“Awalaay Kareenan so Kongregasyon”

1, 2. Antoy planon gawaen nen Saulo ed Damasco?

ASINGGER lad Damasco so makapataktakot ya grupo na lalakin manaakar, tan walay mauges ya plano dan gawaen diman. Labay dan puersaan ya erelen iray disipulo nen Jesus, baloren da ra, pabaingan da ra, insan da ra awiten ed Jerusalem pian dusaen na Sanhedrin.

² Saulo so ngaran na lider na satan ya grupo tan akaiba la ed impamatey ed sakey a too.a Agano ni ya tinutupak na saray panatikon Judio anggad inatey so sakey ya matoor ya disipulo nen Jesus ya si Esteban. Binantayan ira nen Saulo tan agkinmontra. (Gawa 7:57–8:1) Agkontento si Saulo ed pamapairap tod saray disipulo nen Jesus ya tagad Jerusalem ta inanap tan pinasegsegang to met iray disipulo ed arum ya syudad. Labay ton upoten so amin ya onsusuporta ed ipapasen ton peste ya sekta ya tatawagen ya “Say Dalan.”​—Gawa 9:1, 2; nengnengen so kahon ya “Say Autoridad nen Saulo Diad Damasco.”

3, 4. (a) Antoy agawad si Saulo? (b) Anto ran tepet so pantongtongan tayo?

³ Insan biglan walay liwawa ya sinminag ed kaliberliber nen Saulo. Ataktakot iray lalakin kaiba ton manaakar kanian ag-ira akasel. Agmakanengneng si Saulo insan atumba. Anggapoy nanenengneng to pero arengel toy sakey ya boses ya nanlapud tawen ya angibagad sikaton, “Saulo, Saulo, akin et papasegsegangen mo ak?” Ataktakot si Saulo, kanian nantepet: “Siopa ka, Katawan?” Seguradon abiglan maong si Saulo ed ebat: “Siak si Jesus, a papasegsegangen mo.”​—Gawa 9:3-5; 22:9.

⁴ Antoy naaralan tayo ed saray unonan imbaga nen Jesus ed si Saulo? Antoy nitulong ed sikatayo na panaral ed saray agawa nen nagmaliw ya disipulo nen Jesus si Saulo? Tan anto ray naaralan tayo ed ginawa na kongregasyon nen awalaan iray kareenan kayarin nagmaliw ya disipulo si Saulo?

“Akin et Papasegsegangen Mo Ak?” (Gawa 9:1-5)

5, 6. Antoy naaralan tayo ed saray imbaga nen Jesus ed si Saulo?

⁵ Nen pinatunda nen Jesus si Saulo diad dalan ya paonla ed Damasco, agto imbagan: “Akin et papasegsegangen mo iray disipulok?” Imbes say imbaga to: “Akin et papasegsegangen mo ak?” (Gawa 9:4) Imbaga itan nen Jesus ta no maniirap iray disipulo to, naiirapan met.​—Mat. 25:34-40, 45.

⁶ No napapairap kayo lapud pananisia yo ed Kristo, makaseguro kayo ya amta nen Jehova tan nen Jesus so situasyon yo. (Mat. 10:22, 28-31) Nayarin agni ekalen nen Jehova natan so subok ya dadalanen yo. Tandaan ya anengneng nen Jesus nen sinuportaan nen Saulo so impamatey ed si Esteban, tan anengneng to met nen puersaan ya inawit nen Saulo iray matoor ya disipulo to diad Jerusalem. (Gawa 8:3) Balet agnin tampol akibabali si Jesus. Pero diad panamegley to et inikdan nen Jehova na biskeg si Esteban tan saray arum nin disipulo pian makapansiansia ran matoor.

7. Antoy gawaen yo pian nasarag yoy panamasegsegang?

⁷ Nasarag yo met so panamasegsegang no gawaen yo iraya: (1) Dapat determinado kayon manmatoor ed si Jehova antokaman so nagawa. (2) Kerew kayoy tulong ed si Jehova. (Fil. 4: 6, 7) (3) Agkayo ombabawi, paulyan yon si Jehova so ombales. (Roma 12:17-21) (4) Mantiwala kayo ya ikdan kayo nen Jehova na biskeg pian nasarag yoy subok ya anggad ekalen to lan mismo itan.​—Fil. 4:12, 13.

