Ma gä rekonosehu̱ ge hindi pädihu̱ gatꞌho

1. ¿Te bi rꞌakägihu̱ rä Zi Dada Jeoba nuꞌmu̱ bi hyogägihu̱ ꞌne por hanja?

RÄ ZI DADA JEOBA bi hyogägihu̱ xa mähotho ꞌne bi rꞌakägihu̱ nꞌa mä bo̱yꞌohu̱ pa gä ntso̱ꞌmihu̱, pa te gä pädihu̱ ꞌne pa gä handihu̱ hanja gä pe̱fihu̱ ha mä mꞌu̱ihu̱ näꞌä tꞌutkägihu̱. ¿Por hanja bi hyogägihu̱ njabu̱? Ngeꞌä rä Zi Dada Jeoba ne gä tinihu̱ «näꞌä rä mfädi bi ehe» de geꞌä. Näꞌä ne dä hyandi gä usahu̱ mä mfenihu̱ pa gä huahnihu̱ yä hogä desision ꞌne gä pe̱päbihu̱ ja ngu di hoꞌä (Prov. 2:​1-5; Rom. 12:1).

2. a) ¿Te mähyoni gä rekonosehu̱? (Job 37:​23, 24; hyandi ꞌnehe rä kꞌoi). b) ¿Hanja di benefisiagihu̱ ora di rekonosehu̱ ge hindi pädihu̱ gatꞌho?

² Mäske rä Zi Dada Jeoba bi rꞌakägihu̱ nꞌa mä bo̱yꞌohu̱, mähyoni gä benihu̱ ge hingi tsa gä pädihu̱ gatꞌho (hñeti Job 37:​23, 24). Ma gä handihu̱ te bi thogi Job. Nꞌa rä pa rä Zi Dada Jeoba bi yꞌo̱ꞌtuäbi rꞌa yä ntꞌani habu̱ bi nheki ge Job hinte mi pädi. Oraꞌä, Job bi da ngue̱nda ge mi debe dä paati rä mfeni ꞌne dä rekonose ge mi ja ndunthi yä tꞌo̱tꞌe näꞌä himi pädi (Job 42:​3-6). Nuju̱ ꞌnehe ma gä hänihu̱ ndunthi yä benefisio mu̱ gä rekonosehu̱ ge ja ndunthi yä tꞌo̱tꞌe näꞌä hindi pädihu̱. Geꞌä ma dä maxkägihu̱ pa mänꞌa gä pe̱ꞌtsuäbihu̱ rä komfiansa rä Zi Dada Jeoba ge näꞌä nzäntho ma dä ꞌñutkägihu̱ ho̱nse̱ näꞌä di jakägihu̱ mꞌe̱di pa gä huahnihu̱ yä hogä desision (Prov. 2:6).

3. ¿Te ma gä pädihu̱?

³ Ha nunä ntꞌudi di nxadihu̱ ma gä handihu̱ rꞌa yä tꞌo̱tꞌe näꞌä hindi pädihu̱ ꞌne geꞌä rꞌabu̱ dä za dä jakägihu̱ gä ntsuhu̱ o gä tumämu̱ihu̱. ꞌNehe ma gä handihu̱ hanja ndunthi yä mꞌiki mänꞌa xä ñho hingä pädihu̱ rꞌa yä tꞌo̱tꞌe. Näꞌä ma gä pädihu̱, ma dä maxkägihu̱ pa mänꞌa gä pe̱ꞌtsuäbihu̱ rä komfiansa ge rä Zi Dada Jeoba «hinte mä tsꞌoki di ñꞌoui näꞌä rä mfädi pe̱ꞌtsi». ꞌNe ge näꞌä mänꞌa pädi ndaꞌä mä ñhohu̱, hänge näꞌä nzäntho ma dä ꞌñutkägihu̱ ho̱nse̱ näꞌä handi ge di ja mꞌe̱di gä pädihu̱ (Job 37:16).

