Salmo

37 Agka onsyosyodot lapud saray mauges a totoo

Tan agmo iibegan iramay manggagaway makapuy.+

 2 Singa ra dika a magangganon namagaan+

Tan singa ra balon tubon dika a mainomay a nalenes.

 3 Manmatalek kad si Jehova tan manggawa kay maong;+

Manayam kad dalin, tan kiwas ka a matoor.+

 4 Manliket kan maong ed si Jehova,

Tan iter tod sika iray pirawat na pusom.

 5 Ipiam ed si Jehova so dalan mo;+

Manmatalek kad sikato, tan sikatoy onkiwas parad sika.+

 6 Say inkatunong mo et pasindagen to a singa liwawad kabuasan,

Tan say inkahustisyam a singa agew no ugto.

 7 Mandeen ka labat ed arapan nen Jehova

Tan mananos kan manalagar ed sikato.+

Agka onsyosyodot ed samay too

A nagagawaan to ray pakana to.+

 8 Tundaan moy manpasnok tan paliisan moy onsanok;+

Agka onsyosyodot tan onggapon manggaway kaugsan.*

 9 Ta saray mauges a totoo et naandi,+

Balet saramay maniilalo ed si Jehova et tawiren day dalin.+

10 Agmanbayag et anggapo lay mauges;+

Nengnengen moy kawalaan da,

Et anggapo la ra.+

11 Balet saray mauyamo et tawiren day dalin,+

Tan manliket iran maong ed agnaparaan a kareenan.+

12 Say mauges a too et manplaplano sumpad matunong;+

Ingangayet to ray ngipen to ed sikato.

13 Balet sikatoy elekan nen Jehova,

Ta amta To a sikatoy mangangga.+

14 Saray mauges et uuyosen da ray espada ra tan pipinaten da ray pana ra

Pian itumba da imay nalalames tan mairap-bilay,

Pian pateyen da iramay maptek so dalan da.

15 Balet say mismon puso ra so naduyok na espada ra;+

Naputer iray pana ra.

16 Magmaong ni daiset a walad matunong

Nen say daakan a walad dakel a mauges.+

17 Ta saray taklay na mauges et naputer,

Balet tulongan nen Jehova so matunong.

18 Amta nen Jehova so dadalanen na saray andiay pakabalawan,*

Tan say tawir da et mansiansia ya anggad angga.+

19 Ag-ira niiyan ed kababaingan diad panaon na desyang;

Nawalaan iray daakan diad panaon na eras.

20 Balet saray mauges et naderal;+

Saray kabusol nen Jehova et naandi a singa saray balibalin panagpastolan;

Naandi ran singa asewek.

21 Say mauges et onuutang tan agmanbabayar,

Balet say matunong et mabunlok* tan maiter.+

22 Saramay benendisyonan na Dios et tawiren day dalin,

Balet saramay insamba To et naandi.+

23 Igigiya* nen Jehova iray kupbang na sakey a too+

Sano panliliketan To so dalan to.+

24 Anggan sikatoy natumba et agnipasubsob,+

Ta sikatoy susuportaan nen Jehova diad lima.*+

25 Nensaman et ugaw ak ni tan natan et matatken ak la,

Balet anggapo ni anengneng kon matunong ya apaulyan,+

Odino saray ananak to a mipapayabol na naakan.+

26 Sikatoy naynay a manpapautang a mabulbulos,+

Tan saray ananak to et mangawat na bendisyon.

27 Ipulisay moy kaugsan tan manggawa kay kamaongan,+

Et manayam kad dalin diad andi-anggaan.

28 Ta aaroen nen Jehova so hustisya,

Tan agto paulyanan iray matoor ed sikato.+

Nasalimbengan ira lawas;+

Balet say kailalakan na saray mauges et naandi.+

29 Saray matunong et tawiren day dalin,+

Tan manbilay ira ditan diad andi-anggaan.+

30 Say sangi na matunong et manginanabang na karunongan,*

Tan say itotongtong na dila to et hustisya.+

31 Say ganggan na Dios to et walad puso to;+

Ag-onkapuy iray sali to.+

32 Babantayan na mauges so matunong,

A manaanap na pankanawnawan napatey to.

33 Balet say matunong et agpaulyanan nen Jehova ed lima na mauges+

Tan agto ipasen a nankasalanan sano sikatoy uukomen.+

34 Manilalo kad si Jehova tan tumbok moy dalan to,

Tan itandoro to ka tan tawiren moy dalin.

35 Anengneng koy toon maruksa tan mauges

Ya ombubulaslas a singa masalompapak a kiew diad dalin ya akataneman to.+

36 Balet sikatoy biglan naandi tan anggapo la;+

Inanap-anap ko, tan agla naromog.+

37 Imanom pa so toon andiay pakabalawan,*

Tan agmo aalisan na mata so maptek,+

Ta say pansumpalan na satan a too et kareenan.+

38 Balet amin a makasalanan et naderal;

Say pansumpalan na mauges a totoo et kadederal.+

39 Si Jehova so mangililiktar ed matunong;+

Sikato so panag-amotan da diad panaon na gonigon.+

Iliktar to ra ed mauges tan isalba to ra,

Lapud pasasalimbengan irad sikato.+