Deuteronomio

23 “Agnayarin onloob ed kongregasyon nen Jehova so siopaman a laki a kinapon diad impanemek ed paltak to odino aputot so kayarian to.+

2 “Agnayarin onloob ed kongregasyon nen Jehova so sakey ya anak ed paway.+ Anggapo ed saray kailalakan to ya angga ed komasamplon henerasyon so nayarin onloob ed kongregasyon nen Jehova.

3 “Agnayarin onloob ed kongregasyon nen Jehova so sakey ya Ammonita odino Moabita.+ Anggapon balot ed saray kailalakan da ya angga ed komasamplon henerasyon so nayarin onloob ed kongregasyon nen Jehova, 4 ta agda kayo tinulongan diad impangiter da komon na naakan tan danum sanen wala kayod dalan a papaway ed Ehipto,+ tan lapud inupaan day Balaam ya anak nen Beor, a taga Petor na Mesopotamia, a mangisamba ed sikayo.*+ 5 Balet agdinengel nen Jehova a Dios yo si Balaam.+ Imbes, say ayew et impagmaliw nen Jehova a Dios yo a bendisyon ed sikayo,+ ta inaro kayo nen Jehova a Dios yo.+ 6 Agkayon balot manggagaway antokaman parad pankaabigan da odino parad iyaligwas da diad amin ya agew yo.+

7 “Agmo bubusolen so sakey ya Edomita, ta sikatoy agim.+

“Agmo bubusolen so sakey ya Ehipsio, ta nagmaliw kan dayo nensaman diad bansa to.+ 8 Nayarin onloob ed kongregasyon nen Jehova iray ananak da a niyanak ed komatlon kailalakan.

9 “Sano mankampo ka pian onsumpad saray kalaban mo, nepeg mon paliisan so antokaman a mauges.*+ 10 No say sakey a laki et nagmaliw ya agmalinis lapud walay pinmaway ed kayarian to diad labi,+ sikatoy nepeg ya ompaway ed kampo tan ag-onloloob ed kampo. 11 Sano mansirunget la, sikatoy nepeg a manames, insan nayarian to lay ompawil ed kampo diad kaselek na agew.+ 12 Sakey a pribadon pasen* so nepeg mon ibiig diad paway na kampo, tan ditan so nepeg mon laen. 13 Nepeg a kaiba ed saray kagawaan mo so sakey a panagkotkot. Sano onyurong ka ed paway, mankotkot kay abot ed panamegley na satan insan mo tabonan so dutak mo. 14 Ta manaakar si Jehova a Dios yo diad loob na kampo yo+ pian iliktar to kayo tan iyawat tod sikayo iray kakabusol yo, kanian nepeg a masanto so kampo yo,+ pian anggapoy antokaman a mabanday a nanengneng to ed sikayo a sengegay agto la piulop ed sikayo.

15 “Agmo nepeg ya iyawat so sakey ya aripen ed katawan to sano imbatikan toy katawan to tan linmad sika. 16 Sikatoy nayarin miayam ed sikayo ed anggan iner a pasen a pilien to diad sakey ed saray syudad yo, inerman a labay to. Sikatoy agmo nepeg a maltratoen.+

17 “Agnepeg a magmaliw a paabang a bii diad templo so siopaman ed saray ananak na Israel,+ tan agmet nepeg a magmaliw a paabang a laki diad templo so siopaman ed saray ananak na Israel.+ 18 Agmo aawiten ed abung nen Jehova a Dios mo so bayar ed sakey a paabang a bii odino say bayar ed* sakey a paabang a laki* pian sumpalen so sakey a sipan, ta namparan makapadimla iratan ed si Jehova a Dios mo.

19 “Agmo papatuboan so agim+ sano sikatoy pabayesen moy kuarta, naakan, odino antokaman a bengatlan nayarin singilen a walaay interes. 20 Nayarim a patuboan so dayo,+ balet agmo papatuboan so agim,+ pian bendisyonan ka nen Jehova a Dios mo ed amin a pansasagpotan mo diad dalin a kayarianen mo.+

21 “No mangisipan kad si Jehova a Dios mo,+ agka matantan a manumpal ed satan.+ Ta seguradon anapen itan ed sika nen Jehova a Dios mo; ta no andi et mankasalanan ka.+ 22 Balet no agka mangisipan, agka makapankasalanan.+ 23 Sumpal mo so salitan pinmaway ed bibil mo,+ tan gawam so sipan ya imbalikas na sangim bilang boluntaryon apay parad si Jehova a Dios mo.+

24 “No onla kad kaubasan na kaabay mo, nayarian moy mangan na ubas ya anggad napenek ka,* balet agmo la kakargaay pananginan mo.+

25 “No onla kad kapageyan na kaabay mo, nayarian moy man-arurot na matatken lan dawa, balet agmo papaloten so pagey na kaabay mo.+