Apocalipsis​—Asingger la so Engranden Kapantokan To!

Kapitulo 43

Say Mansiayap a Syudad

Pasingawey 16​—Apocalipsis 21:9–22:5

Tema: Say paneskribe ed Balon Jerusalem

Panaon na Kasumpalan: Kayari na baleg a kairapan tan kibasileng nen Satanas ed kaaralman

1, 2. (a) Iner so angitagaran na anghel ed si Juan pian bantagen so Balon Jerusalem, tan anton panduma so naimano tayo dia? (b) Akin a saya so engranden pantok na Apocalipsis?

Si Juan so intagar na sakey ya anghel ed kalawakan pian ipanengneng ed sikato so Babilonia a Baleg. Sakey met ed sayan anghelikon grupo so manguulop natan ed si Juan ed sakey ya atagey a palandey. Agaylan duma natan so naiimano to! Dia et anggapoy makapadimla, imoral a syudad a singa say Binababilonian balangkatis, noagta say Balon Jerusalem​—puro, espiritual, masanto—​tan onleleksab a manlapud tawen a mismo.​—Apocalipsis 17:1, 5.

² Anggan say mangaraldalin a Jerusalem so agbalot awalaan na gloria a singa saya. Ibabaga nen Juan ed sikatayo: “Tan dinmago so sakey ed pitoran anghel a walaan na pitoran kupa a napno na pitoran kaunoran a bakbak et akisalita ed siak a kuanto: ‘Dago ka dia, ipanengneng ko ed sika so nobya, say asawa na Kordero.’ Kanian intarok toak ed pakayari na espiritu ed sakey a baleg tan atagey a palandey tan impanengneng to ed siak so masanto a syudad na Jerusalem ya onleleksab a manlapu ed tawen dia ed Dios tan wala ed sikato so gloria na Dios.” (Apocalipsis 21:9-11a) Manlapud sankatoktokan na palandey, babantagen nen Juan so marakerakep a syudad ed kada makaroyroyon detalye to. Nanlapulad inkaplag na katooan ed kasalanan tan ipapatey et mailalon tuloy a manaalagar iray totoon walaan na pananisia ed isabi to. Diad kaunoran et wadia la! (Roma 8:19; 1 Corinto 15:22, 23; Hebreos 11:39, 40) Saya so sankarakpan ya espiritual a syudad, a tugyupen na 144,000 a matoor a manamenben na katooran, a mansiayap ed kasantosan to tan mangidalangirang ed mismon gloria nen Jehova. Nia so engranden kapantokan na Apocalipsis!

3. Panon so impaneskribe nen Juan ed karakpan na Balon Jerusalem?

³ Makapatunday-linawa so dakep na Balon Jerusalem: “Say kidyam to so singa sankablian a bato, singa baton jaspe a mankirlap a singa kristal. Saya so walaan na baleg tan atagey a padir, tan labinduay pinto to tan dia ed saray pinto et wala so labindua ya anghel, tan diman et akasulat so kangaranan na labinduan tribu na saray anak na Israel. Diad bandad bukig taloran pinto, tan dia ed bandad amianen taloran pinto, tan dia ed bandad abalaten taloran pinto et dia ed bandad sagur taloran pinto. Say padir na syudad met so walaan na letnegan iran bato, tan wala ed sikara iray ngaran na labinduan apostoles na Kordero.” (Apocalipsis 21:11b-14) Agaylan matukoy a say inmunan impresyon ya inkurit nen Juan so nipaakar ed makalaram a liwawa! Masnag a singa sakey a balon kasal a nobya, say Balon Jerusalem so matukoy a kapareha para’d si Kristo. Saya so talagan onsisinag, a mitukoyan ed palsa na “Ama na mangatatawen a liwawa.”​—Santiago 1:17.

