Ancianohu̱, de̱mbäbihu̱ rä ejemplo Gedeón

1. Ja ngu di handihu̱ ha 1 Pedro 5:2, ¿te mä mäkä me̱fi pe̱ꞌtsi yä anciano?

RÄ ZI Dada Jeoba xä nkargobi yä anciano dä supäbi yä zi de̱ti. Yä anciano handi ngu nꞌa rä däta nsu dä madi yä mhuntsꞌi, hänge o̱tꞌe ntsꞌe̱di po dä me̱päbi ꞌne dä jamäsu gatꞌho yä ku (Jer. 23:4; hñeti 1 Pedro 5:2). ¡Hängu di jamädibihu̱ rä Zi Dada Jeoba ngeꞌä xä hñutsꞌi yä anciano ha yä mhuntsꞌi!

2. ¿Te mä xuñha di ñhandui rꞌa yä anciano?

² Ora yä anciano pe̱fi näꞌä xä nkargobi rä Zi Dada Jeoba, rꞌabu̱ di ñhandui ndunthi yä xuñha. Por ejemplo, yä anciano xi pe̱ꞌtsi ndunthi rä ꞌme̱fi ora di su ꞌne di ñäni rä mhuntsꞌi. Tony, nꞌa rä anciano rä mengu Estados Unidos, mää ge koꞌmu̱ xi ja ndunthi rä ꞌme̱fi, rꞌabu̱ pe̱ꞌtsi te xä rekonose ge hingä gatꞌho dä za dä jase̱. Nuni zi ku enä: «Nuꞌmu̱ bi mu̱di rä COVID-19 xa mi ja ndunthi mä ꞌme̱fi pa ndi organisa yä mhuntsꞌi ꞌne rä tꞌungä ntꞌo̱de. Himi mporta hängu rä ꞌme̱fi ya ndi pe̱ꞌtsi, nunka ndi enä hinä. Pe ꞌnepu̱ ya himi pongi rä tiempo pa gä nxadi rä Mäkä Tꞌofo, ꞌne gä xatuäbi rä Zi Dada Jeoba». Ilir, nꞌa rä anciano rä mengu Kosovo, bi ñhandui ꞌnehe nꞌa rä däta xuñha. Koꞌmu̱ ha rä dähni Kosovo mi ja rä gerra, nuni zi ku xa mi japäbi xä ñhei dä me̱fi nuꞌu̱ yä instrucción mi umbäbi rä hnini rä Zi Dada Jeoba. Nuni zi ku enä: «Ora rä ngu Betel bi xikägi gä fatsꞌi nuꞌu̱ yä ku mi ꞌmu̱i ha nuꞌu̱ yä luga habu̱ mi ja ndunthi rä peligro, ¡xi dä ntsu! Pe hingä ho̱nse̱ꞌä, ndi senti ge näꞌä mi xikägi rä ngu Betel gä pe̱fi, hingä ma xä bo̱ni xä ñho. Hänge xä mi jakägi xä ñhei gä pe̱fi näꞌä mi mändagi nuꞌu̱ yä ku». Tim, nꞌa rä misionero de rä dähni Asia enä: «Xa mi jakägi xä ñhei gä kumpli ko ngatꞌho nuꞌu̱ mä responsabilida, ꞌne rꞌabu̱ xa mi tsabigi ꞌne asta xmä ñꞌu̱ mä ñäxu». ¿Te dä za dä me̱fi yä anciano ora thogi ja ngu bi thogi nuꞌu̱ yä zi ku ya dä no̱nihu̱?

