Matulok ed Saraman So Mangipapangulo
“Matulok ed saraman so mangipapangulo ed limog yo tan pauleyan, lapud sikara so manbabantay ed saray kakamarerwa yo a singa saraman so mangisaklang na pipalinewan.”—HEBREOS 13:17.
1. Panon so kagunggunaan tayo a manlapud kimey na saray Kristianon manangasikaso?
SI Jehova so angitarya na saray manangasikaso ed organisasyon to diad sayan “panaon na anggaan.” (Daniel 12:4) Sikara so mangipangulo diad pangasikaso ed malakarnero, tan say panangimaton da so makarepresko. (Isaias 32:1, 2) Nagkalalo ni, say maaron panangasikaso na saray mamatatken a mantatrato ed pulok na Dios ed inkatamoy so manserbin salimbeng a manlapud si Satanas tan sayan marelmeng a sistema na bengabengatla.—Gawa 20:28-30; 1 Pedro 5:8; 1 Juan 5:19.
2. Panon so impanmoria na arum ed si apostol Pablo, balet anton awawey ed saray mamatatken so matukoy?
2 Balet panon so panmoriam ed saray mamatatken? Diad pusom, kasin ibagam: ‘Siak so agbalot onasingger ed sananey a matatken ed sayan kongregasyon no walaan ak na problema, lapud andian ak na talek ed anggan siopa ed sikara’? No ontan so liknaan mo, kasin idadanet mon tuloy so agda inkayadyari? Diad kadaanan a Corinto, arum so angibaga nipaakar ed si apostol Pablo: “Saray sulat to so ambelat tan mabiskeg, balet say kiwawala to ed inkatoo so maletey tan say panagsalita to so namudmora.” Ingen, impabtang na Dios ed si Pablo so ministeryo tan inusar to a bilang “sakey ya apostol ed saray nasyones.” (2 Corinto 10:10; Roma 11:13; 1 Timoteo 1:12) Nailaloan, sirin, a naliknam a nagkalalo so singa alikna na agin bii ya angikuan: “Sikami so walaan na sankaabigan ya ulop na mamatatken ed mundo. Sikara so wadian mismo ya ontulong sano nakaukolan.”
Akin a Sikara So Tuloken?
3. Pian say Katawan so wala ed espiritun ipanengneng tayo, panon so nepeg a panmoria tayo ed saray Kristianon katambayan-a-papastol?
3 Lapud saray Kristianon katambayan-a-papastol so intarya na Baleg a Pastol, si Jehova a Dios, panon so isipen yon labay to ed sikatayo a panmoria ed sikara? Segurado, sikatayo so ilaloan na Dios a manumbok ed niletneg-ed-Biblian panangiwanwan a naawat ed panamegley na saray maaron manangasikaso diad leksab na panangimaton na Mananguley ya Ulop na saray Tasi nen Jehova. Sirin ‘say Katawan so wala ed espiritu ya ipanengneng tayo,’ panggayagaan tayo so kareenan, tan sikatayo so napabiskeg ed espiritual.—2 Timoteo 4:22; ipareng so Gawa 9:31; 15:23-32.
4. Panon so personal a pakapangiyaplika tayo ed Hebreos 13:7?
4 Impaseseg nen Pablo: “Nonoten iraman so mangipapangulo ed limog yo, ya angisalita na salita na Dios ed sikayo, tan legan a morekdeken yo no panon so nagmaliwan na ugali ra et aligen yo so pananisia ra.” (Hebreos 13:7) Diad limog na saray inmunan Kristianos, saray apostoles so manunan angipangulo. Natan, naimano tayo a saraman so manitibukel na Mananguley ya Ulop na saray Tasi nen Jehova, arum so alanaan a manangasikaso, tan lalaki ed “baleg ya ulop” so mangipapangulo ed sikatayo. (Apocalipsis 7:9) Anggaman ag-itayo naragdag a mangalig ed kalidad na boses, postura, odino arum iran atooan ya ugali, nayarian tayon gawaen so ugali tayon mansumpal a maabig diad pangalig ed pananisia ra.
5. Diad dalin natan, siopa so nimatalekan na manunan responsabilidad na panangasikaso ed Kristianon kongregasyon, tan anto so kanepegan da?
