Say Aro ed si Jehova so Mamaliing ed Tuan Panagdayew
“Ta saya so kabaliksan na aro na Dios, a sumpalen tayo so saray ganggan to.”—1 JUAN 5:3.
1, 2. Tekep na anton motibo a nepeg tayon lingkoran si Jehova?
SAKEY a grupo na bisitan nanlapud Japan so manpapasyar ed sakey ya Assembly Hall na saray Tasi nen Jehova ed California, E.U.A. Say makapalikliket iran kaliberliber, a pati say hardin a napno na blue jays, malapati, tan hummingbirds, so lalon amaapit ed sikara ed Engranden Manamalsa ra, si Jehova a Dios. Diad saginonor et akabatan na tour guide da a ngalngalin amin ed grupo so manlilingkor a sigpot-panaon bilang payunir. Kanian, diad saginonor, say grupo so atepetan na tepet a mabetbet a nipaarap: “Akin a dakerakel so payunir ed Japan?” Biglan niwala so kareenan. Insan sakey a tobonbalon bii so nanboluntaryon inmebat: “Lapud inaro mi si Jehova.”
2 Panangaro ed si Jehova—agaylan saya so mamakiwas ed sikatayon magmaliw a maseseg diad panlingkor ed sikato! Tua, aliwan amin et makapanpayunir. On, kaslakan ed saray apatiran laksan manangipalapag na Panarian so agmakapangiyarunsa na eskedyul da pian pangayagaan iyan pribilehyo. Balet dakel ed saramay mangiyabuloy ed sirkumstansya ra so mandampot ed satan. Say arum met ed sikatayo so nayarin “manmatalek ed si Jehova tan manggawa na maong,” ya ipanengneng so aro diad kiwala na arum a pibiang ed panaggaway-babangatan a kimey. (Salmo 37:3, 4) Tan makapibiang so amin a dedikadon managdayew ed si Jehova a mangilagyat ed espiritu na panagpayunir, ya iter so maaron tulong ed saramay manpapayunir.—Mateo 24:14; 28:19.
3. Anto so naimanon pandumaan ed kaslakan a mangipasen a Kristianos tan ed Tastasi nen Jehova?
3 Misuniyan ed kaslakan a mangikuan a Kristianos, ya ipasen da so relihyon a komadua lambengat ed saray bilay da, saray Tasi nen Jehova so mangidedemostra na ampetang ya aro ed Dios a mamabayubo ed sikaran mantultuloy ya “anapen ya ununa so panarian tan say inkatunong to.” Mankaukolan iya na sakripisyo, balet agaylan makagungguna itan a sakripisyo! (Mateo 6:33; 16:24) Mitunosan itan ed ununan baleg a ganggan, ya inmunan sinalita nen Moises tan inulit nen Jesu-Kristo: “Si Jehova a Dios tayo so sakey a Jehova, tan nepeg mon arowen si Jehova a Dios mo ed amin a pusom tan ed amin a kamarerwam tan ed amin a nonot mo tan ed amin a biskeg mo.”—Marcos 12:29, 30; Deuteronomio 6:4, 5.
4, 5. Siopa iray nepeg ya ipasen a matoor, tan panon a nayarin nipanengneng so katooran?
4 Agano ni, inkuan na sakey a katambayan ed hedkuarter na saray Tasi nen Jehova ed si F. W. Franz, say 98-años a presidente na Watch Tower Society a masulok lan 70 taon ed sigpot-panaon a serbisyo: “Nagmaliw kan maabig ya ehemplo na katooran, Agin Franz.” Tan inmebat si Agin Franz: “On! Nakaukolan so magmaliw a matoor.” Ditan asegek so amin a bengatla. Diad antokaman a nengneng na kimey ed Panarian a gagawaen tayo, magmaliw itayon matoor.—1 Corinto 4:2; Galacia 3:9.