“Saulo, Agik, Imbaki Ak na Katawan” (Gawa 9:6-17)

8, 9. Antoy nayarin alikna nen Ananias ed asainmin to?

⁸ Kayarin inebatan nen Jesus so tepet nen Saulo ya, “Siopa ka, Katawan?” Oniay imbaga to: “Alagey ka tan la kad syudad, tan nibaga ed sika no antoy nepeg mon gawaen.” (Gawa 9:6) Abulag si Saulo kanian inyakar da ed panayaman to diad Damasco. Taloy agew ya nampikasi tan ag-angan odino inminum. Legan na satan, impaamta nen Jesus ed si Ananias so nipaakar ed si Saulo. Si Ananias et sakey ya disipulo ed Damasco tan “maabig so ibabaga na amin a Judion manaayam” ed satan ya syudad nipaakar ed sikato.​—Gawa 22:12.

⁹ Isip yo pa labat so alikna nen Ananias! Kinatongtong ya mismo na Ulo na kongregasyon, say apaolin si Jesu-Kristo, tan sikatoy apili parad sayan espisyal ya asainmin. Baleg ya kagalangan iman, pero makapataktakot met ya asainmin! Nen imbaga nen Jesus ed si Ananias ya kaukolan ton katongtongen si Saulo, oniay inyebat nen Ananias: “Katawan, dakel lay akadngelan ko nipaakar ed sayan too, nipaakar ed amin a makapasakit a ginawa tod saray masanton totoom diad Jerusalem. Tan sikatoy linma dia a walay autoridad ton nanlapud saray manunan saserdote pian arestoen to so amin ya ontatawag ed ngaran mo.”​—Gawa 9:13, 14.

10. Antoy naaralan tayo ed impitongtong nen Jesus ed si Ananias?

¹⁰ Agbinano nen Jesus si Ananias ed satan ya imbaga to. Imbes, malinew ya impaliwawa nen Jesus no antoy gawaen to. Pian napagalangan si Ananias, imbaga nen Jesus no akin ya sikato so pinili parad sayan nikaduman asainmin. Oniay imbaga nen Jesus nipaakar ed si Saulo: “Sayan too et sakey a pananginan a pinilik a mangawit na ngaran ko ed saray nasyon ontan met ed saray arari tan ed saray anak na Israel. Ta ipaliwawak a maong ed sikato no kaunongan karakel ya irap so nepeg ton itepel lapud ngaran ko.” (Gawa 9:15, 16) Inunor ya tampol nen Ananias si Jesus. Inanap toy Saulo ya managpasegsegang tan imbaga to: “Saulo, agik, imbaki ak na Katawan a Jesus a nampanengneng ed sika diad dinalanan mo, pian ompawil so pakanengneng mo tan napano kay masanton espiritu.”​—Gawa 9:17.

11, 12. Antoy naaralan tayo ed samay agawa ed si Jesus, Ananias, tan Saulo?

¹¹ Wala ray naaralan tayo ed sayan agawa ed si Jesus, Ananias, tan Saulo. Singa bilang, naamtaan tayo ya idadaulo nen Jesus so panagpulong ya kimey ta atan so im-promise to. (Mat. 28:20) Anggano agdirektan mitotongtong si Jesus ed saray totoo natan, idadaulo to so panagpulong ya kimey panamegley na matoor ya aripen, ya tinuro to ya mangasikaso ed saray lingkor na sankaabungan to. (Mat. 24:45-47) Diad panangidaulo na Mananguley ya Ulop, ibabaki iray manangipalapag tan saray payunir pian anapen iramay labay da nin nakabat so Kristo. Wala ray abasa tayon ontan ya alimbawa diad akaunan kapitulo. Dakel so mangipipikasi ya komon ta tulongan ira na Dios, insan bigla iran nalmo na saray Tasi nen Jehova.​—Gawa 9:11.

