Levitico

10 Diad saginonor, inala nen Nadab tan Abihu+ ya ananak nen Aaron iray kargaan day ngalab tan ininan day apoy tan kinargaan da na insenso.+ Insan angiyapay ira ed arapan nen Jehova na duman pinoolan ya insenso,+ ya agto ingganggan a gawaen da. 2 Diad saman et pinmaway so apoy a nanlapud si Jehova tan apoolan ira,+ kanian inatey ira ed arapan nen Jehova.+ 3 Insan inkuan nen Moises ed si Aaron: “Oniay inkuan nen Jehova, ‘Nepeg a napasanto ak ed limog na saramay asingger ed siak,+ tan nigloria ak ed arap na amin a totoo.’” Tan ag-inmesel si Aaron.

4 Kanian tinawag nen Moises si Misael tan Elzafan ya ananak nen Uziel,+ a pangamaen nen Aaron, tan inkuan tod sikara: “Gali dia, alsa yo iray agagi yo ed arap na masanton pasen tan iyakar yo ra ed paway na kampo.” 5 Kanian sinmingger ira tan inalsa da iray lalaki ya akasulong ni na saray andukey a kawes tan inyakar da ra ed paway na kampo, unong ya imbaga nen Moises ed sikara.

6 Insan inkuan nen Moises ed si Aaron tan ed arum ya ananak to a di Eleazar tan Itamar: “Agyo papaulyanan ya ag-akaayos iray buek yo, tan agyo pipilaten iray kawes yo,+ pian agkayo ompatey tan ag-onsanok so Dios ed amin a nantitipon a totoo. Saray agagi yo ed interon sankaabungan na Israel so onnangis lapud saramay pinatey nen Jehova ed panamegley na apoy. 7 Agkayo ontataynan ed lolooban na tolda a pantitiponan, ta no andi et ompatey kayo, lapud walad sikayo so larak a panaglana nen Jehova.”+ Kanian ginawa ra so unong ed salita nen Moises.

8 Insan inkuan nen Jehova ed si Aaron: 9 “Sano onloob kayo ed tolda a pantitiponan, agkayo oniinum na alak odino arum ni ran de-alkohol ya iinumen, sika tan saray ananak mo a kaibam,+ ta pian agkayo ompatey. Satan et permanentin ganggan parad saray henerasyon yo. 10 Saya et pian nibiig so masanton bengatla manlapud mabanday tan say malinis a bengatla manlapud agmalinis,+ 11 tan pian nibangat iray Israelita ed amin a totontonen ya imbaga nen Jehova ed sikara diad panamegley nen Moises.”+

12 Insan akitongtong si Moises ed si Aaron tan ed saray atilak ya ananak to a di Eleazar tan Itamar: “Ala yo so akeran apay a kakanen ed saray apay a pinoolan parad si Jehova tan akan yo diad abay na altar bilang andi-lebaduran tinapay,+ ta satan et bengatlan sankasantosan.+ 13 Nepeg yon kanen itan ed masanton pasen,+ ta satan so apag mo tan saray ananak mo ed saray apay a pinoolan parad si Jehova, lapud ontan so niganggan ed siak. 14 Kanen yo met ed malinis a pasen so pagew na apay ya ipapayapay tan say ulpo na sagradon kabiangan na bagat,+ sika tan saray ananak mon lalaki tan bibii a kaibam,+ ta sarayan bengatla so niiter bilang apag mo tan apag na saray ananak mo ed saray bagat a pandurungoan na saray Israelita. 15 Iyakar da so ulpo na sagradon kabiangan na bagat tan say pagew na apay ya ipapayapay pati saray pinoolan ya apay a taba, pian nipayapay itan ed arapan nen Jehova; tan onkana itan bilang permanentin apag parad sika tan saray ananak mon kaibam,+ unong ya ingganggan nen Jehova.”

16 Insan maseet ya inanap nen Moises imay kanding ya apay parad kasalanan,+ tan nalmoan ton apoolan la itan. Kanian sikatoy asanokan ed si Eleazar tan Itamar, saray atilak ya ananak nen Aaron, tan inkuan to: 17 “Akin et agyo kinan ed masanton pasen so apay parad kasalanan,+ ta satan et bengatlan sankasantosan tan inter to itan ed sikayo pian akoen yo so kasalanan na totoo tan makapanggawa kayo na pananakbong parad sikara diad arapan nen Jehova? 18 Agni anggan niloob ed masanton pasen so dala na satan.+ Kinan yo la komon itan ed masanton pasen, unong a niganggan ed siak.” 19 Inmebat si Aaron ed si Moises: “Inyapay da natan so apay da parad kasalanan tan apay da a popoolan diad arapan nen Jehova,+ anggano agawad siak irayan bengatla. No bilang ta kinan ko natan so apay parad kasalanan, naliketan kasi si Jehova?” 20 Sanen nadngel nen Moises itan, sikatoy inmabobon.