¿Te dä za gä pädihu̱ de nuꞌu̱ yoho yä karta bi yꞌofo Pedro?

1. ¿Te mä ꞌme̱fi bi umbäbi rä Zi Dada Jeoba rä apostol Pedro änte de xä tho?

RÄ APOSTOL Pedro bi me̱päbi rä Zi Dada Jeoba durante ndunthi yä je̱ya. Bi ñꞌoui rä Hesu nuꞌmu̱ bi mꞌu̱kua ha rä Xiꞌmhai, bi ꞌñuti de rä Noya Äjuä nuꞌu̱ yä jäꞌi myä mengu de märꞌa yä luga ꞌne bi mpe̱fi ko rä cuerpo gobernante de näꞌä tiempoꞌä. Rä apostol Pedro mi pädi ge ya himi ꞌme̱di ndunthi rä tiempo pa xä du, pe tobe bi hñäni mä nꞌa rä ꞌme̱fi näꞌä bi umbäbi rä Zi Dada Jeoba. Entre nuꞌu̱ yä je̱ya 62 ꞌne 64, rä Zi Dada Jeoba bi umbäbi rä mäkä tsꞌe̱di pa bi yꞌofo yoho yä karta nuꞌu̱ fädi ngu rä 1 Pedro ꞌne rä 2 Pedro. Rä apostol Pedro mi ne ge mꞌe̱fa de xä du, nuya yoho yä karta xä sigi xä matsꞌi nuꞌu̱ yä de̱ni rä Hesu (2 Ped. 1:​12-15).

2. ¿Por hanja dä za gä eñhu̱ ge nuꞌu̱ yoho yä karta bi yꞌofo rä apostol Pedro, geꞌä rä mfatsꞌi xa mi japäbi mꞌe̱di nuꞌu̱ yä kristianu de näꞌä tiempoꞌä?

² Nuꞌmu̱ rä apostol Pedro bi yꞌofo nuya yoho yä karta, yä kristianu mi thogi po ndunthi yä xuñha ꞌne yä prueba (1 Ped. 1:6). Mi ꞌmu̱i rꞌa yä jäꞌi nuꞌu̱ xa myä tsꞌomꞌu̱i nuꞌu̱ mi udi näꞌä hingä mäjuäni ha yä mhuntsꞌi ꞌne mi tsitsꞌi nꞌa rä mꞌu̱i näꞌä hingi tꞌaxi. Nuyu̱ yä jäꞌi mi trata dä ꞌueke yä kristianu de näꞌä rä ꞌñuu xki ꞌñuti rä Hesu (2 Ped. 2:​1, 2, 14). ꞌNehe, nuꞌu̱ yä kristianu mi ꞌmu̱i ha Jerusalén, mänꞌitꞌho ma xä hyandi hanja nuꞌu̱ yä soldado de Roma ma xä zo̱ho̱ pa xä huati rä hnini ꞌne rä templo (1 Ped. 4:7). Otho rä duda ge nuꞌu̱ yä karta bi yꞌofo rä apostol Pedro, bi matsꞌi nuꞌu̱ yä kristianu de näꞌä tiempoꞌä pa bi ze̱ti nuꞌu̱ yä prueba mi thogi ꞌne nuꞌu̱ yä xuñha bi ꞌñepäbi mꞌe̱fa.b

3. ¿Por hanja xa mähyoni gä pädihu̱ ꞌne gä jamäsuhu̱ näꞌä hutsꞌi ha nuꞌu̱ yoho yä karta bi yꞌofo rä apostol Pedro?

