Komaduan Arari
9 Et tinawag nen propetan Eliseo so sakey ed saray ananak na propeta tan inkuan tod sikato: “Ibariber moy kawes mo ed balangbang mo, tan apuram, awit mo yay melag a panagkargaan na larak tan la kad Ramot-gilead.+ 2 Kasabim diman, anap moy Jehu+ ya anak nen Jehosafat ya anak nen Nimsi; loob ka tan paalagey mo manlapud limog na saray agagi to tan iyakar mod sankadaleman a kuarto. 3 Insan alam so melag a panagkargaan na larak tan ikalbom ed ulo to, insan ibagam, ‘Oniay inkuan nen Jehova: “Lanaan ta ka bilang ari ed Israel.”’+ Insan lukasan moy puerta tan batik kan tampol.”
4 Kanian say lingkor na propeta et linmad Ramot-gilead. 5 Kasabi to diman, saray pangulo na armada et akayurong. Inkuan to: “Walay mensahek ed sika, O pangulo.” Et tinepet nen Jehu: “Siopad sikami?” Et inmebat: “Sika, O pangulo.” 6 Kanian inmalagey si Jehu tan linmoob ed abung; inkalbo na lingkor so larak ed ulo to tan imbaga to, “Oniay inkuan nen Jehova a Dios na Israel: ‘Lanaan ta ka bilang ari na saray totoo nen Jehova, say Israel.+ 7 Kabilen mo so sankaabungan nen Ahab a katawan mo, tan singilen ko so dala na saray lingkor ko a propeta tan say dala na amin a lingkor nen Jehova ya inatey diad lima nen Jezebel.+ 8 Et ompatey so interon sankaabungan nen Ahab; tan upoten ko so amin a lalaki* ed pamilya nen Ahab, kaiba iray pakaskasi tan makapuy ed Israel.+ 9 Tan say sankaabungan nen Ahab et gawaen kon singa sankaabungan nen Jeroboam+ ya anak nen Nebat tan singa sankaabungan nen Baasa+ ya anak nen Ahias. 10 Tan si Jezebel et kanen na saray aso diad sakey ya uma ed Jezreel,+ tan anggapoy mangiponpon ed sikato.’” Diad saman et nilukasan toy puerta insan batik.+
11 Kapawil nen Jehu ed saray arum nin pangulo na armaday ari, intepet dad sikato: “Wala tay problema? Akin et linmad sika may ambagel a too?” Oniay ebat tod sikara: “Amta yo met la man a too tan say ibabagbaga to.” 12 Balet inkuan da: “Aliwan tua ’tan! Sige la, ibagam la.” Et inkuan to: “Oniay imbaga tod siak, insan kuan to ni, ‘Oniay inkuan nen Jehova: “Lanaan ta ka bilang ari ed Israel.”’”+ 13 Diad saman et inekal a tampol na balang sakey so kawes to tan inyaaplag dad saray balitang diad salian to,+ insan pinaknol day tambuyog tan inkuan da: “Si Jehu et nagmaliw ya ari!”+ 14 Tan si Jehu+ ya anak nen Jehosafat ya anak nen Nimsi et akikomplot sumpad si Jehoram.
Diad saman, si Jehoram tan say interon Israel et manbabantay diad Ramot-gilead+ lapud si Arin Hazael+ na Sirya. 15 Ag-abayag, si Arin Jehoram et pinmawil ed Jezreel+ pian manpaabig ed sugat to ta nakna na saray Siryano nen akilaban ed si Arin Hazael na Sirya.+
Et oniay inkuan nen Jehu: “No onabobon kayo,* agyo papaulyanan a walay makatakas ed syudad pian mangibalita ed Jezreel.” 16 Insan linmugan ed karwahe si Jehu tan linmad Jezreel, ta wadman ya akadukol si Jehoram lapud sugat to, tan linmad man si Arin Ahazias na Juda pian bisitaen si Jehoram. 17 Legan ya akaalagey so managbantay diad tori diman ed Jezreel, anengneng to ya onsasabi grupo na lalakin kakaiba nen Jehu. Et inkuan ton tampol: “Walay nanenengneng kon grupo na lalaki.” Et inkuan nen Jehoram: “Mangibaki kay lakin akakabayo a mangabet ed sikara, tan paibagam, ‘Kareenan tay pegdat yo?’” 18 Kanian sakey a lakin akakabayo so angabet ed sikato tan imbaga to: “Oniay inkuan na ari, ‘Kareenan tay pegdat yo?’” Balet inkuan nen Jehu: “Antoy amtam ed ‘kareenan’? Tumbok kad siak!”