5 Tua, dakel so mankaliktan a manggawa na malaem ed serbisyo ed si Jehova, balet say Makasulatan iran responsabilidad o problema ed bunigas so nayarin manlimita ed sikaran manggawa na ontan. Anggaman kuan, saramay agmakapanpayunir so ag-ipasen a bilang samet a matoor. Arum so nansiansian matoor ed silong na sankairapan iran subok tan mabetbet diad dakel laran taon. On, sikara so nagmaliw a matoor! Impanengneng da so panangaro ed si Jehova tan nanlingkor iran siseseet diad sigpot-puson pananuporta ed saray teokratikon oksuyan to. Walaan ira na mabiskeg ya interes ed panagpayunir tan pinaseseg daray potensyal a payunir, nagkalautla saray dilin anak da, pian gegemtan so panagpayunir a bilang karera ed bilay a mablin tuloy nen say arum.—Ipareng so Deuteronomio 30:19, 20.
6, 7. Panon ya onaplika natan so niletneg ya oksuyan ed 1 Samuel 30:16-25?
6 Say maaron pankakasakey a kiwas na amin a totoo na Dios natan so nayarin iyilustra na salaysay ed 1 Samuel 30:16-25. Diad impibakal a sumpad saray Amalakitas, “sikaray kinabil nen David nanlapud mankapisdem anggad labi” tan inala to so baleg a samsam. Diad impawil da ed kampamento, inkuan na saray sundalon lalaki nen David a saramay ag-akila ed sikara ed bakal so agbalot ikdan na samsam. Balet inmebat si David: “Siopa so ondengel ed sikayo diad sayan getma? Ta singa say apag na linmasor ed bakal, ontan so apag na atilak ed saray kagawaan. Amin so nawalaan na apag.”
7 Onaplika natan so parehon prinsipyo. Saray payunir so walad unaan na espiritual a pibabakal tayo. Balet amin nin arum ed kongregasyon so mangiiter na sigpot-puso, matoor a suporta. Amin a Tastasi so kaiba ed panaglingkor. Tan say engranden resulta na nandadagup a kimey da legan na 1991 so nipanengneng ed tsart.
Matalonggaring a Report
8. (a) Anto so iparungtal na sankamundoan a report nipaakar ed dagup na manangipalapag tan oras ya inusar da ed panaglingkor ed si Jehova? (b) Anton makapainteres iran punto so naimano yo ed saray bansan balon niparungtal ed report?
8 On, say akaunan apatiran pahina na saray magasin so angipanengneng no panon a say nankakasakey a sagpot na amin a maseseg a managdayew nen Jehova so angarum ed makapasagyat a sankamundoan ya ilalaknab legan na 1991. Sakey a matalonan balon pantok na 4,278,820 manangipalapag na Panarian so nirekord—sakey a 6.5-porsienton indaak. Saraya so angideboto na 951,870,021 oras (ngalngalin sakey bilyon!) ed serbisyo. Tan imanoen pa so masekder a sagpot ya insekar na agagi tayo ed saray bansan datin wala so panameget balet natan diad sankaunaan a pankanawnawa et ompatnag ed sankamundoan a report—say Bulgaria, Cameroon, Czechoslovakia, Ethiopia, Mozambique, Nicaragua, Rwanda, tan U.S.S.R.
9, 10. (a) Panon so inkiwas na saray payunir ed angat na mairap iran panaon? (b) Anton panamaseseg so nitarya diad iloob ed panagpayunir?
9 Diad agano niran taon et linmaknab ed interon mundo so espiritu na panagpayunir. Anggan diad daldalin ya agano nin niyabuloy so kawayangan ed panagdayew et ondaraak so ranko na saray payunir. Say maruksan kipapasen na ekonomiko so ag-amatalaw ed sarayan mabiskeg a Tastasi diad pangideboto ed amin a kayarian da diad panagdayew ed si Jehova. (Ipareng so 2 Corinto 11:23, 27.) Diad binulan a promedyo, 14 porsiento na amin a manangipalapag na Panarian so manpapayunir. Say pantok a bilang na saray payunir so 780,202, a satan so ekselentin 18 porsiento na amin a manangipalapag.