HINDI PÄDIHU̱ HÄMꞌU̱ DÄ ZO̱HO̱ RÄ FIN

4. Ja ngu di handihu̱ ha Mateo 24:​36, ¿te hindi pädihu̱?

⁴ (Hñeti Mateo 24:​36, TNM). Nuju̱ hindi pädihu̱ hämꞌu̱ ma dä uadi gatꞌho nuꞌu̱ yä tsꞌo tꞌo̱tꞌe di nheki mäpaya. Mi mꞌu̱kua rä Hesu ha rä Xiꞌmhai nixi geꞌä himi pädi «te mä pa ꞌne te mä ora» ma dä zo̱ho̱ rä fin.a Nꞌa rä pa, rä Hesu bi ꞌñembäbi nuꞌu̱ yä apostol ge rä Zi Dada Jeoba go geꞌä di mända rä tiempo ꞌne yä pa, ꞌne go geꞌä di desidi hämꞌu̱ dä thogi yä tꞌo̱tꞌe (Hech. 1:​6, 7). Rä Zi Dada Jeoba ya xä hñutsꞌi te mä fecha ma dä ꞌñepu̱ rä fin ꞌne nuju̱ hindä za gä pädihu̱ te mä paꞌä.

5. Koꞌmu̱ hindi pädihu̱ hämꞌu̱ ma dä zo̱ho̱ rä fin, ¿rꞌabu̱ te dä za gä sentihu̱?

⁵ Ko näꞌä bi mää rä Hesu ha Mateo 24:​36, hindi pädihu̱ mä hängu rä tiempo ma gä to̱ꞌmihu̱ asta dä zo̱ho̱ rä fin. Po geꞌä rꞌabu̱ dä za gä tumämu̱ihu̱ o gä desanimähu̱, mänꞌa mu̱ ya o̱tꞌe ndunthi yä je̱ya di pe̱päbihu̱ rä Zi Dada Jeoba. ꞌNehe, koꞌmu̱ hindi pädihu̱ hämꞌu̱ ma dä zo̱ho̱ rä fin, rꞌabu̱ dä za dä jakägihu̱ xä ñhei gä sigihu̱ gä ze̱tihu̱ nuꞌu̱ yä ntsꞌomꞌu̱i o̱tkägihu̱ yä jäꞌi ngeꞌä di pe̱päbihu̱ rä Zi Dada Jeoba (2 Ped. 3:​3, 4). Rꞌabu̱ asta dä za gä enähu̱: «Mu̱ gä pädihmä hämꞌu̱ ma dä zo̱ho̱ rä fin, zäi ge mänꞌa hindä jakägi xä ñhei gä pe̱ꞌtsä rä pasensia ꞌne gä sigi gä ze̱ti yä ntsꞌomꞌu̱i».

6. ¿Por hanja mänꞌa xä ñho hingä pädihu̱ hämꞌu̱ ma dä zo̱ho̱ rä fin?

⁶ Rä Zi Dada Jeoba hingi xikägihu̱ te mä pa nixi te mä ora ma dä zo̱ho̱ rä fin, pa njabu̱ gä udihu̱ hängu di pe̱ꞌtsuäbi rä komfiansa ꞌne hängu di mädihu̱. Nuju̱ di ne gä pe̱päbihu̱ pa nzäntho rä Zi Dada Jeoba ngeꞌä xa di mädihu̱ hingä ngeꞌä ma dä hä rä fin. Hänge en lugar de gä tumämu̱ihu̱ hämꞌu̱ ma dä zo̱ho̱ rä fin, mänꞌa dä hogi gä benihu̱ te ma dä me̱fi rä Zi Dada Jeoba näꞌä rä paꞌä ꞌne te mä jäpi ma dä hä mꞌe̱fa. Mu̱ gä hudihu̱ gä ntso̱ꞌmihu̱ näꞌä ma dä me̱fi rä Zi Dada Jeoba ꞌne por hanja, geꞌä ma dä maxkägihu̱ pa mänꞌa gä mädihu̱ ꞌne geꞌä ma dä jakägihu̱ xa gä o̱thu̱ ntsꞌe̱di po gä johyabihu̱ rä koraso (2 Ped. 3:​11, 12).