3. Mu̱ dyä ancianohu̱ o hinä, ¿por hanja xä ñho gä de̱mbäbihu̱ rä ejemplo Gedeón?

³ Yä anciano dä za dä bädi ndunthi de rä ejemplo Gedeón (Heb. 6:12; 11:32). Gedeón bi ñäni ꞌne bi supäbi rä hnini rä Zi Dada Jeoba (Juec. 2:16; 1 Crón. 17:6). Ja ngu bi me̱fi Gedeón, mäpaya yä anciano ꞌnehe supäbi rä hnini rä Zi Dada Jeoba ora thogi yä däta xuñha (Hech. 20:28; 2 Tim. 3:1). Gedeón mi pädi dä rekonose ora himi tsa dä me̱fi nꞌa rä tꞌo̱tꞌe. ꞌNehe, hingä mrä ꞌñexmänsu ꞌne nzäntho bi yꞌo̱te rä Zi Dada Jeoba. Ko rä mfatsꞌi Jeoba, Gedeón bi däpäbi nuꞌu̱ yä xuñha bi ñhandui. Mäske hingä dyä ancianohu̱, gatꞌho dä za gä balorahu̱ näꞌä rä ꞌme̱fi di ja yä anciano, ꞌne gä apoyahu̱ ora gu̱nkägihu̱ o rꞌakägihu̱ yä tsꞌofo (Heb. 13:17).

ORA JAꞌI XÄ ÑHEI GI ꞌÑENÄ HINÄ ꞌNE ORA TꞌETSꞌÄꞌI RI NSU

4. ¿Por hanja dä za gä eñhu̱ ge Gedeón mi rekonose näꞌä mi tsa dä me̱fi ꞌne näꞌä hinä, ꞌne ge himrä ꞌñexmänsu?

⁴ Gedeón mi rekonose ora himi tsa dä me̱fi nꞌa rä tꞌo̱tꞌe, ꞌne hingä mrä ꞌñexmänsu.b Nuꞌmu̱ yä madianita xki dominä yä israelita, rä Zi Dada Jeoba bi me̱hni nꞌa rä e̱nxe̱ pa bi xipäbi Gedeón ge go geꞌä xki huahni pa dä ñämbäbi rä hnini. Pe Gedeón bi dädi: «Mä familia geꞌä mänꞌa rä zi tꞌu̱ki de gatꞌho Manasés, ꞌne nuga hinte mä nsu di pe̱ꞌtsi ha rä ngu mä dada» (Juec. 6:15). Gedeón mi handi ge hingä ma xä za xä ja näꞌä bi mändabi rä Zi Dada Jeoba. Pe rä Zi Dada Jeoba himbi hye̱se̱ ꞌne bi matsꞌi Gedeón pa njabu̱ bi logra bi me̱fi näꞌä bi mändabi.

5. a) ¿Te mä hogä mꞌu̱i udi yä anciano? b) ¿Hämꞌu̱ dä za dä japäbi xä ñhei dä ꞌñudi nuꞌu̱ yä hogä mꞌu̱iꞌu̱?

⁵ Yä anciano nzäntho o̱tꞌe ntsꞌe̱di po dä ꞌñudi ge di rekonose ora tsa dä me̱fi nꞌa rä tꞌo̱tꞌe ꞌne ora hinä, ꞌnehe nuyu̱ yä ku hingyä ꞌñexmänsu (Miq. 6:8; Hech. 20:18, 19). Yä anciano hingi exä yä nsu po gatꞌho näꞌä pädi dä me̱fi, nixi di u̱ yä mfeni ora nꞌa rä tꞌo̱tꞌe hingi po̱nibi xä ñho. Pe mähyoni dä beni yä anciano ge rꞌabu̱ dä za dä japäbi xä ñhei dä ꞌñudi nuya yä hogä mꞌu̱i. Por ejemplo, rꞌa yä anciano ne dä asepta gatꞌho näꞌä rä ꞌme̱fi tꞌumbäbi ha rä mhuntsꞌi mäske pädi ge ma dä japäbi xä ñhei dä kumpli ko ngatꞌho. Märꞌa yä anciano, japäbi xä ñhei dä dädi ngu ri ꞌñehe ora tꞌespäbi yä nsu po gatꞌho näꞌä pe̱fi ha rä mhuntsꞌi, o nuꞌmu̱ dri kritika po näꞌä rä modo hanja di ja nꞌa rä tꞌo̱tꞌe. Ora thogi njabu̱, ¿hanja dä za yä anciano dä de̱mbäbi rä ejemplo Gedeón?

