NTʼUDI 11
Té gi pe̱fí pa má da möxkí kʼa i mä nu̱ Biblia
¿Kja ko ʼñonfeni ʼna mpa mu̱ ko beni gi ma o̱te ʼna ndo̱ ʼbe̱fí? Pa hin gui tso ra nthí go ʼuehke kʼa ʼbe̱fí, pa gui ʼyo̱te ʼra ma chichu̱. Xo nihi i nkjanu̱ mu̱ gi ne gi xödí nu̱ Biblia. ʼBu̱i ta gi kjá ʼna ntʼöni: “¿Abu̱ da fu̱dí?”. Ha nuná ntʼudi go ma núhu̱ ʼra yä mföxte pa da möxkígihu̱ go mpohmu̱ mu̱ go xödíhu̱ nu̱ Biblia.
1. ¿Ó ra zo go xödíhu̱ nu̱ Biblia goʼtho yu̱ mpa?
Kʼa kjäʼni zäi da xödí nu̱ Biblia, o “kʼa ro hmända kʼa Jehová”, zäi da mpoho nihi goʼtho kʼa da o̱te da bo̱ni ra zo (xödí Salmo 1:1-3). Pa da zo gi fu̱dí, ʼme̱tʼo gi xödí ʼra minuhto kada mpa. Mu̱ má gi pädi kʼa i mä nu̱ ro hñä kʼa Tsi Mähkí Tá, má gi mpoho mu̱ gi xödí.
2. ¿Té da möxkí pa má gi pädi kʼa gi xödí de nu̱ Biblia?
Pa go xödíhu̱ ra zo nu̱ Biblia petsite go mbenihu̱ kʼa dra xödíhu̱. Hi ho̱nse go xödíhu̱ nu̱ Biblia, nihi go “mbenihu̱ kʼa i mä” (Josué 1:8). Mu̱ ti xödí, kjá gehya ntʼöni: “¿Té i úhtigi de kʼa Jehová gehya xe̱ni? ¿Ankja da zo go kjá kʼa dra pädi? ¿Ankja da zo go kju̱ gehya xe̱ni pa da zo go fötsí piʼra yä kjäʼni?”.
3. ¿Abu̱ da zo gi kju̱hki tiempo pa gi xödí nu̱ Biblia?
¿Gi tso ra nthí gi kju̱hki tiempo pa gi xödí nu̱ Biblia? Ndunthi di tsohu̱ nkjanu̱. Nsohtho kju̱ “kʼa tiempo má ra ndo̱ zo” (Efesios 5:16). Da zo gi ʼuehke chichu̱ ri tiempo kada mpa pa gi xödí nu̱ Biblia. ʼRa i xödíhu̱ nu̱ Biblia mu̱ nxuditho. Piʼra i kjáhu̱ mu̱ ya ri ndé, o mu̱ i tsoyahu̱ pa da ma zihu̱. Pe nihi i ʼbu̱i ku̱ i nxödí mu̱ ya ri nxui, o ante da ma ähmu̱. Xi nuke, ¿té ma ora gi nú má ra zo pa gi nxödí?
MA PÄDIHU̱ MÁ RA NGU DE NU̱ TEMA
Ma núhu̱ té da zo go pe̱hmu̱ pa má go ne go xödíhu̱ nu̱ Biblia. Nuua go ma tötihu̱ ʼra yä mföxte pa go xödíhu̱ ante nu̱ ma librohu̱, nihi pa da möxkígihu̱ go pädihu̱ má ra zo mu̱ i tʼúhtigihu̱ de nu̱ Biblia.
Di mpohmu̱ mu̱ di fu̱htíhu̱ di tsihu̱ maʼra yä hñuni, nkjanu̱ nihi da zo go mpohmu̱ mu̱ go fu̱htíhu̱ go xödíhu̱ nu̱ Biblia.
4. Pädi ankja da zo gi mpoho mu̱ gi xödí nu̱ Biblia
Ta ngu gi tso ra nthí mu̱ gi fu̱htí gi nxödí nu̱ Biblia. Pe, kjangutho mu̱ di tsohu̱ ʼna raʼyo hñuni, ko yu̱ mpa a thogi má go ne go tsihu̱, nihi i nkjanu̱ ko nu̱ Biblia “má go ne” go xödíhu̱ ko yu̱ mpa ba thogi. Xödíhu̱ 1 Pedro 2:2 nihi ñähu̱ de gehna:
¿Gi beni ge mu̱ gi xödí nu̱ Biblia goʼtho yu̱ mpa, zäi gi ne gi xödí?
Núhu̱ nu̱ VIDEO pa gi pädihu̱ ankja ʼra yä bähtsí bi ndo̱ mpohmu̱ mu̱ nga xödíhu̱ nu̱ Biblia. ʼMe̱fa ñähu̱ de gehna:
¿Té ʼbenku̱ ra nthí bi ze̱htí yu̱ bähtsí de nu̱ video?