10 Diad impakaimaton ed saray gayagan naeeksperiensia na saray payunir, arum met so apaseseg a mangala ed sayan panaglingkor. No sikayo so aliwa nin payunir, kasin say aro yo parad si Jehova so mamakiwas ed sikayon mangikuan, unong a nabasa tayo ed Isaias 6:8, “Wadia ak! Ibaki moak”? Odino diad panamegley na maseet a panagaral yo na Biblia, et nayarin selselan na Salita na Dios so manliub a pilalek ed puso yo, pian alaen yo so kaaruman a kundang diad iloob ed panagpayunir? Anggan diad panaon na subok, say salita nen Jehova so amaliing ed si Jeremias, ya agto napokpokan.—Jeremias 20:9.
Maaron Panaglingkor ed Katooan
11. Panon so inyaligwas na kimey na panangiyaral na Biblia ed abung?
11 Say indaak ed bilang na saray libren panangiyaral na Biblia ed abung so sakey ed saray matalonggaring a kabiangan na report ed sayan taon, binulan et 3,947,261, so nikokonduktan maparanay ed sankamundoan. Saya so maaron oksuyan ya isasaklang na saray Tasi nen Jehova pian tulongan iray interesadon totoo a naromog da ed panagkabkaabungan. Maliket kamin mangikondukta na saray panangiyaral na Biblia ed totoo ed anggan anton nasyonalidad tan rasa, a mankimey tekep na parehon gunaet a singa impanengneng nen apostol Pablo. Say ‘nagnap ya impantasi to ed namparan Judios tan saray Griego’ so andiduaruwan nankaukolan na dakel iran oras ed panbangat na katuaan. (Gawa 20:20, 21) Satan so mipadpara met natan. Tutulongan na saray Tasi nen Jehova so “amin a nengneng na totoo [pian] nilaban tan ondago ed suston pikakabat ed katuaan.”—1 Timoteo 2:4.
12-14. Antoran magayagan report so narengelan a manlapud Europa?
12 Agaylan makapasagyat iray report ed apadaak a kimey na panangiyaral na Biblia ed Mamabukig a Europa! Diad apalabas iran dekada saray agagi tayo diman so makapantitipon ed ankelag iran ulop, a tekep kalamor na sakey a dagdaan, in-mimeograph a kopya na daan a Watchtower a parad amin ed grupo. Balet natan say daakan iran Biblia tan literatura na Biblia so alusbo ed saratan a daldalin. Ipanonot na satan ed sakey so Kanta nen Solomon 2:4, King James Version: “Sikato [Jesu-Kristo] so angiyakar ed siak ed [espiritual] panduruypoan ya abung, tan say laylay to ed tagey ko so aro.” Diad impakawalaan na personal iran kopya na magasin, dakel so nakikinlongan a tuloy pian bembenan a “susto so salita na katuaan.”—2 Timoteo 2:15.
13 Agano ni, sakey a kongregasyon na 103 iran manangipalapag ed St. Petersburg, Russia so angireport na masulok a 300 iran panangiyaral na Biblia ed abung. Bilang bunga na sayan sagpot ed panangiyaral na Biblia, 53 balon Tastasi so abautismoan ed waloran bulan lambengat. Masulok a kapaldua ed kongregasyon so niwalad katuaan ed kulang odino waloran bulan! Tan andian ira na mamatatken—sakey lambengat a ministeryal ya aripen so mangaasikaso ed espiritual ya iyaaligwas da.
14 Sakey a manangipalapag na Panarian ed Estonia so tinepetan na sakey ya estudyante na Biblia no nayarian ton imbitaan so arum a kakaaro to ed panagaral. Sanen sinmabi so Tasi ed abung ed ontumbok a simba, aromog to so masulok a 50 totoon atiptipon! Siempre, nakaukolan so nikabkabiig iran oksuyan parad mantultuloy a pangasikaso ed amin na saratan ya interesado.