³ Mäske rä apostol Pedro bi yꞌofo nuya yoho yä karta pa nuꞌu̱ yä kristianu de näꞌä tiempoꞌä, rä Zi Dada Jeoba bi ne ge nuya yä karta xä gohi ꞌnehe ha rä Mäkä Tꞌofo pa ꞌnehe dä maxkägihu̱ mäpaya (Rom. 15:4). Mäpaya yä jäꞌi di ho dä zitsꞌi nꞌa rä mꞌu̱i näꞌä hingi tꞌaxi. ꞌNehe, hyaxtho di ñhanduihu̱ yä xuñha, yä dumu̱i ꞌne märꞌa yä tꞌo̱tꞌe nuꞌu̱ ne dä hñägägihu̱ de gä pe̱päbihu̱ rä Zi Dada Jeoba. Pe hingä ho̱nse̱ꞌä, mänꞌitꞌho ma gä handihu̱ nꞌa rä däta mbidi mänꞌa xä ntsꞌo ke näꞌä bi thogi Jerusalén nuꞌmu̱ bi tso̱ni yä soldado de Roma pa bi huati rä hnini ꞌne rä templo. Hänge nuya yoho yä karta bi yꞌofo rä apostol Pedro, ma dä maxkägihu̱ ndunthi pa gä sigihu̱ gä to̱ꞌmihu̱ rä pa rä Zi Dada Jeoba. ꞌNehe ma dä maxkägihu̱ pa gä täpäbihu̱ rä ntsu, ꞌne pa gä potꞌihu̱ näꞌä xa mäjuäni rä mhäte po gatꞌho yä ku. Nuꞌu̱ yä tsꞌofo hutsꞌi ha nuya yoho yä karta, ꞌnehe ma dä matsꞌi yä anciano pa mänꞌa dä jamäsu ꞌne dä matsꞌi yä ku de rä mhuntsꞌi.

MA GÄ NDO̱ꞌMIHU̱

4. ¿Te dä za dä desanimägihu̱? (2 Pedro 3:​3, 4).

⁴ Kasi gatꞌho yä jäꞌi hingi ne dä gamfri näꞌä mängä rä Mäkä Tꞌofo ge ma dä thogi. Koꞌmu̱ yä testigo rä Jeoba ya o̱tꞌe ndunthi yä je̱ya mää ge Äjuä mänꞌitꞌho ma dä huati gatꞌho nuꞌu̱ yä tsꞌo tꞌo̱tꞌe ja ha rä xiꞌmhai, rꞌa yä jäꞌi nuꞌu̱ hingi mäkägihu̱ thengägihu̱ ꞌne mää ge rä fin nunka ma dä ꞌñepu̱ (hñeti 2 Pedro 3:​3, 4, TNM). ¿Te di sentihu̱ ora toꞌo xikägihu̱ njabu̱? ¿Te ma dä maxkägihu̱ pa hindä desanimägihu̱? Ma gä handihu̱ te mä konseho bi uni rä apostol Pedro.

5. ¿Te ma dä maxkägihu̱ pa gä ntiendehu̱ por hanja rä Zi Dada Jeoba tobe hinxä huati nuꞌu̱ yä tsꞌo tꞌo̱tꞌe ja ha rä xiꞌmhai? (2 Pedro 3:​8, 9).

⁵ Rꞌaa dä za dä mbeni ge rä Zi Dada Jeoba xa di tarda pa dä hñäki nuꞌu̱ yä ntsꞌomꞌu̱i ja ha rä Xiꞌmhai. Pe rä apostol Pedro benꞌgägihu̱ ge rä Zi Dada Jeoba hingi handi yä pa nixi rä tiempo ja ngu di handihu̱ (hñeti 2 Pedro 3:​8, 9, TNM). Pa rä Zi Dada Jeoba nꞌa mꞌo yä je̱ya ꞌñenä go nꞌa pa. ꞌNehe rä Zi Dada Jeoba pe̱skägihu̱ ndunthi rä pasensia ꞌne hingi ne dä hyandi ninꞌa rä jäꞌi dä ꞌme̱di rä te. Pe rä pa rä Zi Dada Jeoba ma dä zo̱ho̱ ꞌne ma dä huati gatꞌho nuꞌu̱ yä tsꞌo tꞌo̱tꞌe di nheki ha rä Xiꞌmhai. ¿Hänge xi nꞌa rä däta nsu pa gekhu̱ gä usahu̱ näꞌä rä tiempo kohi pa gä utihu̱ gatꞌho yä jäꞌi de rä Zi Dada Jeoba?