7. ¿Te hää di pädihu̱?

⁷ Mänꞌa xä ñho gä e̱ntꞌihu̱ ha mä mfenihu̱ ꞌne hingä pumfrihu̱ näꞌä hää di pädihu̱. Pe, ¿te hää di pädihu̱? Di pädihu̱ ge dende rä je̱ya 1914 bi mu̱di yä gäxä pa. ¿Hanja di pädihu̱? Ngeꞌä dende mäyaꞌmu̱ rä Zi Dada Jeoba bi mända dä tꞌofo ha rä Mäkä Tꞌofo näꞌä ma dä thogi durante yä gäxä pa, ꞌne geꞌä ya di handihu̱ ge thogi mäpaya. Po geꞌä, hinte mä duda di pe̱ꞌtsihu̱ ge «rä pa Jeoba ya ꞌmu̱i getbu̱» (Sof. 1:14). ¿Pe gi pädi te ne rä Zi Dada Jeoba gä pe̱fihu̱? Näꞌä ne ge nuju̱ gä utihu̱ gatꞌho yä jäꞌi nuꞌu̱ «yä hogä notisia de rä Tsꞌu̱tꞌhui» (Mat. 24:​14, TNM). Mäpaya yä testigo rä Jeoba ya udi de rä Noya Äjuä ha 240 yä dähni ha thogi de 1.000 yä ñhäki o idioma. Ja ngu di handihu̱, hingä mähyoni gä pädihu̱ te mä pa ꞌne te mä ora ma dä ꞌñehe rä pa rä Zi Dada Jeoba, pa ko ndunthi rä johya gä mfaxtehu̱ gä uñhu̱ ntꞌo̱de de rä Noya.

RꞌABU̱ HINDI PÄDIHU̱ HANJA MA DÄ MAXKÄGIHU̱ JEOBA

8. ¿Te me̱ꞌu̱ «yä ꞌme̱fi Äjuä»? (Eclesiastés 11:5).

⁸ Nuju̱ hindi pädihu̱ «gatꞌho nuꞌu̱ yä ꞌme̱fi Äjuä» (hñeti Eclesiastés 11:5). ¿Te me̱ꞌu̱ «yä ꞌme̱fi Äjuä»? Gatꞌho näꞌä pe̱fi rä Zi Dada Jeoba o näꞌä hopi dä thogi pa dä kumpli rä bolunta. Nuju̱ hindä za gä pädihu̱ xä ñho por hanja Jeoba hopi dä thogi rꞌa yä tꞌo̱tꞌe, nixi di pädihu̱ te ma dä me̱fi pa dä rꞌakägihu̱ rä mfatsꞌi (Sal. 37:5). Rä Mäkä Tꞌofo mää ge nunka ma gä pädihu̱, ja ngu hindi pädihu̱ xä ñho hanja ngu thogi yä pa di te nꞌa rä zi bätsi näꞌä o mbo ha rä mu̱i rä nänä. Mäpaya ꞌmu̱i ndunthi yä bämhñä nuꞌu̱ xä yꞌo̱tꞌe ntsꞌe̱di po dä bädi xä ñho te thogi ko nꞌa rä zi bätsi mbo ha rä mu̱i rä nänä, pe asta mäpaya hinxä logra xä bädi gatꞌho.

9. ¿Te dä za dä thogi ora hindi pädihu̱ hanja ma dä maxkägihu̱ rä Zi Dada Jeoba?

