Isaias
30 “Pakaskasi la iray benger ya ananak,”+ so inkuan nen Jehova,
“Saramay manusumpal na saray plano ya agnanlapud siak,+
Saramay miaalyansa,* balet ag-ira iwawanwan na espirituk,
Pian lalon naaruman so kasalanan.
2 Linma rad Ehipto+ ya agda ak kinonsulta,*+
Pian onamot ed proteksion na Faraon*
Tan pasalimbengan ed anino na Ehipto!
3 Balet pansengegay kababaingan yo so proteksion na Faraon,
Tan pansengegay kipaabeba yo so salimbeng na anino na Ehipto.+
4 Ta walad Zoan iray prinsipe to,+
Tan akasabi anggad Hanes iray ibabaki to.
5 Napabaingan iran amin
Na saray totoon agmakapangiter na gunggona ed sikara,
Ya anggapoy niiter dan tulong tan gunggona,
Noagta kababaingan tan kabandayan labat.”+
6 Say panangukom ed saray ayayep ed abalaten:
Diad dalin a kawalaay gulo tan kairapan,
Diad kawalaay leon, managlem a leon,
Diad kawalaay maditan uleg tan say singa apoy ya uleg ya ontitikyab,*
Et ilugan dad saray asno iray awit dan kayamanan
Tan diad beneg na saray kamelyo iray regalo ra.
Balet agnagunggonaan iray totoo ed sarayan bengatla.
7 Ta anggapoy kakanaay tulong na Ehipto.+
Kanian nginaranan ko iya na: “Rahab,+ say marendeen ya akayurong.”
8 “La ka, isulat mo itan ed sakey a tablan panagsulatan diad arapan da,
Tan isulat mo ed sakey a libro,+
Pian onkana itan ed arapen
Bilang sakey a permanentin pantasi.+
10 Ibabaga rad saray makakatalos na pasingawey, ‘Agkayo la onnenengneng,’
Tan diad saray propeta, ‘Agyo la ibabagad sikami iray tuan pasingawey.+
Saray panaglarog* so ibaga yod sikami; mangipropesiya kayo na saray makapalikdon katilaan.+
11 La kayod sananey a dalan; ekal kayod basbas.
Agyo la bibitlaen ed sikami so Masanton Dios na Israel.’”+
12 Kanian oniay imbaga na Masanton Dios na Israel:
“Lapud agyo inawat so salitak+
Tan nanmatalek kayod panagsaol tan panagtila
Tan nandepende kayod saraya,+
13 Sayan kasalanan yo et magmaliw a singa aderal a padir,
Singa sakey ya atagtagey a padir a magano lan nakusbo.
Bigla tan maples a nageba itan.
14 Nabetag itan a singa baleg a buyog a produkto na managdamili,
Namisimisi itan kanian anggapo lay nakeran langa
A pankaykay na apoy ed dalikan
Odino pankaor na danum ed sakey ya atapew ya abot.”*
15 Ta oniay inkuan na Soberanon Katawan a Jehova, say Masanton Dios na Israel:
“Niliktar kayo no ompawil kayo ed siak tan manpareen kayo;
Say biskeg yo et akadepende ed pansiansia yon kalmado tan pangipatnag yoy panagmatalek.”+
Balet agyo labay.+
16 Imbes, oniay imbaga yo: “Andi, ta akakabayo kamin ontakas!”
Kanian ontakas kayo.
“Tan onlugan kami ed maples iran kabayo!”+
Kanian ompeles met iramay manguusil ed sikayo.+
17 Ontakot so sanlibo lapud panamagyaw na sakey;+
Ontakas kayo lapud panamagyaw na limara
Anggad say nakera ed sikayo et singa sakey a posten pangisisingeray layag diad toktok na palandey,
Singa palitek a pinagkatanda ed toktok na pukdol.+
18 Balet si Jehova et maan-anos a manaalagar* ed pangipatnag toy kaabigan ed sikayo,+
Tan sikatoy onalagey pian kasian to kayo.+
Ta si Jehova et Dios na inkahustisya.+
Maliket so amin a mantultuloy a manilalo* ed sikato.+
19 Sano manaayam la iray totoo ed Sion, diad Jerusalem,+ agka la onakis.+ Seguradon kasian to ka sano narengel toy ikerew moy tulong; ebatan to kan tampol sano narengel to itan.+ 20 Anggaman ikdan kayo nen Jehova na gonigon a pinagkatinapay yo tan panamairap a pinagkadanum yo,+ agla onamot so Makapadinayew a Managbangat yo, tan nanengneng yon mismo so Makapadinayew a Managbangat yo.+ 21 Tan makarengel kayo na salita ed benegan yo, a kuan to, “Saya so dalan.+ Dia so panakaran yo,” no bilang onla kayod kawanan odino onla kayod kawigi.+
22 Tan dutakan yo iray imahen yon abalkot na pilak tan saray metal ya estatua yon abalkot na balitok.+ Ibantak yo iratan a singa abel ya uusaren parad panreregla, insan yo ibagan, “Ekal kayo dia!”*+ 23 Tan sikatoy mangiter na uran parad bini ya itanem yo,+ tan dakerakel tan sankaabigan* so tinapay a pawalaen na dalin.+ Diad satan ya agew, saray ayayep yo et mankabkab ed maawang a panagpastolan.+ 24 Tan saray baka tan asno a manbabaka ed dalin et mangan na maabig a kakanen a tinaepan. 25 Tan diad kada atagey a palandey tan atagey a pukdol et wala ray kulos tan aagusan na danum,+ diad agew na baleg a panamatey sano nageba iray tori. 26 Tan say sinag na tulaw a bulan et magmaliw a singa liwawa na agew; tan say liwawa na agew et magmaliw a maminpitoy inkaliwawa to,+ a singa kaliwawa na pitoran agew, sano bedberan nen Jehova so impakaderal* na totoo to+ tan paabigen toy aralem a sugat lapud impanusa tod sikato.+
27 Say ngaran nen Jehova et onsabi manlapud arawi,
A mandarlang so sanok to tekep na makapal iran lurem.
Napno na sanok iray bibil to,
Tan singa apoy ya manguupot so dila to.+
28 Say espiritu* to et singa delap a mapmaples ya onaagus ya anggad beklew so kaaralem to,
Pian yegyegen to iray nasyon ed yakayakan na kadederal;*
Tan iyan tod panga na saray totoo so sakey a renda+ a pakabalangan da.
29 Balet say kansion yo et magmaliw a singa samay kakansionen ed labi
Sano manpaparaan kayo* parad piesta,+
Tan manliket so puso yo a singa samay sakey
A manaakar a walaay* plauta
A paarap ed palandey nen Jehova, ed Bato na Israel.+
30 Iparengel nen Jehova so makapadinayew a boses to+
Tan iparungtal toy taklay to+ legan ya ondadapo itan lapud petang na sanok to,+
Tekep na apoy a manguupot,+
Maksil ya uran+ tan bagyon atekepay karol tan uran a kristal.+
32 Tan kada ibasig nen Jehova so lewet ton panagdusa
Pian idapo tod Asirya,
Bansagan itan na saray tamburin tan arpa,+
Legan ya iwawasiwas toy taklay to a milalaban ed sikara.+
33 Ta akaparaan la so Tofet*+ to;
Niparaan met itan parad ari.
Ginawa ton aralem tan maawang so buntonan na kiew,+
A balbaleg so apoy tan alusbo so kiew.
Say ingas nen Jehova, a singa onaagus ya asupre,
So mamool ed satan.