¿Té bi mötsí pa hin di zohu̱ ra nthí?
¿Té bi me̱hmu̱ pa má di mpohmu̱ mu̱ mi xödíhu̱ nu̱ Biblia?
Yä mföxte pa gi fu̱dí gi nxödí:
Juahni ʼna Biblia hi dra nthí gi xödí pa gi pädi kʼa i mä. Da zo gi kjá ko kʼa Traducción del Nuevo Mundo mu̱ i ʼbu̱i ha kʼa hñä gi ñä.
Fu̱dí gi xödí kʼa xi nthutsí ha nu̱ Biblia abu̱ gi núge má ra zo. Da zo gi töti yä mföxte abu̱ i mä “Kʼa da zo gi kjá pa gi fu̱dí gi xödí nu̱ Biblia”.
Hñutsí kʼa gi xödí. Kju̱ kʼa mföxte abu̱ i mä “Go xaxti kʼa go xödí ha nu̱ Biblia”, ge xi nthutsí ha nuná libro.
Ku̱ti ha kʼa aplicación JW Library®. Mu̱ gi käʼmi ha kʼa ri teléfono o ha piʼna dispositivo, da zo gi xödí o gi ʼyo̱de nu̱ Biblia abu̱ gi ʼbu̱i.
Kju̱ ku̱ mföxte xi nthutsí ha nu̱ Traducción del Nuevo Mundo. Nupu̱ da zo gi töti yä mapa, yä tabla nihi ʼna glosario ge da möxkí pa má gi pädi ra zo kʼa gi xödí de nu̱ Biblia.
5. Xödí nu̱ ri libro ante da ma tʼúhtiki de nu̱ Biblia
Xödíhu̱ Salmo 119:34 nihi ñähu̱ de gehna:
¿Ó ra zo gi ñäui kʼa Jehová ante gi xödí nu̱ Biblia o ante da tʼúhtiki ko nuná libro?
¿Ankja má da zo gi pädi kʼa da tʼúhtiki ha nu̱ ri nxödí? Mu̱ ti xödí yä ntʼudi de gehna libro, kjá ngu xi nthuxkua:
Xödí goʼtho yu̱ párrafo de kada ʼna de yu̱ ntʼudi.
Hiöní yu̱ xe̱ni de nu̱ Biblia, xödí nihi nú o i hñe̱hmi ko genkʼa gra xödí ha yu̱ párrafo.
Xaxti yä hñä má ra zo pa gi thädí yu̱ ntʼöni. ʼMe̱fa nuná da möxkí mu̱ gi nxödí kada ʼna de gehya ntʼudi ko genkʼa tó i úhtiki.
¿Ngi pädina?
Yu̱ testigo ga Jehová to kju̱he maʼra yä Biblia, pe má di núhe ra zo kʼa Traducción del Nuevo Mundo xo nuná hi ra nthí go xödíhe nihi i no̱ni kʼa ro thuhu kʼa Tsi Mähkí Tá (nú nuná artículo ha nu̱ jw.org: “¿I peʼtsise yu̱ testigo ga Jehová kʼa ro Biblia?”).
KʼA I MÄHMU̱ PIʼRA YÄ KJÄʼNI: “Nugo hin da zo go xödí nu̱ Biblia. Di peʼtsi ndunthi ʼbe̱fí nihi hin di ne go kjá”.
¿Xi nuke té gi mä?
KʼA KO PÄDI
Pa má da möxkí kʼa i mä nu̱ Biblia, juahni té ma ora gi nxödí, öhpi kʼa Tsi Mähkí Tá da möxkí pa gi pädi kʼa gra xödí nihi gi nxödí nu̱ ri libro ante da tʼúhtiki de nu̱ Biblia.
Kʼa to núhu̱
¿Té da möxkí pa má gi pädi kʼa i mä nu̱ Biblia?
¿Té ma ora de nu̱ mpa da zo gi xödíse nu̱ Biblia?
¿Ó ra zo gi xödí ʼme̱tʼo kʼa da ma tʼúhtiki de nu̱ Biblia?
MÁ GI PÄDI DE GEHNA
Nú ʼra yä mföxte da möxkí pa má gi pädi kʼa i mä nu̱ Biblia.
Töti hñu yä mföxte pa gi xödí nu̱ Biblia.
Nú ankja da zo gi mpoho mu̱ gi xödí nu̱ Biblia.
Nú ʼra yä mföxte i nahkígihu̱ ʼra yä kjäʼni ge i xödíhu̱ nu̱ Biblia po ndunthi yä kjea.
Ankja go xödíhu̱ nu̱ Biblia pa má da zo da möxkígihu̱ (2:06)