6. ¿Te ma dä maxkägihu̱ pa hingä pumfrihu̱ ge rä Zi Dada Jeoba ya ꞌmu̱i getbu̱? (2 Pedro 3:​11, 12).

⁶ Rä apostol Pedro engägihu̱ ge di debe xa gä to̱ꞌmihu̱ näꞌä rä pa rä Zi Dada Jeoba (hñeti 2 Pedro 3:​11, 12, TNM). ¿Hanja dä za gä lograhu̱? Mähyoni gä hudihu̱ ꞌne gä ntso̱ꞌmihu̱ te mä mꞌu̱i to̱bgägihu̱ ha rä rꞌayꞌo xiꞌmhai. Xi nuꞌi, ¿gi imäjinä ge ya gi ꞌmu̱i ha rä rꞌayꞌo xiꞌmhai habu̱ gi ju̱ntsꞌi rä ndähi xä ntꞌaxi ꞌne gi tsi nuꞌu̱ yä ñhuni xä ku̱hi ꞌne uni rä nzaki? ¿Ya gi handi hanja ma gi umbäbi rä hogä ꞌñehe nuꞌu̱ yä jäꞌi xä du?, o ¿dä za gi imäjinä ge ya gi esplikabi yä jäꞌi hanja bi kumpli nuꞌu̱ yä profecía hutsꞌi ha rä Mäkä Tꞌofo? Mu̱ gi hudi gi imäjinä nuya yä jäpi xä ꞌñepu̱, ma dä jaꞌi gi beni ge ya di ꞌmu̱ihu̱ ha yä gäxä pa ꞌne geꞌä ma dä maxꞌäꞌi pa gi sigi gi ndo̱ꞌmi. Mäpaya ꞌmu̱i xi ndunthi yä jäꞌi nuꞌu̱ hingi kamfri ge rä pa rä Zi Dada Jeoba ya xä ꞌñepu̱. Pe koꞌmu̱ nuju̱ ya di pädihu̱ te ma dä thogi, hingä ma gä hopäbihu̱ dä hyo̱xkägihu̱ näꞌä di mbeniꞌu̱ (2 Ped. 3:17).

JU̱ RÄ BALO ꞌNE TÄPÄBI RÄ NTSU

7. ¿Te ma dä thogi mu̱ gä hopäbihu̱ dä däkägihu̱ rä ntsu?

⁷ Di pädihu̱ ge ya ꞌmu̱i getbu̱ näꞌä rä pa habu̱ Äjuä ma dä huati gatꞌho nuꞌu̱ yä tsꞌo tꞌo̱tꞌe ja ha rä Xiꞌmhai. Po rängeꞌä, di nehu̱ ge gatꞌho yä jäꞌi dä me̱ꞌtsi rä oportunida de dä yꞌo̱de nuꞌu̱ yä hogä notisia de rä Tsꞌu̱tꞌhui Äjuä. Pe rꞌabu̱ zäi ge di jakägihu̱ xä ñhei. ¿Por hanja? Ngeꞌä di tsuhu̱ te dä xikägihu̱ yä jäꞌi. Geꞌä bi senti rä apostol Pedro näꞌä xui änte de xä tho rä Hesu. Näꞌä bi ntsu ꞌne himbi me̱ꞌtsi rä balo pa bi mää ge ꞌnehe mi kamfri ꞌne mi de̱ni rä Hesu. Hää, ¡asta hñu mꞌiki bi mää ge himi pädi toꞌo rä Hesu! (Mat. 26:​69-75). Pe mꞌe̱fa, bi logra bi däpäbi rä ntsu ꞌne bi ꞌñenä: «Hänge oxki tsuhu̱ te dä tꞌo̱tꞌähu̱, nixi dä durimu̱ihu̱» (1 Ped. 3:14). Nuꞌu̱ yä noya bi mää rä apostol Pedro utkägihu̱ ge hää dä za gä ju̱hu̱ rä balo ꞌne gä täpäbihu̱ rä ntsu.

