Kapitulo Uno
Pankakasakey ed Panagdayew Diad Panaon Tayo—Anto so Kabaliksan na Satan?
1, 2. (a) Anton makapaliket a pakurang so nagagawa ed panaon tayo? (b) Anton makapakelaw ya ilalo so wala ed saray matuan-impanpuson totoo?
DIAD sankamundoan et wala so makapaliket a pakurang a mamapaarap ed pankakasakey ed panagdayew. Pankakasakeyen na satan iray minilyon a totoo ed amin a nasyones, tribu, tan lenguahe. Dakel ni so natitipon kada taon. Saraya so nipabidbir ed Biblia bilang ‘tastasi’ nen Jehova tan atawag a “baleg ya ulop.” Isasaklang da ed Dios so “sagradon serbisyo ed agew tan labi.” (Isaias 43:10-12; Apocalipsis 7:9-15, NW) Akin a gagawaen da iya? Lapud akabat da si Jehova bilang say alenleneg a tuan Dios. Satan so mamapakiwas ed sikara a mangitukoy na bilay da unong ed saray matunong a dalan to. Ontan met, naaralan da a manbibilay itayo la “ed saray kaunoran ya agew” na sayan peles a mundon marelmeng, a magano lan deralen na Dios, tan salatan na paraison balon mundo to.—2 Timoteo 3:1-5, 13; 2 Pedro 3:10-13.
2 Insipan na Salita na Dios: “Wala ni so daiset, et say bagel onandi. . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.” (Salmo 37:10, 11) “Say matunong tawiren to so dalin tan manayam diman lawas.” (Salmo 37:29) “Punasen [na Dios] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot. Ta saray ona a bengatla sikara so linmabas la.”—Apocalipsis 21:4.
3. Panon a nagagawa so tuan pankakasakey ed panagdayew?
3 Saramay nikakasakey la natan ed tuan panagdayew so manutugyop ed saray unonan manayam ed satan a balon mundo. Naaralan da no anto so linawa na Dios tan satan so gagawaen da ed anggaan na nayarian da. Diad pangipapabitar nen Jesus ed kaimportantian na saya, oniay inkuan to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Insulat nen apostol Juan: “Say mundo mangangga, tan saray penel to, sabalet so mangunor ed linawa na Dios onsiansia lawas.”—1 Juan 2:17.
No Anto so Peteg a Kabaliksan na Satan
4. (a) Anto so peteg a kabaliksan na katitipon na dakerakel diad nankakasakey a panagdayew ed panaon tayo? (b) Panon so impaneskribe na Biblia ed sayan panagtipon?
4 Anto so peteg a kabaliksan na katitipon natan na dakerakel diad nankakasakey a panagdayew? Satan so malinew ya ebidensyan asingsingger tayo la ed anggaan na sayan marelmeng a mundo, ya onggapon tampol so balon mundo na Dios kayari na satan. Sikatayo so makakaimaton ed kasumpalan na saray propesiya na Biblia ya angipasakbay ed sayan makatantandan panagtipon. Inkuan na sakey ed saratan a propesiya: “Dia ed saray kaunoran ya agew [sarayan kaunoran ya agew] nagawa naani, a say palandey na abung nen Jehova [say nipaatagey a tuan panagdayew ed sikato] niletneg naani ed toktok na saray palandey [ya atagtagey nen say anggan anton nengneng na panagdayew]; . . . et saray baley onagus ira naani ed sikato. Et dakel a nasyon onla ra naani a kuan da, Dago kayo, tan onsegep itayo ed palandey nen Jehova, tan ed abung na Dios nen Jacob; et ibangat to itayo ed saray dalan to, tan manakar itayo ed basbas to.”—Miqueas 4:1, 2; Salmo 37:34.
5, 6. (a) Panon a tua ya onaarap iray nasyones ed si Jehova? (b) Antoray nepeg tayon itepet ed inkasikatayo?
5 Anggaman ag-onprepresenta so interon nasyones ed espiritual ya abung na panagdayewan ed si Jehova, minilmilyon a totoon nanlapud amin a nasyones so mandadayew ed sikato. Legan ya aaralen da so nipaakar ed maaron gagala tan say makapasagyat a personalidad nen Jehova a Dios, saray kapusoan da so atenyeg a tuloy. Mapaabeban aanapen da no anto so kakaukolanen na Dios ed sikara. Say pikakasi ra so singa samay pikakasi na salmista sanen inkuanto: “Ibangat moak a mangunor na linawam; ta sika so Dios ko.”—Salmo 143:10.