4. Anto so mangipatnag a say Balon Jerusalem et say silalaman a nasyon na Israel?

⁴ Diad 12 a pinto to, nisulat iray kangaranan na 12 a tribu na Israel. Kanian, sayan simbolikon syudad so tugyopen na 144,000, ya atatakan “a manlapud balang tribu na ananak na Israel.” (Apocalipsis 7:4-8) Mitunusan ed saya, saray letnegan a bato so walaan na kangaranay 12 ya apostoles na Kordero. On, say Balon Jerusalem et aliwan say natural a nasyon na Israel ya inletneg unong ed 12 ya ilalak nen Jacob. Satan so espiritual ya Israel, ya inletneg ed “apostoles tan propetas.”​—Efeso 2:20.

5. Anto so iparungtal na say “baleg tan atagey a padir” na Balon Jerusalem tan say katuaan a saray anghel et nipasen ed balang lolooban?

⁵ Say simbolikon syudad so walaan na baleg a padir. Nen inmuna iran panaon, nipaalagey iray padir na syudad pian onkanan salimbeng manlapud kakabusol. Ipapanengneng na “baleg tan atagey a pader” a say Balon Jerusalem so maligen ed espiritual a paraan. Anggapoy siopaman a kabusol na inkatunong, anggapoy siopaman a marutak odino agmatua, a naabuloyan a makaloob. (Apocalipsis 21:27) Balet para’d saramay palooben, say iloloob ed sayan marakep a syudad so nialiling ed iloloob ed Panarian. (Apocalipsis 2:7) Kayari impamapaway ed si Adan, saray kerubin so impasen ed arap na orihinal a Paraiso pian amperen so iloob na makapadimlan totoo. (Genesis 3:24) Mipadpara, impasen met iray anghel ed balang lolooban na masanton syudad na Jerusalem pian mamaseguro na espiritual a kaligenan ed syudad. On, diad interon kaunoran ya agew, say kongregasyon na alanaan a Kristianos, a magmamaliw a Balon Jerusalem, so babantayan na saray anghel manlapud Binababilonian inkadutak.​—Mateo 13:41.

Panukat ed Syudad

6. (a) Panon so paneskribe nen Juan ed panukat na say syudad, tan anto so kabaliksan na sayan panukat? (b) Anto so makapangisalaysay a say sukat ya inusar et “unong ed sukat na too, a mitukoyan ed anghel”? (Nengnengen so paimanod-leksab.)

⁶ Intuloy nen Juan so salaysay to: “Natan say misasalita ed siak et walaan na sankabenbenan a binmalitok a bara, pian sukaten to so syudad tan saray pinto to tan say padir to. Tan say syudad so niletneg a kuadrado, tan say ondoy to so singa kabaleg na benlag to. Tan sinukat to so syudad ed saman a bara, labinduan libo ya estadios; say karukey tan say kaatagey tan say kaawang to so nampadpara. Ontan met, sinukat to so padir to, sanlasus apataplo tan apat a kasiko, unong ed sukat na sakey a too, a panagsukat met na anghel.” (Apocalipsis 21:15-17) Sanen say templon santuaryo so sinukat, pinaletan na saya so kasumpalan na saray gagala nen Jehova nipaakar ed saya. (Apocalipsis 11:1) Natan, say panusukat na anghel ed Balon Jerusalem so mangipanengneng no panon ya agnaoman iray gagala nen Jehova nipaakar ed sayan maglorian syudad.a

7. Anto so makatantanda nipaakar ed sukat na syudad?

⁷ Agaylan nidumaduma iyan syudad! Sakey ya ayadyarin kubikon 12,000 ya estadio (ngalngali 2,200 km.) a manliber, ya aliktoban na padir a 144 a siko, odino 210 pie, ed kaatagey. Anggapoy literal a syudad a makabet ed ontan a sukat. Sakupen to so teritoryo a ngalngalin 14 a danay a babaleg nen say modernon Israel, tan satan so onabet ed tagey a ngalngali 560 a kilometro angga ed paway na liwang! Say Apocalipsis so niiter ed saray tanda. Kanian, anto so ibabaga ed sikatayo na sarayan sukat nipaakar ed mangatatawen a Balon Jerusalem?

8. Anto so ipatnag na (a) say 144-kubikon-katagey na saray pader? (b) say 12,000 ya estadion sukat? (c) say nagnap a inkakuadrado na syudad ed ohas to?