8. ¿Te ma dä maxkägihu̱ pa gä ju̱hu̱ rä balo ꞌne gä täpäbihu̱ rä ntsu? (1 Pedro 3:15).

⁸ ¿Te dä za dä maxkägihu̱ pa gä ju̱hu̱ rä balo ꞌne gä täpäbihu̱ rä ntsu? Rä apostol Pedro bi ꞌñenä: «Dende ha ri korasohu̱, nsundahu̱ rä Kristo ngu ri Hmuuhu̱» (hñeti 1 Pedro 3:​15, TNM). Hää, xa mähyoni gä imäjinähu̱ tenguꞌä näꞌä rä däta nsu pe̱ꞌtsi rä Kristo de gä rey ꞌne näꞌä rä tsꞌe̱di pe̱ꞌtsi. Hänge ora ja nꞌa rä oportunida de gi xipäbi nꞌa rä jäꞌi de rä Noya Äjuä —pe gi ntsa o gi tsu— beni toꞌo mä reyhu̱. Imäjinä hanja rä Kristo ya bi mända ha mähetsꞌi ꞌne nthetsꞌi de geꞌä bi ꞌmu̱i yä miyontho yä e̱nxe̱. ꞌNehe beni näꞌä bi mängä rä Kristo mi mꞌu̱kua ha rä Xiꞌmhai nuꞌmu̱ bi ꞌñenä: «Gatꞌho rä Tsꞌu̱tꞌhui xä tꞌe̱nkꞌägi ha mä yꞌe̱ pa gä ndä nuni mähetsꞌi ꞌne nuua ha rä xiꞌmhai». ꞌNepu̱ bi benꞌgägihu̱ ge di pe̱ꞌtsihu̱ rä mfatsꞌi ora bi ꞌñenä: «Di ꞌmu̱i kongeꞌähu̱ gatꞌho yä pa asta xti zo̱ho̱ rä fin» (Mat. 28:​18-20, TNM). Rä apostol Pedro bi uni mä nꞌa rä konseho nuꞌmu̱ bi ꞌñenä: «Ñhokihu̱ pa gi presentahu̱ nꞌa rä defensa ante nuꞌu̱ toꞌo dä yꞌaꞌähu̱ yä prueba». Xi nuꞌi, ¿gi hohmä gi predika ha ri ꞌme̱fi, ha rä skuela o ha mä nꞌa rä luga? Nde, beni habu̱ gi pe̱ꞌtsä rä oportunida de gi predika. ꞌNepu̱, beni xä ñho te ma gi mää. Yꞌapäbi rä Zi Dada Jeoba dä rꞌaꞌi rä balo ꞌne pe̱ꞌspäbi rä komfiansa ge Näꞌä ya xä ñhoki pa dä maxꞌäꞌi gi täpäbi rä ntsu (Hech. 4:29).

“XA DÄ MÄDIHU̱ NꞌA NGU MÄNꞌAA”

9. ¿Te bi me̱fi nꞌa rä pa rä apostol Pedro ꞌne por hanja? (Hyandi ꞌnehe rä foto).

