Kapitulo Beinte-uno

Narapat na Gagala nen Jehova so Maglorian Itatalona

1, 2. (a) Anto so gagala nen Jehova nipaakar ed saray matudion pinalsa to? (b) Siopara so kabiangan ed nankakasakey a pamilya na saray managdayew ed Dios?

AMIN a matudion pinalsa so nankakasakey diad panagdayew ed alenleneg a tuan Dios tan panggagayagaan na amin so maglorian kawayangan bilang ananak na Dios​—satan so maaron gagala nen Jehova. Satan met so pampilpilalekan na saray manangaro ed inkatunong.

² Sayan engranden gagala so ginapoan nen Jehova a sumpalen sanen inggapo to so kimey na impamalsa to. Say inmunan pinalsa to et sakey ya Anak a nanlapu la’d inkioli to et “sinag na gloria [na Dios] tan dilin talintao na inka-Dios to.” (Hebreos 1:1-3) Sayan Anak so nikadkaduma, unong ta sikato so pinalsan bukbukor na Dios. Ontumbok, diad panamegley na sayan Anak et saray amin nin arum a bengatla so niwala: unona saray anghel ed tawen, insan saray totoo ed dalin. (Job 38:7; Lucas 3:38) Amin na saraya so anibukel ed sakey a sankatalbaan a pamilya. Diad amin da et si Jehova so Dios, say Sankatalbaan a Soberano, tan maaron Ama ra.

3. (a) Anto so atawir tayon amin ed inmunan atateng tayo? (b) Anton maaron probisyon so ginawa nen Jehova para ed saray ilalak nen Adan?

³ Sanen akondena ed patey iray inmunan toon atateng tayo bilang nanggagalan managkasalanan, sikara so pinataynan ed Eden insan intalirak na Dios. Aliwa la ran kabiangan na sankatalbaan a pamilya to. (Genesis 3:22-24; Deuteronomio 32:4, 5) Amin tayo so kapolian da, kanian nianak itayon walaan na makasalanan a tendensya. Balet kabat nen Jehova ya arum ed limog na saray kapolian nen Adan tan Eva so mangaro ed inkatunong. Sirin Sikato so simamaaron nanggawa na probisyon ta pian narapat na saraya ‘so maglorian kawayangan na saray ananak na Dios.’​—Roma 8:20, 21.

Abalang na Israel so Naabobonan a Talindeg

4. Anton pribilehyo so innatnat nen Jehova ed inmunan Israel?

⁴ Ngalngalin 2,500 taon kayari inkapalsa nen Adan, innatnat nen Jehova so pribilehyo ed pigaran totoo a nawalaan na nikabiig a relasyon ed Sikato. Pinili to so inmunan Israel a nagmaliw a totoo to tan inter to ed sikara so Ganggan to. (Genesis 12:1, 2) Tinugyop to ra ed sakey a nasyon tan inusar to ra nipaakar ed gagala to. (Deuteronomio 14:1, 2; Isaias 43:1) Anggaman ontan, sikara nin siansia so aripen na kasalanan tan patey, sirin agda nanggayagaan so maglorian kawayangan a datin wala ed si Adan tan Eva.

5. Panon ya abalang na saray Israelita so nikabkabiig a talindeg da ed Dios?

⁵ Anggaman kuan, saray Israelita so walaan na naabobonan a talindeg ed Dios. Responsabilidad da met a respetoen si Jehova bilang Ama ra tan mankimey a mitunosan ed gagala to. Indanet nen Jesus so kaimportantian na panumpal da ed satan ya obligasyon. (Mateo 5:43-48) Anggaman ontan, ag-iya agawaan na nasyon na Israel. Anggaman imbaga na saraman a Judio a “wala so sakey ya Ama mi, salanti Dios,” inyabawag nen Jesus a saray kiwas da tan say impatnag dan espiritu so sumlang ed ibabaga ra. (Juan 8:41, 44, 47) Nen 33 K.P., say Ganggan so impanampot na Dios, et angangga lay nikabkabiig a relasyon na Israel ed sikato. Balet kasin kabaliksan na saya ya aglan balot napanggayagaan na totoo so naabobonan a relasyon ed Dios?

Panagtipon “ed Saray Bengatla ed Katawenan”

6. Anto so gagala na “panangimaton” a sinalambit nen Pablo ed Efeso 1:9, 10?

⁶ Impanengneng nen apostol Pablo a napanggayagaan na arum ed limog na katooan so nikabkabiig a relasyon ed Dios. Alimbawa, nipaakar ed uksoyan nen Jehova a ditan et saramay mangagamil na pananisia so nayarin magmaliw a membro na sankaabungan To, insulat nen Pablo: “Impaamta [na Dios] ed sikatayo so sagradon sekreto na linawa to. Satan so unong ed maabig a panliketan to a ginagala to ed inkasikato so nipaakar ed sakey a panangimaton diad nagnap a kasumpalan na saray aturon panaon, salanti, pian tiponen lamet so amin a bengatla a mikasakey ed Kristo, saray bengatla ed katawenan tan saray bengatla ed dalin.” (Efeso 1:9, 10, NW) Sayan “panangimaton” so nisentro ed si Jesu-Kristo. Diad panamegley to, saray totoo so nitarok ed naabobonan a kipapasen ed arap na Dios. Say limitadon bilang da so awalaan na ilalon manayam ed tawen. Say mas dakel a bilang so manbilay na ando lan ando diad dalin.