5 Diad dalin natan, say manunan responsabilidad na panangasikaso ed espiritual a nakakaukolan tayo so nimatalek ed “matoor tan makabat ya aripen.” Say representante ton Mananguley ya Ulop so mangipapangulo tan mangiyuuksoy ed sankamundoan a kimey na panangipulong-ed-Panarian. (Mateo 24:14, 45-47) Nagkalautlan sarayan alanaan-na-espiritun mamatatken so ipasen a bilang espiritual a gobernador, lapud nayarin nipatalos so Hebreos 13:7: “Sinononot kayo ed saramay manguuley . . . ed sikayo.” (Kingdom Interlinear) Diad masulok a 60,000 kongregasyon tan masulok a 3,500,000 manangiyabawag na Panarian, saray 12 mamatatken a manitibukel na Mananguley ya Ulop so walaan na ‘daakan a gawaen ed kimey na Katawan.’ (1 Corinto 15:58) Nisesengeg ed inter-na-Dios a kimey da, kanepegan da so sigpot a kooperasyon tayo, a singa saray inmunan Kristianos so walaan na kooperasyon ed inmunan-siglon mananguley ya ulop.—Gawa 15:1, 2.
6. Anto so arum ed saray bengatlan gagawaen na saray mamatatken diad pakagunggunaan na saray totoo nen Jehova?
6 Saray manangasikaso so tinuro-na-espiritun mangasikaso ed espiritual a nakakaukolan na kongregasyon. (Gawa 20:28) Imanoen dan say mensahe na Panarian so nipupulong ed teritorya na lokal a kongregasyon. Sarayan Makasulatan a kualipikadon lalaki so mangitatarya met na espiritual a panangiwanwan diad maaron nengneng. Sikara so mamilin, manligliwa, tan mantasi ed espiritual ya agagi ran lalaki tan bibii, pian saraya komon so mantultuloy a manakar a makana ed Dios. (1 Tesalonica 2:7, 8, 11, 12) Anggaman sano say sakey so nalingo ed kundang to sakbay a sikato so sikakabat ed satan, sarayan lalaki so mametek ed sikato “diad espiritu na kaumildian.”—Galacia 6:1.
7. Anton simbawa so inter nen Pablo ed Hebreos 13:17?
7 Saray kapusoan tayo so napapakiwas a mikoopera ed ontan iran maaron manangasikaso. Saya so manepeg, a singa insulat nen Pablo: “Matulok ed saraman so mangipapangulo ed limog yo tan pauleyan, lapud sikara so manbabantay ed saray kakamarerwa yo a singa saraman so mangisaklang na pipalinewan; pian saya komon so gawaen da ed gayaga tan aliwan diad ingungot, lapud saya so makaderal ed sikayo.” (Hebreos 13:17) Panon so pantalos tayo ed sayan simbawa?
8, 9. (a) Nisesengeg ed Hebreos 13:17, akin a sikatayo so nepeg a matulok ed saraman so mangipapangulo? (b) Say katutulok tan panagpauley tayo so nayarin nawalaan na anton maabig ya epekto?
8 Sikatayo so papasesegen nen Pablo a mangunor ed saraman so manguuley ed sikatayo ed espiritual. Sikatayo so “pauleyan,” onsuko ed sarayan katambayan-a-papastol. Akin? Lapud ‘sikara so manbabantay ed saray kakamarerwa yo,’ odino bilabilay na saray dedikado ed Dios. Tan panon so “pambabantay” da? Dia et say presenten aktibon indikatibo na Griegon berbo ya a·gru·pneʹo so literal a kabaliksan ton saray mamatatken “so agnaugip.” Saya so mangipapanonot ed sikatayo ed begtebegtew a pastol ya agnaugip pian salimbengan to so pulok to a manlapud saray kaatapan ed labi. No maminsan et saray mamatatken so agnanaugip ed labi diad sipipikasin panagpaga ed pulok na Dios odino diad panangisaklang na espiritual a tulong ed saray kapananisiaan. Agaylan nagkalalo ya apresyaen tayo so matoor a serbisyo ra! Peteg, agtayo labay so magmaliw a singa “agmaridios a totoo” ed agew nen Judas a ‘nileglemew da so inkakatawan tan pinauges da iray magloria,’ saray alanaan a Kristianon mamatatken a walaan na inter-na-Dios a gloria, odino kagalangan, a nipabtang ed sikara.—Judas 3, 4, 8.