6 Kasin kabiangan ka la na baleg ya ulop na totoon ititipon nen Jehova natan ed nankakasakey a panagdayew? Kasin say kiwas mo ed bangat a naawat mo ed Salita to so mangipanengneng a talagan papablien mo a si Jehova so Lapuan na satan? Diad anton kalaknab so ‘panakar mo ed basbas to’?
No Panon Itan a Nadadampot
7. (a) Diad anton kalaknab so pakadampot a siansia ed pankakasakey ed panagdayew? (b) Akin a maganat so pagmaliw a managdayew ed si Jehova natan, tan panon a natulongan so arum a manggawa ed satan?
7 Gagala nen Jehova ya amin a matudion pinalsa so mankakasakey ed tuan panagdayew. Agayla so pampirawat tayo ed panaon sano amin lan manbilay et mandayew ed alenleneg a tuan Dios! (Salmo 103:19-22) Balet sakbay itan a nagawa, nakaukolan a paandien nen Jehova so amin ya agmalabay a manggawa ed matunong a linawa to. Sikato so mapangasin mangipapasakbay ed no anto so gawaen to, ta pian saray totoo ed amin a pasen so nawalaan na pankanawnawan manguman ed kurang da. (Isaias 55:6, 7) Kanian “diad balang nasyon tan poli tan salita tan baley” ed agew tayo, sayan maganat a tawag so nipapasabi: “Takotan yo so Dios, tan iter yo ed sikato so gloria, ta say oras na panangukom to sinmabi la; tan igalang yo so nanggawa ed tawen tan dalin tan say dayat tan saray subol na saray danum.” (Apocalipsis 14:6, 7) Kasin inawat mo la itan ya imbitasyon? No ontan, pribilehyom ya imbitaan ni so arum a mangamta tan mandayew ed tuan Dios.
8. Kayari na impakaaral tayo ed saray manunan bangat na Biblia, anto nin iyaaligwas so nepeg tayon panbanikelan a gawaen?
8 Aggagala nen Jehova a sikatoy dayewen na totoon mankuan a manisia ed sikato balet ta itutultuloy dan gawaen iray dilin panlabayan da. Kaliktan na Dios a saray totoo so makarateng ed “suston pikakabat ed linawa to” tan saya so ipatnag da ed bilay da. (Colosas 1:9, 10, NW) Sirin, saray maapresyan totoo a makaaral ed manunan bangabangat na Biblia so magunaet ya ontundas ed Kristianon inkatatken. Say pilalek da et say nagkalalon pikabat ed si Jehova, a palaknaben tan paaralemen da so pakatalos ed Salita to, tan lalon nagnap ya iyaplika itan diad kabibilay da. Panggugunaetan dan ipatnag iray kalidad na mangatatawen ya Ama tayo tan moriaen da iray pamaakaran unong ed panmoria to. Saya so mamapakiwas ed sikaran mananap na saray paraan a mibiang ed manangisalbay-bilay a kimey a pagagawa to diad dalin ed panaon tayo. Ontan met kasi so pilalek mo?—Marcos 13:10; Hebreos 5:12–6:3.
9. Diad antoran dalan a posible natan so tuan pankakasakey?
9 Ipapanengneng na Biblia a saramay manlilingkor ed si Jehova so nepeg a nankakasakey a totoo. (Efeso 4:1-3) Sayan pankakasakey so nepeg a niwala natan, anggaman manbibilay itayo ed mundon naapag-apag tan siansia nin mipupuligesgesan itayo ed dilin ag-inkayadyari tayo. Mapetepet ya impikasi nen Jesus ya amin a babangatan to so magmaliw iran saksakey, a panggayagaan da so tuan pankakasakey. Anto so kabaliksan na saya? Unona, sikara so nawalaan na maabig a relasyon ed si Jehova tan diad Anak to. Komadua, sikara so mankakasakey. (Juan 17:20, 21) Pian nagawaan itan, say Kristianon kongregasyon so onkakana bilang organisasyon a pangibangatan nen Jehova ed totoo to.
Antoran Sengegan so Ontulong ed Pankakasakey?
10. (a) Anto so nabayuboan tayo sano personal tayon usaren so Biblia a mankatunongan ed saray ebat ed tepetepet a mangaapekta ed sikatayo? (b) Analisaen iray sengegan ya ontulong ed Kristianon pankakasakey diad pangebat ed saray tepet a nilista ed sayan parapo.
