Levitico

11 Insan inkuan nen Jehova ed si Moises tan Aaron: 2 “Ibagam ed saray Israelita, ‘Saraya so mabilay a pinalsa diad dalin* a nayarian yon kanen:+ 3 Amin ya ayayep ya asian tan pisag iray kuko ra tan manpaparintek et nayarian yon kanen.

4 “‘Balet agyo kakanen irayan ayayep a manpaparintek odino asian so kuko ra: say kamelyo a manpaparintek balet ag-asian so kuko to. Ag-itan malinis parad sikayo.+ 5 Ontan met ed kuneho ed kabatoan,+ ta manpaparintek balet ag-asian so kuko to. Ag-itan malinis parad sikayo. 6 Pati say kuneho, ta manpaparintek balet ag-asian so kuko to. Ag-itan malinis parad sikayo. 7 Ontan met ed baboy,+ ta asian tan pisag so kuko to balet agmanpaparintek. Ag-itan malinis parad sikayo. 8 Agyo kakanen so antokaman a karne ra odino didiwiten so bangkay da. Ag-iratan malinis parad sikayo.+

9 “‘Saya so nayarian yon kanen ed amin a walad karanuman: Antokaman a walad karanuman a walaay palikpik tan siksik, balanglan diad saray dayat odino ilog, nayarian yo itan a kanen.+ 10 Balet antokaman a walad saray dayat tan ilog ya andiay palikpik tan siksik, ed amin ya amungkog a pinalsa tan ed amin a mabilay a pinalsa* a walad karanuman, makapadimlan bengatla itan parad sikayo. 11 On, nepeg a makapadimla iratan ed sikayo, tan agyo nepeg a kanen so antokaman a laman na saratan+ tan nepeg yon dimlaen iray bangkay na saratan. 12 Amin a walad karanuman ya andiay palikpik tan siksik et makapadimla iran bengatla ed sikayo.

13 “‘Saraya so ontitikyab a pinalsa a nepeg yon dimlaen; ag-ira nepeg a kanen lapud makapadimla iraya: say agila,+ say baga ed dayat, say andeket a buwitre,+ 14 say ambalangan baga tan amin a klase na andeket a baga, 15 amin a klase na wawak, 16 say ostrits, kulayot, garseta, amin a klase na falcon, 17 say melag a kulayot, kormoran, andukey-layag a kulayot, 18 ganso, pelikano, buwitre, 19 dulakak, amin a klase na heron, abubilya, tan kaging. 20 Amin a nampayak tan amungkog a pinalsa* ya onkukurang ed apatiran sali et makapadimla ed sikayo.

21 “‘Diad saray nampayak tan amungkog a pinalsa ya onkukurong ed apatiran sali, nayarian yo labat a kanen iramay walaay andukey iran sali a panlukso rad dalin. 22 Nayarian yon kanen iraya: saray nanduruman klase na ontitikyab a duron, arum nin naakan a duron,+ saray kuryat, tan saray manlukson duron. 23 Balet, saray arum nin nampayak tan amungkog a pinalsa a walaay apatiran sali et makapadimlan bengatla ed sikayo. 24 Magmaliw kayon agmalinis lapud saraya. Amin a maniwit ed bangkay da et magmaliw ya agmalinis ya anggad labi.+ 25 Siopaman a mangawit ed anggan dinan a bangkay da et nepeg ton ipesak iray kawes to;+ sikatoy magmaliw ya agmalinis ya anggad labi.

26 “‘Antokaman ya ayep ya asian so kuko to balet anggapoy pisag tan agmanpaparintek et agmalinis ed sikayo. Amin a maniwit ed saratan et magmaliw ya agmalinis.+ 27 Amin a mabilay a pinalsa ya ag-asian iray kuko ra* a kaiba ed saray pinalsan manaakar ed apatiran sali et agmalinis ed sikayo. Amin a maniwit ed saray bangkay da et magmaliw ya agmalinis ya anggad labi. 28 Samay mangawit ed saray bangkay da et nepeg ton ipesak iray kawes to,+ tan sikatoy magmaliw ya agmalinis ya anggad labi.+ Saratan et agmalinis ed sikayo.

