Si Esteban​—“Walad Sikato so Sigpot a Panangabobon tan Pakayari na Dios”

1-3. (a) Anton makapataktakot ya situasyon so inarap nen Esteban, balet antoy ginawa to? (b) Anto ran tepet so ebatan tayo?

INMARAP ed korte si Esteban. Balbaleg itan ya kuarto ya nayarin asingger ed templo diad Jerusalem, tan ditan nantitipon so 71 ya lalakin membro na Sanhedrin. Wadtan ira pian litisen si Esteban. Makapanyari tan maimpluensyan lalaki irayan ukom, tan maslak ed sikara et anggapoy pibabali da ed sayan disipulo nen Jesus. Diad tua, impatawag ira na Atagey a Saserdoten si Caifas. Sikato met so angidaulo ed Sanhedrin nen nilitis day Jesu-Kristo pian pateyen pigay bulan ni labat so linmabas. Kasin natatakot si Esteban?

² Walay sankaimano ed lupa nen Esteban ed saman ya oras. Akanengneng ed sikato iray ukom tan anengneng dan say lupa to et “singa lupay anghel.” (Gawa 6:15) Ipapasabi na saray anghel iray mensahe ya manlalapud si Jehova a Dios kanian anggapoy takot da, mauyamo ira, tan kalmado ira. Ontan so nalilikna nen Esteban​—kanian anggan saramay ukom ya mamubusol ed sikato et sankanengneng da itan. Akin et kakkalmado si Esteban?

³ Dakel so naaralan na saray Kristiano natan ed ebat ed satan ya tepet. Kaukolan tayo met ya naamtaan no akin ya wadtan si Esteban ed satan ya mairap a situasyon. Panon ton indepensa so pananisia to antis na satan? Tan panon tayon naalig?

“Sinugsogan Da Iray Totoo” (Gawa 6:8-15)

4, 5. (a) Akin et mabmabli ed kongregasyon si Esteban? (b) Akin et nibaga tayon walad sikato so “sigpot a panangabobon tan pakayari na Dios?”

⁴ Amta tayo la ya baleg so nitutulong nen Esteban ed balon Kristianon kongregasyon. Diad kapitulo 5 na sayan libro, anengneng tayo ya sakey si Esteban ed saramay pitoran mapaabeban lalaki ya mabulbulos ya tinmulong ed saray apostol. Tan mas lalo tayo nin pandinayewan so kapaabebaan to no isipen tayo iray abilidad ya walad sikato. Diad Gawa 6:8, nabasa tayo ya inikdan na Dios si Esteban na pakayari ya manggawa na “angkakabaleg iran pakelaw tan tanda” ya singa gagawaen na saray apostol. Naamtaan tayo met ya walad sikato so “sigpot a panangabobon tan pakayari na Dios.” Antoy labay ya ibaga na satan?

⁵ Say Griegon salita ya impatalos ya “panangabobon na Dios” et nayari met ya ipatalos bilang “grasya.” Mapatnag ya mabait tan mauyamo si Esteban kanian labalabay na totoo. No mansasalita, nakokombinse to iray katongtong to ya talagan tua iray ibabaga to tan makatulong iratan ed sikara. Walad sikato so sigpot ya pakayari na Dios ta onkikiwas ed sikato so espiritu nen Jehova lapud manpapaigiya ed satan. Imbes ya manlastog lapud saray abilidad to, ipapaarap ton amin so dayew ed si Jehova tan nanengneng ya walay malasakit to ed saray katongtong to. Kampega lan iisipen na saray onsusumpa ya napepeligro so relihyon da lapud sikato!

6-8. (a) Antoy duaran inyakusa na saray onsusumpa ed si Esteban, tan akin? (b) Akin et nayarin makatulong so alimbawa nen Esteban ed saray Kristiano natan?