15. Anto so nibaga nipaakar ed inmatendi ed Memoryal tan saray bautismo?
15 Dakel a manaaral so inmunan akataway ed Kristianon panlilimog diad inyatendi ed Memoryal na impatey nen Jesus. Diad apalabas a taon, say bilang na inmatendi so sinmulok ed 10,000,000 ed sankaaunaan a pankanawnawa, 10,650,158 so nantitipon ed 66,207 iran kongregasyon ed sankamundoan parad sayan magayagan okasyon. Diad dakerakel iran bansa ed Latin-America, Aprika, tan Mamabukig a Europa, wala so inmatendin mamitlo o mamipat a danay nen say bilang na saray manangipalapag na Panarian. Natan et nepeg tayo lan manparaan a parad Memoryal a nagawa ed Biernes, Abril 17 ed sayan taon. Iilaloan a baleg a bilang na balo iran estudyante na Biblia ya onatendi ed Memoryal so mantultuloy ya onaligwas anggad bautismo. Nipaakar ed saray bautismo, nen 1991 et anengneng tayo lamet so masulok a 300,000 a mangisisimbolo na dedikasyon da ed si Jehova a Dios diad inkipalseb ed danum.
Manangaro ed Maridios a Kawayangan
16. Antoran makapasagyat a report so onsasabi a manlapud “Manangaro ed Kawayangan” Distrito Kumbension?
16 Sakey a makatantandan kabiangan na 1991 serbisyon taon et saray serye na “Manangaro ed Kawayangan” Kumbension Distrito, ya akumpleto natan ed Mamaamianen a Hemisphere bangta mantultuloy anggad 1992 ed Mamaabalaten a Hemisphere. Diad sankaunaan a pankanawnawa, say kumpleton programa na kumbension so niparungtal ed pigaran Mamabukig a Europan bansa, a ditan et pangagayagaan na agagi tayon usaren so aromog dan balon kawayangan diad pandayew ed si Jehova. Nen Oktubre 1991 say nireport a dagup na inmatendi ed inmunan 705 iran kumbension ed 54 iran bansa so 4,774,937.
17, 18. (a) Antoran kawayangan so pangagayagaan tan pitamitam na saray managdayew nen Jehova? (b) Panon a miduma so maridios a kawayangan ed minumundon kawayangan?
17 Inkuan nen Jesus ed saray babangatan to: “Say katuaan so mangibulos ed sikayo.” (Juan 8:32) Natan, say katuaan na Biblia so angibulos ed nilaksa a manlapud saray doktrina na Kakristianoan. Naaralan na sarayan nilaksa a say probisyon nen Jehova ed dondon bagat nen Jesus so manggawan posibli ed katoaan a “nibulos manlapud inkaaripen ed kabubulok tan nawalaan na maglorian kawayangan a bilang ananak na Dios.” (Roma 8:19-22) Agaylan engranden kawayangan itan—pambilay na ando lan ando ed paraison dalin diad dalem na manepeg iran getar a maaron determinaen nen Jehova!—Isaias 25:6-8; ipareng so Gawa 17:24-26.
18 Saray kawayangan a pangagayagaan natan na Tastasi nen Jehova, tan ilaloan dan pangayagaan a tuloy ed daakan ed balon sistema na bengabengatla na Dios, so nanlapud Dios tayo, si Jehova. (2 Corinto 3:17) Saratan so ag-itarok na dinanman a mapulitika o rebolusyonaryon ulopan. (Santiago 1:17) Pian makapanalwar sumpad antokaman a lingon pantalos ed sayan pamaakaran, saray badge ed 1991 kumbension ya impeket na Tastasi nen Jehova ed arum a Mamabukig a Europan daldalin so walaan na sayan balikas “Manangaro ed Maridios” imbes a “Manangaro ed Kawayangan.”