⁹ Mu̱ xa di tumämu̱ihu̱ ngeꞌä hindi pädihu̱ te ma dä me̱fi rä Zi Dada Jeoba pa dä rꞌakägihu̱ rä mfatsꞌi, geꞌä hingä ma dä hyokägihu̱ gä paatihu̱ näꞌä rä mꞌu̱i di tsitsꞌihu̱ pa mänꞌa gä pe̱päbihu̱ xä ñho rä Zi Dada Jeoba. Ora hindi pädihu̱ hanja ma dä maxkägihu̱ Jeoba, geꞌä dä za dä hyu̱skägihu̱ pa hingä tsohu̱bu̱ näꞌä rä ꞌme̱fi o nuꞌu̱ yä kosa di pe̱ꞌtsihu̱ pa mänꞌa dä za gä po̱nihu̱ gä predikahu̱, o pa gä maha habu̱ mänꞌa bi ja mꞌe̱di rä mfatsꞌi pa toꞌo dä predika. ꞌNehe, ora yä tꞌo̱tꞌe hingi po̱ni xä ñho ja ngu di to̱ꞌmihu̱, geꞌä dä za dä jakägihu̱ gä dudahu̱ ge rä Zi Dada Jeoba di numäñhogihu̱. Rꞌabu̱ xa di nehu̱ gä pe̱päbihu̱ mä nꞌa tu̱i rä Zi Dada Jeoba, pe di sentihu̱ ge mäske xa di o̱thu̱ ntsꞌe̱di, hindi lograhu̱ gä pe̱fihu̱ näꞌä di nehu̱. O rꞌabu̱ di sentihu̱ ge mäske xa di predikahu̱, yä jäꞌi hingi ne dä yꞌo̱de. ꞌNehe mu̱ di faxtehu̱ pa dä thoki nꞌa rä Ngu de gä Mhuntsꞌi o mä nꞌa rä mäkä ꞌme̱fi, rꞌabu̱ tso̱kägihu̱ ndunthi yä xuñha nuꞌu̱ jakägihu̱ gä mbenihu̱ ge rä Zi Dada Jeoba hindi numäñho näꞌä di pe̱fihu̱.

10. ¿Te mä benefisio di hänihu̱ ora hindi pädihu̱ te ma dä me̱fi rä Zi Dada Jeoba pa dä maxkägihu̱?

¹⁰ Pe xa mähyoni gä benihu̱ ge ora hindi pädihu̱ te ma dä me̱fi rä Zi Dada Jeoba pa dä maxkägihu̱, benꞌgägihu̱ ge tsꞌu̱tho näꞌä mä mfenihu̱ di pe̱ꞌtsihu̱ ꞌne ge nunka ma dä ñhe̱hui ko näꞌä rä mfeni pe̱ꞌtsi rä Zi Dada Jeoba (Is. 55:​8, 9). Ora hindi pädihu̱ hanja ma dä maxkägihu̱ Jeoba, geꞌä ꞌnehe faxkägihu̱ pa hingä exä mä nsuhu̱ ge xa di pädihu̱ ndunthi, sino ke di debe gä pe̱ꞌtsuäbihu̱ rä komfiansa rä Zi Dada Jeoba ge ko rä mfatsꞌiꞌä, yä tꞌo̱tꞌe ma dä bo̱ni xä ñho. Ora di predikahu̱ ꞌne di tinihu̱ nuꞌu̱ yä zi jäꞌi ne dä yꞌo̱de, o nuꞌmu̱ po̱ni xä ñho nꞌa rä ꞌme̱fi näꞌä di jahu̱ ha rä hnini rä Zi Dada Jeoba, mähyoni go gä eꞌtsuäbihu̱ rä nsuꞌä ꞌne hingä mbenihu̱ ge näꞌä rä ꞌme̱fi bi bo̱ni xä ñho po mä tsꞌe̱dise̱hu̱ (Sal. 127:1; 1 Cor. 3:7). Pe mu̱ yä tꞌo̱tꞌe o nꞌa rä ꞌme̱fi hingi po̱ni xä ñho ja ngu ndi to̱ꞌmihu̱, di nupkägihu̱ mä mfenihu̱ gä pädihu̱ ge rä Zi Dada Jeoba handi gatꞌho näꞌä thogi (Is. 26:12). Mähyoni gä pe̱fihu̱ gatꞌho näꞌä tsu̱kägihu̱ gä jahu̱; ꞌne näꞌä hingi tsa, dä hogi go gä tsokuäbihu̱ ha yä yꞌe̱ rä Zi Dada Jeoba. Mäske hindi to̱ꞌmihu̱ dä ja nꞌa rä milagro pa dä ꞌñutkägihu̱ te mä ꞌñuu gä ju̱hu̱, pe hää di pädihu̱ ge ma dä maxkägihu̱ pa gä pe̱fihu̱ näꞌä xä ñho (Hech. 16:​6-10).

