NTʼUDI 10
¿Ó ra zo gi maʼ ha yu̱ hmuntsi de yu̱ testigo ga Jehová?
¿Xi thsiʼkí ʼna bes gi maʼ ha yu̱ hmuntsi de yu̱ testigo ga Jehová? Pe, mu̱ nindi ʼna bes ko maʼ, ʼbu̱i gi peʼtsi ri tso mu̱ gi beni gi maʼ. Kja ko ʼñöni: “¿Té i pe̱h yu̱ Testigo ha ku̱ yo hmuntsi? ¿Ó i núhu̱ ra ndo̱ zo ku̱ yo hmuntsi? ¿Nihi nugo da zo go maʼ?”. Ha gehna ntʼudi gi ma pädi ó yu̱ hmuntsi da möxkí pa gi ze̱di nihi pa má gi kuati ko kʼa Tsi Mähkí Tá.
1. ¿Ndänakʼa rraso ra ndo̱ zo i ʼbu̱i pa go hmuntsihu̱?
ʼNa de ku̱ bi hñutsí nu̱ Biblia bi mä ndänakʼa rraso má ra ndo̱ zo pa go hmuntsihu̱: “Ha kʼa ndo̱ hmuntsi go xo̱hkimbeni kʼa Jehová” (Salmo 26:12). Ha yu̱ ma mpahu̱ya, nihi yu̱ testigo ga Jehová i hmuntsihu̱, nuná i kjá da ndo̱ mpohmu̱. Po goʼtho nu̱ ximojoi i hmuntsihu̱ kada ngo pa da xo̱hkimbenihu̱ kʼa Tsi Mähkí Tá, da túpibihu̱ nihi da nzohmu̱. Nihi kada kjea i xo̱hkimbenibihu̱ kʼa Tsi Mähkí Tá ha yu̱ ndo̱ hmuntsi.
2. ¿Té gi ma pädi ha yu̱ ma hmuntsihe?
Ha yu̱ hmuntsi i tʼúhtite ko genkʼa ro hñä kʼa Tsi Mähkí Tá, nupu̱ i hmä ra ndo̱ zo kʼa i ne da mä (xödí Nehemías 8:8). Mu̱ nuke gi maʼ ha ʼna hmuntsi, má gi kuati ko kʼa Jehová nihi gi pädi a i nkja ku̱ yo tsi chala ʼmu̱i i peʼtsi. Mu̱ má gi pädi kʼa hmädí i peʼtsi po nuke má gi ne gi pädi a i nkjá gege. Nihi gi pädi ankja da zo da möxkí pa gi peʼtsi ʼna ri nzahki má ra ndo̱ zo (Isaías 48:17, 18).
3. ¿Ankja da möxkí yu̱ kjäʼni gi mpädiui ha yu̱ hmuntsi?
Kʼa Jehová i xihkígihu̱ go “hñähu̱ ro nguenda ʼra ko maʼra pa go mföxihu̱, pa go údihu̱ ge di nmädíhu̱, nihi pa go kjáhu̱ kʼa ra zo, hin go he̱gihu̱ go hmuntsihu̱” (Hebreos 10:24, 25). Ha yu̱ ma hmuntsihe, gi ma mpädiui ko yä kjäʼni i peʼtsihu̱ ndunthi yä hmädí, kjangutho nuke má i ne da bädihu̱ de kʼa Tsi Mähkí Tá. Nupu̱ gi ma ʼyo̱de ku̱ mföxte i nahkígihu̱ nu̱ Biblia (xödí Romanos 1:11, 12). Nihi da zo gi ñäui ko yä kjäʼni xi nthähtí o yu̱ ʼbe̱di da nthähtí pa da xiʼkí ankja xi ze̱htíhu̱ mu̱ xi thohmu̱ ku̱ ra ndo̱ nthí. Gehya to núhu̱ i nkja ʼra yä rraso pa go hmuntsihu̱ kjangutho i ne kʼa Jehová.
MA PÄDIHU̱ MÁ RA NGU DE NU̱ TEMA
Ma núhu̱ a i nkja yo hmuntsi de yu̱ testigo ga Jehová nihi ó ra zo go mpexkehu̱ pa go möhmu̱ abu̱ i hmuntsihu̱.
4. Yu̱ hmuntsi de yu̱ testigo ga Jehová
Ha kʼa ʼme̱tʼo siglo, ku̱ kristiano mi hmuntsihu̱ pa di xo̱hkimbenihu̱ kʼa Jehová (Romanos 16:3-5). Xödíhu̱ Colosenses 3:16 nihi ñähu̱ de gehna:
¿Ankja mi xo̱hkimbenihu̱ kʼa Jehová ku̱ ʼme̱tʼo kristiano?
Nihi ta yu̱ ma mpahu̱ya, yu̱ Testigo zäi i hmuntsihu̱ pa da xo̱hkimbenihu̱ kʼa Jehová. Pa gi pädihu̱ a i nkja ku̱ yo hmuntsi, núhu̱ nu̱ VIDEO. ʼMe̱fa gi núhu̱ a i nkja ʼna hmuntsi nihi ñähu̱ de gehna:
¿Té ko käʼti ge i hñe̱hmi kʼa i tʼo̱te ha ʼna nguu ga hmuntsi ko kʼa i mä Colosenses 3:16?
