Jezebel—Mauges ya Reyna

SANEN inatey lay Arin Jeroboam, mauges iray sinmusublay ya ari ed 10 tribu. Balet say sankaugesan et si Arin Ahab. Antam no akin? Lapud mauges so asawa ton si Reyna Jezebel.

Aliwan Israelita si Jezebel. Sikatoy anak na ari na Sidon. Mandadayew si Jezebel ed aliwan tuan dios a si Baal, tan atukso toy Ahab tan dakel ya Israelita a mandayew met ed si Baal. Kabusol toy Jehova tan dakel so pinatey ton propeta. Saray arum et inmaamot ed kuweba pian ag-ira napatey. No walay labay nen Jezebel, sarasarag toy mamatey.

Aminsan, maer-ermen si Arin Ahab. Kanian tinepet nen Jezebel: ‘Akin et maer-ermen ka natan?’

‘Ta si Nabot. Labay kon saliwen may ubasan to, balet agto iter,’ so ebat nen Ahab.

‘Agka mapaga, alaen ko itan parad sika,’ so kuan nen Jezebel.

Kanian sinulatan nen Jezebel so arum ya opisyal na syudad a panaayaman nen Nabot. Imbaga to: ‘Mangala kayoy lokolokon totoo a mangibagan inayew nen Nabot so Dios tan say ari. Insan ipaway yod syudad si Nabot tan tupak yo anggad ompatey.’

Nen naamtaan nen Jezebel ya inatey lay Nabot, imbaga tod si Ahab: ‘La ka, alam lay ubasan to.’ Di ba nepeg labat ya dusaen si Jezebel ta mauge-uges?

Kanian asabi panaon, imbaki nen Jehova si Jehu pian dusaen si Jezebel. Sanen abalitaan nen Jezebel ya nitan lay Jehu, kinoloran toy mata to tan nan-ates. Balet sanen anengneng nen Jehu si Jezebel diad bintana, imbando tod saray lalakin walad palasyo: ‘Ipelag yo tan a bii!’ Tinmulok iray lalaki, ya singa nanenengneng mod litrato. Kanian impelag day mauges ya Reyna Jezebel tan inatey.