9 Si Jehova so agmanliket no onsaew itayon ontulok tan pauleyan ed saray Kristianon manangasikaso. Saya met so mansumpal a pakabelatan ed sikara tan sakitan to itayo ed espiritual. No sikatayo so agmikokoopera, saray mamatatken so nayarin mangasikaso ed saray kimey da ed panermen, anganko diad espiritu na kadidismaya a mansumpal ed pakabalang na gayaga ed Kristianon aktibidades tayo. Balet say katutulok tan panagpauley tayo so mangiyalibansa na maridios a kondukta tan pabiskegen to so pananisia tayo. ‘Say Katawan so wala ed espiritu ya ipanengneng tayo,’ tan say gayaga so ombuna ed ontan a klima na kooperasyon, kareenan, tan pankakasakey.—2 Timoteo 4:22; Salmo 133:1.
10. Unong ed 1 Timoteo 5:17, akin a saraman so mangiimaton ed maabig a nengneng so mankanepegan na galang?
10 Say pagmaliw tayon matulok tan pauleyan ed saray mamatatken na kongregasyon so agmankabaliksan a sikatayo so managpaliket ed totoo. Satan so aliwan makasulatan, lapud saray inmunan-siglon Kristianon ariripen so niganggan a mangunor ed saray kakatawan da, “aliwan diad gawa na lingkor-ed-mata a bilang managpaliket ed totoo, noagta diad inkasimoon na puso, diad takot ed si Jehova.” (Colosas 3:22; Efeso 6:5, 6) Saray manangasikaso a ‘mangiimaton ed maabig a nengneng tan mankikimey na impasya diad panagsalita tan panagbangat’ so mankanepegan na galang a manuna lapud say panagbangat da so nibase ed Salita na Dios. Singa insulat nen Pablo: “Komon ta saray mamasiken a mangimaton ed maabig a nengneng so mankanepegan na doblen galang, nagkalautla ed saraman so mankikimey na impasya ed panagsalita tan panagbangat. Lapud ibabaga na kasulatan: ‘Agmo babalungosan so sakey a baka sano maniilik’; ontan met: ‘Say managkimey so makanepegan ed saray tumang to.’”—1 Timoteo 5:17, 18.
11. Panon so nayarin isabi na “doblen galang” ed sakey a matatken, balet anto so manepeg a paliisan to?
11 Saray salita nen Pablo ya inaon so mangipapanengneng a say materyal a tulong so nayarin manepeg ya iter ed saraman so mangaasikaso ed saray espiritual ya intereses na arum. Anggaman kuan, agkabaliksan na saya a saray mamatatken so nepeg a mangawat na sueldo, tan say “doblen galang” so peteg ya aliwan bengatlan kerewen na sakey a matatken. Satan so nayarin onsabi a manlapud membro na kongregasyon a mabulbulos, balet agton balot usaren so kimey to diad pangamgam na pakayari odino materyal iran kayarian. Nepeg ya agto anapen so dilin gloria to odino milimog a manuna ed saray maaligwas ed materyal a bentaha bangta napaulianan so arum. (Uliran 25:27; 29:23; Judas 16) Imbes, say sakey a manangasikaso so nepeg a mangipastol ed pulok na Dios a ‘mabulbulos, aliwan diad aro ed sinasaol a pananubo, noagta magunaet.’—1 Pedro 5:2.
12. Diad pannonot tayo na anto a sikatayo so natulongan ya ontulok ed saraman so mangipapangulo ed sikatayo?
12 Natulongan itayon ontulok tan mangigalang ed saraman so mangipapangulo no nanonotan tayon say Dios a mismo so angitarya ed saray mamatatken. (Efeso 4:7-13) Lapud sarayan lalaki so tinuro na espiritu tan say organisasyon na Dios so mangukopa ed makanan pasen diad bilay na saray Tastasi nen Jehova, seguradon labay tayon ipanengneng so pisasalamat tan respeto ed saray teokratikon oksuyan. Nagkalalo ni, nayarian tayon tulongan iray balobalo a mamayubo ed sayan awawey no sikatayo so mangipanengneng na maabig ya ehemplo na katutulok tan panagpauley ed saraman so mangipapangulo ed sikatayo.
Akin ya Apresyaen So Serbisyo Ra?
13. (a) Anton mandumaan a panmoria ed panangipangulo so wala ed mundo tan diad organisasyon na Dios? (b) Walaan itayo na antoran maabig a rason na talek diad saray lalakin mangipapangulo ed sikatayo? (c) Imbes a pabalegen iray ag-inkayadyari na saray managkimey-na-impasyan mamatatken, anto so nepeg a gawaen tayo?
