Kapitulo 4
Say Nengneng na Bilay a Manaalagar ed Saray Niliktar
1. Akin a say isabi na “agew nen Jehova” so agmanaynan ed dalin a paoypaoy ed deral? (Isaias 45:18)
1 Anggaman makapataktakot so onsasabin “agew nen Jehova,” agto taynanan so dalin ya aderalderal a para ed panayaman. Saray epekto so aliwan singa saraman so panderal na nuklar, a sikato so tatakotan a maneral ed ekologo tan manggawa ed saray niliktar a manlikna na makapasinagem iran epekto na radiasyon. Imbes a deralen to so dalin a para ed panayaman na too, say Amalsa so “maneral ed saraman so manederal na dalin.”—Joel 2:30, 31; Apocalipsis 11:18.
2. Anto so mangiter ed sikatayo na talek ya iliktar nen Jehova iray matoor diad baleg a kairapan?
2 Anggapo so anggan melanting a panduaruwa ed kanonotan na saray matoor ya ariripen nen Jehova a sikara so nayarian na Dios ya iliktar anggaman ed saray makadesyang a puersa ya ibasig to ed kaliberliber da. Kabat da a sanen say marutak ed moral a Sodoma tan Gomorra so aderal diad panamegley na ‘asupre tan apuy a nanlapud tawen,’ saray angheles nen Jehova so angiliktar ed si Lot tan saray duaran mamarikit to. (Genesis 19:15-17, 24-26) Sikara met so sikakabat a sanen saray panguloan ed amin ya Ehipto so aderal ed saray agew nen Moises, say anghel a manamatey nen Jehova so linmabas ed abung na saray Israelitas, saramay kaabungan ya atandaan ed dala na korderon Paskua. (Exodo 12:21-29) Sirin, met, sano ombetag so makadesyang a petang na baleg a kairapan, iliktar nen Jehova iraman so nansalimbeng ed sikato.—Salmo 91:1, 2, 14-16; Isaias 26:20.
3. Akin a say baleg a bilang na saray inaatey so agmangiter na kaatapan ed bunigas na saray niliktar?
3 Tua, bilang nansumpalan na baleg ya impanderal, say dalin so akatakatakan na saraman so pinatey nen Jehova. Balet anggapo so mikabat a magmaong nen say Dios ed no anto so nakaukolan a gawaen pian salimbengan so bunigas na saray niliktar. Ibabaga to ed sikatayo ya imbitaan toray kamanokan ed tawen tan saray ayayep ed uma diad “baleg a pangdem” to tan sikara so napesel ed saray malaman a kabiangan na saraman so pinatey. (Apocalipsis 19:17, 18; Ezequiel 39:17-20) Say agda naupot et nayarian ton isinop diad arum a paraan. Say gagala na Dios ed dalin a singa nibaga ed Eden so diad satan et mantultuloy ed kasumpalan to.
No Anto So Ipaparungtal na Orihinal a Gagala na Dios
4. Anton nengneng na gapo so inter nen Jehova ed inmunan paris a too, tan akin a satan so nikadkaduman makapainteres ed sikatayo?
4 Say pamatnagan ed no anto so itatarya na arapen ed saray niliktar ed baleg a kairapan so naromog ed nengneng na gapo ya inter nen Jehova ed pamilya na too ed Eden. Diad impangiparaan ed dalin a para ed panayaman na totoo, pinawala na Amalsa so daakan a tantanaman, ontan met ed sira, manomanok tan saray ayayep ed dalin diad makapalikliket a panduruma. “Si Jehova a Dios so angitanem na sakey a tanamanan ed Eden, diad bukig, tan diman et impasen to so too a tinibukel to.” (Genesis 2:8) Balet agginawa na Dios so interon dalin a sakey a paraiso tan insan pansiansiaen to a bilang sakey a parke a para ed too. Imbes, inikdan nen Jehova so inmunan paris a too na makapakelaw a gapo, ya impabtang to so bendisyon to ed sikara tan inikdan tora na kimey a gawaen. Inyan to ed arap da iray proyekton manggawa ed sikaran mangusar diad nagnap a pakayari ra tan makaromog na pakapnek diad saray nagawaan da. Saya so mamano ed saray bilay da na kabaliksan. Agaylan makapasagyat so kimey a wala ed sikara—a mangumponi ed saray anak a mangisindag na maridios iran kalidad, a manginatnat na Paraiso ed saray kasampotan na dalin tan mangasikaso ed saray dakerakel a pinalsan bilay! No si Adan tan Eva so nantultuloy ya amagalang ed inkasoberano nen Jehova, sikara komon so agbalot ompatey. Panggayagan da komon so ayadyarin bilay ed dalin diad ando lan ando.—Genesis 1:26-28; 2:16, 17.