11. ¿Te mä nꞌa hää di pädihu̱?

¹¹ Gä beñhu̱ ꞌne hingä pumfrihu̱ näꞌä hää di pädihu̱, ¡faxkägihu̱ ndunthi! Pe, ¿te mä nꞌa hää di pädihu̱? Di pädihu̱ xä ñho ge rä Zi Dada Jeoba xa di mäkägihu̱, rä hojäꞌi, o̱tꞌe rä justisia ꞌne ge ja ndunthi rä mfädi. ꞌNehe di pädihu̱ ge näꞌä handi ko ndunthi rä muui gatꞌho näꞌä di pe̱fihu̱ po geꞌä ꞌne po mä zi kuhu̱. Rä Zi Dada Jeoba nunka ma dä pumfri dä jäpkägihu̱ ngeꞌä di yꞌohu̱ mänjuäntho ha rä ꞌñuu (Heb. 11:6).

HINDI PÄDIHU̱ TE MA DÄ THOGI NUꞌU̱ YÄ PA XÄ ꞌÑEPU̱

12. Ja ngu di handihu̱ ha Santiago 4:​13, 14, ¿te hindi pädihu̱?

¹² (Hñeti Santiago 4:​13, 14).b Ninꞌa de gekhu̱ hindä za gä pädihu̱ te ma dä thogi kongekhu̱ xudi o ndämäni, ngeꞌä «yä tsꞌo thogi nse̱kitho dä za dä zo̱päbi gatꞌho» (Ecl. 9:11). Nisikiera hindä za gä pädihu̱ mu̱ xudi o ndämäni tobe grä tehu̱ pa dä za gä pe̱fihu̱ näꞌä di mbenihu̱ o hinä.

13. ¿Te dä za gä sentihu̱ ora hindi pädihu̱ te ma dä thogi xudi o ndämäni?

¹³ Ora hindi pädihu̱ te ma dä thogi xudi o ndämäni geꞌä dä za dä jakägihu̱ xa gä tumämu̱ihu̱, gä ntso̱ꞌmihu̱, gä ntsuhu̱ ꞌne geꞌä dä za dä jakägihu̱ gä ꞌme̱dihu̱ rä johya. ꞌNehe mu̱ nse̱kitho tso̱kägihu̱ nꞌa rä xuñha o nꞌa rä tsꞌo thogi, geꞌä dä za dä jakägihu̱ xa gä tumämu̱ihu̱ o xa gä nkue̱hu̱. O mu̱ di handihu̱ ge yä tꞌo̱tꞌe hingi thogi ja ngu di to̱ꞌmihu̱ geꞌä ꞌnehe dä za dä desanimägihu̱ ndunthi (Prov. 13:12).

14. ¿Habu̱ bi ehe näꞌä xa mäjuäni rä johya? (Hyandi ꞌnehe rä kꞌoi).

