Simbawa Nipaakar ed Pananisia, Kondukta, tan Aro

SI Santiago tan Judas et agagi nen Jesus ed ina. Si Pedro tan Juan et kabiangan ed 12 apostol nen Jesus. Ami-amin et pitora so insulat na sarayan apatiran lalaki, tan saray sulat da et naromog ed Kristianon Griegon Kasulatan. Kada sulat et ningaran ed nansulat ed satan. Say gagala na impuyan a simbawa a walad sarayan sulat et pian tulongan iray Kristiano a napansiansia ray katooran da ed si Jehova tan ed Panarian to.

Ipatnag so pananisia. Aliwan magenap so pangibaga na sakey a walay pananisia to. Say tuan pananisia et nepeg a walay katekep ton gawa. Oniay insulat nen Santiago: “Say pananisia ya andi gawa inatey.” (Santiago 2:26) Say sakey et makapansungdo no ipatnag toy pananisia sano nasusubok. Pian ontalona, kaukolan na sakey a Kristiano so onkerew ed Dios na karunongan, a matalek ya iter itan na Dios ed sikato. Say panagsungdo et manresulta ed pangabobon na Dios. (Santiago 1:2-6, 12) No mansiansian matoor so sakey a managdayew, onkiwas met si Jehova a Dios. “Singger kayo ed Dios,” kuan nen Santiago, “et sikato so onsingger naani ed sikayo.”​—Santiago 4:8.

Nepeg a mabiskeg so pananisia na sakey a Kristiano pian nalabanan to iray tukso tan imoral iran impluensya. Lapud kasmak ed kaliberliber so kabandayan, apakiwas si Judas a pasesegen iray kapananisiaan to a ‘mangitalindeg ed pananisia.’​—Judas 3, Maung a Balita.

Pansiansiaen so malinis a kondukta. Iilaloan nen Jehova a saray managdayew to et magmaliw a masanto, salanti, malinis ed amin a pamaakaran. Oniay insulat nen Pedro: “Masantos kayo met komon ed ganaganay panagbilay, ta nisulat ya, Masantos kayo komon ta masantos ak,” kuan nen Jehova. (1 Pedro 1:15, 16) Saray Kristiano so walaan na uliran ya aligen. ‘Si Kristo nanirap met lapu ed sikayo,’ inkuan nen Pedro, “dia ed impangitilak to na panuliranan, pian tumboken yo so bakat to.” (1 Pedro 2:21) Anggaman maniirap iray Kristiano lapud panutumbok da ed saray estandarte na Dios, sikaray ‘walaan na maong a konsiensia.’ (1 Pedro 3:16, 17) Binilin nen Pedro iray Kristiano a lalo ran ipanengneng so masanton panagbilay tan saray gawa a pakapatnagan na debosyon ed Dios legan ya aalagaren so agew na panangukom na Dios tan say insipan Ton balon mundo a ‘panayaman na inkatunong.’​—2 Pedro 3:11-13.

Ipanengneng so aro. “Say Dios sikato so aro,” insulat nen Juan. Ipapabitar na apostol ya impanengneng na Dios so sankabalegan ya aro to diad impangibaki to ed si Jesus bilang “makapamaandi kasalanan tayo.” Antoy nepeg a gawaen na saray Kristiano? Oniay inkuan nen Juan: “Inar-arok ira, no say Dios ontan so impangaro to ed sikatayo, nepeg met a manaaroan so sakey tan sakey ed sikatayo.” (1 Juan 4:8-11) Say sakey a paraan a nipanengneng so ontan ya aro et diad pagmaliw a maparawes ed saray kapananisiaan.​—3 Juan 5-8.

Balet, panon a nipanengneng na saray managdayew nen Jehova so aro ra ed sikato? Oniay ebat nen Juan: “Saya so aro [ed] Dios, a sumpalen tayo so saray ganggan to: tan saray ganggan to aliwa ran ambelat.” (1 Juan 5:3; 2 Juan 6) Saraman sirin so mangunor ed Dios so makaseguro a sikaray lawas aroen na Dios tan nailaloan day “bilay ya andi-angga.”​—Judas 21.

​—Nibase ed Santiago; 1 Pedro; 2 Pedro; 1 Juan; 2 Juan; 3 Juan; Judas.