Exodo

31 Onia ni inkuan nen Jehova ed si Moises: 2 “Nia, pinilik* si Bezalel+ ya anak nen Uri ya anak nen Hur ed tribu nen Juda.+ 3 Sikatoy panoen koy espiritu na Dios pian nawalaay karunongan, pakatalos, tan kakabatan ed amin a klase na kimey a mankaukolay dunong, 4 diad panggawa na saray mararakep a desinyo, diad pankimey ed balitok, pilak, tan gansa, 5 diad pantabas tan pangipeket na saray bato,+ tan diad panggawa na amin a klase na bengatlan gawad kiew.+ 6 Ontan met, tinurok ya ontulong ed sikato si Oholiab+ ya anak nen Ahisamac ed tribu nen Dan, tan iyan ko so karunongan ed puso na saramay amin a walaay dunong,* pian nayarian dan gawaen so amin ya ingganggan kod sika:+ 7 say tolda a pantitiponan,+ say kaban na Testimonya+ tan say sakob+ ya akatapew ed satan, amin a kagawaan ed tolda, 8 say lamisaan+ tan saray kagawaan na satan, say kandelero a puron balitok tan amin a kagawaan na satan,+ say altar na insenso,+ 9 say altar na apay a popoolan+ tan amin a kagawaan na satan, say palanggana tan say patoonan ed satan,+ 10 saray kawes a balibali inkagawa ra, saray masanton kawes parad si Aaron a saserdote, saray kawes na ananak to pian makapanlingkor ira bilang saserdote,+ 11 say larak a panaglana, tan say ambalingit ya insenso parad santuaryo.+ Gawaen dan amin so ingganggan kod sika.”

12 Onia ni inkuan nen Jehova ed si Moises: 13 “Mansalita kad saray Israelita tan ibagam ed sikara, ‘Seguroen yon ngilinan so sabaton ko,+ ta saya so tanda ed baetan tayo, siak tan sikayo, legan na saray henerasyon yo pian naamtaan yo a siak, si Jehova, so mamapasantos ed sikayo. 14 Nepeg yon ngilinan so Sabaton, ta satan et masanto parad sikayo.+ Siopaman a mamabanday ed satan et nepeg a pateyen. No walay mankimey ed satan ya agew, satan a too* et nepeg ya ekalen* ed kabaleyan to.+ 15 Anemiran agew so pankimey, balet diad komapiton agew et sabaton na sigpot a pampainawa.+ Masanto itan parad si Jehova. Siopaman a mankimey ed agew na Sabaton et nepeg a pateyen. 16 Nepeg a ngilinan na saray Israelita so Sabaton; nepeg dan selebraan so Sabaton diad amin a henerasyon da. Sakey itan a manbayag a sipanan. 17 Sakey itan a manbayag a tanda ed baetan ko tan saray totoo na Israel,+ ta anem agew a pinalsa nen Jehova so tawen tan say dalin, tan diad komapiton agew et sikatoy tinmundan nankimey insan nampainawa.’”+

18 Natan, kayari ton akitongtong ed sikato diad Palandey Sinai, inter tod si Moises so duaran tapyas na Testimonya,+ saray tapyas na bato a sinulatan na gamet na Dios.+