10 Nipaimano ed leksab so pitoran manunan sengegan ya ontulong diad pankakasakey ed panagdayew. Legan ya ebatan moray kaulop a tepet, morekdeken no panon ya apektaen na kada punto so relasyon mo ed si Jehova tan ed saray kaparan Kristiano. Say pankatunongan ed sarayan punto tan say pambasa ed saray nisitan kasulatan ya ag-inaon so ontulong pian nabayuboan mo so maridios a kakabatan, abilidad na panagnonot, tan pakatebek—kalidades a kaukolan tayon amin. (Uliran 5:1, 2; Filipos 1:9-11) Sarayan sengegan so konsideraen a sansasakey.
(1) Bibidbiren tayo so kanepegan nen Jehova a mangigeter ed estandarte no nipaakar ed maong tan mauges. “Manmatalek ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.”—Uliran 3:5, 6.
Akin a nepeg tayon kerewen so simbawa tan panangiwanwan nen Jehova sano manggawa na saray desisyon? (Salmo 146:3-5; Isaias 48:17)
(2) Walaan itayo na Salita na Dios a mangiwanwan ed sikatayo. “Sanen inawat yo ed sikami so salita ya ingganggan, a salanti salita na Dios, inako yo ya aliwan singa salita na totoo, balet unong ed katuaan, say salitay Dios, a sikato met so onggawa ed sikayo a manisia.”—1 Tesalonica 2:13.
Anto so kaatapan na basta panggawa ed “liknaen” tayon susto? (Uliran 14:12; Jeremias 10:23, 24; 17:9)
No agtayo amta so simbawa na Biblia ed sakey a pamaakaran, anto so nepeg tayon gawaen? (Uliran 2:3-5; 2 Timoteo 3:16, 17)
(3) Nagugunggonaan itayon amin ed parehon programa na espiritual a panagtagano. “Amin iray anak mo nibangat ira ed Jehova.” (Isaias 54:13) “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la lapud nanengneng yo a manasingger so agew [na kadederal]”.—Hebreos 10:24, 25.
Antoray nagunggona na saramay sigpot ya ondungo ed saray uksoyan na espiritual a panagtagano nen Jehova? (Isaias 65:13, 14)
(4) Si Jesu-Kristo, tan aliwan too, so Pangulo tayo. “Agkayo komon patatawag na Rabbi, ta sakey so managbangat ed sikayo, et sikayo ya amin sanaagi kayo. Tan anggapoy tawagen yo na ama ed dalin, ta sakey so Ama yo, a sikatoy wala ed tawen. Tan agkayo met patatawag na katawan, sakey so katawan yo a salanti si Kristo.”—Mateo 23:8-10.
Manepeg kasin ipasen tayo’y inkasikatayo ya atagey nen saray arum? (Roma 3:23, 24; 12:3)
(5) Manilalo itayo ed gobiernon Panarian na Dios bilang say alenleneg ya ilalo na katooan. “Kanian onia sirin no mikasi kayo; Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin. Ingen anapen yo nin unona so panarian, tan say inkatunong to.”—Mateo 6:9, 10, 33.
Panon a makatulong so ‘pananap ya unona ed panarian’ ed pakasalimbengay pankakasakey tayo? (Miqueas 4:3; 1 Juan 3:10-12)
(6) Papawalaen na masanton espiritu ed saray managdayew ed si Jehova iray kalidad a makanakana ed Kristianon pankakasakey. “Say bunga na espiritu sikato so aro, liket, deen, kasungdoan, kauyamoan, kaabigan, sisia, tayadno, dangka.”—Galacia 5:22, 23.
Anto so nepeg tayon gawaen ta pian pawalaen na masanton espiritu na Dios ed sikatayo so bunga na satan? (Gawa 5:32)
Panon a say pakawalaan na espiritu na Dios et mangimpluensya ed relasyon tayo ed saray kaparan Kristiano? (Juan 13:35; 1 Juan 4:8, 20, 21)
(7) Amin na saray tuan managdayew ed Dios so mibibiang diad panangipulong ed maong a balita na Panarian to. “Saya ya ebanghelyo na panarian so nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.”—Mateo 24:14.