⁸ Say 144-kubikon-katagey so mangipanonot ed sikatayo a say syudad so tutugyopen na 144,000 ya espiritual ya atagibin ananak na Dios. Say numeron 12 a pinmatnag ed 12,000 ya estadion sukat na syudad​—tekep na namparparan dukey, kaawang, tan katagey—​so uusaren ed propesiya na Biblia pian mangiretrato ed organisasyonal ya oksuyan. Kanian, say Balon Jerusalem et maong so inkadisenyo to ed organisasyonal ya uksoyan para’d panumpal ed andi-anggaan a gagala na Dios. Say Balon Jerusalem, a pati ed Ari ton Jesu-Kristo, so organisasyon a Panarian nen Jehova. Wadtan met so ohas na syudad: sakey ya ayadyarin kubiko. Diad templo nen Solomon, say Sankasantosan, a walaay simbolikon representasyon na kiwawala nen Jehova, so ayadyarin kubiko. (1 Arari 6:19, 20) Sirin, agaylan matukoy a say Balon Jerusalem, a liliwawaan na gloria nen Jehova a mismo, so nanenengneng bilang ayadyari, walay kabalgan a kubiko! Amin a sukat to so ayadyari’d inkasimbang. Satan a syudad so andian na kakulangan odino depekto.​—Apocalipsis 21:22.

Angkabli iran Materyales ed Pangipalaagey

9. Panon so impaneskribe nen Juan ed saray materyales ed pangipaalagey na say syudad?

⁹ Itutultuloy nen Juan so pangiretrato to: “Natan say inkana ed padir to so jaspe, tan say syudad so polos a balitok a singa salming kalinew. Saray pundasyon na padir na syudad so aparakpan ed amin a nengneng na bato a mabli: say una a pundasyon so jaspe, say komadua so safiro, say komatlo so calcedonia, say komapat so esmeralda, say komalima so sardonika, say komanem so sardio, say komapito so krisolito, say komawalo so berilo, say komasiam so topacio, say komaplo so krisopasio, say komalabinsakey so jacinto, say komalabindua so amatista. Ontan met, say labinduan pinto et labinduan perlas; balang sakey a pinto so ginawa ed sakey a perlas. Tan say malapar a lansangan na syudad sikato so polos a balitok, a singa mankaninag a salming.”​—Apocalipsis 21:18-21.

10. Anto so ipatnag na katuaan a say syudad so nipaalagey ed jaspe, balitok, tan “balang nengneng na angkablin bato”?

¹⁰ Say inkagawa na syudad so peteg a mansiayap. Imbes ya ordinaryon mangaraldalin iran materyales ed panagpaalagey a singa say langa odino bato, abasa tayoray jaspe, polos a balitok, tan “amin a nengneng na bato a mabli.” Agaylan matukoy so pangiretrato na saraya ed mangatatawen a materyales ed panangipaalagey! Anggapo la so nagkalalon mas marakdakep. Say kadaanan a kaban na sipan so asakbongan na puron balitok, tan diad Biblia sayan elemento so maparanay ya ilalaman na saray bengatlan maabig tan angkabli. (Exodo 25:11; Uliran 25:11; Isaias 60:6, 17) Balet say interon Balon Jerusalem, tan anggan say maawang a lansangan to, so ginawa ed “polos a balitok a singa salming kalinew,” a mangireretrato ed karakpan tan sipor a kablian ya agnayarin isisipen.

11. Anto so mamaseguro a saramay manugyop ed Balon Jerusalem so nasinagan ed sankatagyan ya espiritual ya inkadalisay?

¹¹ Anggapoy toon platero a makapawala na balitok na ontan ya inkapuro. Balet si Jehova so Onsianon Managdalisay. Sikato so manyudyurong “a bilang manlinis tan mangogol na pilak,” tan sikato so manadalisay ed sinansakey, a matoor iran membro na espiritual ya Israel “a singa balitok tan singa pilak,” ya ekalen ed sikara so amin a karutakan. Saray indibidual lambengat a talagan alinisan tan dinalisay so diad kaunoran et manugyop na Balon Jerusalem, tan diad onian paraan et ipaalagey nen Jehova so syudad diad panamegley na mabilay a materyales a masnag ed sankatagyan na espiritual ya inkapuro.​—Malaquias 3:3, 4.

