanja bi njaꞌä näꞌä rä njutꞌi bi uni rä Zi Dada Jeoba ꞌne rä Hesu, mänꞌa ma gä jamädibihu̱ ꞌne mänꞌa ma gä mädihu̱. Mu̱ gä pe̱fihu̱ njabu̱, nuꞌu̱ ꞌnehe mänꞌa ma dä mäkägihu̱ (Juan 14:21; Sant. 4:8). Hänge ma gä sigihu̱ gä usahu̱ gatꞌho näꞌä rꞌakägihu̱ rä Zi Dada Jeoba pa gä sigihu̱ gä pädihu̱ de näꞌä rä njutꞌi bi uni pa dä ñängägihu̱ de rä pekado ꞌne de rä du. Ha näꞌä rä ntꞌudi xä ꞌñepu̱, ma gä handihu̱ de te mä forma dä za gä benefisiahu̱ de näꞌä rä njutꞌiꞌä ꞌne te dä za gä pe̱fihu̱ kada nꞌa de gekhu̱ pa gä udihu̱ ge di jamädibihu̱ rä Zi Dada Jeoba po näꞌä rä mhäte xä ꞌñudi po gekhu̱.
RÄ JÄHÑÄ 107 Jeoba bi ꞌñutkägihu̱ gä mädihu̱
a 1 Juan 4:9, 10: «Ajua̱ bi ꞌñutcaguihʉ gue xi majua̱ni nuꞌá̱ ma̱diguihʉ ngueꞌa̱ bá pɛhna rá ꞌra Tꞌʉ ja ra ximhai pa da ꞌracjʉ ra ꞌraꞌyo te. 10 Ma ga xiꞌahʉ ndaꞌa̱ ra hma̱te majua̱ni: Nujʉ hinstí ma̱dihʉ Ajua̱, pe nuꞌá̱ xi ma̱diguihʉ, hangue bá pɛncahʉ rá Tꞌʉ núꞌa̱ bi unga rá te pa bi gutca ma tsꞌoquihʉ».
b Romanos 8:32: «Ajua̱ bi unga rá ꞌra Tꞌʉ pa bi du po rá nguecjʉ. Nuꞌbʉ ¿ha gue hinda ꞌracjʉ nehe mahyɛgui con gueꞌa̱ gatho maꞌra te dí hoñhʉ?».
c Romanos 8:38, 39: «Hangue dí pa̱hʉ gue joꞌo ni ꞌna toꞌo da za da ꞌuegaguihʉ de rá hma̱te Ajua̱, nixi núꞌbʉ ga tuhʉ, nixi núbya dí tehʉ, nixi ya ɛnxɛ, nixi ya nda̱ gá ɛnxɛ, nixi núꞌa̱ jabya mapaya, nixi núꞌa̱ ma da nja ꞌmɛfa, 39 nixi núꞌa̱ ja maña̱ de mahetsꞌi, nixi núꞌa̱ ja ri gaꞌti de ra ximhai; ni ꞌna de núꞌʉ xa hyoca Ajua̱, hinda za da ꞌuegaguihʉ de rá hma̱teꞌa̱ núꞌa̱ pɛscahʉ ngueꞌa̱ dí ꞌnathohʉ co ma zi Hmuhʉ ra Jesucristo».
d Juan 13:1: «Nura pa ante ra ngo de ra pascua, ra Jesu mi pa̱di gue ya xqui zø ra ora pa da ma de guecua ja ra ximhai pa da yopa mengui habʉ bí ꞌbʉ Ajua̱ rá Dada. Nuꞌá̱ nza̱ntho bi ma̱di núꞌʉ toꞌo yá mɛtiꞌa̱, ne xi ra da̱ngui rá hma̱te bi mɛꞌtsuabiꞌʉ».
e Rä apostol Pablo bi ꞌñenä ge ma dä mhuntsꞌä «nuꞌu̱ yä tꞌo̱tꞌe ha mähetsꞌi» (Efesios 1:10, TNM). Nuya yä noya ri bo̱ni nuꞌmu̱ rä Zi Dada Jeoba usa rä espiritu santo pa dä huahni nuꞌu̱ ma dä ma ha mähetsꞌi. Pe ha Mateo 24:31 ꞌne ha Marcos 13:27, rä Hesu mää de dä «mhuntsꞌä gatꞌho nuꞌu̱ toꞌo xä thahni». Nuya yä noya ne da mää näꞌä rä tiempo habu̱ nuꞌu̱ xä thahni —pe tobe kohi ha rä Xiꞌmhai— ma dä mhuntsꞌi pa dä ma ha mähetsꞌi durante rä däta mbidi o däta tribulación.