Paliisan so Mapaatagey ya Espiritu!

Kuan na makabat ya uliran ed Biblia: “Say mangitandoro na atagey ya wangalan to anapen to so kabagbag.” (Uliran 17:19) Anto so makapuy ed atagey a wangalan? Tan anto so manunan punto na sayan uliran?

NEN kadaanan iran panaon et kaslakan iray sinansakey tan managlubak iran ulop ya akakabayo. Saray ag-abakoran a kaabungan diad mapalaway iran pasen so magmainomay a looban na matatakew. Pian sambenan so katakew na saray kayarian da, arum a makan-abung so angipaalagey na bakor a walaan na nikabkabiig a wangalan. Say bakor so atagey, balet say wangalan so abeba. Diad tua, arum so ag-onsulok ed taloran piye ed katagey​—abeban tuloy pian nalooban na kabayo tan say akakabayo. Saramay agmanggawa na abeban wangalan na saray saban da so mapeligron looban na saray akakabayon lalaki tan mansamsam ed kaykayarian da.

Diad saray syudad saray wangalan na patio so inkalapagan ya abeba tan aliwan marakep, agmangiter na pamatnagan na kayamanan a nayarin walad loob na abakoran a lote. Anggaman kuan, diad Persia say atagey a wangalan so sakey ed saray tanda na inkamaari, a satan so nanggunaetan ya inalig na arum ya uuleyan diad baleg a kapeligroan. Siopaman a manggawa na atagey a wangalan parad abung to so mangiimbita na pantakew lapud panangipangta to na inkaaligwas.

Ipanengneng sirin na Uliran 17:19 a saramay manggawan atagey ed wangalan da so mangukurok na kapeligroan diad alablabas a pangipapasen da’d inkasikara nen say peteg a kablian da. Sayan uliran so nayarin manukoy met ed sangi bilang sakey a wangalan a nipatagey diad malastog tan mapangtan panagsalita. Say ontan a pansalita so mangilagyat na sepakan tan diad kaunoran et itonton to so mapaatagey a too ed kapeligroan. Agaylan makabat, sirin, a paliisan so mapaatagey ya espiritu!

[Picture Credit Line ed pahina 30]

Marakep a Palestina, Sinai tan Ehipto, Tomo 1, nen Colonel Wilson (1881)