5. Sirin, antoran iilaloan so akatarya ed saray niliktar ed baleg a kairapan?
5 Siempre, saray kipapasen ed dalin diad kayarin tampol na baleg a kairapan so aliwan kapara na saraman so wala ed Eden. Balet say orihinal a gagala na Dios ed dalin tan katooan so mansiansian agnauman. Say paraiso so onlaknab ed globo, a saray katooan so manangasikaso to, tan sikaran amin so mankakasakey diad panagdayew ed tuan Dios. Diad arap da et nitarya so pankanawnawan pambilay ed ando lan ando, a panggayagaan so maglorian kawayangan na saray anak na Dios.—Lucas 23:42, 43; Apocalipsis 21:3, 4; Roma 8:20, 21.
6. (a) Anto so pagmaliwan na anggan anton kagawaan ed militar? (b) Akin ya anggapo la so naobligan naerasan lamet?
6 Diad gapo, saray deral na daan a sistema so andi-duaruwan mankaukolan na panlinis. Saray kagawaan na militar a natilak so nakumberte ed mareen ya usar. (Ezequiel 39:8-10; ipareng so Miqueas 4:3.) Saray tanaman a wala ni ed kaumaan so andi-duaruwan anien pian manustine ed saray niliktar. Insan no saray bukel so nitanem tan nagawa so balon panagani, say sipan so ontua: “Say dalin so peteg a mangiter na bunga to; say Dios, Dios tayo, so mamendisyon ed sikatayo.” (Sal. 67:6; ipareng so Deuteronomio 28:8.) Diad kaandi la na saray sinisiblet tan manangapag iran elemento na daan a sistema, anggapo lan balot lamet so anggan siopan naobligan naugip a narasan diad labi.—Salmo 72:16.
7. Panon a say impanpili nen Jehova ed balon ari na dalin so mangisindag na dilin kakabatan tan aro na Dios?
7 Saya so magmaliw a sakey a mundon tibukelen na totoon mangaapresya ed kaimportantian na pakawalaan na panangiwanwan tan panamendisyon nen Jehova. Tan saraya so nitaryaan diad nengneng a mangisindag na dilin kakabatan tan aro na Dios. Say sakey ya impabtang nen Jehova a bilang balon Ari na dalin et say dilin Anak to, si Jesu-Kristo. Ipaparungtal na Biblia a diad panamegley to et pinalsa na Dios so dalin tan amin a nanduruman nengneng na bilay ed tapew to. (Colosas 1:15-17) Sigpot a natalosan na Anak na Dios no anto so nakakaukolan diad pantultuloy na bilay ed dalin tan sikato so walaan na nikaduman panliket ed saray bengatla a nipaakar ed katooan.—Uliran 8:30, 31.
8. Anton kiwas ed inkasoberano nen Jehova so panulongan nen Kristo ed saray mangaraldalin ya uuleyan to a bayuboan?
8 Manuna ed amin, say Anak so sitotoor a mangitandoro ed inkasoberano nen Jehova. Nipaakar ed si Jesus et nipasakbay: “Diad sikato et manayam so espiritu nen Jehova, say espiritu na kakabatan tan ed pakatalos, say espiritu na simbawa tan ed pakapanyari, say espiritu na pikakabat tan ed takot ed si Jehova; tan wala so panggayaga to diad takot ed si Jehova.” (Isaias 11:2, 3) Tulongan toray mangaraldalin ya uuleyan to a makaromog na miparan panggayaga diad pangitukoy da’d saray bilay da ed dalan nen Jehova. Diad silong na inkaari to, saray niliktar ed baleg a kairapan so nipawil ed nengneng na bilay a ginagala na Dios a para ed katooan sanen saray inmunan atateng tayo so naikdan na Eden a bilang ayaman da.
No Anto So Ipaparungtal na Ministeryo nen Jesus
9. (a) Anto so arum ed saray makapaermen ya epekto na atawir a kasalanan? (b) Anton ilalo so itatarya na saray milagro nen Jesus?
