NTʼUDI 14

¿Té i ʼbe̱di pa da nú ra zo nu ma xo̱hkimbenihu̱ kʼa Tsi Mähkí Tá?

Edición impresa

Ngu do núhu̱ ha kʼa piʼna ntʼudi, hi goʼtho yä íhkji i nú ra zo kʼa Tsi Mähkí Tá. Pe hä da zo go xo̱hkímbenihu̱ kʼa xi O̱tegihu̱ ngu i ne gege. ¿Ndänakʼa “xo̱hkimbeni” o “íhkji” i nú ra zo gege? (Santiago 1:27; nota). Ma núhu̱ kʼa i úhtite nu̱ Biblia.

1. ¿Abu̱ i mä ankja go xo̱hkimbenihu̱ kʼa Tsi Mähkí Tá?

Ha nu̱ Biblia i mä ankja i ne kʼa Tsi Mähkí Tá go xo̱hkimbenihu̱. Kʼa Hesu bi xiʼ kʼa Tsi Mähkí Tá: “Nu̱ ri hñä hi i mä yä ʼbe̱thrí” (Juan 17:17). ʼRa yä íhkji hi i ne da kjáhu̱ kʼa xi nthutsí ha ro hñä kʼa Tsi Mähkí Tá, nu̱ Biblia; kʼa má i ne da kjáhu̱ gegehu̱ genkʼa i úhtite yu̱ kjäʼni ko ku̱ yo tsʼonigohu̱. Pe kʼa Jehová hi i nú ra zo mu̱ hin go kjáhu̱ ku̱ yo hmända (xödí Marcos 7:9). Pe nugohu̱ di kjáhu̱ da mpoho mu̱ di o̱tehu̱ kʼa i mä nu̱ Biblia nihi mu̱ di hähu̱ ro guenda ku̱ yo hmända.

2. ¿Ankja go xo̱hkimbenihu̱ kʼa Jehová?

Kʼa Jehová genkʼa xi O̱tegihu̱, po gehna ho̱nse gege go xo̱hkimbenihu̱ (Apocalipsis 4:11). Nuná i ne da mä ge ho̱nse gege go mädíhu̱ nihi go xo̱hkimbenihu̱, pe hin go xo̱hkimbenihu̱ po madé ku̱ kjä (xödí Isaías 42:8).

Nu ma xo̱hkimbenihu̱ da nkja “ra ntʼaxi pa da nú ra zo kʼa Tsi Mähkí Tá” (Romanos 12:1). Nuná i xihkígihu̱ go ʼmu̱fu̱ ngu i ne gege. Nsohtho, ku̱ i mädíhu̱ kʼa Jehová, i núhu̱ ra zo nihi i ʼo̱htehu̱ ku̱ yo hmända de kʼa nthähtí. Nihi i födíhu̱ kʼa ro nzähkíhu̱ xo hi i tsihu̱ yä droga, hi i tsu̱tihu̱ yä ʼyu̱y nihi hi i ntihu̱.a

3. ¿Ó ra zo go xo̱hkimbenihu̱ kʼa Jehová ko piʼra yä kjäʼni ge hä i ne da ʼyo̱htehu̱?

Ha yu̱ ma hmuntsihe i nkja kada ngo i kjá go xo̱hkimbenihe “kʼa Jehová [...] ha nu̱ hmuntsi” (Salmo 111:1, 2). Di kjáhe mu̱ di túhme yä túhu pa kʼa Tsi Mähkí Tá (xödí Salmo 104:33). Kʼa Jehová i ndo̱ negihu̱, nsohtho i ne go hmuntsihu̱, xo i pädi ge ha gehya hmuntsi da möxkígihu̱ pa zäi da zo go mpohmu̱. Mu̱ di hmuntsihe, di mföxíhe ʼra ko maʼra pa go pe̱hpíbihe kʼa Tsi Mähkí Tá ko ndunthi mpoho.

MA PÄDIHU̱ MÁ RA NGU DE NU̱ TEMA

Ma pädihu̱ ó kʼa Jehová hi i ne go xo̱hkimbenihu̱ po madé yä kjä. Nihi ma núhu̱ ʼra yä mföxte ra ndo̱ zo pa go xo̱hkimbenihu̱ kʼa Tsi Mähkí Tá.

