Komaduan Awaran

30 Si Hezekias et angipasabi na mensahe ed interon Israel+ tan Juda, tan angipawit ni ingen na saray sulat ed Efraim tan Manases,+ pian onla rad abung nen Jehova diad Jerusalem tan selebraan day Paskua parad si Jehova a Dios na Israel.+ 2 Balet denesidi na ari, saray prinsipe, tan say interon kongregasyon ed Jerusalem a selebraan so Paskua diad komaduan bulan,+ 3 ta agda itan aselebraan nen unonan bulan,+ lapud aliwan magenap so bilang na saray saserdoten amasantos na inkasikara+ tan agnantitipon iray totoo ed Jerusalem. 4 Sayan uksoyan et duga ed pakanengneng na ari tan say interon kongregasyon. 5 Kanian denesidi ran iyanunsio itan ed interon Israel, manlapud Beer-sheba anggad Dan,+ pian onla ray totoo ed Jerusalem tan selebraan day Paskua parad si Jehova a Dios na Israel, ta agda itan sinelebraan bilang grupo unong ed akasulat.+

6 Kanian linma ray managtulor na sulat* diad interon Israel tan Juda ya awit da ray sulat na ari tan saray prinsipe, unong ed ganggan na ari, a mangibabagan: “O totoo na Israel, pawil kayod si Jehova a Dios nen Abraham, Isaac, tan Israel, pian sikatoy ompawil met ed samay akeran akatakas ed lima na saray arari na Asirya.+ 7 Agyo aaligen iray inmuunan atateng yo tan saray agagi yo ya agnanmatoor ed si Jehova a Dios na inmuunan atateng da, kanian ginawa to ra a bengatlan pakataktakotan, a singa nanenengneng yo.+ 8 Natan, agkayo magmamaliw a benger a singa saray inmuunan atateng yo.+ Manpasakop kayo ed si Jehova tan la kayod santuaryo+ to a pinasanto to ya anggad angga tan manlingkor kayo ed si Jehova a Dios yo, pian onkepay mandarlang a sanok tod sikayo.+ 9 Ta sano ompawil kayod si Jehova, saray agagi yo tan ananak yo et kasian na saramay angerel ed sikara+ tan abuloyan da ran makapawil ed sayan dalin,+ ta si Jehova a Dios yo et maabagey tan mapangasi,+ tan agto iyarap ed biek so lupa to no ompawil kayod sikato.”+

10 Kanian linma ray managtulor na sulat* ed kada syudad diad interon dalin na Efraim tan Manases,+ anggan diad Zebulon, balet eelek-elekan tan luludlureyen ira na totoo.+ 11 Anggaman ontan, wala ray totoon nanlapud Aser, Manases, tan Zebulon a nampaabeba tan linmad Jerusalem.+ 12 Say lima na tuan Dios et wala met ed Juda pian pankasakeyen ira* a manumpal ed samay ingganggan na ari tan saray prinsipe unong ed salita nen Jehova.

13 Et dakdakel so totoon nantitipon diad Jerusalem pian selebraan so Piesta na Andi-lebaduran Tinapay+ diad komaduan bulan;+ sakey itan a balbaleg a kongregasyon. 14 Kinmiwas ira tan ineekal da ray altar a walad Jerusalem,+ tan ineekal da met so amin ya altar parad insenso+ tan imbantak da iratan diad Lawak na Kidron. 15 Insan pinakgeran da so ayep ya ibabagat ed Paskua diad koma-14 ya agew na komaduan bulan. Lapud satan et nababaingan iray saserdote tan saray Levita, kanian pinasantos day inkasikara tan angawit iray apay a popoolan diad abung nen Jehova. 16 Pinmuesto irad datin pasen da, unong ed Ganggan nen Moises a too na tuan Dios; insan inwalsik na saray saserdote so dala+ ya inawat dad saray Levita. 17 Dakel ed kongregasyon so ag-amasantos na inkasikara, tan saray Levita so akanbetang ed panagpakger na saray ayep ya ibabagat ed Paskua parad amin ya aliwan malinis,+ pian napasantos ira parad si Jehova. 18 Ta amayamay so totoo, nagkalalo la ed saramay nanlapud Efraim, Manases,+ Isacar, tan Zebulon, ya ag-amasantos na inkasikara, balet ta angan ni ran siansia ed Paskua, a sumlang itan ed akasulat. Balet sikaray impikasi nen Hezekias, a kuan to: “Komon ta si Jehova a maomaong+ et perdonaen to 19 so balang sakey ya angiparaan ed puso to pian anapen so tuan Dios,+ si Jehova, say Dios na inmuunan atateng to, anggano sikatoy ag-alinisan unong ed estandarte na inkasanto.”+ 20 Et dinengel nen Jehova si Hezekias tan pinerdona* to ray totoo.

21 Kanian saray Israelita a walad Jerusalem et malikeliket dan sinelebraan+ so Piesta na Andi-lebaduran Tinapay+ diad loob na pitoy agew, tan inagew-agew ya idadayew na saray Levita tan saserdote si Jehova, a maksil iran mantotogtog na saray instrumento pian idayew si Jehova.+ 22 Ontan met, si Hezekias et kinatongtong tan pinaseseg toy* amin a Levita a manlilingkor ed si Jehova a walaay pakatebek. Tan angan ira diad piesta ed loob na pitoy agew,+ ya angibagat ira na saray bagat a pandurungoan+ tan akisalamat ira ed si Jehova a Dios na inmuunan atateng da.

23 Insan denesidi na interon kongregasyon a selebraan da itan na pitoy agew ni, kanian pitoy agew da nin sinelebraan itan a walaay panliliket.+ 24 Tan si Arin Hezekias na Juda et angiter na 1,000 kalakian a baka tan 7,000 karnero parad kongregasyon, tan saray prinsipe et angiter na 1,000 kalakian a baka tan 10,000 karnero parad kongregasyon;+ tan dakdakel a saserdote so amasantos na inkasikara.+ 25 Tan nantultuloy a nanliket so interon kongregasyon na Juda, saray saserdote, saray Levita, say interon kongregasyon a nanlapud Israel,+ tan saray dayon miaayam+ a nanlapud dalin na Israel tan saramay manaayam ed Juda. 26 Kanian walay baleg a panliliket ed Jerusalem, ta anggapo ni onian agawa ed Jerusalem nanlapud saray agew nen Solomon ya anak nen David ya ari na Israel.+ 27 Diad kaunoran et inmalagey iray Levitan saserdote tan benendisyonan da ray totoo;+ tan dinengel na Dios so boses da, tan say pikakasi ra et akasabi ed masanton ayaman to, diad tawen.