Apaldua so Panarian

ANTAM no akin ya pipilat-pilaten na sayan laki so kawes to? Ta ingganggan itan nen Jehova. Say ngaran to et Ahias, sakey a propeta na Dios. Antam no anto tay propeta? Sikatoy pangibabagaan na Dios no antoy nagawad arapen.

Sayay katongtong nen Ahias et si Jeroboam. Si Jeroboam imay pinili nen Solomon ya angasikaso ed impanpaalagey ed templo. Sanen asabat nen Ahias si Jeroboam, walay nikadkaduman ginawa nen Ahias. Inekal toy kawes to tan pinilat to ed 12 piraso. Imbaga tod Jeroboam: ‘Alam yay 10 piraso.’ Akin kasi?

Imbaga nen Ahias ya ekalen nen Jehova so panarian ed si Solomon tan iter Tod si Jeroboam so 10 tribu. Kanian, duaran tribu labat so natilak ed anak nen Solomon a si Rehoboam.

Sanen abalitaan iya nen Solomon, nampasnok ya maong. Sinali ton pateyen si Jeroboam. Balet batik si Jeroboam ed Ehipto. Ag-abayag, inatey si Solomon. Sikatoy 40 taon ya nan-ari, tan sinmublay ya ari so anak ton si Rehoboam. Akabatan nen Jeroboam ya inatey lay Solomon, kanian sikatoy pinmawil lad Israel.

Mauges ya ari si Rehoboam. Mas maruksa ni ingen nen say si tatay ton si Solomon. Linmay Jeroboam tan arum nin lalaki ed sikato pian bagaan dan magmaliw a makaaro ed saray totoo. Balet agdinmengel, lalon nagmaliw ya maruksa. Kanian, ginawa na totoo si Jeroboam ya ari na 10 tribu, balet atilak ed si Rehoboam so tribu nen Benjamin tan Juda.

Aglabay nen Jeroboam ya onlad Jerusalem iray totoo to pian mandayew ed templo nen Jehova. Kanian nanggawa na duaran balitok ya baka tan imbaga tod saray 10 tribu ya ditan mandayew. Ag-abayag, dinmakel so krimen tan kaugsan ed sakop to.

Dakel met so problema ed duaran tribu. Manga limaran taon kayarin nan-ari si Rehoboam, akilaban so ari na Ehipto ed Jerusalem. Inala to so dakel ya kayamanan diad templo nen Jehova. Kanian agangganon nausar so templo.