9 Pian satan a nengneng na bilay so napanggayagaan, anggaman kuan, nakaukolan tayo so pakalukpos a manlapud makapaermen iran epekto na kasalanan. Amin tayo so anawir na kasalanan ed si Adan, ya akabalang na inkayadyari to sanen impanengneng to so mauges ya agpanangimano ed inkasoberano nen Jehova. Saray nansumpalan na kasalanan so nipatnag ed nanduruman dalan. Sikato so angitarok na sakit, pisikal iran depekto, ontan met ed tendensyan manisip tan mangibaga tan manggawa ed saray bengatla a nisesengeg ed mauges a motibo. Kaunoran et sikato so amawala na patey. (Roma 5:12; 6:23) Legan na mangaraldalin a ministeryo to, si Jesus so nanggawa na dakel iran milagron angidemostra a nayarian ton itarok so pakainawaan ed saraman so uuleyan na Panarian na Dios.
10. Akin ya aliwan agmakatunongan a nayarian nen Jesus a gawaen iray milagro ya agnaalig na saray sientista?
10 Balet sano nabasa na arum a totoo so makapasagyat a salaysay na Biblia nipaakar ed saray milagro nen Jesus, sikara so manduaruwa. Akin? Lapud sikatayo so manbibilay ed sakey a mundon say panagduaruwa so nagmaliw a popular. Saray managduaruwa so nayarin manliknan pian napanisiaan iray milagro, et saray sientista natan so nepeg a makayarin mangulit ed saratan odino mangipaliwawa ed saratan. Balet akin a saray sientista so mantutultuloy a mangidedeboto na baleg a karakel na panaon tan kuarta ed panagsukimat? Lapud dakel so agda natalosan. Say peteg a salisalan ed awawey tayo diad ministeryo nen Jesus et say inkamabulos a mamidbir ed madibinon pisasalet ed saray kurang na too.
11. Diad Gawa 2:22, antoran balikas so nausar a maneskribe ed saray milagro nen Jesus, tan anto so ipanengneng na saraya?
11 Diad sakey ya ulop ed Jerusalem nen 33 K.P., sinalita nen apostol Pedro si Jesus a bilang “sakey a toon lapag ya impatnag na Dios ed sikayo diad panamegley na saray makapanyarin gawa tan pakelaw tan tantanda a ginawa na Dios ed panamegley to.” (Gawa 2:22) Saray milagro, a singa impanengneng dia nen Pedro, “saray makapanyari gawa,” so aliwan gawagawa a nayarin aligen odino ipaliwawa na arum a totoo, noagta ebidensya a say pakayari na Dios so onkikiwas ed panamegley nen Jesus. Sikara so “tantanda” a sikato so tuan Mesias, say dilin Anak na Dios. Sikara met so “pakelaw,” nagawgawan mangituturo ed makapaligsay-puson arapen iran nagawa.
12. (a) Akin a naromog yon makapaseseg iray salaysay nipaakar ed impanlinis ed saray totoon akating? (b) Anto so nagkalautlan makatantanda nipaakar ed impanambal nen Jesus ed sakey a paralitiko?
12 Basaen so awaran na Ebanghelyo ed Biblia, tan legan a satan so gawaen yo, nonoten a saray milagron ginawa nen Jesus so mangiter na ensayo ed saman so gawaen to ed katooan a manbilay ed dalin diad leksab na Mesianicon Panarian na Dios. Satan so sakey a panaon sano saray totoo a walaan na saray makaderal-indengan iran sakit a singa say kating so nalinisan—a singa impanlinis nen Jesus ed saray samploran totoon akating legan a sikato so mamapaarap ed Jerusalem nen taon 33 K.P. Impanengneng to a nayarian ton tulongan so ontan iran totoo tan satan so peteg a labay ton gawaen. (Lucas 17:11-19; Marcos 1:40-42) Dakel so biniktima na paralisis. Para ed sikara, met, nitarya so katambal—a singa ed samay sakey a paralitiko ed dukolan a tinambal nen Jesus, a saya so insiglaot to diad impamerdona ed saray kasalanan na too.—Marcos 2:1-12.
13. Ibaga so nipaakar ed sakey a milagro nen Jesus a mangitatarya na ilalo ed (a) saray bulag, (b) saraman so telek odino walaan na depekto ed panagsalita, (c) saray totoon tinambal na dakel a doktor ya ag-apaabig. (d) Panon so pikabat yo a nayarian nen Jesus a tambalen so amin a nengneng na sakit tan agpakayari?