7. Siopa so “saray bengatla ed katawenan”?

⁷ Unona, ginmapo nen Pentecostes 33 K.P., niiter so imano ed “saray bengatla ed katawenan,” salanti, saraman so kaiban mananawir nen Kristo ed mangatatawen a Panarian. Diad letnegan na pananisia ra ed bili na bagat nen Jesus, sikara so inyabawag na Dios a matunong. (Roma 5:1, 2) Asabi panaon, nikasakey iray Judio tan Gentil, tan “saray bengatla ed katawenan” so manbilang na 144,000. (Galacia 3:26-29; Apocalipsis 14:1) Say nakdaan labat la so wadia ni ed dalin.

Panagtipon ed “Saray Bengatla ed Dalin”

8. Siopa so “saray bengatla ed dalin,” tan anto so relasyon da ed si Jehova?

⁸ Titiponen met na satan a panangimaton so “saray bengatla ed dalin.” Minilyon so totoon natitipon natan a manilalon manbilay na ando lan ando ed dalin. Diad pikakasakey da ed nakdaan na mananawir ed Panarian, itatandoro ra so ngaran nen Jehova tan iyaalangon da so panagdayew ed sikato. (Isaias 2:2, 3; Sofonias 3:9) Tatawagen da met si Jehova bilang “Ama” lapud sikato so bibidbiren dan subol na bilay. Tan panggagayagaan da so naabobonan a talindeg ed arap to diad letnegan na pananisia ra ed nipaagus a dala nen Jesus. (Apocalipsis 7:9, 14) Balet lapud sikara nin siansia so ag-ayadyari, say sigpot a kabidbir da bilang ananak na Dios so dia ni ed arapen.

9. Anton sipan so ibabaga na Roma 8:21 para ed katooan?

⁹ Sarayan walaan na mangaraldalin ya ilalo so magunaet natan a manaalagar ed panaon sano say toon pinalsa so ‘nibulos manlapud panangaripen na kabubulok.’ (Roma 8:21) Satan a kawayangan so onggapo kayarin panampoten nen Kristo tan saray mangatatawen ya armada to so baleg a kairapan diad kapantokan na Armagedon. Kabaliksan na saya so kaderal na interon marelmeng a sistema nen Satanas, a tumboken na saray bendisyon na Sanlibon Taon ya Uley nen Kristo ed pakayari na Panarian.​—Apocalipsis 19:17-21; 20:6.

10. Saray lingkor nen Jehova so mankanta na anton kanta na panangidayew?

¹⁰ Agaylan makapaliket itan sano saray lingkor nen Jehova ed dalin so mankakasakey a mangiyaniweng ed liknaan na saray lingkor to ed tawen, a magaygayagan mangikelyaw: “Baleg tan makapakelaw iray kimey mo, Jehova a Dios, say Makapanyarin-amin. Matunong tan tua iray dalan mo, Ari ed andi-anggaan. Siopa so ag-ontakot ed sika, Jehova, tan mangigloria ed ngaran mo, lapud sika lambengat so matoor? Ta amin a nasyones so ondago tan mandayew ed arap mo, lapud saray matunong a ganggan mo so nipatnag la.” (Apocalipsis 15:3, 4, NW) On, amin a lingkor nen Jehova so mankakasakey diad panagdayew ed alenleneg a tuan Dios. Anggan saray inaatey so napaoli tan naikdan na pankanawnawan mikasakey diad pangikasil na boses da diad pangidayew ed si Jehova.​—Gawa 24:15.

Makapakelaw a Kawayangan ed Arapen

11. Anton makapakelaw a kawayangan so panggayagaan na saray niliktar ed baleg a kairapan?

¹¹ Kayari na baleg a kairapan diad pantok na satan ed Armagedon, nalinisan so dalin ed karelmengan, et aliwa lan si Satanas a Diablo “so dios na sayan sistema na bengabengatla.” Anggapo lay mauges ya impluensya nen Satanas a pibakalan na saray managdayew ed si Jehova. (2 Corinto 4:4, NW; Apocalipsis 20:1, 2) Anggapo lay palson relihyon a matilan mangirepresenta ed si Jehova tan onkanan mangapag-apag ya impluensya ed sosyedad na too. Agla nasagmak na saray tuan lingkor na Dios so ag-inkahustisya tan panamairap ed lima na saray totoon manuley. Agaylan makapakelaw a kawayangan so panggayagaan!