6. Ora ja ndunthi te dä me̱fi yä anciano ha rä mhuntsꞌi, ¿hanja debe dä de̱mbäbi rä ejemplo Gedeón? (Hyandi ꞌnehe rä foto).

⁶ Yꞌadihu̱ rä mfatsꞌi. ¿Te pe̱fi nꞌa rä jäꞌi ora di rekonose ge hingi tsa dä ja gatꞌho näꞌä rä ꞌme̱fi tꞌumbäbi? Ja ngu Gedeón pe̱ꞌtsi te apäbi rä mfatsꞌi märꞌaa (Juec. 6:27, 35; 7:24). Geꞌä pe̱fi ꞌnehe yä anciano. Tony, näꞌä rä anciano ya dä no̱nihu̱ enä: «Näꞌä rä modo de hanja bri educagi, mi jakägi gä asepta gatꞌho nuꞌu̱ yä ꞌme̱fi mi tꞌakägi mäske xa mi jakägi xä ñhei gä kumpli ko ngatꞌho. Hänge ora dä pe̱ꞌtsihe mä Mhuntsꞌihe de gä Familia, dä apäbi mä zi ꞌme̱hñä ge dä xikägi te mi mbeni de näꞌä ndi pe̱fi. ꞌNehe dä handi näꞌä rä bideo rä thuhu ꞌÑudi ꞌne pe̱ꞌspäbi rä komfiansa märꞌaa ja ngu bi ja rä Hesu, ja ha jw.org». ¿Hanja bi matsꞌi Tony nunä imformäsio bi dini? En lugar de dä jase̱ gatꞌho yä me̱fi, nubye̱ bi yꞌapäbi rä mfatsꞌi märꞌaa ꞌne xikägihu̱ te mä benefisio bi hyandi. Nunä ku enä: «Gatꞌho xrä atiende nuꞌu̱ yä ꞌme̱fi xä nja ha rä mhuntsꞌi, ꞌne nubye̱ hää di pe̱ꞌtsi mä ndunthi rä tiempo pa gä japäbi dä ze̱di mä ntsitsꞌi ko rä Zi Dada Jeoba».

7. ¿Hanja dä za yä anciano dä de̱mbäbi rä ejemplo Gedeón ora toꞌo di kritika? (Santiago 3:13).

⁷ Ogi nkue̱hu̱ ora toꞌo di kritikaꞌihu̱. Ora nꞌa rä anciano dri kritika, dä za dä japäbi xä ñhei dä dädi ngu ri ꞌñehe. Pe Gedeón bi ꞌñudi nꞌa rä hogä ejemplo ora thogi njabu̱. Näꞌä mi rekonose ge hingä nzäntho mi po̱nibi xä ñho gatꞌho näꞌä mi pe̱fi. Hänge nuꞌmu̱ yä me Efraín bi kritika, Gedeón himbi nkue̱ po geꞌä (Juec. 8:1-3). Ko rä ñhojäꞌi Gedeón bi yꞌo̱tsꞌe näꞌä mi ne dä mää nuꞌu̱ yä jäꞌiꞌu̱ ꞌne njabu̱ bi logra bi hueꞌti yä xuñha. Ja ngu Gedeón, nuꞌu̱ yä anciano ja yä mfädi, hindi nkue̱ ora dri kritika. Sino ko rä tꞌekꞌei ꞌne rä ñhojäꞌi o̱tsꞌe te ne dä mää nuꞌu̱ yä ku (hñeti Santiago 3:13). Ora pe̱fi njabu̱, nuꞌu̱ japi dä nja nꞌa rä hogä ntsitsꞌi ha rä mhuntsꞌi.

8. ¿Te debe dä me̱fi yä anciano ora tꞌespäbi yä nsu po näꞌä pe̱fi ha rä mhuntsꞌi? Mää te bi thogi nꞌa rä zi ku.