13 Saray bulag so makalimata, saray telek so makadngel tan saray walaan na depekto ed panagsalita so napaabig ed saray dila ra—unong a singa sarayan bengatla so ginawa nen Jesus ed saray totoo ed Galilea tan diad Decapolis nen inmunan siglo. (Masteo 9:27-30; Marcos 7:31-37) Para ed dakel a totoo natan, agniiter na saray doktor so pakatambal. Satan so kipapasen ed sakey a bii ed Capernaum a “nanlikna na dakel ya ot-ot ed saray dakel a managtambal tan ginastos to so amin a wala ed sikato tan apaabig.” Balet sikato so pinaabig nen Jesus, tan ontan met so gawaen to diad dakerakel ni a singa saman a bii. (Marcos 5:25-29) Kanser, sakit ed puso, malaria, tipos—anggapo so mairap a tuloy, a singa impanengneng to sanen tinambal to so “amin a nengneng na sakit tan amin a nengneng na agpakayari” kaleganan na ministeryo to ed Galilea.—Mateo 9:35.
14. Panon a saray salaysay ed impamaoli nen Jesus ed saray inaatey so mangipanengneng ed no anto so kabaliksan na kioli ed saray niliktar?
14 Satan met so sakey a panaon sano wala so pankanawnawa ed saray inaatey—aliwan saraman so dineral na Dios ed baleg a kairapan, noagta diad saray binilyon nin arum ya inatey ed inlabas na saray siglos—pian manbilay lamet, tan nawalaan na ilalo ya anggapo nensaman ed pakadampot da. Anto so kabaliksan na satan ed saray niliktar? Asingger ed baley na Nain, pinamaga nen Jesus iray lua na kaermenan ed sakey a balon ina diad impamaoli to ed alenleneg ya anak ton laki. Diad Capernaum et intarok to so baleg a liket ed saray atateng na sakey a biin walad kalangweran diad impanliing to ed anak da a manlapud saray inaatey. (Lucas 7:11-16; Marcos 5:35-42) Kasin labay mo so wadman a mantalaran sano saray inad-arom so napaoli a manlapud saray inaatey? Satan so makapalikliket ya eksperiensia na saray niliktar ya onloob ed “balon dalin.”
15. (a) Panon so pangipanengneng na saray bangat nen Jesus ed nengneng na totoon manbilay ed dalin diad satan? (b) Diad anton dalan a sikatayo so nawalaan na pakataway ed satan a nengneng na bilay natan?
15 Say bilay ed satan so aliwan kaulit na sulit-ed-puso tan kaermenan a mabetbet a mamapabelat ed saray totoo natan. Saya so nipanengneng aliwan diad saray milagro labat nen Jesus noagta ontan met ed saray bangat to, lapud saraman lambengat so tuan babangatan so makaliktar ya onloob ed “balon dalin.” (Juan 3:36) Imbangat toray patumbok ton mangiyuna ed saray espiritual a kablian nen saray materyal a gegemtan, a manmatalek ed si Jehova, ya onnengneng ed Sikato a para ed kiwanwan tan pablien daray bendisyon To. Diad panamegley na salita tan ehemplo, indanet nen Jesus so kaimportantian na aro tan kaumildian, ya inabagey toray arum a totoo tan insuko to so inkasikato a nisesengeg ed sikara. Agawa la, saraman so nagmaliw a babangatan nen Kristo tan saraman so tuan mangiyaaplika ed sarayan prinsipyo so makaroromog na baleg a pakainawaan ed saray kamarerwa ra tan sikara, met, so mangitatarok na pakainawaan ed arum. (Mateo 11:28, 29; Juan 13:34, 35) Saya lambengat so panaway ed nengneng na bilay a panggayagaan na saraman so siansia nin mabilay sano naandi so peles a mundon andian na aro. No sika so onkiwas a sikakabat natan, satan a bilay so nakayarian mo.
[Kahon\Litrato ed pahina 33]
ORIHINAL A GAGALA NA DIOS ED KATOOAN
Pian panoen so dalin na saray totoon mangisindag na maridios iran kalidad
Pian inatnat so Paraiso ed sankadalinan tan satan so asikasoen tan say bilay na ayep
Pian panggayagaan so bilay ed dalin diad ando lan ando