Komaduan Awaran

2 Et ingganggan nen Solomon ya ipaalagey so abung parad ngaran nen Jehova+ tan say abung* parad panarian to.+ 2 Tan walay atipon nen Solomon a 70,000 lalakin trabahador,* 80,000 lalakin managtabas na bato diad kapalandeyan,+ tan 3,600 a manangasikaso ra.+ 3 Ontan met, oniay impaibaga nen Solomon ed si Hiram+ ya ari na Tiro: “Komon ta gawaen mod siak so ginawam ed si David ya amak ya impawitan mo na saray kiew a sedro pian nipaalagey toy abung* a panayaman to.+ 4 Natan et mangipaalagey ak na abung parad ngaran nen Jehova a Dios ko, a pasantosen ko parad sikato, pian makapanpaasewek na ambalingit ya insenso+ ed arapan to, ontan met parad saray regular ya iyaapay a nantatapewan a tinapay*+ tan saray apay a popoolan, diad kabuasan tan labi,+ legan na Sabaton,+ balon bulan,+ tan no panaoy piesta+ nen Jehova a Dios mi. Saya et manbayag ya obligasyon na Israel. 5 Say abung ya ipaalagey ko et makapadinayew, ta say Dios mi et makapadinayew nen say amin a dirios. 6 Tan siopay makasarag a mangipaalagey na abung parad sikato? Ta sikatoy agnakarga na katawenan tan say tawen na saray katawenan,+ kanian siopa ak a nayarian kon ipaalageyan na abung? Say nasarag ko labat et sakey a pasen a pampaasewekan na bagat diad arapan to. 7 Natan, mangibaki ka komon ed siak na lakin marunong a mankimey ed balitok, pilak, gansa,+ balatyang, kolor-ube ya abel,* telan krimson, tan asul a tinebey, tan marunong met a man-ukit. Sikatoy mankimey ed Juda tan Jerusalem a kaiba na saray marunong a komikimey ko, a tinuro nen David ya amak.+ 8 Tan ipawitan mo ak komon na saray troso na sedro, enebro,+ tan algum+ manlapud Lebanon, ta amtak a saray lingkor mo et eksperiensyado ra ed panagbatang na saray kiew na Lebanon.+ Saray lingkor ko et mankimey a kaiba iray lingkor mo+ 9 pian iparaanan da ak na dakdakel a troso, ta say abung ya ipaalagey ko et makapadinayew a maong. 10 Et suplayan ko na kakanen iray lingkor mo,+ saray managbatang na kiew: 20,000 cor* a trigo, 20,000 cor a sebada, 20,000 bat* ya alak, tan 20,000 bat a larak.”

11 Diad saman et impawit nen Hiram ya ari na Tiro iyan akasulat a mensahe ed si Solomon: “Lapud inaro nen Jehova so totoo to, ginawa to kan ari ra.” 12 Inkuan ni nen Hiram: “Narayew komon si Jehova a Dios na Israel, a nanggawa na tawen tan say dalin, lapud inikdan toy Arin David na marunong ya anak,+ a walaay pakatebek tan pakatalos,+ a mangipaalagey na abung parad si Jehova tan abung parad panarian to. 13 Natan et mangibaki ak na marunong a komikimey a walaay pakatalos, si Hiram-abi,+ 14 ya anak na sakey a biin Danita balet say ama to et taga Tiro; walay eksperiensya ton mankimey ed balitok, pilak, gansa, balatyang, bato, troso, kolor-ube ya abel, asul a tinebey, maabig a klase na tela, tan krimson.+ Sarag ton gawaen so amin a klase na panag-ukit tan marunong ed antokaman a desinyon ipagawad sikato.+ Kaiba ton mankimey iray marunong a komikimey mo tan saray marunong a komikimey nen katawan kon David ya amam. 15 Et komon ta ipawit na katawan ko iray trigo, sebada, larak, tan alak ya insipan to ed saray lingkor to.+ 16 Tan manbatang kami na saray kiew ed Lebanon,+ anggan pigaray nakaukolan mo, tan gawaen mi iratan a lamo ya ipadalan mid dayat pian iyakar mid sika diad Joppe;+ tan awiten mo iratan ed Jerusalem.”+

17 Et impabilang nen Solomon so amin a dayon lalaki a manaayam ed dalin na Israel,+ a singa samay ginawa nen David ya ama to,+ tan walay abilang dan 153,600. 18 Kanian say 70,000 ed sikara et ginawa ton trabahador,* say 80,000 et managtabas na bato+ diad kapalandeyan, tan say 3,600 et manangasikaso ed pankimey na totoo.+