¹² Maunor si Ananias tan inawat toy asainmin to kanian abendisyonan. Kasin uunoren moy ganggan ya mamasyan manpulong anggano aliwan mainomay itan parad sika? Parad arum, makapaaburido ed sikara so manpulong ed kaabungan tan mitongtong ed saray agda kabat. Saray arum et naiirapan ya manpulong diad saray kawalaan na negosyo, diad saray gilig na karsada, odino panamegley na telepono o sulat. Asarag nen Ananias so takot to tan apribilehyoan ya tulongan si Saulo ya mangawat na masanton espiritu.b Agawaan to itan ta nantiwala ed si Jesus tan impasen ton agi to si Saulo. Nasarag tayo met so takot tayo no aligen tayoy Ananias. Mantiwala tayo ya idadaulo nen Jesus so panagpulong ya kimey, kasian tayo ray totoo, tan ipasen tayon potensyal ya magmaliw ya agagi tayo anggan saray sankaugesan lan totoo.​—Mat. 9:36.

“Impulong Ton Tampol [so Nipaakar ed] si Jesus” (Gawa 9:18-30)

13, 14. No manaaral kayoy Biblia pero agkayo ni abautismoan, antoy naaralan yo ed alimbawa nen Saulo?

¹³ Kinmiwas ya tampol si Saulo base ed saray naaralan to. Nen pinmawil lay pakanengneng to, nampabautismo tan akiulop ed saray disipulo ed Damasco. Balet aliwan satan labat so ginawa to. “Impulong ton tampol ed saray sinagoga a si Jesus so Anak na Dios.”​—Gawa 9:20.

¹⁴ No manaaral kayoy Biblia pero agkayo ni abautismoan, kasin aligen yoy Saulo tan onkiwas kayon tampol ya iyaplika iray nanaaralan yo? Tua ya anengneng a mismo nen Saulo so milagron ginawa na Kristo, tan akatulong itan pian onkiwas ya manpabautismo. Balet wala ra met so akanengneng ed saray milagron ginawa nen Jesus pero ag-ira kinmiwas. Singa bilang, walay grupo na saray Fariseo ya ombabantay nen pinaabig to so lakin kinmebet so lima to, tan amta met na dakel ed saray Judio ya pinaoli toy Lazaro. Balet siansian agmanisia so dakel ed sikara tan kinontra da ni ingen si Jesus. (Mar. 3:1-6; Juan 12:9, 10) Duma balet si Saulo ta anguman. Akin et nagmaliw ya disipulo si Saulo, say arum balet et andi? Ta mas tatakotan toy Dios nen saray totoo tan naapresya ton maong so panangasi ya impanengneng ed sikato na Kristo. (Fil. 3:8) No ontan met so gawaen yo, anggapoy makapigil ed sikayo ya mibiang ed panagpulong ya kimey tan magmaliw ya kualipikado parad bautismo.

15, 16. Antoy ginawa nen Saulo diad saray sinagoga, tan antoy reaksion na saray Judio ed Damasco?

¹⁵ Imadyin yo pay reaksion na saray totoo nen ipupulong la nen Saulo so nipaakar ed si Jesus diad saray sinagoga? Wala ray abigla tan say arum et mamapasnok ni ingen. Kuan da: “Agta saya imay toon maruksan amasegsegang ed saramay walad Jerusalem ya ontatawag ed sayan ngaran?” (Gawa 9:21) Nen impaliwawa nen Saulo no akin ya anguman so ugali to, “makatunongan ton pinaneknekan a si Jesus so Kristo.” (Gawa 9:22) Balet aliwan amin et akombinse anggano malinew so paliwawa to. Mairap ya umanen so panagnonot na saray totoon nitaker ed tradisyon tan saray mapaatagey so puso ra. Balet agsinmuko si Saulo.