⁶ Walay pigaran lalaki ya linmad si Esteban pian kontraen da, balet “agda nadaeg so karunongan tan say espiritu a mangiwawanwan ed sikato a mansalita.”a Anggapoy nagawaan da kanian wala ray totoo ya “masekreto ran kinombinse” pian akusaan iyan inosentin patumbok na Kristo. ‘Sinugsogan da met iray totoo,’ saray mamatatken, tan saray eskriba, pian puersaan dan awiten si Esteban ed Sanhedrin. (Gawa 6:9-12) Duara so inyakusa na saray onsusumpa ed sikato: Mumudmoraen to kuno so Dios tan si Moises. Diad anto ran paraan?

⁷ Ibabaga na saray palson testigo ya minudmora kuno nen Esteban so Dios ta nansalita sumpad “sayan masanton pasen”​—say templo diad Jerusalem. (Gawa 6:13) Minudmora to kunoy Moises ta nansalita sumpad Mosaikon Ganggan tan uumanen to ray kustombre ya imbangat nen Moises. Seryoso iyan akusasyon ta parad saray Judio nensaman et importantin maong so templo, say Mosaikon Ganggan, tan saray dakdakel ya tradisyon ya inyarum da ed satan ya Ganggan. Kanian ompapaway ed sayan akusasyon ya mauges a too si Esteban tan dapat labat ya ompatey!

⁸ Makapaermen ta kaslakan et ontan so gagawaen na saray relihyoson totoo pian guloen iray lingkor na Dios. Anggad natan, susugsogan na saray relihyoson onsusumpa iray lider na gobierno pian pasegsegangen iray Tasi nen Jehova. Antoy gawaen tayo no walay pikewet odino palson akusasyon sumpad sikatayo? Dakel so naaralan tayo ed si Esteban.

Makpel ya Impulong so Nipaakar ed “Dios na Gloria” (Gawa 7:1-53)

9, 10. Antoy ibabaga na saray kritiko ed samay imbaga nen Esteban ed Sanhedrin, tan antoy nepeg tayon tandaan?

⁹ Abitla ed gapo ya kalmado tan singa lupay anghel so lupa nen Esteban legan ton dedengelen iray akusasyon ed sikato. Insan biglan tinepetan nen Caifas: “Tua irayay ibabaga ra?” (Gawa 7:1) Betang la nen Esteban so mansalita. Tan makpel ya nansalita!

¹⁰ Babalawen na arum ya kritiko imay imbaga nen Esteban ta anggano andukdukey kuno, agto apruebaan ya sikatoy inosente. Balet diad tua, balibalin aligen tayo so alimbawa nen Esteban no panon ya ‘idepensa’ so maong a balita. (1 Ped. 3:15) Tandaan tayo ya naakusaan si Esteban ya minudmora to kunoy Dios ta nansalita sumpad templo tan minudmora to kunoy Moises ta nansalita sumpad Ganggan. Say imbaga nen Esteban et sumaryo ed taloran panaon ed history na Israel, tan wala ray punto ya indanet to ed saratan. Sansakey tayon ikonsidera irayan taloran panaon na history.

11, 12. (a) Panon ya epektibon inusar nen Esteban so alimbawa nen Abraham? (b) Akin et binitla nen Esteban si Jose?

¹¹ Say panaon na saray patriarka. (Gawa 7:1-16) Inggapo nen Esteban so ebat to diad impamitla tod si Abraham, ya rerespetoen na saray Judio lapud pananisia to. Legan ton ipapaliwawa iyan importantin topic ya pareho dan papanisiaan, indanet nen Esteban ya inmunan nampanengneng si Jehova, say “Dios na gloria,” ed si Abraham diad Mesopotamia. (Gawa 7:2) Diad tua, si Abraham et dayo ya manaayam ed Insipan a Dalin. Anggapo ni templo ed saman tan anggapo ni Mosaikon Ganggan. Kanian agdapat ipilit na anggan siopa ya kaukolan so templo odino saray ganggan pian nibagan matoor ed Dios so sakey a too.

¹² Rerespetoen met na saray ondedengel ed si Esteban so apo ed pueg nen Abraham ya si Jose. Balet impanonot ed sikara nen Esteban ya anggano matunong si Jose et pinasegsegang nin siansia na mismon agagi to, saray nagmaliw ya ulo na pamilya na Israel, tan inlako da pian magmaliw ya aripen. Balet sikatoy inusar na Dios pian iliktar so Israel ed sinmabin eras. Anengneng nen Esteban iray pamparehoan nen Jose tan nen Jesu-Kristo, balet agto ni imbaga iratan pian tuloytuloy da nin dengelen.