⁸ ꞌÑeꞌspäbihu̱ rä nsu rä Zi Dada Jeoba. Nuꞌmu̱ Gedeón bi tꞌespäbi rä nsu ngeꞌä xki däpäbi yä madianita, Gedeón go bi ꞌñeꞌspäbi rä nsu rä Zi Dada Jeoba (Juec. 8:22, 23). Yä anciano dä za dä de̱mbäbi rä ejemplo Gedeón ora tꞌespäbi yä nsu po näꞌä pe̱fi ha rä mhuntsꞌi (1 Cor. 4:6, 7). Por ejemplo, ora yä ku di felisita yä anciano ngeꞌä udi xä ñho ha rä mhuntsꞌi, nuyu̱ yä ku mänꞌa dä hogi go dä ꞌñeꞌspäbi rä nsu rä Zi Dada Jeoba, ngeꞌä go geꞌä rꞌakägihu̱ rä mfädi po mäde de rä Mäkä Tꞌofo ꞌne po mäde de rä hnini. Yä anciano mähyoni ge njatꞌä dä ñꞌanise̱ mu̱ näꞌä rä modo hanja udi ha rä mhuntsꞌi, eꞌspäbi rä nsu rä Zi Dada Jeoba o go tꞌespäbi yä nsuꞌu̱. Nꞌa rä zi ku rä thuhu Timothy enä: «Nuꞌmu̱ bi thuxkägi de gä anciano xa ndi ho gä uni yä discurso, xa ndi honi ndunthi rä imformäsio pa ndi handi hanja gä fu̱di nuꞌu̱ mä discurso, ꞌne ndi usa ndunthi yä kꞌoi. Yä ku xa mi ho, ꞌne xa mi eskägi mä nsu ꞌne mi felisitagi. Pe dä da ngue̱nda ge näꞌä ndi pe̱fi hingo mi eꞌspäbi rä nsu rä Zi Dada Jeoba». Mꞌe̱fa, rä zi ku Timothy bi hyoni rä modo hanja dä uni nuꞌu̱ yä discurso pa njabu̱ hingo dä tꞌespäbi rä nsu sino go dä tꞌespäbi rä nsu rä Zi Dada Jeoba (Prov. 27:21). ¿Te xä thogi dende nuꞌmu̱ pe̱fi njabu̱ rä zi ku Timothy? Nuni zi ku enä: «Nubye̱ yä ku xikägi ge ora di uni nꞌa rä discurso, fatsꞌi pa täpäbi o ze̱ti nꞌa rä xuñha o fatsꞌi pa mänꞌa di joni ko rä Zi Dada Jeoba. Ora di o̱de njabu̱ mänꞌa rꞌakägi rä johya ke nuꞌmu̱ go mi tꞌeskägi mä nsu».

ORA DI JAꞌI XÄ ÑHEI GI PE̱FI NÄꞌÄ DI MÄNDA JEOBA O NUꞌMU̱ NE DÄ DOMINÄꞌI RÄ NTSU

9. ¿Te bi me̱fi Gedeón mäske zäi ge bi japäbi xä ñhei? (Hyandi rä kꞌoi de rä mu̱di nxii).

⁹ Rä Zi Dada Jeoba bi hñutsꞌi de gä nzaya Gedeón. Pa dä kumpli ko nunä däta responsabilida mi debe dä me̱ꞌtsi rä balo ꞌne dä yꞌo̱te rä Zi Dada Jeoba mäske xä japäbi xä ñhei. Jeoba bi mändabi ge dä yo̱ꞌte näꞌä rä altar xki hyoki rä dada Gedeón habu̱ mi tsäꞌtuäbi yä ofrenda ꞌne yä tꞌutsꞌi Baal (Juec. 6:25, 26). Nꞌa rä pa, Gedeón bi muntsꞌi xi ndunthi yä soldado pa dä ma duä ntuhni. Pe rä Zi Dada Jeoba asta yo mꞌiki bi xipäbi Gedeón ge hindä zitsꞌi gatꞌho nuꞌu̱ yä soldadoꞌu̱ ꞌne ge xä mändabi ndunthi de geꞌu̱ xä mengi ha yä nguu (Juec. 7:2-7). Mꞌe̱fa rä Zi Dada Jeoba bi mändabi Gedeón ge dä ma ko yä soldado de gä xui ꞌne dä yu̱tꞌi ha yä kampamento nuꞌu̱ yä nkontra pa duä hyo (Juec. 7:9-11).