12. Anto so ipatnag na katuaan a (a) say pundasyon na syudad so naadornoan na 12 angkablin bato? (b) saray pinto na syudad et perlas?

¹² Anggan saray pundasyon na syudad so marakep, a naadornoan na 12 a mablin bato. Saya so mangipanonot ed kadaanan a Judion atagey a saserdote, a diad saray agew na seremonya et akasulong na sakey ya ephod a walaan na 12 nanduruman angkablin bato a mipadpara ed saramay adeskribe dia. (Exodo 28:15-21) Peteg a saya et agnibambana! Imbes, idadanet to so kimey na inkasaserdote ed Balon Jerusalem, a no iner si Jesus, say baleg ya Atagey a Saserdote, so say “lampara.” (Apocalipsis 20:6; 21:23; Hebreos 8:1) Ontan met, saray makagunggunan ministeryo nen Jesus bilang atagey-a-saserdote so nipaarap ed katooan diad panamegley na Balon Jerusalem. (Apocalipsis 22:1, 2) Saray 12 a pinto na syudad, a balang sakey et perlas a sankarakpan, so mangipanonot ed ilustrasyon nen Jesus a nialiling so Panarian ed sakey a perlas a walaay atagey a kantidad. Amin ya onloob ed panamegley na saraman a pinto so mangipanengneng na tuan apresasyon para’d espiritual iran bengatla.​—Mateo 13:45, 46; ipareng so Job 28:12, 17, 18.

Sakey a Syudad na Liwawa

13. Anto so tinmunbok ya inkuan nen Juan nipaakar ed Balon Jerusalem, tan akin a say syudad et agmankaukolan na literal a templo?

¹³ Nen panaon nen Solomon, matalonggaring ed Jerusalem so sakey a templon impaalagey ed sankatagyan a toktok na Palandey Moria ed amianen. Balet komusta so Balon Jerusalem? Ibabaga nen Juan: “Tan anggapoy anengneng kon templo diman, ta si Jehova a Dios say Makapanyarin-amin so templo to, ontan met ed Kordero. Tan say syudad so agmankaukolan na banwa nisay bulan pian onliwawa, ta say gloria na Dios so anindag ed sikato, tan say lampara to et say Kordero.” (Apocalipsis 21:22, 23) Diad katuaan et anggapo so pankaukolan na pangipaalagey na literal a templo dia. Say kadaanan a Judion templo so sakey labat a padron, tan say kapetegan na satan a padron, say baleg ya espiritual a templo, so niwala la nanlapulad nilanaan nen Jehova si Jesus a bilang Atagey a Saserdote nen 29 K.P. (Mateo 3:16, 17; Hebreos 9:11, 12, 23, 24) Say sakey a templo so mangipapatnag met a walay saserdoten klasen mangiyapay na saray bagat ed si Jehova ed biang na totoo. Balet amin a kabiangan na Balon Jerusalem so saserdote. (Apocalipsis 20:6) Tan say baleg a bagat, say ayadyarin atooan a bilay nen Jesus, so niyapay ya aminpinsan ed amin a panaon. (Hebreos 9:27, 28) Niarum ni, si Jehova so personal a naasinggeran na balang sakey a manayam ed syudad.

14. (a) Akin a say Balon Jerusalem et agmankaukolan na sinag na banwa tan bulan? (b) Anto so impasakbay na propesiya nen Isaias nipaakar ed sankatalbaan ya organisasyon nen Jehova, tan panon a nalalanor so Balon Jerusalem ed saya?