⁹ Rä apostol Pedro bi yꞌo̱de nuꞌmu̱ rä Hesu bi ꞌñenä: «Nubye̱ nꞌa rä rꞌayꞌo mhända di tsokꞌähu̱: Mädihu̱ nꞌa ngu mänꞌaa, nja ngu stä mäꞌähu̱» (Juan 13:34). Hää, Pedro mi pädi xä ñho te mi signifika dä mädi nꞌa ngu mänꞌaa nuꞌu̱ yä de̱ni rä Hesu. Pe mäske njabu̱, ¿gi pädi te bi me̱fi nꞌa rä pa? Himbi ne bi ñuni ko nuꞌu̱ yä kristianu myä mengu de märꞌa yä dähni. Po rängeꞌä, rä apostol Pablo bi zu̱i Pedro ꞌne bi ꞌñembäbi ge näꞌä mrä yohmi ꞌne himi pe̱fi näꞌä bi mända rä Hesu (Gál. 2:​11-14). Rä apostol Pedro bi asepta näꞌä rä tsꞌu̱i ꞌne bi jamäsu näꞌä rä konseho bi tꞌumbäbi. Ha nuꞌu̱ yoho yä karta bi yꞌofo, bi ꞌñudi ge hingä ho̱nse̱ di debe gä sentihu̱ rä mhäte, sino ke di debe gä udihu̱ hängu di mädihu̱ mä kuhu̱.

10. ¿Te ma dä maxkägihu̱ pa xa mäjuäni gä mädihu̱ mä kuhu̱ ꞌne pa hingä udihu̱ nꞌa rä mhäte de gä yohmi? (1 Pedro 1:22).

¹⁰ Rä apostol Pedro bi ꞌñenä ge xa mäjuäni gä mädihu̱ mä kuhu̱ ꞌne hingä udihu̱ nꞌa rä mhäte de gä «yohmi» (hñeti 1 Pedro 1:​22, TNM). Näꞌä rä mhäteꞌä ehe ora xa mäjuäni di o̱tehu̱ rä Noya Äjuä. Hää, di udihu̱ näꞌä xa mäjuäni rä mhäte ngeꞌä di de̱mbäbihu̱ rä mꞌu̱i Äjuä ꞌne xtä handihu̱ hanja näꞌä «hingi huahnitho toꞌo dä numäñho» (Hech. 10:​34, 35, TNM). Mu̱ ho̱nse̱ nꞌa hängutho nuꞌu̱ mä kuhu̱ di mädihu̱, nuꞌmu̱ hindi pe̱fihu̱ näꞌä rä mhända bi uni rä Kristo. Mäjuäni ge rꞌabu̱ mänꞌa di ñꞌamigohu̱ ko rꞌa yä ku ke ko märꞌaa (Juan 13:23; 20:2). Pe rä apostol Pedro benꞌgägihu̱ ge debe gä mädihu̱ gatꞌho yä ku ja ngu di mädihu̱ mä familiahu̱ (1 Ped. 2:17).

11. ¿Te di signifika “gä mädihu̱ nꞌa ngu mänꞌaa ko ngatꞌho mä korasohu̱”?

¹¹ Rä apostol Pedro ꞌnehe bi ꞌñenä: «Xa dä mädihu̱ nꞌa ngu mänꞌaa ko ngatꞌho ri korasohu̱». ¿Te signifika nuya yä noya? Ge hingä ma gä mädihu̱ ho̱nse̱ nuꞌu̱ di mäkägihu̱, sino debe gä mädihu̱ asta nuꞌu̱ di ofendegihu̱. Mu̱ nꞌa mä kuhu̱ bi yꞌo̱tkägihu̱ rä ntsꞌomꞌu̱i, zäi gä nehmähu̱ gä o̱tpäbihu̱ rä ntsꞌomꞌu̱i ꞌnehe. Pe rä apostol Pedro bi hyandi ge xa mäjuäni näꞌä bi mängä rä Hesu nuꞌmu̱ bi ꞌñenä ge Äjuä hingi numäñho rä bengansa (Juan 18:​10, 11). Rä apostol Pedro bi yꞌofo nunä rä tsꞌofo: «Oxki o̱ꞌtuähu̱ rä ntsꞌomꞌu̱i nuꞌu̱ toꞌo o̱tꞌähu̱ rä ntsꞌomꞌu̱i, nixi gi tsañhu̱ nuꞌu̱ toꞌo tsañꞌähu̱. Nuꞌä gi yꞌo̱thu̱, yꞌaphu̱ Äjuä dä jäpäbiꞌu̱» (1 Ped. 3:9). Ma gi ꞌñudi ge gi jamäsu nunä rä konseho, mu̱ gi hopäbi ge rä mhäte dä jaꞌi gi ꞌñudi rä ñhojäꞌi ꞌne rä nhuekäte asta ko nuꞌu̱ di ofendeꞌi o di u̱ñꞌäꞌi.

