Mä ngähä: Hurricane Ian, Florida, USA, September 2022 (Sean Rayford/Getty Images); center: Mother evacuating with her son, Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); mä ñꞌe̱i: Mass COVID testing, Beijing, China, April 2022 (Kevin Frayer/Getty Images)
¡ÑHOKI ꞌNE NDO̱ꞌMIHU̱!
2022: Nꞌa rä je̱ya habu̱ xa bi nja yä xuñha ꞌne yä dumu̱i | ¿Te udi rä Biblia?
Durante rä je̱ya 2022, ha yä notisia bi tꞌo̱de puru yä gerra, yä ñꞌäbojä, yä bu̱nthi yꞌee, yä nzo̱o̱ ꞌne märꞌa yä tsꞌo thogi. Rä Biblia xikägihu̱ por hanja thogi njabu̱.
¿Te udi rä Biblia de nuya yä tsꞌo thogi bi nja ha rä je̱ya 2022?
Nuya yä tsꞌogi bi nja ha rä je̱ya 2022, udi xä ñho ge xa mäjuäni di ꞌmu̱ihu̱ ha «yä gäxä pa» (2 Timoteo 3:1). Nuya «yä gäxä pa» bi mu̱di dende rä je̱ya 1914. Ma gä handihu̱ hanja nuꞌu̱ yä tsꞌo thogi di nheki mäpaya di nthe̱e̱ ko näꞌä ya xki mängä rä Biblia.
«Yä tuhni» (Mateo 24:6).
«Rä 2022, geꞌä rä je̱ya bi nheki yä gerra mänꞌaki ha Europa».a
Hyandi rä artikulo «Rä ejército Rusia bi yu̱tꞌi ha Ucrania».
«Yä dängä thuhu» (Mateo 24:7).
«Rä 2022, geꞌä rä je̱ya mänꞌa bi nheki yä thuhu ꞌne yä ñꞌäbojä».b
Hyandi rä artikulo «Rä gerra ha Ucrania japi mänꞌa dä mäki yä ñhuni ha gatꞌho rä Xiꞌmhai».
«Yä tsꞌo hñeni» (Lucas 21:11).
«Asta mäpaya, yä hñeni ngu rä polio, rä viruela del mono ꞌne rä COVID-19 xpä hänkägihu̱ ndunthi yä u̱gi ꞌne yä sufrimiento. Yä hñeni nguyatho, xä ꞌñudi ge yä jäꞌi hingi tsa te dä yꞌo̱tꞌe pa dä hñäki nuya yä hñeni».c
Hyandi rä artikulo «Rꞌato yä miyon yä jäꞌi xä du po rä COVID».
«Yä ntꞌudi nuꞌu̱ asta dri ungä rä ntsu» (Lucas 21:11).
«Ha rä je̱ya 2022 bi nja yä pa hyadi, yä seka, yä nzo̱o̱ ꞌne yä däyꞌe. Gatꞌho nuya yä tsꞌo thogi bi hñäkuäbi yä bida yä mꞌotho yä jäꞌi, ꞌne yä miyontho pe̱ꞌtsi te bi bo̱ni bi zopu̱ yä nguu».d
Hyandi rä artikulo «Po gatꞌho rä Xiꞌmhai xi xä patꞌi ndunthi rä Hyadi».
«Yä nxaxhni» (Lucas 21:11).
«Ha rä je̱ya 2022, yä jäꞌi bi ja yä uelga ꞌne bi nju̱tsꞌi kontra yä gobiernu ngeꞌä bi nja yä ñꞌäbojä ꞌne ha ndunthi yä luga xi bi mäki yä kosa».e
Hyandi rä artikulo «Po gatꞌho rä xiꞌmhai xi xä mäki yä kosa».
Xibye̱, ¿te di to̱ꞌmihu̱ ha rä je̱ya 2023?
Hinto pädi te to̱bgägihu̱ ha rä je̱ya 2023. Pe näꞌä hää di pädihu̱, ge näꞌä rä Gobiernu Äjuä xä ꞌñegi ha mähetsꞌi, mänꞌitꞌho ma dä hä ndunthi yä mpadi (Daniel 2:44). Hää, rä Gobiernu Äjuä ma dä huati gatꞌho nuꞌu̱ yä tsꞌo tꞌo̱tꞌe jakägihu̱ gä sufrihu̱ ꞌne ma dä japi dä tꞌo̱tꞌe rä bolunta Äjuä nuua ha rä Xiꞌmhai (Mateo 6:9, 10).
Di mbitaꞌihe gi jamäsuhu̱ näꞌä rä tsꞌofo bi uni rä Hesu nuꞌmu̱ bi ꞌñenä: «¡Ñhoki ꞌne ndo̱ꞌmihu̱!». ꞌNehe hyandi hanja gatꞌho nuꞌu̱ yä tsꞌogi di nheki ha rä Xiꞌmhai, di nthe̱e̱ ko nuꞌu̱ yä profecía ya xki mängä rä Biblia (Marcos 13:37). Mu̱ gi hohmä gi pädi hanja dä za dä maxꞌäꞌi ꞌne dä hupꞌä ri mu̱i näꞌä udi rä Biblia, po rä mäte hyoni gi ñäui nꞌa rä testigo rä Jeoba.
a AP News, «Rä 2022, geꞌä rä je̱ya bi nheki yä gerra mänꞌaki ha Europa», bi yꞌofo Jill Lawless, 8 de rä disiembre de rä 2022.
b World Food Programme, «bi nheki yä thuhu ꞌne yä ñꞌäbojä».
c JAMA Health Forum, «Asta mäpaya, yä hñeni ngu rä polio, rä viruela del mono ꞌne rä COVID-19 xpä hänkägihu̱ ndunthi yä u̱gi ꞌne yä sufrimiento», bi yꞌofo Lawrence O. Gostin, JD, 22 de rä septiembre de rä 2022.
d Earth.Org, «¿Por hanja ha rä je̱ya 2022 xi bi mpadi ndunthi rä clima?», bi yꞌofo Martina Igini, 4 de rä oktubre de rä 2022.
e Carnegie Endowment for International Peace, «Ha rä je̱ya 2022, yä jäꞌi bi ja yä uelga ꞌne nju̱tsꞌi kontra yä gobiernu ngeꞌä bi nja yä ñꞌäbojä ꞌne ha ndunthi yä luga xi bi mäki yä kosa» ?», bi yꞌofo Thomas Carothers ꞌne Benjamin Feldman, 8 de rä disiembre de rä 2022.