10. ¿Por hanja rꞌabu̱ yä anciano dä za dä japäbi xä ñhei dä me̱fi näꞌä di mända rä Zi Dada Jeoba?

¹⁰ Yä anciano debe dä ꞌñudi ge ya xä ñhoki pa dä me̱fi näꞌä di mända rä Zi Dada Jeoba (Sant. 3:17). Nꞌa rä anciano näꞌä rä yꞌo̱de, mäntꞌä pe̱fi näꞌä di mända rä Mäkä Tꞌofo ꞌne näꞌä di mända rä hnini rä Zi Dada Jeoba. Ora pe̱fi njabu̱, umbäbi nꞌa rä hogä ejemplo märꞌaa. Rꞌabu̱ yä anciano dä za dä japäbi xä ñhei mäntꞌä dä me̱fi gatꞌho näꞌä di mändabi rä hnini rä Zi Dada Jeoba. Zäi ge rꞌabu̱ di duda ꞌne di ñꞌanise̱ mu̱ näꞌä di mhändabi dä me̱fi ma dä bo̱ni xä ñho o hinä. Rꞌabu̱ yä anciano di japäbi xä ñhei dä me̱fi näꞌä di mända rä hnini rä Zi Dada Jeoba, ngeꞌä yä autorida asta dä za dä yꞌe̱ntꞌi fadi. Ora thogi njabu̱, ¿hanja dä za yä anciano dä de̱mbäbi rä ejemplo Gedeón ꞌne dä jamäsu näꞌä di mända rä Zi Dada Jeoba?

11. ¿Te pe̱fi yä anciano ko näꞌä rä gia häni de rä Zi Dada Jeoba ꞌne de rä hnini?

¹¹ Yꞌo̱dehu̱ ꞌne pe̱fihu̱ näꞌä mända rä Zi Dada Jeoba. Jeoba bi xipäbi Gedeón hanja mi debe dä yo̱ꞌte näꞌä rä altar xki hyoki rä dada. ꞌNehe bi xipäbi habu̱ dä hyoki rä altar pa rä Zi Dada Jeoba ꞌne te mä mboꞌni mi debe dä uni de gä ofrenda. Gedeón hinte bi alega ꞌne nguntꞌä bi me̱fi näꞌä bi mhändabi. Mäpaya, yä anciano häni näꞌä rä gia uni rä Zi Dada Jeoba po mäde de rä hnini, yä karta, yä anunsio, pa njabu̱ dä bädi hanja dä su ꞌne dä ñäni yä mhuntsꞌi. Hängu di umbäbihu̱ njamädi yä anciano ngeꞌä di de̱ni nunä rä gia umbäbi rä Zi Dada Jeoba pa dä sugägihu̱ ꞌne dä su yä mhuntsꞌi (Sal. 119:112).

12. ¿Hanja dä za yä anciano dä jamäsu nunä tsꞌofo hutsꞌi ha Hebreos 13:17 ora rä hnini rä Zi Dada Jeoba di mända drä ja yä mpadi ha rä mhuntsꞌi?