¹⁶ Kayari taloy taon, kokontraen ni na saray Judio ed Damasco si Saulo ya anggad nantotongtongan da ya pateyen. (Gawa 9:23; 2 Cor. 11:32, 33; Gal. 1:13-18) Nen naamtaan toy plano ra, mataktika ya inmalis ed syudad tan pinmayag ya ilugan na saray disipulo to ed sakey a buksot, odino baskit, insan da inleksab ya indalan ed sakey ya bintana na padir na syudad. Imbaga nen Lucas ya saramay tinmulong ed si Saulo ya ontakas ed saman ya labi et “disipulo [nen Saulo].” (Gawa 9:25) Ipapanengneng na satan ya arum ed saramay dinmengel ed si Saulo diad Damasco et inuman day kabibilay da tan nagmaliw iran papatumbok na Kristo.

17. (a) Anto ray reaksion na totoo ed katuaan ya manlapud Biblia? (b) Antoy nepeg tayon tuloytuloy ya gawaen, tan akin?

¹⁷ Nen unaan yon imbaga ed saray kapamilya, kakaaro, tan arum ni iray balibalin nanaaralan yo, seguro naisip yo ya amin da et awaten da itan ta malinlinew so katuaan ya manlapud Biblia. Nayarin wala ra met so angawat, pero dakel so andi. Tan nayarin binusol kayo na mismon kapamilya yo. (Mat. 10:32-38) Balet no tuloytuloy yon paaligwasen so abilidad yon ipaliwawa so Salita na Dios tan no pansiansiaen yoy maong ya kondukta yo bilang Kristiano, nayarin manguman lanlamang so panagnonot na anggan saray onkokontra ed sikayo.​—Gawa 17:2; 1 Ped. 2:12; 3:1, 2, 7.

18, 19. (a) Antoy resulta nen tinulongan nen Bernabe si Saulo? (b) Panon tayon naalig si Bernabe tan si Saulo?

¹⁸ Nen linmad Jerusalem si Saulo, natural labat ya agmakapanisia so arum ya disipulo met la natan. Balet nen kinompirma itan nen Bernabe, inawat met lanlamang na saray apostol si Saulo, tan nantultuloy ya akila ed sikara legan ya wadman. (Gawa 9:26-28) Maalwar si Saulo, balet agto ibabaing so maong a balita. (Roma 1:16) Makpel ya nampulong diad Jerusalem anta ditan to inggapon pasegsegangen iray disipulo nen Jesu-Kristo. Agaylay pasnok na saray Judio ed Jerusalem ta amay iilaloan dan lider da et nagmaliw lan Kristiano, kanian implano dan pateyen. Nabasa tayo ya, “sanen naamtaan iya na saray agagi, sikatoy inyakar dad Cesarea tan pinaonla rad Tarso.” (Gawa 9:30) Nampasakop si Saulo ed panangidaulo nen Jesus panamegley na kongregasyon. Kanian abendisyonan si Saulo pati say kongregasyon.

¹⁹ No naimano yo, nanggaway paraan si Bernabe pian tulongan si Saulo. Lapud satan ya kaabigan to, seguradon akatulong itan pian magmaliw ya sankaaro irayan duaran maseseg ya lingkor nen Jehova. Kasin singa kayo met si Bernabe ya akaparaan ya ontulong ed saray balo ni labat ed kongregasyon yo, ya pipiulopan yo ra ed panagpulong tan tutulongan yo ran mas onapit ed si Jehova? No on, dakel so naawat yon bendisyon. No balo kayo ni ya manangipalapag na maong a balita, kasin singa kayo si Saulo ya aawaten yoy tulong na arum? No miulop kayo ed saray manangipalapag ya mas eksperiensyado, napaaligwas yoy dunong yo ed panagpulong, mas maliket kayo, tan makalmo kayo ray kakaaro ya mansiansia ed andi-angga.

“Dakel so Anisia” (Gawa 9:31-43)

20, 21. Antoy ginawa na saray lingkor na Dios nensaman tan natan legan na saray panaon ya walaay kareenan?

