Nikadkaduman Ilalo!

“Siopaman a manbilay tan manisia ed siak agbalot ompatey.”—JUAN 11:26.

1. Minilyon natan ya inaatey so napaoli ed anton klase na kaliberliber?

SANO napaoli laray minilyon, sikaray agnapaoli ed anggapoy kargan dalin. (Gawa 24:15) Sikaray onliing ed aparakep a kaliberliber tan naimano ran saray panayaman, kawesen, tan daakan a tagano et niprepara la parad sikara. Siopa so manggawa ed amin na sayan preparasyon? Mapatnag, kaukolan a walaray totoon manbibilay ed balon mundo sakbay ya onggapoy mangaraldalin a kikioli. Balet siopa ra?

2-4. Anton nikadkaduman ilalo so manatalaran ed saramay manbibilay ed “saray kaunoran ya agew”?

² Say pakakasumpal na propesiya ed Biblia so mangipapanengneng a manbibilay itayo la ed “saray kaunoran ya agew” na sayan sistema na bengabengatla.a (2 Timoteo 3:1) Agla mabayag, onsalet si Jehova a Dios ed saray pakurang na too tan punasen toy karelmengan ed dalin. (Salmo 37:​10, 11; Uliran 2:​21, 22) Diad satan a panaon, antoy nagawa ed saramay sitotoor a manlilingkor ed Dios?

³ Agderalen nen Jehova iray matunong a kalaktip na saray marelmeng. (Salmo 145:20) Agto nin balot ginaway ontan, tan agto gawaen itan sano linisan toy dalin ed amin ya inkauges. (Ikompara so Genesis 18:​22, 23, 26.) Diad tua, say unor a libro na Biblia so manutukoy ed “sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita,” ya ompapaway ed “baleg ya irap.” (Apocalipsis 7:​9-14) On, sakey a baleg a karaklan so makaliktar ed baleg a kairapan a panganggaan na peles a marelmeng a mundo, tan sikaray onloob ed balon mundo na Dios. Ditan, saray matulok a katooan so sigpot a nagunggunaan manlapud makapakelaw a probisyon na Dios a kibulosay katooan manlapud kasalanan tan ipapatey. (Apocalipsis 22:​1, 2) Kanian, say “baleg ya ulop” so aglan balot makaeksperiensiay ipapatey. Agaylan nikadkaduman ilalo!

⁴ Makapanmatalek tayo ta ed sayan makapakelkelaw ya ilalo? Sigpot! Impatnag a mismo nen Jesu-Kristo a wala naani panaon a manbilay iray totoo ya aglan balot ompatey. Sakbay a tuloy na impamaoli ed kaaro ton Lazaro, inkuan nen Jesus ed si Marta: “Siopaman a manbilay tan manisia ed siak agbalot ompatey.”​—Juan 11:26.

Makapambilay Ka met ya Ando lan Ando

5, 6. No labay moy manbilay ya ando lan ando ed Paraiso diad dalin, antoy nepeg mon gawaen?

⁵ Labay mo ta so manbilay ya ando lan ando ed Paraiso diad dalin? Panpirawatan mo ta a nanengneng lamet iray inad-arom? Sirin nepeg moy mangala na suston pikakabat ed linawa tan saray gagala na Dios. Diad pikakasi ed Dios, inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”​—Juan 17:3.

⁶ Linawa na Dios ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:​3, 4) Natan la so panaon pian aralen no panon mo, kaibay minilyon nin akaparaan a manggaway linawa na Dios, so makapambilay ya ando lan ando ed Paraiso diad dalin. Maliket iray Tastasi nen Jehova ya ontulong ed sikan naamtaan a nagkalalo so nipaakar ed Dios tan saray kakaukolanen to. Akin ya agmitongtong ed sikara diad Kingdom Hall ya asingger ed sikayo odino mansulat ed sankaasinggeran ya address a nilista ed ontumbok a pahina?

[Saray paimano ed leksab]

[Litrato ed pahina 31]

“Sakey a baleg ya ulop” ya aglan balot makaeksperiensiay ipapatey