13. Panon ya prinuebaan na saray imbaga nen Esteban nipaakar ed si Moises ya aliwa iray onsusumpa ed sikato, tan anton tema so abuo lapud satan?

¹³ Say panaon nen Moises. (Gawa 7:17-43) Dakel so imbaga nen Esteban tungkol ed si Moises, tan balibali man ya ginawa to ta dakel ed saray membro na Sanhedrin et Saduceo, ya agmanisia ed amin lawarin libro na Biblia puera labat iramay insulat nen Moises. Tandaan met ya inakusaan day Esteban ya minudmora to kunoy Moises. Kanian nanengneng ed saray imbaga nen Esteban ya aliwa iray akusasyon ed sikato ta prinuebaan to ya balbaleg so respeto to ed si Moises tan ed Ganggan. (Gawa 7:38) Imbaga to met ya anggan si Moises et impulisay na saramay totoon labay ton iliktar. Impulisay da nen manedad na 40. Kayari na masulok ya 40 taon, aminpiga iran nanrebelde ed panangidaulo to.b Diad saray ibabaga nen Esteban et nabubuo to lay manunan tema to: Paulit-ulit ya impulisay na saray totoo na Dios iramay tinuro nen Jehova ya mangidaulo ed sikara.

14. Anto ran punto so apalinew lapud inusar nen Esteban so alimbawa nen Moises?

¹⁴ Impanonot nen Esteban ed saray ondedengel ya impasakbay nen Moises ya manuro so Dios na sakey a propeta ed Israel ya singa sikato. Siopa kasi itan, tan panoy pantrato da ed sikato? Agnin tampol inebatan nen Esteban. Wala ni importantin punto ya binitla to: Naaralan nen Moises ya nayarin magmaliw ya masanto so anggan anton pasen, singa samay dalin ya kawalaan na mandarlang a masabit ya kiew nen kinatongtong nen Jehova. Kanian kasin diad sakey labat ya bilding nayarin dayewen si Jehova, singa samay templo diad Jerusalem? Nengnengen tayo.

15, 16. (a) Panon ya akatulong may impamitla nen Esteban ed tabernakulo? (b) Panon ya inusar nen Esteban so templo nen Solomon ed samay imbaga to?

¹⁵ Say tabernakulo tan say templo. (Gawa 7:44-50) Impanonot nen Esteban ed korte ya nen anggapo ni templo diad Jerusalem, ingganggan na Dios si Moises ya manggaway tabernakulo​—sakey itan ya tolda parad panagdayew ya nayarin iyalis-alis. Seguradon anggapoy onkontra tan mangibagan mas abebbeba so tabernakulo no ikomparad templo, lalo la ta si Moises ya mismo et ditan nandayew.

¹⁶ Asabi panaon nen impaalagey nen Solomon so templo diad Jerusalem, walay importantin imbaga to diad pikakasi to. Imbaga nen Esteban: “Say Sankatagyan et agmanaayam ed saray abung a ginawa na saray lima na too.” (Gawa 7:48; 2 Awa. 6:18) Sarag nen Jehova so mangusar na sakey a templo pian nagawa iray gagala to, balet sarag ton gawaen iratan anggano anggapod templo. Kanian akin et isipen na saray mandadayew ed sikato ya akadepende so dugan panagdayew ed sakey a bilding ya ginawa na saray lima na too? Epektibo so sampot ya imbaga nen Esteban ed sayan punto ta binitla to may walad libro na Isaias: “Say tawen so tronok, tan say dalin so toonan na salik. Anton klase na abung so ipaalagey yo parad siak? so inkuan nen Jehova. Odino iner so pasen a panayaman ko? Agta amin iraya et ginawa na limak?”​—Gawa 7:49, 50; Isa. 66:1, 2.

