Magano lan Manampot so Amin a Kairapan!

Nayarin aminsan et nitepet mo la ed inkasika, ‘Akin a pirmi lay kairapan?’ Diad loob la na nilibon taon, say katooan so pirmi lan maniirap lapud saray guerra, eras, kalamidad, krimen, ag-inkahustisya, sakit, tan ipapatey. Diad linmabas a sanlasus taon et asagmak na katooan so dakel a kairapan ya agnin balot agawa nensaman. Manampot ni kasi irayan amin?

Say makaligliwan ebat et on, tan magano la itan! Oniay ibabaga na Salitay Dios, say Biblia: “Say bagel onandi . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.” Panon kabayag? “Say matunong tawiren to so dalin tan manayam diman lawas.”​—Salmo 37:​10, 11, 29.

Sano nakal la na Dios so kaugsan tan kairapan, say dalin so magmaliw lan paraiso. Insan say totoo so manbilay ya andi-anggaan a walaan na ayadyari odino perpekton bunigas tan liket. Impasakbay na Salitay Dios: “Punasen [na Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”​—Apocalipsis 21:4.

Diad satan a balon mundo, anggan saray inaatey et onoli ed bilay pian minabang met ira ed saray bendisyon: “Wala naani kioli ed bilay na saray matunong tan agmatunong.” (Gawa 24:15) Satan so rason no akin a nibaga nen Jesu-Kristo ed magbabawin managgaway-mauges ya angibesngaw na pananisia ed sikato: “Wala ka ed siak dia ed Paraiso.”​—Lucas 23:43.

Akin a Ginmapo so Kairapan?

Anta gagala na Dios a nawalaan so katooan na alay abig ya arapen, akin et inabuloyan to nin onggapo so kairapan? Akin ya abayag to lan aabuloyan itan?

Sanen pinalsa na Dios si Adan tan Eva, ginawa to iran perpekto ed laman tan nonot. Impanayam to ira ed paraison hardin tan inikdan to ira na makapalikliket a kimey a gawaen da. Ibabaga na Biblia: “Say Dios anengneng to so amin a bengatla a ginawa to, et nia maong iran tuloy.” (Genesis 1:31) No tinulok da labat so Dios, nanilalak ira komon na perpekton ananak, tan say dalin so nagmaliw komon ya interon globo a paraiso, a saray totoo so manbilay komon ya andi-anggaan ed kareenan tan liket.

Insipor na Dios ed inkapalsa di Adan tan Eva so makapakelkelaw a regalon bulos a panagdesisyon. Aliwa iran singa robot. Balet, akadepende so pantultuloy dan maliket ed pangusar da ed bulos a panagdesisyon ed dugan paraan, salanti, pian ontulok ed saray ganggan na Dios. Unong ya ibabaga na Dios: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:17) Say aliwan panangusar ed bulos a panagdesisyon so manresulta ed desyang, lapud ag-apalsa iray totoo ya ontalona no man-independente ira ed Dios. Ibabaga na Biblia: “Say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.”​—Jeremias 10:23.

Makapaermen, inisip na inmunan atateng tayo a nayarian day magmaliw ya independente ed Dios tan ontalona nin siansia. Balet sanen impulisay day pananguley na Dios, agto la ira tinulongan a mansiansian perpekto. Kanian ginmapon linmetey so laman da anggad tinmakken tan inatey ira. Lapud ilalak da itayo, atawir tayo itan ya ag-inkaperpekto tan ipapatey.​—Roma 5:12

Say Manunan Isyu et say Inkasoberano

Akin ya agla dineral a tampol na Dios si Adan tan Eva insan amalsa lamet na sananey a paris a too? Say rason et lapud asubok so sankatalbaan ya inkasoberano na Dios, salanti, say kanepegan ton manuley. Say tepet et, Siopa so makanepegan a manuley, tan siopan uley so duga? Niarum ni, Kasin magmaong so pansumpalan na totoo no ag-ira uleyan na Dios? Lapud naikdan ira na magenap a panaon pian eksperimentoen so sigpot ya inka-independente, niletneg na Dios so malet a basiyan no kasin magmaong so pansumpalan da ed silong na pananguley to odino ed inkasikaran dili. Magenagenap so panaon a niyabuloy pian salien na totoo so amin a klase na politika, sosyedad, ekonomya, tan relihyoson sistema a biig ed panangigiya na Dios.

