Josue

17 Insan say apag+ et niiter ed tribu nen Manases,+ ta sikatoy panguloan+ nen Jose. Say panguloan nen Manases a si Makir+ ya ama nen Gilead, et sakey a sundalo, kanian niiter ed sikato so Gilead tan Basan.+ 2 Tan niiter so apag ed saray arum nin kapolian nen Manases unong ed saray pamilya ra, ed saray ananak nen Abi-ezer,+ ananak nen Helek, ananak nen Asriel, ananak nen Siquem, ananak nen Hefer, tan ananak nen Semida. Saraya so kapolian nen Manases ya anak nen Jose, saray lalaki unong ed saray pamilya ra.+ 3 Balet si Zelofehad,+ ya anak nen Hefer, ya anak nen Gilead, ya anak nen Makir, ya anak nen Manases, et anggapoy anak ton laki noagta bibii, tan saraya so kangaranan na ananak ton bibii: Mahla, Noa, Hogla, Milca, tan Tirza. 4 Kanian linma ira ed si Eleazar+ a saserdote, ed si Josue ya anak nen Nun, tan ed saray papangulo, ya inkuan da: “Si Jehova so angiganggan ed si Moises ya ikdan to kami na tawir ed limog na saray agagi mi.”+ Kanian inikdan to ra na tawir ed limog na saray agagi nen ama ra lapud ganggan nen Jehova.+

5 Wala met so samploran apag a niiter ed Manases nilikud ed dalin na Gilead tan Basan, a walad biek* na Jordan,+ 6 ta akaawat na tawir iray bibiin ananak nen Manases a singa met saray ananak ton lalaki, tan say dalin na Gilead et akayarian na saray arum nin kailalakan nen Manases.

7 Tan say ketegan na Manases et manlapud Aser ya anggad Micmetat,+ ya akaarap ed Siquem,+ tan say ketegan et mamaarap ed abalaten* ya anggad dalin na saray manaayam ed En-Tapua. 8 Akayarian na Manases so dalin na Tapua,+ balet say syudad na Tapua a walad ketegan na Manases et kayarian na saray kapolian nen Efraim. 9 Tan say ketegan et mamalasur ya anggad Kulos na Kana, diad abalaten na kulos. Wala ray syudad na Efraim ed nanleleetan na saray syudad na Manases,+ tan say ketegan na Manases et walad amianen na kulos, tan mangangga ed dayat.+ 10 Say bandad abalaten et kien na Efraim, tan say bandad amianen et kien na Manases, tan say dayat so ketegan to,+ tan onsabi iratan* ed Aser diad amianen, tan ed Isacar diad bukig.

11 Diad saray teritorya na Isacar tan Aser et niiter ed Manases so Bet-sean tan saray angkekelag* a baley to, say Ibleam+ tan saray angkekelag a baley to, saray manaayam ed Dor+ tan saray angkekelag a baley to, saray manaayam ed En-dor+ tan saray angkekelag a baley to, saray manaayam ed Taanac+ tan saray angkekelag a baley to, tan saray manaayam ed Megido tan saray angkekelag a baley to, taloran ataragey a pasen.

12 Balet ag-apataynan na saray kapolian nen Manases iray manaayam ed sarayan syudad; nantultuloy a nanayam ed sayan dalin iray Canaanita.+ 13 Sanen binmiskeg iray Israelita, impagmaliw dan aripen iray Canaanita,+ balet agda ra sigpot a pinataynan.+

14 Oniay inkuan na saray kailalakan nen Jose ed si Josue: “Akin et saksakey so apag a dalin ya inter mod sikami?*+ Dakdakel kami ta bebendisyonan kami nen Jehova ya anggad natan.”+ 15 Oniay ebat nen Josue ed sikara: “No dakdakel kayo, la kayo sirin ed katakelan, tan manlinis kayo na pasen yo diman diad dalin na saray Perizeo+ tan Refaim,+ ta say mapalandey a rehyon na Efraim+ et mainget la parad sikayo.” 16 Insan inkuan na saray kailalakan nen Jose: “Aliwa lan magenap ed sikami so mapalandey a rehyon, tan amin a Canaanitan manaayam ed dalin diad lawak* et walaan na saray pan-guerran karwahe+ a nantarem so dalig da,* balanglan saramay walad Bet-sean+ tan saray angkekelag* a baley na satan odino ed saramay walad Lawak* na Jezreel.”+ 17 Kanian oniay inkuan nen Josue ed sankaabungan nen Jose, ed Efraim tan Manases: “Dakdakel kayon tua, tan mabiskeg kayon maong. Aliwa labat a sakey ya apag so awaten yo,+ 18 noagta nakayarian yo met so mapalandey a rehyon.+ Anggaman katakelan itan, nayarian yon linisan itan, tan ditan so sampot na teritorya yo. Ta pataynanen yo iray Canaanita, anggano mabiskeg ira tan walaan iray pan-guerran karwahe a nantarem so dalig da.”*+