12. a) ¿Te ma gä pe̱fihu̱ mu̱ xa mäjuäni di mädihu̱ yä ku? b) ¿Te animäꞌi gi pe̱fi rä bideo Cuidemos nuestra valiosa unidad?

¹² Zäi ge Pedro tobe mi beni näꞌä xki ꞌñudi rä Hesu nuꞌmu̱ bi mꞌu̱kua ha rä Xiꞌmhai. Nꞌa rä pa, rä apostol Pedro bi yꞌambäbi rä Hesu hage mi debe dä pumbäbi «asta 7 mꞌiki» nuꞌu̱ toꞌo mi ofende. ¿Pe gi pädi te bi mää rä Hesu? Näꞌä bi ꞌñenä: «Hindi xiꞌi asta 7 mꞌiki, sino asta 77 yä mꞌiki». Ja ngu di handihu̱, rä Hesu himbi ꞌñenä gä pedehu̱ hängu mꞌiki di pumbäbihu̱ nuꞌu̱ toꞌo di ofendegihu̱, sino di debe gä pumbäbihu̱ nzäntho (Mat. 18:​21, 22). Hänge nuꞌmu̱ rä apostol Pedro bi yꞌofo näꞌä rä mu̱di karta, näꞌä bi ꞌñenä: «Xa gi mädihu̱ nꞌa ngu mänꞌaa. Ngeꞌä rä mhäte koꞌmi nꞌa tꞌo̱ꞌtse yä pekado» (1 Ped. 4:​8, TNM). Xi nuꞌi, ¿di jaꞌi xä ñhei gi pumbäbi märꞌaa? Nde, rꞌabu̱ gatꞌho jakägihu̱ xä ñhei. Pe xa mähyoni gä o̱thu̱ ntsꞌe̱di po gä pumbäbihu̱ mä kuhu̱ ꞌne gä reglahu̱ nuꞌu̱ yä xuñha ja entre gekhu̱ pa gä ntsitsꞌihu̱ xä ñho.c

ANCIANOHU̱, JAMÄSUHU̱ RÄ MHUNTSꞌI

13. ¿Por hanja rꞌabu̱ yä anciano senti ge hingi huadi rä tiempo pa dä kumpli ko nunä responsabilida ja ngu dä nehmä?

¹³ Zäi ge rä apostol Pedro nunka bi pumfri näꞌä bi mändabi rä Hesu nuꞌmu̱ mi nangi de rä du. Rä Hesu bi ꞌñembäbi: «Supkä xä ñho mä zi de̱ti» (Juan 21:16). Nunä mhända ꞌnehe pa gatꞌho nuꞌu̱ yä anciano faxte ha yä mhuntsꞌi. Pe mu̱ nuꞌi grä anciano, zäi ge rꞌabu̱ gi senti ge hingi huadi rä tiempo pa gi kumpli ko nunä mäkä ꞌme̱fi ja ngu gi nehmä. ¿Por hanja? Ngeꞌä yä anciano ꞌnehe pe̱ꞌtsi te di mpe̱fi pa umbäbi te dä hyee ꞌne te dä zi yä familia ꞌne uti rä ꞌñuu rä Zi Dada Jeoba. Yä anciano go geꞌu̱ gu̱tꞌi rä ꞌñuu pa di tꞌungä ntꞌo̱de rä Noya Äjuä, di ñhoki pa uni yä discurso ha rä congregación ꞌne ha yä däta mhuntsꞌi. Pe hingä ho̱nse̱ꞌä, rꞌa yä anciano ꞌnehe faxte ha yä Comité de Enlace con los Hospitales o ha rä Departamento Local de Diseño y Construcción. Hää, gatꞌho yä anciano xa ja ndunthi te dä me̱fi.