29 “‘Saraya so amungkog a pinalsa diad dalin ya agmalinis ed sikayo: say utot a mankotkot, utot,+ amin a klase na tilay, 30 tuko, baleg a tilay, basakay, tilay ed kabueran, tan say angga. 31 Sarayan amungkog a pinalsa et agmalinis ed sikayo.+ Amin a maniwit ed saray bangkay da et magmaliw ya agmalinis ya anggad labi.+

32 “‘Antokaman a napelagan da sano inatey ira et magmaliw ya agmalinis, balanglan satan et sakey a kagawaan a gawad kiew, kawes, katat, odino sakon abel. Antokaman ya inusar a kagawaan so nepeg ya ipalgep ed danum, tan magmaliw itan ya agmalinis ya anggad labi; insan magmaliw a malinis. 33 No naplag iratan ed sakey a banga, nepeg yon betagen itan, tan antokaman a karga na satan et magmaliw ya agmalinis.+ 34 Antokaman a kakanen ya atedteran na danum a nanlapud satan a kagawaan et magmaliw ya agmalinis, tan antokaman a nainum a karga na satan a kagawaan et magmaliw ya agmalinis. 35 Antokaman a napelagan na bangkay da et magmaliw ya agmalinis. Balanglan diad pugon odino dalikan, nepeg itan a betagen. Saratan et agmalinis, tan mansiansia iran agmalinis ed sikayo. 36 Say subol tan bobon labat a panagtiponay danum so mansiansian malinis, balet siopaman a maniwit ed bangkay da et magmaliw ya agmalinis. 37 No say bangkay da et naplag ed bini ya itatanem, malinis itan. 38 Balet no adanuman so bini tan naplag so kabiangan na bangkay da ditan, agmalinis imay bini ed sikayo.

39 “‘Natan, no say ayep a kanen yo et ompatey, siopaman a maniwit ed satan et magmaliw ya agmalinis ya anggad labi.+ 40 Siopaman a mangan ed dinanman a kabiangan na bangkay na satan et nepeg ton ipesak iray kawes to, tan sikatoy magmaliw ya agmalinis ya anggad labi.+ Siopaman a mangawit ed bangkay na satan et nepeg ton ipesak iray kawes to, tan sikatoy magmaliw ya agmalinis ya anggad labi. 41 Amin ya amungkog a pinalsa ed dalin et makapadimlan bengatla.+ Ag-itan nepeg a kanen. 42 Agyo nepeg a kanen so antokaman a pinalsa ya onkukurong ed eges to, antokaman ya onkukurang ed apatiran sali to, odino antokaman ed amungkog a pinalsa ed dalin a dakdakel iray sali to, ta saratan et makapadimla.+ 43 Agyo pagmamaliwey inkasikayo* a makapadimla ed dinanman ya amungkog a pinalsa, tan agyo dudutakay inkasikayo tan magmaliw ya agmalinis nisengeg ed saratan.+ 44 Ta siak si Jehova a Dios yo,+ tan nepeg yon pasantosen so inkasikayo tan magmaliw a masanto,+ lapud masanto ak.+ Kanian agyo dudutakay inkasikayo* ed dinanman ya amungkog a pinalsa ya onggagalaw ed tapew na dalin. 45 Ta siak si Jehova ya angipaway ed sikayo ed dalin na Ehipto pian magmaliw ak a Dios yo,+ tan nepeg kayon magmaliw a masanto,+ lapud masanto ak.+

46 “‘Saya so ganggan nipaakar ed saray ayayep, saray ontitikyab a pinalsa, amin a mabilay a pinalsa* ya onggagalaw ed danum, tan ed amin a pinalsa* ya amungkog ed tapew na dalin, 47 pian nibiig so agmalinis manlapud malinis, tan ed nayarin kanen manlapud agnayarin kanen iran mabilay a pinalsa.’”+