13 Diad mundo, wala so tendensya na pangipulisay ed panangipangulo. Singa imbaga na sakey a managpaliwawa: “Say ontatagey a sukat na edukasyon so amaaligwas ed talento a saray patumbok so maatap a tuloy a sikara la so ngalngalin imposiblin iwanwan.” Balet say espiritu na independentin panagnonot so ag-ontalona ed organisasyon na Dios, tan walaan itayo na saray maabig a rason na kumpiansa ed saray lalakin mangipapangulo ed sikatayo. Singa bilang, saraman lambengat so makakaabot ed saray Makakasulatan a nakakaukolan so naturo a bilang mamatatken. (1 Timoteo 3:1-7) Sikara so impasal ed pagmaliw a mapangasi, maaro, tan matulong, ingen mapekder ed panangitandoro ed saray matunong ya estandarte nen Jehova. Saray mamatatken so mamebemben ed Makasulatan a katuaan, ‘a bembenan dan malet so matoor a salita, pian nayarian da komon so manimbawa diad mabunigas a bangat.’ (Tito 1:5-9) Siempre, agtayo nepeg a pabalegen so atooan ya ag-inkayadyari, lapud amin tayo so ag-ayadyari. (1 Arari 8:46; Roma 5:12) Imbes a sikatayo so nadismaya ed saray kakulangan da tan leglemewen so simbawa ra, apresyaen tan awaten so niletneg-ed-Biblian panangiwanwan na saray mamatatken a bilang manlalapu ed Dios.
14. Nisengeg ed 1 Timoteo 1:12, panon so nepeg ya inengneng na sakey a matatken ed ministeryon nipabtang ed sikato?
14 Si Pablo, sakey a toon manangapresya so angikuan: “Siak so misalsalamat ed si Kristo Jesus a Katawan tayo, ya angipanabang ed siak na pakayari, lapud impasen toak a matoor diad impangipabtang to ed siak na ministeryo.” (1 Timoteo 1:12) Satan a ministeryo, odino serbisyo, so angisakup ed kimey na panagpulong tan say panaglingkor ed saray kapananisiaan. Anggaman say sakey a manangasikaso so walaan na kimey diad panamegley na masanton espiritu a manlingkor bilang sakey a managpastol, saya so agnepeg a manggawa ed sikaton manlikna a superyor ed arum, lapud sikato a mismo so kabiangan na pulok na Dios na saray malakarnero. (1 Pedro 5:4) Imbes, sikato so nepeg a misalsalamat a say Ulo na kongregasyon, si Jesu-Kristo, so angibilang ed sikaton makana a manlingkor ed saray membro na pulok tan sikato so ginawa na Dios a kualipikado diad impangiter ed sikato na sakey a sukat na pikakabat, kakabatan, tan pakatalos. (2 Corinto 3:5) Lapud say sakey a matatken so walaan na rason ed pisalsalamat diad saray inter-na-Dios a pribilehyo to, arum iran membro na kongregasyon so nepeg a mangapresya ed sayan ministeryo, odino serbisyo.
15. Anto so belas na simbawa nen Pablo ed 1 Tesalonica 5:12, 13?
15 Saray Tasi nen Jehova so misalsalamat ed organisasyon ya impaalagey na Dios ed sarayan kaunoran ya agew, tan satan ya apresasyon so mamakiwas ed sikatayon manrespeto ed saray mamatatken. Sikatayo so maliket a mikooperan nagnap ed saray oksuyan a gawaen da ed pankaabiganan tayo. Imbaga nen Pablo: “Natan kerewen mi ed sikayo agagi, a nawalaan na panangigalang ed saraman so mankikimey na impasya ed limog yo tan mangiimaton ed sikayo diad Katawan tan mamibilin ed sikayo; tan sikara so ikdan na lalo nen say gendat a panangimano diad aro lapud kimey da.” (1 Tesalonica 5:12, 13) Say pangiyaplika ed sayan simbawa so mangitarok na gayaga tan bendisyon nen Jehova.
Aliston Mangiyaplika ed Simbawa
16, 17. Anton simbawa so nayarin iter na saray mamatatken nipaakar ed panangasawa, tan anto so pansumpalan diad panumbok ed satan?
16 Pinaseseg nen Pablo si Tito ya ‘itultuloy to so mamilin tan mamaat a tekep na sigpot a pakauley.’ (Tito 2:15) Miulibay, saray representante na Dios natan so mangiwawanwan ed sikatayo diad saray prinsipyo tan ganggan na Biblia. Walaray maabig a rason ed pangawat na naulit a bilin diad pangiyaplika ed simbawa tan panangiwanwan na organisasyon nen Jehova tan saray aturon mamatatken.