¹² Pe̱fihu̱ mäntꞌä nuꞌu̱ yä mpadi uni rä hnini rä Zi Dada Jeoba. Beni ge rä Zi Dada Jeoba bi ꞌñembäbi Gedeón ge dä ꞌñembi dä mengi ha yä nguu kasi gatꞌho nuꞌu̱ yä soldado xki muntsꞌi (Juec. 7:8). Zäi ge Gedeón bi ñꞌanise̱: «¿Xa mähyoni gä koꞌtsi kasi gatꞌho nuyu̱ mä soldado? ¿Ma gä tähähe rä tuhni ko ho̱nse̱ nuyu̱ yä soldado bi gohi?». Zäi ge mäske Gedeón bi me̱ꞌtsi yä duda, näꞌä bi me̱fi näꞌä bi mändabi rä Zi Dada Jeoba. Mäpaya yä anciano de̱mbäbi rä ejemplo Gedeón ꞌne mäntꞌä pe̱fi nuꞌu̱ yä mpadi mända rä hnini rä Zi Dada Jeoba (hñeti Hebreos 13:17). Por ejemplo, ha rä je̱ya 2014 rä Cuerpo Gobernante bi mää ge dende geꞌmu̱, ma xä ꞌmati näꞌä rä modo de hanja dri jutꞌi nuꞌu̱ yä gasto ora thoki nuꞌu̱ yä Ngu de gä Mhuntsꞌi (2 Cor. 8:12-14). Mä mꞌe̱tꞌo mri hmipäbi rä bojä yä ku pa dä thoki nꞌa rä Ngu de gä Mhuntsꞌi, ꞌne mꞌe̱fa nuꞌu̱ yä ku de näꞌä rä mhuntsꞌiꞌä mi jutꞌi rꞌamätsꞌu̱u̱. Pe mäpaya rä hnini rä Zi Dada Jeoba xä ꞌueke näꞌä rä bojä xä uni yä mhuntsꞌi de gatꞌho rä Xiꞌmhai, ꞌne ja dri ju̱ni näꞌä rä bojä ora thoki nꞌa rä rꞌayꞌo Ngu de gä Mhuntsꞌi, ꞌne hindi mporta mu̱ yä zi ku de näꞌä lugaꞌä xä uni yä donäsio o hinä. Nuꞌmu̱ nꞌa rä anciano rä thuhu José bi bädi ge rä hnini Jeoba xki nja nunä rä mpadi, bi me̱ꞌtsi yä duda ꞌne bi ꞌñenä: «Nunä mpadi zäi ge ma dä hogi ha märꞌa yä luga de rä Xiꞌmhai pe nuua hinä. Gi nuhmähu̱ ge ninꞌa rä Ngu de gä Mhuntsꞌi ma dä za dä thoki». Pe mäske mi pe̱ꞌtsi yä duda rä ku José, bi desidi bi apoya nuꞌu̱ yä mpadi xki ja rä hnini rä Zi Dada Jeoba. Nuni zi ku enä: «Proverbios 3:5, 6 bi bengägi ge mähyoni gä pe̱ꞌspäbi rä komfiansa rä Zi Dada Jeoba. Dä jabu̱ ꞌne xä bo̱ni xä ñho gatꞌho näꞌä xtä pe̱fihe. Ko rä mfatsꞌi rä Zi Dada Jeoba xtä hokihe ndunthi yä Ngu de gä Mhuntsꞌi. Pe hingä ho̱nse̱ꞌä, ꞌnehe xtä pädihe ge xa mähyoni gä o̱tꞌehu̱ ntsꞌe̱di po gä mfaxtehu̱ ko näꞌä tsu̱kägihu̱».

13. a) Te mi pädi xä ñho Gedeón ge ma xä me̱fi rä Zi Dada Jeoba po geꞌä? b) ¿Hanja dä za yä anciano dä de̱mbäbi rä ejemplo Gedeón? (Hyandi ꞌnehe rä foto).

