Eclesiastes

10 No panon a saray inatey ya apangat et pabangeten tan paburaen day ambalingit a larak, say daiset ya inkamakulangkulang et nadaeg toy karunongan tan kagalangan.+

2 Say puso na marunong so mangitonton ed sikato diad dugan dalan,* balet say puso na makulangkulang so mangitonton ed sikato diad sananey a dalan.*+ 3 Inerman a dalan so panakaran na samay makulangkulang, sikatoy andiay maong a pakatebek,*+ tan ipapaamta tod amin a sikatoy makulangkulang.+

4 No say sakey a manuley et ondalang so sanok* tod sika, agka onaalis ed pasen mo,+ ta say inkakalmado so mamatunda ed saray baleg a kasalanan.+

5 Walay bengatlan makapagonigon a nanenengneng ko diad dalin, saya may lingo a nagagawaan na saray walad pakayari:+ 6 Saray makulangkulang et iiyan ed ataragey a posisyon, balet saramay makayari* et mansiasiansia ed saray abeban posisyon.

7 Makakanengneng ak na saray lingkor ya akalugan ed kabayo balet saray prinsipe et manaakar a singa ra lingkor.+

8 Samay mangokotkot na abot et nayarin sikaton mismo so napelag ditan;+ tan samay mangigegeba na padir et nayarin ketketen na uleg.

9 Samay manetebag na saray bato et nayarin nasakitan, tan samay manbebelang na kiew et nayarin narisgo.*

10 No epel so kagawaan a balatyang tan say tarem to et ag-iyubol na sakey, kaukolan toy mansagpot a maong. Balet say karunongan et makatulong ed italona.

11 No say sakey ya eksperton managsalamangka* et kinetket la na uleg antis to nin napaamo itan, anggapoy gunggona na inkadunong to.

12 Saray ibabalikas na sangi na marunong et makapaliket,+ balet say bibil na makulangkulang so maneral ed sikato.+ 13 Saray unaan ya ibabalikas na sangi to et inkamakulangkulang,+ tan saray sampot ya ibabalikas to et makaderal a kaambagelan. 14 Balet samay makulangkulang et ag-ontutundan mansalita.+

Ag-amta na sakey a too no antoy nagawa; siopay makapangibagad sikato no antoy nagawa diad arapen no sikatoy anggapo la?+

15 Say pansasagpot na samay makulangkulang et mamapakesaw a maong ed sikato, ta agto anggan naromog so dalan a paonlad syudad.

16 Pakaskasi so dalin sano say ari to et sakey ya ugaw+ tan saray prinsipe to et onggagapo lan manpiesta diad kabuasan! 17 Maliket so dalin sano say ari to et anak na gagalangen a totoo tan saray prinsipe to et mamangan ed dugan panaon pian ombiskeg, aliwan pian manbuek!+

18 Lapud alablabas ya inkangiras et onkukusboy atep, tan lapud agpankikimey na lima et manterter so abung.+

19 Say tinapay* et mamaelek, tan say alak et mamaliket ed bilay;+ balet say kuarta so ebat ed kada pankaukolan.+

20 Anggan diad nonot mo* et agmo isasamba so* ari,+ tan agmo met isasamba so sakey a mayaman anggan wala kad kuartom; ta ompan ipasabi na sakey a manok* so tanol* a nadngel to, odino uliten na sakey a nampayak a pinalsa imay imbagam.