17. Panon ya (a) apapaway nen Esteban ya aliway iisipen na saray mangaakusa ed sikato tan (b) prinuebaan ton anggapoy ginawa ton aliwa?

¹⁷ No isipen tayoy amin ya imbaga nen Esteban ed Sanhedrin ya anggad sayan punto, di ba marundunong ton apatunayan ya aliway iisipen na saray mangaakusa ed sikato? Impanengneng to ya progresibo so gagala nen Jehova, tan nayarin nasumpal itan ed nanduruman paraan, tan ag-itan akadepende ed saray tradisyon. Saramay mandinayew ya maong ed balibalin bilding diad Jerusalem tan ed saray kustombre tan tradisyon ya inyarum ed Mosaikon Ganggan et agda natatalosan no akin ya inter nen Jehova so Ganggan tan no akin ya impaalagey so templo! Diad sarayan imbaga nen Esteban, singa to itetepet iyan importantin tepet: Agta mas nigalang yoy Ganggan tan say templo no unoren yoy Jehova? Diad tua, prinuebaan na saray imbaga nen Esteban ya anggapoy ginawa ton aliwa, ta ginawa toy anggaay nayarian to ya unoren si Jehova.

18. Diad anto ran paraan tayo naalig si Esteban?

¹⁸ Antoy naaralan tayo ed saray imbaga nen Esteban? Kabisado ton maong so Salita na Dios. Ontan tayo met dapat, nepeg tayon seryoson aralen so Salita na Dios pian ‘dugay pangusar tayo ed salita na katuaan.’ (2 Tim. 2:15) Makaaral tayo met ed si Esteban ya mabait tan maalwar no mansasalita. Kontran maong iray totoon ondedengel ed sikato! Pero ginawa toy anggaay nayarian to ya ipokus iray ibabaga to ed saray bengatlan papanisiaan da tan ipapasen dan importante. Marespeto met so impitongtong to ta tinawag ton “kaamaan” iray mamatatken ya lalakin walaan na posisyon. (Gawa 7:2) Ontan met so gawaen tayo no ibabaga tayod arum iray katuaan manlapud Salita na Dios, dapat ipanengneng tayoy “inkaulimek tan aralem a respeto.”​—1 Ped. 3:15.

19. Panon ya makmakpel ya imbaga nen Esteban so mensahe na panangukom nen Jehova ed Sanhedrin?

¹⁹ Balet agtayo dapat natatakot ya ibaga iray katuaan manlapud Salita na Dios lapud iisipen tayo ya ompan nasakitan tayo iray totoo; tan agtayo met papalemewen iray mensahe na panangukom nen Jehova. Maong ya alimbawa si Esteban. Seguradon alikas to ya anggapoy epekto na amin ya ebidensyan impresenta to diad Sanhedrin ed saray ukom ya anawet so puso ra. Pinakiwas na masanton espiritu si Esteban kanian diad sampot na saray imbaga to, makmakpel ton imbagad sikara ya singa ra saray inmuunan atateng da ya impulisay day Jose, Moises, tan amin ya propeta. (Gawa 7:51-53) Diad tua, pinatey na sarayan ukom na Sanhedrin so Mesias, ya impasakbay nen Moises tan na amin ya propeta so isabi to. Sankaugesan la itan ya paraan na ag-iyunor ed Mosaikon Ganggan!

“Katawan a Jesus, Awat Moy Espirituk” (Gawa 7:54–8:3)

20, 21. Antoy reaksion na Sanhedrin ed imbaga nen Esteban, tan panon ya pinabiskeg nen Jehova?

²⁰ Agaylay pasnok na saramay ukom ta amta ran tua iray imbaga nen Esteban. Ag-ira napakalma tan manngilet ira ed si Esteban. Seguradon alikas na sayan matoor ya laki ya agda kasian, singa ginawa da ed Katawan ton Jesus.