14. ¿Te mähyoni dä beni yä anciano ora su yä ku de rä mhuntsꞌi? (1 Pedro 5:​1-4).

¹⁴ Rä apostol Pedro bi ꞌñembäbi nuꞌu̱ yä anciano mi faxte ha yä mhuntsꞌi: «Fadibihu̱ näꞌä rä taxo Äjuä» (hñeti 1 Pedro 5:​1-4, TNM). Mu̱ nuꞌi gi faxte de gä anciano, di pädihe ge nuꞌi gi mädi gatꞌho yä zi ku ꞌne ko rä mhäte gi ne gi jamäsu rä mhuntsꞌi. Pe koꞌmu̱ gatꞌho yä anciano xa ja ndunthi yä ꞌme̱fi ꞌne tsabi, zäi ge rꞌabu̱ gi senti ge hingi tsa gi kumpli ja ngu ri ꞌñehe nunä mäkä ꞌme̱fi. Mu̱ gi senti njabu̱, ¿te dä za gi pe̱fi? Xatuäbi rä Zi Dada Jeoba ꞌne xipäbi näꞌä gi senti ꞌne yꞌapäbi rä mfatsꞌi. Rä apostol Pedro embäbi yä anciano ge «dä mfaxte ko näꞌä rä tsꞌe̱di xä umbäbi Äjuä» (1 Ped. 4:11). Tal vez ndunthi de nuꞌu̱ yä xuñha pe̱ꞌtsi yä zi ku, ma dä mꞌe̱di asta ha rä rꞌayꞌo xiꞌmhai. Hänge ora gi handi ge nuꞌi hingi tsa gi fatsꞌi yä ku ja ngu gi nehmä, beni ge Ñhesukristo —näꞌä rä dängä mayꞌo— go geꞌä dä za dä matsꞌi tanto mäpaya ngu ha näꞌä rä xiꞌmhai xä ꞌñepu̱. Pe mäske rä Zi Dada Jeoba hingi apäbi yä anciano dä me̱fi näꞌä hingi tsa, hää apäbi dä mädi ꞌne dä jamäsu ko rä mhäte gatꞌho yä ku ꞌne dä ꞌñudi nꞌa rä hogä ejemplo ha rä mhuntsꞌi.

15. ¿Te pe̱fi rä ku William pa fatsꞌi yä ku de rä mhuntsꞌi? (Hyandi ꞌnehe rä foto).

¹⁵ William —nꞌa rä anciano näꞌä pe̱ꞌtsi ndunthi rä esperiensia— xa turämu̱i po dä umbäbi rä mfatsꞌi ja ngu ri ꞌñehe yä ku de rä mhuntsꞌi. Mi mu̱di rä COVID-19, William ꞌne märꞌa yä anciano de rä mhuntsꞌi bi mplatika, ꞌne bi hyandi hanja dä mfatsꞌi pa dä zofo tatꞌä semänä gatꞌho yä publicador de näꞌä rä grupo xkri nkargobi kada nꞌa de geꞌu̱. Rä ku William enä: «Koꞌmu̱ ndunthi yä ku mi ꞌmu̱se̱ ꞌne himi tsa dä bo̱ni po ränge rä COVID-19, dä handihe ge mänꞌa mi ja mꞌe̱di gä nupäbihe yä mfeni». ¿Te pe̱fi rä zi ku William pa di nupäbi yä mfeni yä ku? Mꞌe̱tꞌo di ho dä yꞌo̱de te tupäbi yä mu̱i. ꞌNepu̱ honi te mä imformäsio handi ge ma dä matsꞌi nuꞌu̱ yä ku —ngu nuꞌu̱ yä bideo ehe ha rä página jw.org—. Rä zi ku William enä: «Ha nuya yä gäxä pa, mänꞌa xa di ja mꞌe̱di drä su yä ku de rä mhuntsꞌi. Mu̱ di o̱tꞌehe ntsꞌe̱di po gä fatsꞌihe yä jäꞌi ꞌne di utihe de rä Zi Dada Jeoba, ¡kuantomäs di debe gä fatsꞌihe yä zi ku pa dä sigi dä ñꞌo ha rä ꞌñuu rä Zi Dada Jeoba!».