Et oniay impakabat na samay managbantay: “Akasabi may mensahero ed sikara, balet agla pinmawil.” 19 Kanian sikatoy angibaki lamet na komaduan laki ya akakabayo, tan sanen akasabid sikara et imbaga to: “Oniay inkuan na ari, ‘Kareenan tay pegdat yo?’” Balet inkuan nen Jehu: “Antoy amtam ed ‘kareenan’? Tumbok kad siak!”
20 Et oniay impakabat na samay managbantay: “Akasabi may mensahero ed sikara, balet agla pinmawil, tan walay anengneng kon say panagpabatik to et singa panagpabatik nen Jehu ya apo* nen Nimsi, ta mapmaples so panagpabatik to.” 21 Et inkuan nen Jehoram: “Iparaan yoy karwahek!” Kanian imparaan day karwahe ton parad guerra, tan si Arin Jehoram na Israel tan si Arin Ahazias+ na Juda et pinmaway, a kada sakey et akalugan ed dilin karwahe ton parad guerra pian abeten si Jehu. Et sikatoy anengneng dad uma nen Nabot+ a Jezreelita.
22 Kanengneng nen Jehoram ed si Jehu, inkuan to: “Kareenan tay pegdat mo, Jehu?” Balet inkuan to: “Panon a niwalay kareenan anggad walay prostitusyon tan dakel a panagsalamangka nen Jezebel+ ya inam?”+ 23 Et imbaliwas a tampol nen Jehoram so karwahe to pian ontakas, tan inkuan tod si Ahazias: “Apalikdo ta, Ahazias!” 24 Et inegnaan nen Jehu so pana to tan inkena tod pegley na saray takeb nen Jehoram, tan tinmalos so pana ed puso to, tan abaktar diad karwahe to. 25 Insan inkuan tod si Bidkar ya ayudante to: “Alsam tan ibantak mod uma nen Nabot a Jezreelita.+ Tandaan mo, sankaiba ta ya akalugan ed saray karwahen walad benegan nen Ahab ya ama to sanen impasabi nen Jehova iyan ambelat a mensahe sumpad sikato:+ 26 ‘“Unong ya anengneng koy dala nen Nabot+ tan say dala na saray ananak to nen karuman,” so kuan nen Jehova, “balesen+ ta ka diad sayan uma,” so kuan nen Jehova.’ Kanian natan, alsam tan ibantak mod sayan uma unong ed salita nen Jehova.”+
27 Sanen anengneng nen Arin Ahazias+ na Juda so nagagawa, sikatoy batik tan dinmalan ed maawang a hardin. (Ag-abayag, sikatoy inusilan nen Jehu tan inkuan to: “Sikato met, patey yo!” Et sikatoy kinabil da sanen akalugan ed karwahe a paarap ed Gur, ya asingger ed Ibleam.+ Balet akabatik ni anggad Megido tan diman inatey. 28 Insan sikatoy inyakar ed Jerusalem na saray lingkor to, ya inlugan dad karwahe, tan imponpon da ed lubok to a kaiba na saray inmuunan atateng to diad Syudad nen David.+ 29 Diad koma-11 a taon na uley nen Jehoram ya anak nen Ahab, si Ahazias+ et nagmaliw ya ari ed Juda.)
30 Kasabi nen Jehu ed Jezreel,+ nadngelan itan nen Jezebel.+ Kanian kinoloran to ray mata to na andeket a pinta* tan inayos toy buek to insan tinmandag ed bintana. 31 Sanen akaloob lay Jehu ed puerta, inkuan nen Jezebel: “Antoy agawad si Zimri ya amatey ed katawan to?”+ 32 Et tinmangay si Jehu ed bintana tan inkuan to: “Siopay walad dapag ko? Siopa?”+ Et duara odino taloran opisyal ed palasyo so tinmandag a tampol ed sikato. 33 Et inkuan to: “Ipelag yo!” Kanian sikatoy impelag da, tan say dala to et pinmupulasi ed padir tan diad saray kabayo, tan sikatoy impagatin-gatinan nen Jehu ed saray kabayo to. 34 Kayari na satan et sikatoy linmoob, angan tan inminum. Insan inkuan to: “Ala yo may nisamban bii tan iponpon yo. Ta sikatoy anak na ari.”+ 35 Balet sanen linma ra pian iponpon da, anggapoy aromog da noagta say lapislapis na ulo to, saray sali to, tan saray lima to.+ 36 Sanen pinmawil ira tan imbaga ra yad sikato, inkuan to: “Saya may kasumpalan na imbaga nen Jehova+ ed panamegley na lingkor ton si Elias a Tisbita, a kuan to, ‘Diad sakey ya uma ed Jezreel, say laman nen Jezebel et kanen na saray aso.+ 37 Tan say bangkay nen Jezebel et magmaliw a tai na ayep ed uma diad dalin na Jezreel, pian agda ibagan: “Saya si Jezebel.”’”