Komaduan Samuel
2 Kayari na saman et nantepet si David ed si Jehova,+ ya inkuan to: “Kasin onla ak ed sakey ed saray syudad na Juda?” Inkuan ed sikato nen Jehova: “La ka.” Insan intepet nen David: “Iner so laen ko?” Inyebat to: “Diad Hebron.”+ 2 Kanian linma diman si David a kaibay duaran asawa to, si Ahinoam+ a taga Jezreel tan si Abigail+ a datin asawa nen Nabal a Carmelita. 3 Impila met nen David iray lalakin kaiba to,+ balang sakey et kaiba toy sankaabungan to, tan nanayam ira ed saray syudad ed kaliberliber na Hebron. 4 Insan sinmabi iray lalaki ed Juda, tan nilanaan da diman si David bilang ari na sankaabungan na Juda.+
Inkuan dad si David: “Saray lalaki ed Jabes-gilead so angiponpon ed si Saul.” 5 Kanian angibaki si David na saray mensahero a mangibaga ed saray lalaki ed Jabes-gilead: “Bendisyonan kayo komon nen Jehova, ta impatnag yoy matoor a panangaro ed katawan yon si Saul diad impangiponpon yod sikato.+ 6 Ipatnag komon nen Jehova ed sikayo so matoor a panangaro tan inkamatoor. Ipatnag ko met ed sikayo so kaabigan lapud ginawa yo iya.+ 7 Natan et pabiskeg yo komon iray lima yo tan manpakpel kayo, ta inatey lay Saul a katawan yo, tan nilanaan ak na sankaabungan na Juda bilang ari ra.”
8 Balet si Abner+ ya anak nen Ner, say pangulo na armada nen Saul, et inala toy Is-boset+ ya anak nen Saul tan inyakar tod Mahanaim+ 9 tan ginawa ton ari na Gilead,+ saray Asurita, Jezreel,+ Efraim,+ Benjamin, tan interon Israel. 10 Si Is-boset ya anak nen Saul et mantaon na 40 sanen nagmaliw ya ari na Israel, tan nanuley ed loob na duay taon. Balet sinmuporta ed si David so sankaabungan na Juda.+ 11 Say kabayag* na impan-ari nen David ed Hebron diad sankaabungan na Juda et pitoy taon tan anem bulan.+
12 Sinmabi panaon et pinmaway manlapud Mahanaim+ si Abner ya anak nen Ner tan saray lingkor nen Is-boset ya anak nen Saul pian onla rad Gibeon.+ 13 Pinmaway met si Joab+ ya anak nen Zeruia+ tan saray lingkor nen David tan nabet da ra diad tiponay danum ed Gibeon; tan yinmurong ed sakey a pagpag so sakey a grupo tan yinmurong ed biek a pagpag imay sakey a grupo. 14 Insan inkuan nen Abner ed si Joab: “Paalagey mo pa iray kalangweran a lalaki, tan manlaban* ira ed arapan tayo.” Diad saman et inkuan nen Joab: “Sige, paalagey mo ra.” 15 Kanian inmalagey tan inmasingger ira unong ed bilang a pinili ra, 12 parad Benjamin tan si Is-boset ya anak nen Saul tan 12 manlapud saray lingkor nen David. 16 Nansingkatan ed ulo so balang sakey a mankalaban tan nanduyokan ira na espada ed diking, tan nampapara ran atumba. Kanian ningaran iman a pasen a Helkat-hazurim, a walad Gibeon.
17 Insan agawa so graben panlalaban ed saman ya agew, tan atalo si Abner tan saray lalaki na Israel ed arapan na saray lingkor nen David. 18 Wadman so taloran ananak nen Zeruia+—si Joab,+ Abisai,+ tan Asael; tan si Asael+ et maples ya ombatik a singa ulsa ed maawang ya uma. 19 Inusilan nen Asael si Abner, tan diad panguusil tod si Abner et agto nampakawanan odino nampakawigi. 20 Sanen linmingaw si Abner, intepet to, “Sika ’tan, Asael?” et inyebat to, “On.” 21 Insan inkuan nen Abner ed sikato: “La kad kawanan mo odino ed kawigim tan erel mo lay sakey ed saray kalangweran a lalaki, tan alam so antokaman a walad sikato.” Balet agtinmunday Asael a manguusil ed sikato. 22 Kanian inkuan lamet nen Abner ed si Asael: “Tundaan mo ak lan usilan. Akin et papatey kad siak? Anto lay iyarap kon lupa ed si Joab ya agim?” 23 Balet agto labay so ontunda, kanian induyok nen Abner ed eges to so nguro na gayang,+ tan tinmalos ed beneg to; tan sikatoy atumba diman tan inatey a tampol. Amin ya oonla ed samay pasen ya atumbaan tan inateyan nen Asael et ontundan magano.
24 Insan inusilan nen Joab tan Abisai si Abner. Sanen onseselek lay agew, akasabi rad pukdol na Amma, a walad petek na Gia diad dalan a mamaarap ed kalawakan na Gibeon. 25 Tan nantitipon iray Benjaminita pian ontumbok ed si Abner, tan nankakasakey ira tan nanalagey iran akaparaan ed toktok na sakey a pukdol. 26 Insan oniay inkelyaw nen Abner ed si Joab: “Kasin ag-ontundan mangupot iray espada tayo? Agmo ta amta a sakit na linawa labat so pansumpalan na saya? Kapigay pangibagam ed saray totoo ya ontunda la ra ed panguusil dad saray agagi ra?” 27 Diad saman et inkuan nen Joab: “Unong a mabilay so tuan Dios, no agka nansalita, ag-ontunda iray totoo a mangusil ed saray agagi ra ya anggad kabuasan.” 28 Pinaknol natan nen Joab so tambuyog, tan tinmunda iray totoo to ed panguusil dad Israel, tan tinmunda lay panlalaban.
29 Insan diad saman a labi, si Abner tan saray totoo to et nanakar ed interon Araba+ tan binaliw day Jordan tan nanakar ira ed interon kelas* ya anggad akasabi ra ed Mahanaim.+ 30 Sanen intunda la nen Joab so panguusil tod si Abner, tinipon to so amin a totoo. Diad saray lingkor nen David et 19 so naandi, nilikud ed si Asael. 31 Balet tinalo na saray lingkor nen David iray Benjaminita tan saray totoo nen Abner, tan 360 ed sikara so inatey. 32 Inala ray Asael+ tan imponpon dad lubok nen ama to, diad Betlehem.+ Insan sanlabin nanakar si Joab tan saray totoo to, tan kaliwaway kabuasan et akasabi rad Hebron.+