¹⁴ Hindi mporta te mä xuñha o te mä tsꞌo thogi dä za dä zo̱kägihu̱, dä za gä utihu̱ rä Zi Dada Jeoba ge di ze̱tihu̱ ꞌne di pe̱päbihu̱ ngeꞌä xa di mädihu̱. Ha rä Mäkä Tꞌofo di tinihu̱ ge rꞌa yä ꞌme̱go rä Zi Dada Jeoba de mäyaꞌmu̱ bi thogi yä xuñha ꞌne yä tsꞌo thogi. Kongehnä utkägihu̱ ge rä Zi Dada Jeoba hingä nzäntho ma dä hñägägihu̱ gatꞌho yä xuñha o yä tsꞌo thogi. ꞌNehe rä Mäkä Tꞌofo utkägihu̱ ge rä Zi Dada Jeoba hingä ya xä yꞌofo näꞌä ma gä thogihu̱ kada nꞌa de gekhu̱. Rä Zi Dada Jeoba pädi xä ñho ge pa gä ꞌmu̱ihu̱ ko rä johya, hindi ja mꞌe̱di gä pädihu̱ gatꞌho näꞌä ma dä thogi xudi ndämäni, sino ke rä johya bi ehe ora di hombäbihu̱ yä tsꞌofo ꞌne di o̱tehu̱ (Jer. 10:23). Ora di o̱thu̱ ngue̱nda rä Zi Dada Jeoba ꞌne di honihu̱ näꞌä rä gia ꞌne rä mfatsꞌi bi ehe de geꞌä pa gä tomähu̱ nꞌa rä desision, di udihu̱ ge di mbenihu̱ ja ngu udi rä Mäkä Tꞌofo ora enä: «Mu̱ Äjuä geꞌä rä paha, ꞌne mu̱ dä rꞌakhu̱ rä te ꞌne rä nse̱ki, nuꞌmu̱ hää gä o̱thu̱ gatꞌho nuꞌä di beñhu̱» (Sant. 4:15).

15. ¿Te hää di pädihu̱ ge ma dä thogi xudi ndämäni?

¹⁵ Mäske hindi pädihu̱ te ma dä thogi xudi ndämäni, pe hää di pädihu̱ ge rä Zi Dada Jeoba xä prometegihu̱ dä rꞌakägihu̱ nꞌa rä te pa nzäntho. Di pädihu̱ xä ñho ge rä Zi Dada Jeoba nunka hate ꞌne joꞌo toꞌo dä hñäkuäbi pa dä kumpli gatꞌho yä promesa (Tito 1:2). Ho̱nse̱ rä Zi Dada Jeoba dä za dä ꞌñenä: «Dende ri mu̱di Nuga di mää hanja ma dä uadi yä tꞌo̱tꞌe, ꞌne dende mäyaꞌmu̱ dä mää nuꞌu̱ yä tꞌo̱tꞌe tobe hinxä thogi». Gatꞌho näꞌä bi mää mäyaꞌmu̱ ge ma dä thogi, geꞌä xä nheki ꞌne ma dä sigi dä kumpli gatꞌho näꞌä xä promete (Is. 46:10). Joꞌo toꞌo ma dä hñäkuäbi rä Zi Dada Jeoba pa dä mäkägihu̱ (Rom. 8:​35-39). Näꞌä ma dä rꞌakägihu̱ näꞌä rä mfädi di honihu̱, ma dä hotkägihu̱ ꞌne ma dä rꞌakägihu̱ rä tsꞌe̱di pa gä sigihu̱ gä ze̱tihu̱ gatꞌho näꞌä dä ꞌñekägihu̱. Hää, di pädihu̱ xä ñho ge rä Zi Dada Jeoba ma dä maxkägihu̱ ꞌne dä rꞌakägihu̱ rä jäpi (Jer. 17:​7, 8).