¹⁴ Sanen say gloria nen Jehova so linmabas ed si Moises ed Palandey Sinai, ginawa to itan a say lupa nen Moises so onsinag a masmasnag a tuloy a kinaukolan to a sakbongan itan ed kapara ton Israelitas. (Exodo 34:4-7, 29, 30, 33) Kanian sirin, naisip yo ta la so inkamasnag na sakey a syudad a permanentin liliwawaan na gloria nen Jehova? Diad sayan syudad et anggapo so labi. Agto kaukolan so literal a banwa odino bulan. Satan so andi-geter a manliwawa. (Ipareng so 1 Timoteo 6:16.) Naliliwawaan so Balon Jerusalem ed ontan a masnag a liwawa. On, sayan nobya tan say Nobyon Ari to so nagmaliw a kabisera na sankatalbaan ya organisasyon nen Jehova​—say “bii” to, “say Jerusalem ed tagey”​—a nipaakar ed saya et impropesiya nen Isaias: “Say banwa anggan kapigan aliwa a sikato naani la so liwawam ed agew, anggan say sinag na bulan agla naani onsinag ed sika. Ingen si Jehova naani so andi ebas a liwawa ed sika, tan say Dios mo so karakpan mo. Say banwam agla naani onselek, anggan say bulan mo agla umpaliis; ta si Jehova a mismo so magmaliw para’d sika a sakey a maando a liwawa, tan saray agew na agogol mo so mangangga.”​—Isaias 60:1, 19, 20; Galacia 4:26.

Sakey a Liwawa Para’d Nasyones

15. Antoran salita na Apocalipsis nipaakar ed Balon Jerusalem so mipadpara ed propesiya nen Isaias?

¹⁵ Impasakbay met na sayan propesiya: “Tan saray nasyones ondago ra naani ed liwawam, tan saray arari ed sinag na kapepelnak mo.” (Isaias 6):3) Ipapanengneng na Apocalipsis a sarayan salita so mangilaktip ed Balon Jerusalem: “Tan saray nasyon so manakar ed panamegley na liwawa to, tan itarok na arari ed dalin so gloria ra ed loob to. Tan saray pinto so ag-ikapot ed agew, ta anggapo naanidman so labi. Tan yakar da so gloria tan say dayew na nasyones ed sikato.”​—Apocalipsis 21:24-26.

16. Siopara so “saray nasyon” a manakar ed panamegley na liwawa na Balon Jerusalem?

¹⁶ Siopa irayan “nasyon” a manakar ed panamegley na liwawa na Balon Jerusalem? Sikara so totoo, a datin kabiangan na nasyones na sayan marelmeng a mundo, ya onkikiwas ed liwawan onsisinag diad panamegley na sayan manglorian mangatatawen a syudad to. Manuna ed sikara et say baleg ya ulop, a pinmaway la ed “amin a nasyones tan tribo tan totoo tan pansasalita” tan mandadayew ed Dios ed agew tan labi a kaiba so klasen Juan. (Apocalipsis 7:9, 15) Kayarin linmeksab so Balon Jerusalem a manlapud tawen tan kayari impangusar nen Jesus ed saray tombok na patey tan Hades pian paulien iray inatey, sikaray ulopen na minilyon ni, a diad inmuna et kabiangan na ‘nasyones,’ a mangaaro ed si Jehova tan ed Anak to, say singa-Korderon Asawan Laki na Balon Jerusalem.​—Apocalipsis 1:18.

17. Sioparay “arari na dalin” a “mangitarok na gloria ra” ed Balon Jerusalem?

¹⁷ Sirin, siopa, iray “arari na dalin” a “mangitarok na gloria ed sikato”? Aliwaran literal ya arari ed dalin a bilang sakey a grupo, ta sikara so naderal bangta mibabakal sumpad Panarian na Dios ed Armagedon. (Apocalipsis 16:14, 16; 19:17, 18) Kasin saray arari et pigara ed saray atagey-ranggo ed nasyones a nagmaliw a kabiangan na baleg ya ulop, odino kasin sikaray apaolin arari a nampasakup ed Panarian na Dios ed balon mundo? (Mateo 12:42) Mairap a nagawa iya, lapud diad karaklan et say gloria na saratan ya arari so minumundo tan abayag lan naandi. Sirin, “saray arari ed dalin,” a mangitarok na gloria ed Balon Jerusalem so nepeg a say 144,000, a “sinaliw . . . a manlapud amin a tribo tan pansasalita tan totoo tan nasyon” pian manuley bilang arari a kaiba so Kordero, si Jesu-Kristo. (Apocalipsis 5:9, 10; 22:5) Itarok da so inter-Dios a gloria ed syudad pian mangarum ed sinag to.