²⁰ Nen disipulo lay Saulo tan akaalis lad Jerusalem, “awalaay kareenan so kongregasyon diad interon Judea tan Galilea tan Samaria.” (Gawa 9:31) Antoy ginawa na saray disipulo legan na satan ya panaon ya walay kareenan? (2 Tim. 4:2) Nabasa tayo ya “apabiskeg ira.” Pinabiskeg na saray apostol tan arum nin brother ya walaan na responsabilidad so pananisia na saray disipulo tan inggiya day kongregasyon ya ‘manbibilay a walaay takot ed si Jehova tan naliligliwa na masanton espiritu.’ Singa bilang, legan na satan ya panaon, pinabiskeg nen Pedro iray disipulo ya manaayam ed Lida diad Patar na Saron. Lapud satan, dakel so ‘anisia ed Katawan.’ (Gawa 9:32-35) Imbes ya iyuna na saray disipulo iray kimey ya parad sarili da labat, nansagpotan dan ipanengneng so panangaro ed sakey tan sakey tan impulong da so maong a balita. Lapud satan, “nantultuloy iran dinmakel.”

²¹ Singa ontan met so agawa nen manga 1990’s, “awalaay kareenan” iray Tasi nen Jehova ed dakel ya bansa. Biglan binmagsak iray gobierno ya deka-dekada lan manpapairap ed saray totoo na Dios tan nakal iray ban ed panagpulong ya kimey. Sinambot na nilibon Tasi itan ya panaon ya manpulong ed publiko, tan dakel so dinmengel ed maong a balita.

22. Panon yon usaren ed sankaabigan so maabig ya situasyon yo?

²² Kasin dugay panguusar yo ed maabig ya situasyon yo? No manaayam kayo ed bansa ya bulos kayon makakapandayew, samboten itan nen Satanas pian tuksoen kayon iyuna so pampayaman aliwan say Panarian. (Mat. 13:22) Agkayo ompapayag ed satan. Usar yod sankaabigan so mareen ya panaon. Isip yon atan so pankanawnawa yon mamasyan manpulong tan pabiskegen so kongregasyon. Tandaan ya nayarin biglan manguman so situasyon yo.

23, 24. (a) Anto ray naaralan tayo ed samay agawad si Tabita? (b) Antoy determinado tayon gawaen?

²³ Isip yo pa may agawa ed sakey ya disipulo ya si Tabita, odino Dorcas. Tagad Joppe si Tabita, sakey a syudad ya asingger ed Lida. Duga so angusaran na sayan matoor ya sister ed panaon tan kaykayarian to. Dakdakel so “agawaan ton kaabigan tan inter ton regalo lapud panangasi.” Pero biglan nansakit insan inatey.c Agaylay ermen na saray disipulo ed Joppe lapud impatey to, lalo la iramay balon bibii ya atulongan to. Kasabi nen Pedro ed abung ya kawalaay bangkay nen Tabita, nanggaway milagro ya agnin balot ginawa na arum ya apostol nen Jesu-Kristo. Nampikasi si Pedro insan to binilay lamet si Tabita! Naimadyin yo kasi liket na saray balon bibii tan arum nin disipulo nen tinawag ira nen Pedro tan inyawat tod sikaran mabilay si Tabita? Seguradon apabiskeg ira ed saraman ya agawa tan makatulong itan pian nasarag da ray subok ya onsabi! Milagro iya kanian agti la mankelaw ya “akabatan iya diad interon Joppe, tan dakel so anisia ed Katawan.”​—Gawa 9:36-42.

²⁴ Walay duaran importantin naaralan tayo ed samay agawad si Tabita. (1) Antiktikey so bilay. Kanian importante ya manggawa tayo lay maong ya reputasyon ed Dios legan ya mabilay tayo ni! (Ecl. 7:1) (2) Segurado so ilalo tayon kioli. Naimano nen Jehova iray dakdakel ya kaabigan ya ginawa nen Tabita kanian binilay to lamet. Agto met lingwanan iray sagpot tayo tan bilayen to tayo lamet no bilang ta ompatey tayo antis na Armagedon. (Heb. 6:10) Kanian balanglan manbibilay tayo ed “mairap a panaon” odino panliliketan tayoy ‘panaon ya walaay kareenan,’ komon ta tuloytuloy tayon mamasyan ipulong so nipaakar ed Kristo.​—2 Tim. 4:2.