Ampetang a Panangaro ed si Jehova
19. Panon a say sipipikasin inkamaapit ed si Jehova so ontulong ed sikatayo?
19 Say panangaro tayo ed si Jehova tan talek tayo ed sikato so mamasiansia ed sikatayon maapit ed sikato ed pikakasi. Sayan inkamaapit ed si Jehova so akatulong ed agagi tayo pian sungdoan iray dakel a kairapan tan panamasegsegang. (Salmo 25:14, 15) Diad sankairapan ya inkasubok to, impansiansia nen Jesus so inkamaapit ed si Ama to diad panamegley na pikakasi. (Lucas 22:39-46) Satan a sipipikasin inkaapit ed si Jehova so tinmulong ed si Esteban diad impanirap ed impatey to. Tinmangwa ed tawen bangta sikato la so tupaken ed patey, inkuanto: “Nia! Anengneng koray katawenan ya alukasan tan say Anak na too [Jesus] ya akaalagey ed nikawanan a lima na Dios.”—Gawa 7:56.
20-22. Panon so pangiyilustra na sakey ya eksperiensia a dengelen na Dios iray pikakasi?
20 Eebatan nen Jehova iray pikakasin mitunosan ed linawa to, unong a mabetbet a naeeksperiensia na saray managdayew nen Jehova. Alimbawa, diad sakey a bansa ed Aprika a ditan et sebel so kimey na saray Tasi, sakey ya espesyal payunir a manbiabiahe ed bus a mamaarap ed amianen so walaan na baleg a sako na literatura na Panarian tan sobre pian itulor. Say pahinanten mangakarga ed bus so nantepet ed agi: “Anto so karga na sako?” Inkuan na agi so inmunan bengatlan anonotan to: “Sulat.”
21 Diad panbibiahe et alabsanan na bus so gendat a checkpoint, kanian sikaray inusilan na pulis trapiko tan satan so pinatunda ra, ya inapen dan nankarga itan na kontrabando. Inganggan dan amin a pasahero so onepas ed bus tan amin a maleta so usisaen. Balbaleg iyan problema! Say agi so inmarawi daiset ed madalamurom ya ulop tan, nantalimukor a nanpikasi ed si Jehova. Sanen pinmawil ed ulop, amin a maleta na saray biahero so nilukasan tan inusisan maalwar. Sanen lukasan da so sako na agi, sikatoy andi-esel a nanpikasi ed tulong nen Jehova.
22 “Siopa so akansako ed saya, tan anto so karga to?” inkulyaot na pulis. Sakbay a makapansalita so agi, inmebat so pahinante na bus tan inkuanto: “Sulat a nanlapud opisina na koreo ya iyakar ed opisina na koreo.” “Maabig,” kuan na opisyal. Inalsa to so sako tan inyawat to ed pahinante. “Seguroen mon walad maligen a pasen legan na panbiahe,” so inganggan to ed sikato. Nantalimukor lamet so espesyal payunir tan akisalamat ed Dumerengel na pikakasi.—Salmo 65:2; Uliran 15:29.
23. Anto so indemostra nen Jehova, tan ingen akin a no maminsan et abuloyan ton nagawan sigpot so panamasegsegang?
23 Anggaman kuan, agkabaliksan na saya a saray managdayew nen Jehova so sigpot a bulos ed kaatapan. Diad arum iran kipapasen, namparan diad panaon na Biblia tan natan, indemostra nen Jehova a nayarian ton iliktar so totoo to. Balet mitunosan ed panolbar na salisalan ed katooran, no maminsan et ompatnag ya abuloyan ton nagawan sigpot so panamasegsegang. (Ipareng so Mateo 26:39.) Niarum ni, ag-otomatikon salimbengan nen Jehova iray totoo to manlapud aksidente, sibil a gotgotan, o krimen, anggaman say pangagamil ed nibased-Biblian praktikal a kakabatan so walaan na kablian. (Uliran 22:3; Eclesiastes 9:11) Anggaman ontan, makapanmatalek itayo a balanglan niliktar itayo ed pakasubokan odino andi, say katooran tayo so natumangan, anggan diad kioli no nakakaukolan.—Mateo 10:21, 22; 24:13.
