Nehemias

10 Diad impangusar dad panagtatak da et pinaletan itan+ di:

Nehemias a gobernador* ya anak nen Hacalias,

Tan si Zedekias, 2 Seraias, Azarias, Jeremias, 3 Pasur, Amarias, Malkias, 4 Hatus, Sebanias, Maluc, 5 Harim,+ Meremot, Obadias, 6 Daniel,+ Gineton, Baruc, 7 Mesulam, Abias, Mijamin, 8 Maazias, Bilgai, tan si Semaias; saraya et saserdote.

9 Ontan met iray Levita: si Jesua ya anak nen Azanias, si Binui a nanlapud saray ananak nen Henadad, si Kadmiel,+ 10 tan saray agagi ra a sikara di Sebanias, Hodias, Kelita, Pelaias, Hanan, 11 Mica, Rehob, Hasabias, 12 Zacur, Serebias,+ Sebanias, 13 Hodias, Bani, tan Beninu.

14 Saray pangulo na baley: si Paros, Pahat-moab,+ Elam, Zatu, Bani, 15 Buni, Azgad, Bebai, 16 Adonias, Bigvai, Adin, 17 Ater, Hezekias, Azur, 18 Hodias, Hasum, Bezai, 19 Harif, Anatot, Nebai, 20 Magpias, Mesulam, Hezir, 21 Mesezabel, Zadok, Jadua, 22 Pelatias, Hanan, Anaias, 23 Hosea, Hananias, Hasub, 24 Halohes, Pilha, Sobek, 25 Rehum, Hasabna, Maasias, 26 Ahias, Hanan, Anan, 27 Maluc, Harim, tan si Baanah.

28 Saray arum nin totoo—saray saserdote, saray Levita, saray bantay na puerta, saray managkansion, saray lingkor ed templo,* tan kada sakey ya imbiig toy inkasikato manlapud saray totoo ed kaliberliber a dalin pian unoren so Ganggan na tuan Dios,+ kaibay kaasawaan da, ananak dan lalaki, tan ananak dan bibii, amin iramay walaan na kakabatan tan pakatalos*— 29 et akikasakey ed saray agagi ra, saray prominentin lalaki ed sikara, tan intalaga day sarili ra ed ayew tan samba, a manakar ira unong ed Ganggan na tuan Dios, a niiter diad panamegley nen Moises a lingkor na tuan Dios, tan maalwar dan unoren so amin a bilin nen Jehova a Katawan mi, saray panangukom to, tan saray totontonen to. 30 Agmi iter iray ananak min bibii ed saray totood kaliberliber a dalin, tan agmi alaen iray ananak dan bibii parad saray ananak min lalaki.+

31 No saray totood kaliberliber a dalin et mangawit ira na saray produkto ra tan amin a klase na ilik* pian ilako ra diad agew na Sabaton, agkami mangaliw ed sikara legay Sabaton+ odino diad masanton agew.+ Palampasen mi met so produktod komapiton taon+ tan say amin ya utang ed sikami.+

32 Ontan met, inobliga mi sarili mi a kada sakey et tinaon a mangiter na kakatlo na siklo* parad panaglingkor ed abung* na Dios mi,+ 33 parad nantatapewan a tinapay,*+ say regular ya apay a kakanen,+ say regular ya apay a popoolan legan na Sabaton+ tan balon bulan,+ tan parad saray piesta,+ saray masanton bengatla, saray apay parad kasalanan+ pian manggaway pananakbong ed Israel, tan parad amin a kimey ed abung na Dios mi.

34 Nampapalaranan kami met pian naamtaan mi no kapigan so turno ed kada taon na saray saserdote, saray Levita, tan saray arum a totoo, a pangawit da na saray kiew diad abung na Dios mi, unong ed saray pamilya na kaamaan mi, pian itungo diad altar nen Jehova a Dios mi, unong ya akasulat ed Ganggan.+ 35 Kada taon et awiten mi met ed abung nen Jehova iray unonan matakken a bunga na dalin mi tan saray unonan aluton bunga na amin a klase na kiew,+ 36 pati say panguloan ed saray anak min lalaki tan panguloan ed saray kokomponien min ayayep+—unong ya akasulat ed Ganggan—tan say panguloan ed saray baka tan karnero mi. Awiten mi iratan ed abung na Dios mi, diad saray saserdoten manlilingkor ed abung na Dios mi.+ 37 Ontan met, saray magasal ya arina+ min nanlapud unona iran bunga, saray kontribusyon mi, saray bunga na amin a klase na kiew,+ say balon alak, tan larak+ et nepeg min awiten ed saray saserdote diad saray kuarton panagsimpenan* ed abung na Dios mi,+ kaibay kakaplo a manlalapud dalin mi a parad saray Levita,+ ta saray Levita so mankokolekta na kakaplo manlapud amin a syudad min walay daralusan.

38 Tan say saserdote, say anak nen Aaron, et kaukolan a kaiba na saray Levita sano kolektaen day kakaplo; tan saray Levita et nepeg a mangiyapay na kakaplo ed samay kakaplo diad abung na Dios mi,+ diad saray kuarto* ed pasen a panagsimpenan. 39 Ta diad saray kuarton panagsimpenan* so nepeg a pangawitan na saray Israelita tan ananak na Levita ed kontribusyon+ ya ilik, balon alak, tan say larak,+ tan ditan so kawalaan na saray kagawaan na santuaryo, ontan met iray saserdote a manlilingkor, saray bantay na puerta, tan saray managkansion. Agmi paulyanan so abung na Dios mi.+