Kapitulo 19
No Anto so Kabaliksan na Mosaicon Ganggan ed Sikayo
1. (a) Anto so mangipanengneng a, ginmapo nen 36 K.P., saray ag-agalsiman a Hentiles so inawat nen Jehova a bilang Kristianos? (b) Balet diad anton salisalan ya arum ed saray inmunan Kristianos so walaan na mabiskeg a liknaan ed satan?
SAKEY ya isyun ampetang a nansasangsangan ed saray agew nen apostol Pablo ed no kasin saray Hentil a Kristianos so obligadon manumpal ed saray nakakaukolan ed Mosaicon Ganggan. Tua a nen 33 K.P. et sinmabi so masanton espiritu ed saray ag-agalsiman a Hentiles. Balet saray arum a Kristianon binmaleg ed inka-Judio so nanliknan mabiskeg a saray Hentil a babangatan so nepeg a galsiman tan bangatan a manumpal ed Ganggan nen Moises. Kasin, diad tua, nakaukolan ed sikara so panumpal ed satan a Ganggan, odino say nayarin kabiangan na satan? Diad ngalngalin 49 K.P. say salisalan so impanon ed mananguley ya ulop ed Jerusalem.—Gawa 10:44-48; 15:1, 2, 5.
2. Akin a sayan salisalan so makapainteres ed sikatayo?
2 Say nansumpalan so makapainteres a tuloy ed sikatayo. Akin? Aliwa lambengat a lapud no maminsan et naabet tayoray totoon mangisangsang a saray Kristianos so nepeg a manumpal ed arum iran nakakaukolan na Ganggan, a singa say pananumpal ed Sabaton, noagta ontan met a lapud say Biblian mismo so mangibabaga a “say Ganggan so masanto, tan say bilin so masanto tan matunong tan maong.” (Roma 7:12) Anggaman atukoy a bilang say Mosaicon Ganggan lapud si Moises so manamegley na Ganggan na sipanan, saman a kodego na Ganggan so peteg a nanlapud si Jehova a Dios.—Exodo 24:3, 8.
Akin a say Ganggan?
3. Akin a say Ganggan so niiter ed Israel?
3 No panon so panmoria tayo ed Ganggan natan so naapekta diad no kasin natalosan tayo no akin ya inter nen Jehova ed Israel so sakey a kodego na Ganggan. Ipapaliwawa na Kasulatan: “Niarum [ed Abrahamicon sipanan] pian ompatnag iray impakalukso, ya anggad onsabi so bini ya akagawaan na sipan . . . Kanian sirin say Ganggan so nagmaliw a managbangat tayo a mangitonton ed si Kristo, ta pian sikatayo komon so niyabawag a matunong nisesengeg ed pananisia.” (Galacia 3:19, 24) Panon so impanggawa na Ganggan ed saya?
4. (a) Panon a say Ganggan et “ginawa ton ompatnag so impakalukso”? (b) Panon met so impangitonton to ed saray matoor diad si Kristo?
4 Diad impangiletneg na ayadyarin padron a manasakup ed nanduruman kipapasen na bilay, impanengneng to’d saray Judios a bilang makasalanan. Pinmatnag, anggaman ed anton maabig a getma tan maseseg a sagpot, sikara so misukat ed saray nakakaukolan to. Uusaren toray Judios a bilang sakey ya ehemplo ya ag-ayadyarin atooan pamilya, say Ganggan so angiparungtal ed amin diad mundo, a pati balang sakey ed sikatayo, a bilang makasalanan, manepeg ed pananusa na Dios. (Roma 3:19, 20) Sirin indanet to so pankaukolan ed sakey a manangilaban na katooan, tan angitonton ed saray matoor ed si Jesu-Kristo a bilang Manangilaban. Diad anton dalan? Impabidbir to a bilang say alenleneg ya anumpal ed Ganggan ya ayadyari, sirin say alenleneg a toon andian na kasalanan. Saray bagat ya ayep ed leksab na Ganggan so limitado lambengat ed kablian, balet bilang ayadyarin too, nayarin nen Jesus ya iyapay so bilay to a bilang sakey a bagat a peteg a mangekal na kasalanan tan mangilukas na dalan ya onarap ed maandon bilay ed amin na saraman so mangagamil na pananisia.—Juan 1:29; 3:16; 1 Pedro 1:18, 19.
5. Diad pangusar ed saray nitaryan kasulatan, ebatan iray tepet a nisakup ed sayan parapo.
5 Tekep na sayan kanonotan, panon so pangebat yo ed onggendan iran tepet?
Kasin say Mosaicon Ganggan et kabaliksan ton nepeg a tumboken na amin a katooan? (Salmo 147:19, 20; Exodo 31:12, 13)
Kasin angiter si Jehova na anggan anton pamatnagan ed Israel a say Ganggan na sipanan so mangangga ed arum ya agew? (Jeremias 31:31-33; Hebreos 8:13)
Kasin say Samploran Ganggan, a pati say nakakaukolan a panumpal ed sinimban Sabaton, so mantultuloy a sumpalen kayari na impangekal ed arum a kabiangan na Ganggan? (Colosas 2:13, 14, 16; 2 Corinto 3:7-11 [a singa impalinew na Exodo 34:28-30]; Roma 7:6, 7)
Diad anton paraan ya impanampot nen Jehova so Ganggan na sipanan? (Colosas 2:13-17; Mateo 5:17, 18; Roma 10:4)
6. Anto so atukoy diad saray argumenton mangibabaga a say Mosaicon Ganggan so siansia nin mankukurang?
6 Diad liwawa na saya, anto so atukoy diad pangisangsang a say Mosaicon Ganggan so siansia nin mankukurang? Diad epekto, saya so panangipukay na pananisia ed si Jesu-Kristo. Akin ya ontan? Lapud say ontan a panmoria so panangipulisay ed katuaan a sinumpal nen Jesus so Ganggan, sirin imparaan to so dalan diad pamatunda na Dios ed satan. Diad saray totoon mangibabagan Kristianos balet ta sikara so tinangguyor na argumento diad panlabay a panumpal ed Ganggan, odino say arum a kabiangan to, mabiskeg ya insulat nen apostol Pablo: “Sikayo so nisian ed si Kristo, siopaman ed sikayo a manasalin niyabawag a matunong diad panamegley na ganggan; sikayo so naandi ed kanepegan a panangasi to.”—Galacia 5:4; Nengnengen met so Roma 10:2-4.