¿Toꞌo dä za gi pe̱ꞌspäbi rä komfiansa? | ¿Te udi rä Biblia?

Koꞌmu̱ ja yä jäꞌi nuꞌu̱ hatꞌi märꞌaa, hänge ndunthi yä hingi pädi toꞌo dä kamfri. Ndunthi xä ꞌme̱tuäbi rä komfiansa märꞌaa, por ejemplo . . .

• Yä politiko, ngeꞌä nuꞌu̱ honi yä ñhose̱ en vez de dä jamäsu näꞌä di japäbi ꞌme̱di yä jäꞌi.

• Nuꞌu̱ uni yä notisia, ngeꞌä hingä nzäntho mää näꞌä mäjuäni o ngu thogi yä tꞌo̱tꞌe.

• Näꞌä pe̱fi yä científico, ngeꞌä rꞌabu̱ nuꞌu̱ yä me̱fi hingi fatsꞌi yä jäꞌi.

• Nuꞌu̱ gu̱tꞌi rä ꞌñuu ha yä nijä, nuꞌu̱ mänꞌa di ho dä matsꞌi yä politiko ke dä me̱päbi Äjuä.

Hänge yä jäꞌi di jamäsu xä ñho toꞌo ma dä me̱ꞌspäbi rä komfiansa. Rä Mäkä Tꞌofo enä:

• «Ogi huxu̱ ri komfiansahu̱ ha nuꞌu̱ yä jäꞌi di mändaꞌihu̱, ninꞌa rä mexiꞌmhai, ngeꞌä nuꞌu̱ hindä za dä salbaꞌihu̱» (Salmo 146:3).

Toꞌo hää dä za gi pe̱ꞌspäbi rä komfiansa

 Rä Biblia xikägihu̱ toꞌo hää dä za gä pe̱ꞌspäbihu̱ rä komfiansa: Rä Ñhesukristo. Näꞌä hingä se̱he̱ nꞌa rä ñꞌo̱ho̱ näꞌä bi mꞌu̱kua mäyaꞌmu̱, rä Biblia enä de geꞌä: «Näꞌä ma dä mända pa nzäntho. . . . ꞌNe rä gobiernu hinto ma dä huati» (Lucas 1:32, 33). Äjuä go bi hñutsꞌi rä Hesu pa dä ndä ha rä Tsꞌu̱tꞌhuiꞌä. Mäpaya näꞌä ya bi mända dende mähetsꞌi (Mateo 6:10).

• Pa gi pädi por hanja hää dä za gi pe̱ꞌspäbi rä komfiansa rä Hesu, hyandi nuya yä artikulo «¿Quién es el Rey del Reino de Dios?» ꞌne «Qué hará el Reino de Dios?»