4. Hi ra zo go xo̱hkimbenihu̱ kʼa Tsi Mähkí Tá po madé yä kjä

¿Ankja dra pädihu̱ ge kʼa Tsi Mähkí Tá hi i nú ra zo? Núhu̱ nu̱ VIDEO nihi ñähu̱ de gehna:

VIDEO: ¿I ne kʼa Tsi Mähkí Tá go xo̱hkimbenihu̱ po madé yä kjä? (3:26)

Yä nkʼoi: 1. ʼNa ʼño̱ho̱ ra xöhpíbi ʼna ro kjä nihi i ndo̱ kja yä hñuni. 2. ʼNa ʼño̱ho̱ ra hä ha yo ʼye̱ ʼna rosario pa da xöhpíbi kʼa birje María.

¿Té bi thogi mu̱ ʼra yä kjäʼni ga Israel, kʼa ro hnini kʼa Tsi Mähkí Tá, bi xo̱hkimbenihu̱ kʼa Jehová po madé ʼna kjä?

ʼRa yä kjäʼni i tsohu̱ ge má i kuatihu̱ ko kʼa Tsi Mähkí Tá mu̱ i xo̱hkimbenihu̱ po madé yä kjä. Pe, ¿hi ra kjáhu̱ ʼnanguadi mu̱ i kjáhu̱ nkjanu̱? Xödíhu̱ Éxodo 20:4-6 ko kʼa Salmo 106:35, 36, nihi ñähu̱ de gehna:

¿Té ma kjä gi núge ge i xo̱hkimbeni yu̱ kjäʼni?
¿Té i mä kʼa Jehová mu̱ yu̱ kjäʼni i xo̱hkimbeni yä kjä?
¿Ankja gi núge mu̱ yu̱ kjäʼni i xo̱hkimbeni yä kjä?

5. Mu̱ ho̱nse go xo̱hkimbenihu̱ kʼa Jehová, ya hin go kjáhu̱ kʼa i pe̱h yu̱ íhkji yo ʼbe̱thrí

Ma núhu̱ ó mu̱ go xo̱hkimbenihu̱ kʼa Jehová ngu i ne gege, ya hin go kjáhu̱ kʼa i pe̱h yu̱ íhkji yo ʼbe̱hthrí. Núhu̱ nu̱ VIDEO.

VIDEO: Mu̱ do pädi de nu̱ Biblia ya hin do ntsú (5:16)

Xödíhu̱ Salmo 91:14 nihi ñähu̱ de gehna:

Mu̱ go úhtibihu̱ kʼa Jehová ge di mädíhu̱ nihi di xo̱hkimbenisehu̱ gege, ¿té xi mä da o̱te po nugohu̱?

6. A yu̱ nguu ga hmuntsi di xo̱hkimbenihu̱ kʼa Tsi Mähkí Tá mu̱ di hmuntsihu̱

Mu̱ di túhmu̱ nihi mu̱ di thädíhu̱ ha yu̱ hmuntsi di xo̱hkimbenihu̱ kʼa Jehová nihi di mföxihu̱ ʼra ko maʼra. Xödíhu̱ Salmo 22:22 nihi ñähu̱ de gehna:

¿Gi mpoho mu̱ gi o̱de ge yu̱ ku i thädíhu̱ ha yu̱ hmuntsi?
¿Gi ne gi nxödí ra zo pa gi nú té gi ma thädí ha kʼa hmuntsi?

7. Kʼa Jehová i ndo̱ mpoho mu̱ di xihmu̱ ku̱ piʼra kʼa dra pädihu̱

I ʼbu̱i ndunthi yä tema pa go úhtibihu̱ yu̱ kjäʼni de nu̱ Biblia. Xödíhu̱ Salmo 9:1 ko kʼa 34:1, nihi ñähu̱ de gehna:

De goʼtho kʼa ko pädi ha nu̱ Biblia, ¿ndänakʼa gi ne gi úhtibi yu̱ kjäʼni?

KʼA I MÄHMU̱ PIʼRA YÄ KJÄʼNI: “Mu̱ di kjáhu̱ kʼa ra zo, da zo go xo̱hkimbenihu̱ kʼa Tsi Mähkí Tá ngu di nehu̱”.

¿Nuke té gi beni?

KʼA KO PÄDI

Di kjáhu̱ da mpoho kʼa Tsi Mähkí Tá mu̱ di xo̱hkimbenihu̱ ho̱nse gege, mu̱ di ñähu̱ de gege ha yu̱ nguu ga hmuntsi nihi mu̱ di xihmu̱ yu̱ kjäʼni kʼa to pädihu̱ de gege.