HINDÄ ZA GÄ PÄDIHU̱ ASTA HABU̱ PÄKÄGIHU̱ RÄ ZI DADA JEOBA

16. Mäske di jakägihu̱ xä ñhei gä kamfrihu̱, ¿te pädi rä Zi Dada Jeoba de gekhu̱? (Salmo 139:​1-6).

¹⁶ (Hñeti Salmo 139:​1-6). Rä Zi Dada Jeoba pädi xä ñho tenguꞌä mä ndoyꞌohu̱, mä mfenihu̱ ꞌne gatꞌho näꞌä di sentihu̱. Näꞌä hyaxtho di sugägihu̱. Pädi xä ñho te di mäñhu̱ ꞌne näꞌä di ne gä mäñhu̱, näꞌä di pe̱fihu̱ ꞌne por hanja di pe̱fihu̱ njabu̱. Rä rey David bi ꞌñenä ge rä Zi Dada Jeoba di theskägihu̱ pa di bijilagihu̱ ꞌne di sugägihu̱ ja ngu nꞌa rä mayꞌo näꞌä fadi ꞌne di su rä zi taxo. ¿Di jaꞌi xä ñhei gi kamfri ge Näꞌä Toꞌo bi hyoki gatꞌho mähetsꞌi ꞌne rä Xiꞌmhai hingi häki yä da de geꞌi pa di suꞌäꞌi? Zäi ge rä rey David ꞌnehe bi japi xä ñhei dä gamfri, hänge näꞌä bi ꞌñenä: «Näꞌä rä mfädi gi pe̱ꞌtsi, xa rä dängi ꞌne mä mfeni hingi tsu̱di dä bädi gatꞌho» (Sal. 139:6).

17. ¿Por hanja rꞌabu̱ jakägihu̱ xä ñhei gä kamfrihu̱ ge rä Zi Dada Jeoba päkägihu̱ xä ñho?

¹⁷ Rꞌabu̱ näꞌä rä modo hanja dä tehu̱, näꞌä bi ꞌñutkägihu̱ mä dadahu̱ ꞌne mä nänähu̱ dende ndi bätsihu̱, o nuꞌu̱ yä nzäi pe̱ꞌtsi yä jäꞌi ha näꞌä rä luga habu̱ dä tehu̱; po geꞌä rꞌabu̱ dä za dä jakägihu̱ xä ñhei gä kamfrihu̱ ge rä Zi Dada Jeoba xa di mäkägihu̱ ꞌne ge xa mäjuäni turämu̱i po gekhu̱. ꞌNehe mu̱ mä mꞌe̱tꞌo dä o̱tꞌehu̱ rꞌa yä tsꞌoki; po geꞌä dä za gä mbenihu̱ ge rä Zi Dada Jeoba nunka ma dä mäkägihu̱ o ge nunka ma dä za gä pe̱ꞌtsihu̱ nꞌa rä hogä ntsitsꞌi kongeꞌä. Asta rä rey David bi mbeni njabu̱ rꞌa yä mꞌiki (Sal. 38:​18, 21). O mu̱ xa di pexkehu̱ pa gä tsohu̱bu̱ rꞌa yä tꞌo̱tꞌe nuꞌu̱ hindi ho rä Zi Dada Jeoba, rꞌabu̱ zäi ge di enähu̱: «Pe, ¿por hanja rä Zi Dada Jeoba, akägi gä tsopu̱ nuya yä tꞌo̱tꞌe di handi ge hinxä ntsꞌo? ¿Hage hindi komprendegi?».

18. ¿Por hanja xä ñho gä kombensehu̱ mä mfenihu̱ ꞌne mä korasohu̱ ge rä Zi Dada Jeoba mänꞌa päkägihu̱ xä ñho ke nuju̱se̱? (Hyandi ꞌnehe yä kꞌoi).