18. (a) Siopara so nilikud manlapud Balon Jerusalem? (b) Siopa ra lambengat so naabuloyan ya onloob ed syudad?

¹⁸ Intuloy nen Juan: “Balet antokaman a bengatlan aliwan sagrado tan siopaman a manggagawa na bengatlan makapadimla tan tila so agmakaloob ed dinanman a paraan; saraman lambengat so nisulat ed lukot na bilay na Kordero.” (Apocalipsis 21:27) Anggapon balot so amantsaan na sistema a bengabengatla nen Satanas a magmaliw a kabiangan na Balon Jerusalem. Anggaman saray pinto to et permanentin akalukas, anggapon balot so “bengatlan makapadimla tan tila” a naabuloyan ya onloob. Anggapo iray apostata ed satan a syudad nisay siopaman a kabiangay Babilonia a Baleg. Tan siopaman a manggunaet a manutak ed syudad diad paneral ed arapen iran membro legan a saraya so wala ni ed dalin, saray sagpot da so magmaliw ya andi-kana. (Mateo 13:41-43) “Iramay nisulat ed lukot na bilay na Kordero,” say 144,000, so diad kaunoran et makaloob ed Balon Jerusalem.b​—Apocalipsis 13:8; Daniel 12:3.

Say Ilog na Danum na Bilay

19. (a) Panon so impaneskribe nen Juan ed Balon Jerusalem bilang paralanan na saray bendisyon ed katooan? (b) Kapigan ya onagus so “ilog na danum na bilay,” tan panoy pikabat tayo?

¹⁹ Say masnag a Balon Jerusalem so mangiparalan na engrande iran bendisyon ed katooan ed dalin. Saya so tinmunbok a naamtaan nen Juan: “Tan impanengneng to ed siak so sakey ya ilog na danum na bilay, a singa kristal kalinew, ya onaagos manlapud trono na Dios tan say Kordero dia ed pegley na maawang a lansangan to.” (Apocalipsis 22:1, 2a) Kapigan ya onagus iyan “ilog”? Lapud satan so onagus a “manlapud trono na Dios tan say Kordero,” nagawa lambengat iya kayari na ingapo na agew na Katawan nen 1914. Satan so panaon para’d agawa ya inyabawag ed pamaknol na komapiton trumpeta tan say engranden panangiyanunsyo: “Natan sinmabi so kilalaban tan say pakayari tan say panarian na Dios tan say pakauley nen Kristo to.” (Apocalipsis 11:15; 12:10) Sakbay na sayan petsa, “say Kordero” so agni nitrono bilang Mesianikon Ari. Kaaruman ni, lapud say ilog so onaagus ed panamegley na maawang a lansangan na Balon Jerusalem, say panaon na kasumpalan na pasingawey so nepeg a kayari na kadederal na mundo nen Satanas, sano say Balon Jerusalem so ‘onleleksab ed tawen a manlapud Dios.’​—Apocalipsis 21:2.

20. Anto so mangipatnag a say kabiangan na danum na bilay et wala la?

²⁰ Saya so aliwan ununan pankanawnawan say manangiter-bilay a danum so niyoopresi ed katooan. Sanen sikato so walad dalin, sinalita nen Jesus so danum a mangiter na andi-anggaan a bilay. (Juan 4:10-14; 7:37, 38) Niarum ni, ngalngali la narengelan nen Juan so maaron imbitasyon: “Say espiritu tan nobya so mantultuloy a mankuan: ‘Gala!’ Tan siopaman a makadngel so mankuan: ‘Gala!’ Tan siopaman a napgaan so naimbitaan; siopaman a mankaliktan so mangala na libren danum na bilay.” (Apocalipsis 22:17) Sayan imbitasyon so nipapaknol la natan, mangipapatnag a naala la natan so kabiangan na danum na bilay. Balet diad balon mundo, saraman a danum so onagus a manlapud trono na Dios tan ed panamegley na Balon Jerusalem a singa sakey ya ilog.