17 Diad pangiyilustra: Saray mamatatken so nayarin mamaseseg ed sakey a Kristianon manumbok ed simbawa na Biblia a mangasawa “lambengat ed Katawan.” (1 Corinto 7:39; Deuteronomio 7:3, 4) Nayarin ipabitar da a say pangasawa na sakey a toon ag-abautismoan so nayarin mangitonton ed seryoson problema, a singa si Arin Solomon so nankasalanan na baleg diad impangala ed sankailin kaasawaan a bibii, ya anangguyor ed puso to diad saray palson dirios tan binmeneg ed si Jehova. (1 Arari 11:1-6) Nayarin ipaliwawa met na saray mamatatken a si Esdras so angiganggan ed saray Judion lalaki a mamataynan ed saray paganon kaasawaan da, tan imbaga nen Nehemias a saraman so mangasawa na agmananisia so ‘manggagawa na baleg a kaugsan diad ikikiwas ya agmatoor a sumpad Dios.’ (Nehemias 13:23-27; Esdras 10:10-14; nengnengen so The Watchtower, Marso 15, 1982, pahina 31; Nobyembre 15, 1986, pahina 26-30.) Saray bendisyon tan say kapenek na pakapaliket ed si Jehova so mansumpal ed panangiyaplika ed ontan a Makasulatan a simbawan iter na saray maaron mamatatken.
18. Diad pangimano ed insulat nen Pablo ed 1 Corinto 5:9-13, panon so nepeg ya ikiwas tayo no say sakey a membro na pamilya so adispelosip?
18 Manepeg met so panrespeto ed saray hudisyal a desisyon na mamatatken. Imbaga nen Pablo ed saray Kristianos ed Corinto a “tundaan da so milimog ed siopaman a tatawagen na sakey ya agi a managlawan, odino maagum a too odino managtalintao odino manag-ayew odino managbuanges odino managpatubo, ag-anggan mimiakan ed ontan a too.” Sikara so ‘mangekal ed marelmeng a too a manlapud limog da.’ (1 Corinto 5:9-13) Balet panon so ikiwas yo no say sakey a kanayon so adispelosip? Manwarin wala so pankaukolan ed limitadon pakapitongtong diad pangasikaso ed saray pamaakaran na pamilya, amin a pililimog ed espiritual ya adispelosip a kanayon so nepeg a pultoten. (Nengnengen so The Watchtower, Setyembre 15, 1981, pahina 29-31.) Peteg, say katooran ed Dios tan diad organisasyon to so manenyeg ed sikatayon manrespeto ed saray hudisyal a desisyon na manangasikaso.
19. Anto so nepeg a gawaen tayo no ipanengneng na saray mamatatken ed sikatayo a sikatayo so mamapaarap ed lingon dalan diad espiritual?
19 Aliwan mainomay so pansiansia ed mainget a dalan a mamaarap ed bilay. Diad panggawa na ontan, nepeg tayon tumboken so panangiwanwan a niiter ed Salita na Dios tan diad panamegley na saraman so angimatalkan na panagpastol iran responsabilidad ed organisasyon to. (Mateo 7:13, 14) No sikatayo so manbibiahe ed nanduruman syudad diad panamegley na kotse tan alingo itayo ed nilikuan, nakaukolan so aksion diad pametek ed kurang tayo. Tano andi, sikatayo so agbalot makasabi ed destinasyon tayo. Miulibay, no ipanengneng ed sikatayo na saray mamatatken a sikatayo so mamapaarap ed lingon dalan diad espiritual, anganko diad pankakaraw ed agmananisia, nepeg ya iyaplika tayon tampol so Makasulatan a simbawa ra. Saya so sakey a dalan na panangipanengneng a sikatayo so peteg a “manmamatalek ed si Jehova.”—Uliran 3:5, 6.
Respeto Anggan diad Saray Ankelag a Bengatla
20. Say panepet tayo ed sikatayo na antoran tepet so ontulong ed sikatayon mangipanengneng na respeto diad panangiwanwan na saray mamatatken ed anggan diad saray ankelag a bengatla?
