Isaias
31 Pakaskasi la iramay oonlad Ehipto pian onkerew na tulong,+
Saramay mandedepende ed saray kabayo,+
A manmamatalek ed saray karwahen pan-guerra, lapud dakerakel iratan,
Tan ed saray kabayon parad guerra,* lapud mabisbiskeg iratan,
Balet ag-ira nanilalo ed Masanton Dios na Israel,
Tan agda inanap si Jehova.
2 Balet ta sikatoy makabat tan idapo to so kadederal,
Tan agto babawien iray salita to.
Sikatoy onsumpad sankaabungan na saray manggagaway mauges
Tan ed saramay ontutulong ed saray manggagaway aliwa.+
Sano iyunat nen Jehova so lima to,
Napatir so siopaman ya ontutulong
Tan natumba so siopaman a tutulongan;
Amin da et maminpinsan a naandi.
4 Ta oniay inkuan nen Jehova ed siak:
“Singa leon a manngernger, sakey a mabiskeg tan malangwer a leon ed abay na narel ton ayep,
A sano nantitipon so interon grupo na saray managpastol pian ablogen da itan,
Ag-itan ontakot ed boses da
Odino napagyaw ed ingal da,
Ontan met so pilaban nen Jehova na saray armada
Nisengeg ed Palandey Sion tan say pukdol to.
5 Singa saray manok a maples ya ontitikyab, ontan met so pangiyagel nen Jehova na saray armada ed Jerusalem.+
Sikatoy idepensa tan isalba to.
Sikatoy iyagel tan iliktar to.”
6 “Pawil kayod samay parungtalan yon nanrebeldian, sikayo ran totoo na Israel.+ 7 Ta diad satan ya agew et ipulisay na balang sakey ed sikayo iray andi-kakanaan a dirios ton gawad pilak tan balitok, a ginawa na mismon lima yo tan sengegay impankasalanan yo.
8 Tan say Asiryano et ompatey ed espada ya agnanlapud too;
Tan sikatoy akmonen na espada ya agnanlapud too.+
Sikatoy ombatik lapud satan ya espada,
Tan magmaliw ya aripen iray kalangweran a lalaki to.