²¹ Kaukolan nen Esteban so pakpel pian nasarag to iray nagawad sikato, tan seguradon apaseseg a maong ed pasingawey ya maaron inter nen Jehova ed sikato. Anengneng nen Esteban so gloria na Dios, tan anengneng toy Jesus ya akaalagey ed nikawanan nen Jehova! Legan ya ibabaga nen Esteban so anengneng tod pasingawey, pinepetan na saray ukom iray layag da. Akin ey? Ta imbaga met nen Jesus ed saya met ya korte ya sikato so Mesias tan asingger lan onlad nikawanan na Ama to. (Mar. 14:62) Pinaneknekan na pasingawey ya anengneng nen Esteban ya tua so imbaga nen Jesus. Trinaidor tan pinatey na sayan Sanhedrin so Mesias! Kanian inambon day Esteban tan tinutupak da anggad inatey.c

22, 23. Anto ray pamparehoan na impatey nen Esteban tan say Katawan to, tan akin ya makapantiwala met ed si Jehova iray Kristiano natan ya singa si Esteban?

²² Singa say Katawan to, inatey si Esteban ya walay kareenan ed puso to, buo so tiwala to ed si Jehova tan pinerdona to iray amatey ed sikato. Seguro nanenengneng to nid pasingawey so Anak na too ya kaiba nen Jehova kanian imbaga to, “Katawan a Jesus, awat moy espirituk.” Seguradon amta nen Esteban may makapaseseg ya imbaga nen Jesus: “Siak so kioli tan say bilay.” (Juan 11:25) Insan la nampikasi ed Dios ed maksil ya boses: “Jehova, agmo ra dudusaen ed sayan kasalanan.” Kayari ton imbaga itan, sikatoy naugip ed patey.​—Gawa 7:59, 60.

²³ Kanian diad amin ya papatumbok na Kristo, si Esteban so sankaunaan ya martir. (Nengnengen so kahon ya “‘Martir’ Diad Anton Paraan?”) Makapaermen balet ta aliwan sikatoy sampot. Anggan diad panaon tayo natan, wala ray matoor ya lingkor nen Jehova ya ipapapatey na saray relihyoson panatiko, saray panatiko ed politika, tan arum ni ran maruksan onsusumpa. Balet walay rason tayon mantiwala ed si Jehova ya singa ginawa nen Esteban. Manuuley la natan si Jesus bilang Ari, tan inikdan na Ama to na mabisbiskeg ya pakayari. Anggapoy makapigil ed sikato no bilayen to la ray matoor ya papatumbok to.​—Juan 5:28, 29.

24. Antoy ginawa nen Saulo legan ya papateyen so matoor ya lakin si Esteban, tan antoy marakep ya epekto na impatey nen Esteban?

²⁴ Naobserbaan irayan amin na kabataan ya lakin say ngaran to et Saulo. Inabobonan toy impamatey ed si Esteban, binantayan to ni ingen iray kawes na saramay nantupak ed si Esteban. Ag-abayag kayari to tan, ginapoan nen Saulo ya maruksan pairapen iray disipulo nen Jesus. Balet walay marakep ya epekto na impatey nen Esteban. Lapud alimbawa to, napabiskeg iray arum ya Kristiano ya mansiansian matoor ed si Jehova anggad patey. Sakey ni, pagbabawian ya maong nen Saulo, ya mas nakabkabat ed ngaran ya Pablo, so betang to ed impatey nen Esteban. (Gawa 22:20) Tua ya tinmulong si Pablo ed impamatey ed si Esteban, balet sinmabi panaon ya imbaga ton: “Nensaman et sakey ak a managmudmora ed Dios tan managpairap tan agmangikabkabilangan.” (1 Tim. 1:13) Malinew ya agbalot alingwanan nen Pablo si Esteban tan saray balibalin imbaga to ed saman ya agew. Diad tua, arum ed saray paliwawa tan insulat nen Pablo et mikonektaan ed saray tema ya abitla nen Esteban. (Gawa 7:48; 17:24; Heb. 9:24) Onsabi panaon ya naaralan a maong nen Pablo ya aligen so pananisia tan pakpel ya impanengneng nen Esteban, say lakin “walad sikato so sigpot a panangabobon tan pakayari na Dios.” Say tepet, Kasin aligen tayo met si Esteban?