Ko kʼa ko nú ha nu̱ video hihi ko kʼa foto i kuati ha nuná he̱ʼmi, ¿té ʼbenkʼa ko käʼti má ra zo de yu̱ ma hmuntsihe?
Xödíhu̱ 2 Corintios 9:7 nihi ñähu̱ de gehna:
¿Ó hi i tʼödi yä domi ha yu̱ hmuntsi de yu̱ testigo ga Jehová?
Käʼti ko kʼa tó ra úhtiki de nu̱ Biblia, té ʼbenkʼa da ma hnú ha ʼna hmuntsi de nuná ngo.
De nuná hmuntsi, ¿té ʼbenkʼa gi beni má da möxkí?
¿Ngi pädina?
Ha nu̱ jw.org da zo gi töti abu̱, nihi kjäʼmu̱ i nkjá yu̱ ma hmuntsihe po goʼtho nu̱ ximojoi.
Ha yu̱ ma hmuntsihe i hmä yä discurso ko nu̱ Biblia, i tʼúhtigihe ankja da úhtihe ko nu̱ Biblia nihi di núhe yä video. Goʼtho yu̱ hmuntsi ri mu̱dí nihi ri guadi ko ʼna túhu nihi i tʼsofo kʼa Tsi Mähkí Tá.
Ku̱ i pöhmu̱ ha ku̱ hmuntsi da zo da dädíhu̱ mu̱ i tʼo̱te ku̱ ntʼöni.
Goʼtho ku̱ i tso̱te ha ku̱ hmuntsi i hnú ra zo: yä ʼño̱ho̱ ko yä ʼbe̱hña, yu̱ tsi ndo̱htá nihi yu̱ tsi bähtsí...
Ha yu̱ hmuntsi de yu̱ testigo ga Jehová hi i tʼödi yä domi nihi mu̱ gi maʼ hin gi kjutʼi.
5. I tʼo̱te tse̱dí pa da hmaʼ ha yu̱ hmuntsi
Ma benihu̱ kʼa ro miní kʼa Hesu. Mi ʼbu̱fu̱ a Nazaret, pe pa di möhmu̱ ha kʼa templo ga Jerusalén kada kjea, petsite di ʼñohu̱ hñuhpa po ʼna luga mi ʼbu̱i ndunthi yä xo̱ntho̱. Xödíhu̱ Lucas 2:39-42 nihi ñähu̱ de gehna:
¿Gi beni ge mu̱ mi pöhmu̱ a Jerusalén mi o̱tehu̱ ndunthi yä tse̱dí?
Xi nuke, ¿té ma tse̱dí gi o̱te pa da zo gi maʼ ha yu̱ hmuntsi?
¿Gi beni ge ra zo gi maʼ ha yu̱ hmuntsi mahke gi nú ra nthí? ¿Ó i nkjapu̱?
Nu̱ Biblia i úhtigihu̱ ge ra ndo̱ zo go hmuntsihu̱ pa go xo̱hkimbenihu̱ kʼa Jehová. Xödíhu̱ Hebreos 10:24, 25 nihi ñähu̱ de gehna:
¿Ó ra zo go möhmu̱ zäi ha yu̱ hmuntsi?
KʼA I MÄHMU̱ PIʼRA YÄ KJÄʼNI: “Pa da zo go xo̱hkimbenihu̱ kʼa Tsi Mähkí Tá hi ra zo go ndee go hmuntsihu̱ ko maʼra yä kjäʼni. Kada ʼna i peʼtsise kʼa ro íhkji”.
¿Té ma xe̱ni de nu̱ Biblia i úhtite kʼa i ne kʼa Jehová go pe̱hmu̱?
KʼA KO PÄDI
Mu̱ gi maʼ ha ku̱ hmuntsi má da zo gi pädi de kʼa Jehová, má gi kuati ko gege nihi da zo gi xo̱hkimbeni kʼa Jehová ko maʼra yä kjäʼni.
Kʼa to núhu̱
¿Ó i xihkígihu̱ kʼa Jehová go möhmu̱ ha ku̱ hmuntsi?
¿Té gi ma pädi ha ku̱ yo hmuntsi de yu̱ testigo ga Jehová?
¿Ankja gi beni ge má da zo da möxkí yu̱ hmuntsi?
MÁ GI PÄDI DE GEHNA
¿Gi peʼtsi ri tso mu̱ gi maʼ ha ʼna hmuntsi? ʼNa ʼño̱ho̱ mi tso nkjanu̱ bi ndo̱ nú ra zo mu̱ nga maʼ. Nú ó bi nkjapu̱.
Nú ʼna bähtsí mi ndo̱ mpoho mu̱ mi paʼ ha yu̱ hmuntsi, nihi käʼti té bi me̱fí pa hin di ʼbe̱di nindi ʼna de gehya.
Xödí kʼa i beni yu̱ piʼra de yu̱ hmuntsi.
“¿Ó ra zo go möhmu̱ ha yu̱ hmuntsi i tʼo̱te ha yu̱ nguu ga hmuntsi?” (Artículo de jw.org)
Nú ankja ʼna ʼño̱ho̱ mi ndo̱ ntú bi mbödi kʼa ro nzahki mu̱ nga maʼ ha yu̱ hmuntsi de yu̱ testigo ga Jehová.
“Mu̱ abu̱ ndi paʼ zäi ndi häx kʼa ma nzafi.” (La Atalaya, 1 de julio de 2014)