¹³ Ogi tsuhu̱ ora ja yä peligro. Mu̱ Gedeón mi tsu o hinä, pe näꞌä bi me̱päbi rä Zi Dada Jeoba ja ngu bi mändabi (Juec. 9:17). Rä Zi Dada Jeoba bi asegurabi Gedeón ge ma xä mꞌu̱i kongeꞌä. Hänge Gedeón himbi duda ge rä Zi Dada Jeoba ma xä matsꞌi ꞌne ma xä ñäni rä hnini. Ha nuꞌu̱ yä luga habu̱ yä autorida di proibi toꞌo dä predika o toꞌo dä muntsꞌi, ja ngu Gedeón nuꞌu̱ yä anciano ꞌmu̱i ha nuꞌu̱ yä lugaꞌu̱, hingi tsu ꞌne gu̱tꞌi rä ꞌñuu pa di organisa yä mhuntsꞌi, rä predicación, mäske pädi ge dä za dä ꞌme̱di yä ꞌme̱fi, ꞌmu̱i en peligro yä bida o mäske pädi ge dä za dä ꞌme̱hni fadi.c Nuꞌu̱ yä ntꞌu̱tsate ma dä thogi durante rä däta tribulación, yä anciano xa ma dä japäbi mꞌe̱di dä me̱ꞌtsi rä balo pa dä me̱fi näꞌä ma dä mända rä hnini rä Zi Dada Jeoba, mäske pädi xä ñho ge yä bida ma dä mꞌu̱i en peligro. Tal vez ma dä tꞌengägihu̱ gä xipäbihu̱ yä jäꞌi ge rä Zi Dada Jeoba nse̱kitho ma dä hämpäbi nꞌa rä juisio, ꞌne ora xti yꞌo̱de njabu̱ yä jäꞌi ma dä za ge ꞌñenä toꞌo bi umbäbi yä däta nkꞌahni ko yä ndo. Hänge rä hnini rä Zi Dada Jeoba zäi ge ma dä umbäbi yä instrucción yä anciano de hanja di debe gä xipäbihu̱ nunä rä mensaje yä jäꞌi, ꞌne te di debe gä pe̱fihu̱ xti zo̱ho̱ näꞌä rä ora habu̱ ma dä nju̱tsꞌi yä dähni kontra gekhu̱ (Ezeq. 38:18; Apoc. 16:21).

ORA YÄ TSABIꞌIHU̱

14. ¿Te bi me̱fi Gedeón mäske xa xki zabi?

¹⁴ Näꞌä rä responsabilida bi umbäbi rä Zi Dada Jeoba Gedeón, mi uni ndunthi rä nzabi. Por ejemplo, näꞌä rä xui bi ntunkui yä madianita, Gedeón bi te̱ti dende rä valle de Jezreel asta ha rä río Jordán. Zäi ge po gatꞌho rä ꞌñuu xa mi ja ndunthi yä ꞌmini (Juec. 7:22). ¿Te bi me̱fi Gedeón ko nuꞌu̱ yä soldado mi zo̱ni ha rä río Jordán? ¿Bi hye̱gi bi ma nuꞌu̱ yä nkontra? Hinä. Mäske nuꞌu̱ xa xki zabi, Gedeón ꞌne nuꞌu̱ 300 yä soldado bi sigi bi te̱ti nuꞌu̱ yä nkontra asta xa bi zu̱di ꞌne bi hyo (Juec. 8:4-12).

15. Rꞌabu̱, ¿te dä za dä senti yä anciano ora kumpli ko ngatꞌho nuꞌu̱ yä responsabilida xä umbäbi rä Zi Dada Jeoba?

¹⁵ Yä anciano pe̱ꞌtsi te di su yä familia ꞌne yä mhuntsꞌi. Ora di kumpli ko nunä rä responsabilida xä umbäbi rä Zi Dada Jeoba, zäi ge xa tsabi o rꞌabu̱ asta umbäbi rä u̱ ñäxu. Ora di senti njabu̱ yä anciano, ¿hanja dä za dä de̱mbäbi rä ejemplo Gedeón?

16, 17. a) ¿Te bi matsꞌi Gedeón pa bi ze̱ti? b) ¿Te mä komfiansa dä za dä me̱ꞌtsi yä anciano mäpaya? (Isaías 40:28-31; hyandi ꞌnehe rä foto).