Anto so nepeg a mamakiwas ed sikatayon mibiang a sigpot ed sayan kimey na panagpulong? (Mateo 22:37-39; Roma 10:10)
11. Sano iyaplika tayo iray katuaan na Biblia ed bilay tayo, anto so epekto?
11 Lapud nankakasakey a panagdayew ed si Jehova, lalo itayon onapit ed sikato tan panggayagaan tayo so makarepreskon pililimog ed saray kapananisiaan. Ibabaga na Salmo 133:1: “Nengneng yo, alay kaabigan tan alay kaligliwaan na panayam na sanaagi ed inkasaksakey!” Agaylan makarepresko so iyarawi ed mundo a pati amin a kasibletan to, imoralidad, tan karawalan tan pian mitipon ed saramay tuan mangaaro ed si Jehova tan manguunor ed saray ganggan to!
Paliisan Iray Impluensyan Mangapag-apag
12. Akin a nakaukolan tayon paliisan so independentin espiritu?
12 Ta pian agnabuyak so mabmablin sankagloboan a pankakasakey tayo, nepeg tayon paliisan iray impluensyan mangapag-apag. Sakey ed saraya et say espiritu na iyaarawi ed Dios tan diad saray ganggan to. Sikatayo so tutulongan nen Jehova a makapaliis ed satan diad pangipaparungtal to ed lapuan na satan, si Satanas a Diablo. (2 Corinto 4:4; Apocalipsis 12:9) Si Satanas so angimpluensya ed si Adan tan Eva a mangibaliwala ed imbaga na Dios tan manggawa na saray desisyon a sumlang ed linawa na Dios. Say nansumpalan so desyang ed sikara tan ed sikatayo. (Genesis 3:1-6, 17-19) Sayan mundo so abalkot ed espiritu na iyaarawi ed Dios tan ed saray ganggan to. Kaukolan tayo sirin a labanan itan ya espiritu ed inkasikatayo.
13. Antoy mangipanengneng no kasin sikatayo so masimoon a manpaparaan a para ed bilay diad matunong a balon mundo na Dios?
13 Alimbawa, imanoen so makapasagyat a sipan nen Jehova a salatan to so peles a marelmeng a mundo na balon katawenan tan sakey a balon dalin a ‘panayaman na inkatunong.’ (2 Pedro 3:13) Agta satan so mamakiwas ed sikatayon onggapon manparaan a manbilay ed satan a panaon sano ontalona so inkatunong? Kabaliksan na saya so panumpal ed mabitar a simbawa na Biblia: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo, say aro na Ama andi ed sikato.” (1 Juan 2:15) Sirin, paliisan tayo iyan awawey na mundo—say independentin ugali, say alablabas a panagpaga ed dili, say imoralidad tan karawalan. Iyugali tayo so italineng ed si Jehova tan impapuson tuloken tayo, anggaman ed sumlang iran kaliktan na ag-ayadyarin laman. Say interon kurang na bilay tayo so mamaneknek a say panagnonot tan saray motibo tayo so nipasal diad panaggawa ed linawa na Dios.—Salmo 40:8.
14. (a) Akin ya importantin anamoten so pankanawnawa natan ya aralen iray dalan nen Jehova tan tumboken iratan ed bilay tayo? (b) Anto so kabaliksan ed sikatayo na saray nisitan teksto ed parapo?
14 Sano nasabi lay inggeter a panaon pian deralen nen Jehova iyan marelmeng a sistema na bengabengatla tan ed amin a manutumbok ed dalan to, agto la ipaleen. Agto iguntang itan a panaon odino umanen iray estandarte to ta pian awaten iraman so siansia nin manasalin ompeket ed mundo legan a paspasaray so panaaral tan panusumpal da ed linawa na Dios. Natan la so panaon na ikiwas! (Lucas 13:23, 24; 17:32; 21:34-36) Sirin, agaylan makapaligsay-puso so pakanengneng ed baleg ya ulop a mangaanamot ed sayan mabmablin pankanawnawa, a panggunaetan ya anamoten so bangat ya itatarya nen Jehova ed panamegley na Salita tan organisasyon to tan mankakasakey a manakar ed basbas ton mamaarap ed balon mundo! Tan kapiganman a dakel so nanaaral tayo nipaakar ed si Jehova, sikato so lalon aroen tayo tan labay tayon panlingkoran.
Repason Pantongtongan
• Anto so gagala nen Jehova no nipaakar ed panagdayew?
• Kayari na impakaaral tayo ed saray manunan bangat na Biblia, anto nin iyaaligwas so panggunaetan tayon gawaen?
• Anto so nagawaan tayo bilang indibidual ta pian makapikasakey ed arum a managdayew ed si Jehova?
[Litrato ed pahina 4]
‘Saray mauyamo tawiren da so dalin tan manliket ira ed inkadaakan na kareenan’