Tepetepet Manlapud Managbasa

Kasin napaoli iray totoo no agda awaten so tuan Inkakristiano natan tan ompatey [ira] sakbay na igapo na baleg a kairapan?

Maabig no amin tayo et resistian tayo’y antokaman ya inklinasyon ya onkiwas bilang uko-ukom, a bibidbiren a diad kaunoran say panangukom nen Jehova diad panamegley nen Jesu-Kristo so walaa’y kakanaan. (Juan 5:22; Gawa 10:42; 2 Timoteo 4:1) Balet peteg ya itatarok na Kasulatan so pigaran makatulong ya impormasyon a mangebat ed akadkaunan tepet.

Say sankamundoan a panangipulong na maong a balita na Panarian na Dios so makanan nengneng na ‘say tanda na kiwawala nen Jesus.’ Sayan tanda so napapanekneknan nanlapulad asasakbay na sayan siglo. Mansusumpal so panagpulong a kimey ed kibibiig na totoo ed amin a nasyones diad panumpal ed ilustrasyon nen Jesus ed “saray carnero” tan “saray kanding.” Diad kakumpleto na sayan panagpulong tan panangibiig a kimey, say “baleg a kairapan” so mangitarok ed kaplesan a marelmeng a sistema na bengabengatla’d anggaan to.​—Mateo 24:3, 21, 22; 25:31-46.

Si Jehova, pati ed Anak to, so mangukom no kasin say sakey a mangipupulisay ed mensahe na Panarian tan ompatey sakbay na iterak na baleg a kairapan so nigrugrupo bilang kanding. Inkuan nen Jesus a saray kanding “onlara naani ed dusa ya andi angaan.” Kanian, nibaga tayo a saramay adetermina na Dios a magmaliw a kanding so agnapaoli. Sikaray naukom a singa ed saramay “mantepel na dusa a salanti andi angaan” diad panaon na baleg a kairapan.​—2 Tesalonica 1:9.

Balet komusta iramay ompatnag ya onkulang na pikakabat ed mensahe na Panarian ta pian manggawa na matudion panpili para odino sumpa ed katuaan sakbay na ipatey da legan na sarayan “kaonoran iran agew”?​—2 Timoteo 3:1.

Dakel ed ompatey legan na kagagaway panagpulong a kimey sakbay na baleg a kairapan so mabitar a napaoli. Saya so nanengneng unong ed nabasa tayo’d Apocalipsis 6:7, 8 nipaakar ed inlugan na saray simbolikon managkabayo. Dakel a totoo so inatey bilang biktima na saray bakal, kakisiran na tagano, tan makapatey a salot. Lapud say “Hades” so mangakmon na sarayan biktima na “Patey,” sikaray napaoli legan na Milenyon Uley nen Kristo, sano ipaway na Hades so amin ya inatey to. (Apocalipsis 20:13) Dakerakel ed saramay napaoli ed bilay so nayarin akapikabat la’d mensahe na Panarian sakbay na impatey da.

Agaylay pisalamat tayo ya ag-impabtang nen Jesus ed totoo a determinaen no sioparay malakarnero tan malakanding! Ag-amta na ag-ayadyarin totoo no kaunongay pankanawnawan kaukolan ya idengel na sakey a too ta pian awaten [toy] maong a balita. Kasin kabat tayo no antoy kipapasen na puso to odino kasin peteg ya inaro toy inkatunong? Kasin nasukat tayo no panon a say kiwas to et aapektaan na pamilya to, relihyoson abenegan to, odino arum niran impluensya? Mabitar ya andi. Ingen, naseguro tayo a si Jehova a Dios tan si Jesu-Kristo so makapankuenta na saratan a pamaakaran tan diad ontan et makadampot ed saray panangukom ya ayadyari, maptek, tan matunong.​—Deuteronomio 32:4; Isaias 11:1-5.

Kanian, anggapo so katunongan para’d sikatayo a manpalbeng nipaakar ed saramay inatey ed agano ni no kasin napaoli ra odino andi. Saya so bengatlan agtayo naautorisaan a gawaen. (Ipareng so Lucas 12:13, 14.) Mas makabat parad sikatayo a manalagar ed saray desisyon na matunong ya Uko-ukom, si Jehova a Dios tan si Jesu-Kristo. Mangiter ed sikatayo iya na nagkalalon deen na kanonotan bilang ariripen nen Jehova. Ontulong met itan ed sikatayo a lalon asikasoen so nipabtang ed sikatayon gawaen​—“onla kayo sirin, tan mangawa kayo na saray babangatan ed amin a naciones, . . . ya ibangat yo ra’n mangonor na amin a bengabengatla ya ingangan [nen Jesus].”​—Mateo 28:19, 20.

[Picture Credit Line ed pahina 31]

Karneron Leicester, Meyers