¹⁸ Nuju̱ dä za gä kombensehu̱ mä mfenihu̱ ꞌne mä korasohu̱ ge rä Zi Dada Jeoba mänꞌa päkägihu̱ xä ñho ke nuju̱se̱, ꞌne ge näꞌä tsa dä hyandi näꞌä xä ñho de gekhu̱ mäske nuju̱se̱ hingi tsa gä handihu̱. Mäjuäni ge rä Zi Dada Jeoba handi näꞌä rä tsꞌoki di ñꞌouihu̱ o näꞌä hindi pe̱fihu̱ xä ñho, pe näꞌä mꞌe̱tꞌo handi te bi zixkägihu̱ gä pe̱fihu̱ njabu̱ ꞌne di ntiende xä ñho näꞌä di sentihu̱, di huegägihu̱ ꞌne hingi he̱gi de dä mäkägihu̱ (Rom. 7:15). Mäske rꞌabu̱ di tagihu̱ ora hingä geꞌä di pe̱fihu̱, pe di lograhu̱ gä kamfrihu̱ ge rä Zi Dada Jeoba xa di mäkägihu̱ ꞌne di baloragihu̱, geꞌä di nupkägihu̱ mä mfenihu̱ pa gä nangihu̱, gä mädihu̱ ꞌne gä sigihu̱ gä pe̱päbihu̱ ko ndunthi rä johya.

19. ¿Te di pädihu̱ xä ñho de rä Zi Dada Jeoba?

¹⁹ Di pädihu̱ xä ñho ꞌne hinte mä duda di pe̱ꞌtsihu̱ ge rä Zi Dada Jeoba näꞌä «rä mhäte» (1 Juan 4:​8, TNM). Di pädihu̱ ge gatꞌho nuꞌu̱ yä tsꞌofo ꞌne yä mhända xä rꞌakägihu̱, xä rꞌakägihu̱ ngeꞌä xa di mäkägihu̱ ꞌne nzäntho honi mä ñhouihu̱. Di pädihu̱ ge rä Zi Dada Jeoba bi uni rä Tꞌu̱ ngu nꞌa rä njutꞌi po gekhu̱, ngeꞌä näꞌä ne gä pe̱ꞌtsihu̱ nꞌa rä te pa nzäntho. Po näꞌä rä njutꞌi bi uni, dä za gä pe̱päbihu̱ rä bolunta mäske xtä mꞌu̱ihu̱ ko rä tsꞌoki (Rom. 7:​24, 25). ꞌNehe di pädihu̱ ge rä Zi Dada Jeoba «mänꞌa rä dängi ke mä korasohu̱ ꞌne näꞌä pädi gatꞌho» (1 Juan 3:​19, 20, TNM). Hää, mänꞌa di mporta näꞌä di mbeni rä Zi Dada Jeoba de gekhu̱ ke näꞌä di mbenise̱hu̱, ꞌne näꞌä pädi xä ñho ꞌne handi ge hää dä za gä pe̱päbihu̱ rä bolunta.

20. ¿Hanja faxkägihu̱ gä pädihu̱ ge rä Zi Dada Jeoba xikägihu̱ ho̱nse̱ näꞌä xa mähyoni?

²⁰ Gä pädihu̱ ge rä Zi Dada Jeoba xikägihu̱ ho̱nse̱ näꞌä xa mähyoni, geꞌä faxkägihu̱ pa hingä tumämu̱ihu̱ po näꞌä hindi pädihu̱. Mu̱ jabu̱ rꞌa yä tꞌo̱tꞌe näꞌä hinxä xikägihu̱, signifika ge hindi ja mꞌe̱di ꞌne ge mänꞌa dä hogi gä jamäsuhu̱ näꞌä hää ya xä xikägihu̱. Ora di pe̱fihu̱ njabu̱, di udihu̱ hängu rä komfiansa di pe̱ꞌtsuäbihu̱ rä Zi Dada Jeoba ngeꞌä «hinte mä tsꞌoki di ñꞌoui näꞌä rä mfädi pe̱ꞌtsi» (Job 36:4). Mäske mäpaya hingi tsu̱kägihu̱ gä pädihu̱ o gä ntiendehu̱ gatꞌho, pe ko ndunthi rä johya di to̱ꞌmihu̱ nꞌa rä te pa nzäntho habu̱ ma gä pädihu̱ ndunthi de näꞌä di nehu̱ ꞌne ma gä sigihu̱ gä pädihu̱ ndunthi de rä Zi Dada Jeoba (Ecl. 3:11).