¹⁶ Ogi dudahu̱ ge Jeoba ma dä rꞌaꞌähu̱ rä tsꞌe̱di. Gedeón mi pädi xä ñho ge Jeoba ma xä umbäbi rä tsꞌe̱di, ꞌne rä Zi Dada Jeoba himbi fayabi (Juec. 6:14, 34). Por ejemplo, nuꞌmu̱ yoho yä rey de Madián bi to̱ge yä kameyo ꞌne bi nextꞌi bi ma pa xä eskapahmä, Gedeón ko nuꞌu̱ yä soldado bi te̱ti ñꞌoua asta xa bi zu̱di (Juec. 8:12, 21). Hää, ko rä mfatsꞌi rä Zi Dada Jeoba, Gedeón ko nuꞌu̱ yä soldado bi za bi zu̱di nuꞌu̱ yä nkontra ꞌne bi däpäbi. Mäpaya yä anciano ꞌnehe dä za dä me̱ꞌtsi rä komfiansa ge rä Zi Dada Jeoba —näꞌä rä Zi Dada hingi tsabi nixi thege rä tsꞌe̱di— ma dä matsꞌi ꞌne ma dä umbäbi rä tsꞌe̱di (hñeti Isaías 40:28-31).

¹⁷ Nꞌa rä zi ku rä thuhu Matthew, faxte ha nꞌa rä Comité de Enlace con los Hospitales. ¿Te xä matsꞌi nuni rä zi ku pa dä ze̱ti? Rä zi ku Matthew enä: «Xtä handi ge xa mäjuäni näꞌä mää Filipenses 4:13. Ora xa tsabigi xa di xatuäbi rä Zi Dada Jeoba ꞌne di bäntebi dä rꞌakägi rä tsꞌe̱di ꞌne rä mfeni pa dä za gä sigi gä fatsꞌi yä ku. Oraꞌä xtä handi hanja rä Zi Dada Jeoba pe̱nkägi rä espiritu santo pa dä rꞌakägi rä tsꞌe̱di ꞌne rä mfatsꞌi pa gä sigi gä ze̱ti». Ja ngu Gedeón, mäpaya yä anciano xa di nzabi pa supäbi yä mhuntsꞌi rä Zi Dada Jeoba. Di felisitahu̱ ndunthi po geꞌä. Pe ꞌnehe mähyoni ge yä anciano dä rekonose ge rꞌabu̱ hingä ma dä za dä ja gatꞌho näꞌä rä ꞌme̱fi ja ha rä mhuntsꞌi. Pe hindi mporta hängu rä ndunthi näꞌä rä ꞌme̱fi pe̱ꞌtsi yä anciano, dä za dä me̱ꞌtsi rä komfiansa ge rä Zi Dada Jeoba o̱de yä sadi ꞌne umbäbi rä mfatsꞌi ꞌne rä tsꞌe̱di pa dä sigi dä ze̱ti (Sal. 116:1; Filip. 2:13).

18. Ja ngu ya dä handihu̱, ¿hanja dä za yä anciano dä de̱mbäbi rä ejemplo Gedeón?

¹⁸ Ja ngu ya dä handihu̱, yä anciano dä za dä bädi ndunthi de rä ejemplo Gedeón. Dä handihu̱ ge yä anciano mähyoni dä rekonose ora hingi tsa dä me̱fi gatꞌho näꞌä rä ꞌme̱fi ja ha rä mhuntsꞌi. ꞌNehe dä handihu̱ hanja ri ꞌñehe dä hyandi o dä dädi ora märꞌaa eꞌspäbi yä nsu o di kritika po näꞌä rä modo hanja di ja yä tꞌo̱tꞌe. ꞌNehe ha nuya yä gäxä pa di ꞌmu̱hu̱, yä anciano pe̱ꞌtsi te di debe dä yꞌo̱de ꞌne hindä ntsu dä me̱fi gatꞌho näꞌä di mändabi rä hnini rä Zi Dada Jeoba. Hindi mporta te mä xuñha di ñhandui yä anciano, mähyoni dä me̱ꞌtsi rä komfiansa ge rä Zi Dada Jeoba ma dä matsꞌi ꞌne ma dä umbäbi rä tsꞌe̱di pa dä sigi dä ze̱ti. ¡Hängu di umbäbihu̱ njamädi yä anciano po gatꞌho näꞌä pe̱fi po gekhu̱ ꞌne po yä mhuntsꞌi! (Filip. 2:29).