Anto so nansumpalan? Napaneknekan ed nilibon taon la na awaran na too ya ompapalalo so kairapan. Diad apalabas a siglo, asagmak na katooan so sankagrabian a kairapan. Minilyon so pinapatey legan na Guerra Mundial II. Masulok a 100 milyon so atigway ed saray guerra. Kinmasmak so krimen tan karawalan. Kinmayat so panag-abuso ed druga. Mantutultuloy ya onkakamayat so makaalis a sakit ed sekso. Minilyon so ompapatey kada taon lapud eras tan sakit. Nadederal so bilay na pamilya tan onaabeba iray estandarte ed moral ed inerman a pasen. Anggapoy gobierno na too a makaresolbi ed sarayan problema. Anggapo so anggan sakey ed saratan a makapatunda ed itatakken, sakit, tan ipapatey.

Say kipapasen na katooan et eksakto ed impasakbay na Biblia nipaakar ed panaon tayo. Ipapabitar na Salitay Dios so panaon tayo bilang “kaunoran iran agew” na sayan sistema na bengabengatla a “walaray panaon na kairapan.” Tan unong ya imbaga na Biblia, “magmaliw a lalon mauges iray managgaway kaugsan tan manamalingo.”​—2 Timoteo 3:1-5, 13, Maung a Balita.

Magano Lan Manampot so Kairapan

Ipapabitar na amin a paneknek a manasingger itayo la ed panampot na makapaermen a pan-eeksperimento na toon manbilay bilang independente ed Dios. Mabitabitar a say pananguley na totoo a biig ed Dios et agbalot ontalona. Say pananguley labat na Dios so makapangiter na kareenan, liket, perpekton bunigas, tan andi-anggaan a bilay. Kanian magano lan manampot so pangiyaabuloy nen Jehova ed kaugsan tan kairapan. Agla manbayag et onsalet so Dios ed saray pakurang na too diad paneral to ed sayan interon agmakapenek a sistema na bengabengatla.

Inkuan na propesiya na Biblia: “Dia ed saray agew naani na saratan ya ar-ari [pananguley na too a wala natan], say Dios na tawen mamaalagey naani na sakey a panarian [ed tawen] ya anggan kapigan agnaani naderal. . . . Balet buybuyaken to naani tan upoten to naani so saraya ya amin a panarian [peles a pananguley], et sikato so mansiansia lawas.” (Daniel 2:44) Say kiyalangon na inkasoberano nen Jehova, salanti, say kanepegan ton manuley, panamegley na mangatatawen a Panarian to, so manunan bangat na Biblia. Sanen ipapasakbay nen Jesus so manunan kabiangan na tanda na “kaunoran iran agew,” inkuan to: “Nipulong ed interon mundo iyan Maong a Balita a nipaakar ed Panariay Dios, a pamaneknek ed amin a katooan. Kasumpal to ya, insan la’d satan onsabi kasampotan.”​—Mateo 24:​14, Maung a Balita.

Sano nasabi lay kasampotan, sioparay makaliktar? Oniay ebat na Biblia: “Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.” (Uliran 2:​21, 22) Say maptek odino matunong et saramay manaaral tan manggagawa ed linawa nen Jehova. Inkuan nen Jesu-Kristo: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) On, “say mundo mangangga . . . , sabalet so mangunor ed linawa na Dios onsiansia lawas.”​—1 Juan 2:17.

Likud no sananey so nipanengneng, say nausar et say Pangasinan a Biblia a PBS tekep na modernon ortograpiya, NW Ingles a New World Translation of the Holy Scriptures.