24. Anton maaro iran regalo so intarya nen Jehova, tan panon so nayarin ikiwas tayo ed aro to?
24 Agaylan makapakelaw iray maaron regalo nen Jehova! Saray regalo to ed katoaan salanti say dalin tan amin a lugan to so matalonggaring a balikas na aro to. (Salmo 104:1, 13-16; 115:16) Tan say maabagey a regalo na Dios ya Anak to, si Jesu-Kristo, a manondon ed katooan manlapud kasalanan tan patey so sankamaarowan a regalon agawa. “Diad saya et nipatnag so aro na Dios ed sikatayo, ya imbaki to so Anak ton bogbogtong ed mundo pian nagamoran tayo so bilay ed panamegley to. Onia so panangaro, aliwan lapud sikatayo so angaro ed Dios, noag ingen sikato so angaro ed sikatayo tan imbaki to so Anak ton mamaandi na kasalanan tayo.” (1 Juan 4:9, 10) Diad ebat ed satan ya aro, nayarin kumbinsido itayon “anggan say patey nisay bilay nisay saray angheles nisay saray pananguley nisay saray bengatlan wadia natan nisay saray bengatlan onsabi nisay saray pakayari nisay kaatagey nisay kaaralem nisay anggan siopan pinalsa so agmakayarin mangisian ed sikatayo ed aro na Dios a walad si Kristo Jesus a Katawan tayo.”—Roma 8:38, 39.
Panrepaso ed Sayan Artikulo
◻ Anto so kabaliksan na pagmaliw a matoor?
◻ Diad anto iran nengneng na kimey a nidalangirang tayo so aro ed si Jehova?
◻ Anton kabiangan na report ed serbisyon-taon so akasagyat a tuloy ed sikayo?
◻ Panon tayon nipanengneng so panamabli ed saray maaron regalo nen Jehova?
[Kahon ed pahina 22]
AKIN YA ONTANLAN DAKEL IRAY PAYUNIR?
Nireport a diad 2,600 iran taon saray Hapones so maktang a managdayew ed saray emperador da. Dia lambengat ed saray bakal ed sayan koma-20 siglo, masulok a taloran laksan sundalon lalakin Hapones so angisakripisyo na saray bilay da, lapud sisiaen dan anggapo la so nagkalalon kagalangan nen say ipatey nisesengeg ed dios dan emperador. Balet say Budista-Shinto a militarismo so sinmaew ed Guerra Mundial II, tan kayari to et inkuan na emperador a sikatoy aliwan dios. Anto so makayarin mamano ed sayan relihyoson pankaukolan? Makapaliket, saray panangiyaral na Biblia ed abung ya inkondukta na saray misioneron Tastasi nen Jehova tan saginonor et saray Tasin Hapones so akatulong ed dakel a makaromog ed tuan Dios, si Jehova, tan pian idedika ra so bilay da ed sikato. Parad saraman a Tastasin Hapones sayan dedikasyon so makabaliksan a tuloy. No diad apalabas et sarag dan isakripisyo so bilay da ed sakey dios ya emperador, agaylan nagkalalon seseg a natan et indeboto ra so biskeg da a bilang payunir diad pandayew ed mabilay a Dios tan Manamalsa na talba—say Soberanon Katawan a Jehova!
[Tsart ed pahina 18-21]
1991 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Litrato ed pahina 23]
Manangaro ed maridios a kawayangan—saray managdayew nen Jehova ed kumbension ed Prague, Agosto 9-11, 1991