20 Nakaukolan tayon ipanengneng so respeto diad panangiwanwan na saray mamatatken anggan diad saray ankekelag a bengatla. Kanian nayarin itepet tayo ed inkasikatayo: ‘Kasin siak so mikokoopera no kerewen na mamatatken ed sikami so idalaw ed mansasakit odino mangipasal ed saray balobalo ed lawak na ministeryo? Kasin siak so sipaparaan a mangawat ed saray asainmin ed saray miting tan iparaan iran maong? Kasin siak so aliston mangawat sano saray mamatatken so mangiter na panangiwanwan diad panangireserba ed saray yurongan ed kumbension, diad nengneng na panagkawes, tan arum nira? Kasin siak so mikoopera sano kerewen da ed sikami so itulong ed panaglinis diad Kingdom Hall, mangireport a tampol ed lawak na serbisyo, odino onsabi ed saray miting a masakbay?’
21. Say panangipanengneng tayo na respeto ed saray mamatatken so nayarin mangipanonot ed antoran salita nen Jesus?
21 Apresyaen na saray manangasikaso ed kongregasyon so kooperasyon tayo, tan mansumpal ed sankaabigan. Diad tua, say pagmaliw tayon marespeto tan mikokoopera ed anggan diad saray ankelag a bengatla so nayarin mangipanonot a maong ed saray salita nen Jesus: “Say toon matoor ed melag so matoor met ed baleg.” (Lucas 16:10) Peteg, labay tayo so nipasen a matoor.
Mantultuloy ya Onkiwas ed Maaron Panangasikaso
22. Anto so arum ed saray gungguna a mansumpal a manlapud maaron panangasikaso na matoor ya aripen tan saray mamatatken ed kongregasyon?
22 Saray gunggunan mansumpal ed maaron panangasikaso na matoor ya aripen tan saray mamatatken ed kongregasyon so mamaneknek a say mayaman a bendisyon nen Jehova so wala ed mangaraldalin a muyongan to. Nagkalalo ni, say makabkabat a panangiwanwan na saray mamatatken so mangitekep ed saray abilidad da tan mangiyalibansa na pankakasakey ed limog tayo. Mansumpal met ed mabiskeg tan matalonan sagpot diad panangiyalibansa ed saray intereses na Panarian. Peteg, say sakey a positibon resulta na maapresyan kiwas ed panangasikaso na saraman so mangipapangulo et say Dios so mamendisyon ed kimey tayo a panagpulong tan panaggaway-babangatan tayo. (Mateo 28:19, 20) Say pikokoopera tayo ed saray mamatatken so mangipaparaan ed sikatayo a para ed maandon bilay diad balon sistema na bengabengatla.
23. Diad liwawa na 1 Juan 5:3, anto so nepeg a pakapakiwasan tayon gawaen?
23 Lapud inaro tayo si Jehova, say panangunor ed sikato so aliwan makapaingungot a kimey. Insulat nen apostol Juan: “Saya so kabaliksan na aro ed Dios, a sumpalen tayoray ganggan to; tan ingen saray ganggan to so aliwan makapabelat.” (1 Juan 5:3) Saray matoor a Kristianos so maliket a mangunor ed saray ganggan nen Jehova tan napapakiwas a mikoopera ed saraman so angimatalkan to na panangasikaso ed kongregasyon. Agaylan sikatayo so misalsalamat a wala itayo ed organisasyon nen Jehova tan wala itayo na ontan iran “langkap ed lalaki”! (Efeso 4:8) Tekep na sigpot a talek a say Dios so mangiwawanwan ed totoo to, sirin, sikatayon naynay komon so matulok ed saramay apribilehyoan a mangipangulo ed limog na saray Tasi nen Jehova.
Antoray Komento Yo?
◻ Akin ya ontulok ed saraman so mangipapangulo ed sikatayo?
◻ Anto so nepeg ya awawey tayo nipaakar ed serbisyon isasaklang na saray managkimey-na-impasyan mamatatken?
◻ Akin ya aliston mangiyaplika ed simbawan iter na saray mamatatken?
◻ Antoran gungguna so mansumpal diad maapresyan kiwas tayo ed maaron panangasikaso?
[Blurb ed pahina 22]
Kasin sika so mikoopera ed saray mamatatken diad pangawat ed saray asainmin ed miting, diad itulong a manlinis ed Kingdom Hall, diad pangireport a tampol ed lawak na kimeyan, tan diad arum iran dalan?
[Litrato ed pahina 21]
Si Pablo so aliketan a mangipulong ed maong a balita tan manlingkor ed saray kapananisiaan. Bilang sakey a matatken, kasin sika so misalsalamat ed saray inter-na-Dios a pribilehyo ed serbisyo?