21. Anto so irerepresenta na “ilog na danum na bilay,” tan panon ya ontulong ed sikatayo so pasingawey nen Ezequiel a mangamta ed sayan ilog?

²¹ Anto iyan “ilog na danum na bilay”? Say literal a danum so makanan elemento na bilay. Anggaman anggapo so tagano na sakey a too et nayarin manbilay ni ed pigaran simba, balet no anggapo so danum sikato so ompatey ed loob lambengat na sakey simba. Say danum so sakey met a panlinis tan importanti ed bunigas. Sirin, say danum na bilay so nepeg a mangilaman ed bengatlan makana para’d bilay tan bunigas na katooan. Say propetan Ezequiel so apabtangan na sakey a pasingawey na sayan “danum na bilay,” tan say pasingawey to, say ilog so inmagus a manlapud templo ed Jerusalem tan anggad Inatey a Dayat. Insan, pakelaw ed saray pakelaw! Saman ya inatey a danum na say datin alaokan na kemikal so apasimbalo ya anggad nagmaliw a tariwan danum a walaan na sira! (Ezequiel 47:2) On, say mapasingawey ya ilog so mangitarok lamet na bilay ed datin inatey, a pepekderan a say ilog na danum na bilay so mangiretrato ed probisyon na Dios ed panamegley nen Jesu-Kristo ed pangipawil na ayadyarin atooan a bilay ed “inatey” a rasa na too. Sayan ilog so “singa kristal kalinew,” mangipapanengneng ed inkadalisay tan inkasanto na saray probisyon na Dios. Aliwan singa say amantsaan na dala, makapatey a “danudanum” na Kakristianoan.​—Apocalipsis 8:10, 11.

Say Mansiayap a Syudad

22. (a) Manlalapud iner so ilog, tan akin a matukoy iya? (b) Anto so nalanor ed danum na bilay, tan anto so itekep na sayan simbolikon danum?

²² Say ilog so manlalapud “trono na Dios tan ed Kordero.” Saya so matukoy, ta say basiyan na manangiter-bilay iran probisyon nen Jehova et say dondon bagat, tan saya so nitarok lapud si Jehova et “inaro to so mundo ya imbaki to so bogbogtong ya Anak to, pian amin a mangagamil na pananisia ed sikato so agnaderal noag nawalaan na bilay ya andi-anggaan.” (Juan 3:16) Lalanoren met na danum na bilay so Salita na Dios, ya asalitan danum ed Biblia. (Efeso 5:26) Anggaman ontan, say ilog na danum na bilay so aglabat mangilaktip ed katuaan noagta ontan met ed amin iran probisyon nen Jehova, a nibased bagat nen Jesus, pian iliktar so matulok a katooan manlapud kasalanan tan patey tan mangagamor ed sikara na andi-anggaan a bilay.​—Juan 1:29; 1 Juan 2:1, 2.

23. (a) Akin a matukotukoy a say ilog na danum na bilay so onagus ed panamegley na pegley na maawang a lansangan na Balon Jerusalem? (b) Anton madibinon sipan ed si Abraham so nasumpal sano say danum na bilay so onagus na daakan?

²³ Legan na Sanlibon Taon ya Uley, saray gungguna na dondon so niyaplikan sigpot ed panamegley na inkasaserdote nen Jesus tan say 144,000 iran kaiban saserdote to. Sirin, matukotukoy a say ilog na danum na bilay so onagus ed panamegley na pegley na maawang a lansangan na Balon Jerusalem. Saya so tugyopen na espiritual ya Israel, a pati si Jesus et manugyop na tuan bini nen Abraham. (Galacia 3:16, 29) Sirin, sano say danum na bilay so onagus ed inkadaakan ed panamegley na pegley na baleg a lansangan na simbolikon syudad, “amin a nasyones ed dalin” so nawalaan na nagnap a pankanawnawan bendisyonan so inkasikara ed panamegley na bini nen Abraham. Say sipan nen Jehova ed si Abraham so kompleton nasumpal.​—Genesis 22:17, 18.

(Ituloy ed ontumbok a paway.)

[Saray paimano ed leksab]