12. Panon so kabulos na amin ed kasalanan tan saray epekto to?

¹² Bilang “Korderoy Dios, a mangekal na kasalanay mundo,” ikana nen Jesus so balor na bagat to diad pamunas ed saray kasalanan na katooan. (Juan 1:29) Sanen si Jesus so wadiad dalin tan pinerdona toray kasalanan na too, tinambal to so sakey a pinerdona bilang prueba na satan. (Mateo 9:1-7; 15:30, 31) Diad mipadparan nengneng, si Kristo Jesus, bilang mangatatawen ya Ari ed Panarian na Dios, so mamilagron manambal ed bulag, ed emel, ed telek, ed lupoy, ed saray walay deperensya ed nonot, tan saraman so walaan na arum a sakit. (Apocalipsis 21:3, 4) Naandi la so “ganggan na kasalanan” ed amin a matulok ta pian saray nonot da tan kiwakiwas da so makapaliket, diad inkasikaran dili tan diad Dios. (Roma 7:21-23) Diad anggaan na Milenyo, sikara la so nitarok ed inkayadyari bilang too, diad ‘indengan tan ulibay’ na alenleneg a tuan Dios.​—Genesis 1:26.

13. Diad anggaan na Milenyon Uley, anton kiwas so gawaen nen Kristo, tan diad anton pansumpalan?

¹³ Sano nitarok la nen Kristo so katooan ed inkayadyari, diad satan et ipawil to ed Ama so pakauley a nipabtang ed sikato a para ed sayan kimey: “Iter to so panarian ed Dios tan Ama [to], sano naekal to la’ra ya ami panagari, tan amin pananguley tan pakayari. Ta sikato so nakaukolan a manari, angga ed pakapangiyan to’d saray kabusol to ed silong na saray sali to.” (1 Corinto 15:24, 25) Say Milenyon Uley na Panarian so sigpot lan anumpal ed gagala to; sirin agla nakaukolan ed sayan katulongan a gobierno a mansiansia ed baetan nen Jehova tan katooan. Tan lapud sigpot lan naekal so kasalanan tan patey tan arondon la so katooan, say pankaukolan ed si Jesus bilang sakey a Mananondon so mangangga la. Ipapaliwawa na Biblia: “Sirin say Anak met a dili pauleyan ed anguley ed ami ganagana, pian say Dios wala ed amin ed ami ganagana.”​—1 Corinto 15:28.

14. Anto so kisilongan na amin ya apayadyarin katooan, tan akin?

¹⁴ Ontumbok ed saya, say apayadyarin katooan so naikdan na pankanawnawan mangipanengneng a say pinili ra et say panlingkor ed alenleneg a tuan Dios diad ando lan ando. Sirin, sakbay a sikaray sigpot a tagibien to bilang ananak to, isilong nen Jehova ed unor a subok so amin ya apayadyarin katooan. Si Satanas tan saray demonyo to so nibulos manlapud kaaralman. Ag-iya mansumpal ed magnayon a kasakitan na saramay tuan mangaaro ed si Jehova. Balet siopaman a gagalaen toy agmanmatoor, a paitonton diad katutunganga ed si Jehova, so naderal ed ando lan ando, kaiba na orihinal a rebelde tan saray demonyo to.​—Apocalipsis 20:7-10.

15. Anton kipapasen so niwala lamet ed limog na amin a matudion pinalsa nen Jehova?

¹⁵ Tagibien la’d satan nen Jehova ya ananak to so amin ya apayadyarin katooan ya angitandoro ed inkasoberano to legan na satan ya unor a subok. Manlapu la’d satan a mantultuloy, mibiang iran nagnap ed maglorian kawayangan na saray ananak na Dios bilang kabiangan na sankatalbaan a pamilya na Dios. Amin a matudion pinalsa ed tawen tan ed dalin so maminsan lamet a mankakasakey diad pandayew ed sikato bilang say alenleneg a tuan Dios. Akarapat la’d satan ed maglorian aligwas so gagala nen Jehova! Kasin labay moy magmaliw a kabiangan na satan a maliket, andi-anggaan, sankatalbaan a pamilya? No ontan, pasesegen mi kan mangipapuso ed ibabaga na Biblia diad 1 Juan 2:17: “Say mundo mangangga, tan saray penel to, sabalet so mangunor ed linawa na Dios onsiansia lawas.”

Repason Pantongtongan

• Sakbay na rebelyon ed Eden, anto so relasyon na amin a managdayew ed si Jehova ed sikato?

• Anton responsabilidad so nipasakbat ed saraman so lingkor na Dios?

• Siopa ni so magmaliw ya ananak na Dios, tan panon so pisiglaotan na saya ed gagala nen Jehova nipaakar ed nankakasakey a panagdayew?

[Litrato ed pahina 190]

Panggayagaan na saray matulok a katooan so bilay diad sankadalinan a paraiso