HYOPÄBI JEOBA DÄ SIGI DÄ ꞌÑUTꞌÄꞌI

16. ¿Hanja dä za gä udihu̱ ge di jamäsuhu̱ nuꞌu̱ yä konseho bi yꞌofo rä apostol Pedro ha nuꞌu̱ yoho yä karta?

¹⁶ Ya dä handihu̱ nꞌa hängu yä konseho nuꞌu̱ ehe ha nuꞌu̱ yä karta bi yꞌofo rä apostol Pedro ꞌne zäi ge ya gä da ngue̱nda habu̱ tobe di ja mꞌe̱di gi mpe̱fi mä nꞌa tu̱i. Por ejemplo, ¿dä za gi ꞌueke mä nꞌa tu̱i rä tiempo pa gi imäjinä nuꞌu̱ yä jäpi ma dä hä rä Zi Dada Jeoba ha rä rꞌayꞌo xiꞌmhai? ¿Dä za gi ungä ntꞌo̱de de rä Noya Äjuä ha ri ꞌme̱fi, ha rä skuela o ha mä nꞌa rä luga? ¿Ya gä handi de te mä forma dä za gi ꞌñudi ge xa mäjuäni gi mädi yä ku? Mu̱ gi faxte de gä anciano ha rä mhuntsꞌi, ¿gi ꞌmu̱i desidido gi sigi gi fatsꞌi yä zi ku ko ndunthi rä ganä ꞌne rä mhäte? Hñudi gi ntso̱ꞌmi pa gi hyandi habu̱ gi faya. Mu̱ ya gä da ngue̱nda, ¡ogi desanimä! Beni ge rä Zi Dada Jeoba ꞌmu̱i dispuesto dä rꞌaꞌi rä mfatsꞌi (1 Ped. 2:3). Rä apostol Pedro bi ꞌñenä: «Äjuä [ . . . ] go geꞌä ma dä huati ri entrenämientohu̱. [ . . . ] go geꞌä ma dä rꞌaꞌähu̱ rä tsꞌe̱di, ꞌne ma dä rꞌaꞌähu̱ nꞌa rä luga seguro pa dä za gi ꞌmaihu̱ xä ñho ꞌne hingi njuenihu̱» (1 Ped. 5:​10, TNM).

17. ¿Te ma gä tähähu̱ mu̱ gä hopäbihu̱ rä Zi Dada Jeoba dä ꞌñutkägihu̱ pa gä pe̱päbihu̱ ja ngu di Hoꞌä?

¹⁷ Nꞌa rä pa, Pedro bi senti ge himi meresebi dä mꞌai ndelante de rä Tꞌu̱ Äjuä (Luc. 5:8). Pe ko rä mfatsꞌi ꞌne rä mhäte rä Zi Dada Jeoba ꞌne rä Hesu, rä apostol Pedro bi logra bi ñꞌo ha näꞌä rä ꞌñuu bi ꞌñuti rä Kristo. ¿Te mä jäpi bi hñäni? Pedro bi thahni pa dä mända ko rä Kristo ha mähetsꞌi (2 Ped. 1:11). ¿Hänge xi nꞌa rä däta nsu? Ja ngu rä apostol Pedro, mu̱ nuꞌi ꞌnehe gi hyopäbi rä Zi Dada Jeoba dä ꞌñutꞌäꞌi pa gi pe̱päbi ja ngu adiꞌä, ꞌnehe ma dä rꞌaꞌi nꞌa rä däta njutꞌi. Hää, ¡ma dä rꞌaꞌi ꞌnehe nꞌa rä te pa nzäntho! (1 Ped. 1:9).