Report na Saray Manangiyabawag na Panarian

“Sakey a Monumento ed Espiritu na Kooperasyon”

ASINGGER ed sanka-abalatenan a sampot na Espanya et wadman so sakey ya abalbaleg a baton dena a kabkabat bilang Dampay na Gibraltar. Diad loob na nilasus laran taon, sayan dampay so sakey a pepe a tasi ed mapulitikan sangsangan tan internasyonal ya agpanpapakna. Diad kasuniyan, agano nin say Dampay na Gibraltar so nagmaliw a nenengnengen para’d panangipatnag na kooperasyon tan pankakasakey a mataltalag a nanengneng ed mundo natan.

Taloran kilometro lambengat manlapud Dampay et wadman so baley na La Línea, Espanya. Diman ya agawa so panangipaalagey na sakey a Kingdom Hall na saray Tasi nen Jehova a mamapakasakey ed nilasus iran boluntaryon komikimey a magunaet a mangiter na panaon tan biskeg da. Legan a pansasagpotan day pangipaalagey na matukoy a pasen pian pandayewan ed Manamalsa, si Jehova a Dios, anggan say makapakelaw a nenengnengen a Dampay na Gibraltar so kinmupas ed kaimportantian no ipareng ed gagawaen a paalagey.

Onia so report na saray manangiyabawag na Panarian ed satan a parti na mundo:

“Siamlasus ya entusiastikon boluntaryo so nankimey ya agew-labi, a ginmapo nen Biernes na ngarem, Setyembre 24, 1993. Kasabi na ala-siete na labi na Simba, nikabit la so sakey a balon karatula a mangipapabidbir a say paalagey et sakey a Kingdom Hall na saray Tasi nen Jehova, tan say makapaingganyon balon palagey so usaren para’d sankaunaan a publikon miting to.

“Dakel a Tasin nanlapud kabangibang a Gibraltar so binmasil ed ketegan pian tulongan iray agagi ran Kastila. ‘Saray mapulitikan inkaapag-apag so ag-amaletey ed internasyonal ya impanaagi mi,’ so salaysay na sakey ed saray boluntaryon komikimey, a native na Gibraltar. Inyarum to: ‘Pigaran taon lay linmabas, sinmasabi kakaaron nanlapud La Línea pian tulongan kami ed pangipaalagey na Kingdom Hall mi ed Gibraltar, kanian natan et maliket kamin manbayar ed otang na linawa mi met ed sikara.’

“Pian sapotan so mabulos iran sagpot na duaran kongregasyon na saray Tasi nen Jehova tan nilasus ya onsianon katulongan manlapud rehyon na Andalusia, diniside na syudad na La Línea ya idona so nakakaukolan a lote. ‘Unong ed tradisyon, naynay a mangitatarok so lokal iran autoridad a Kastila na dalin a pangipaalageyan na saray simbaan na Katoliko,’ so salaysay na alkalde na La Línea diad aminsan ya impasyar to ed pasen na panpapaalageyan. ‘Akin ya ag met itan gawaen para’d arum a grupo na relihyon? Siak so mandinayew a tuloy ed inkamabunlok na saray boluntaryo, tan liknaen kon kanepegan da so suporta tayo. Nagkalalon kaukolan tayo so onian nengneng na espiritu ed naapag-apag a mundo natan.’

“Tinukoy to so Kingdom Hall bilang ‘sakey a monumento na espiritu na kooperasyon.’ On, say pandinayewan a tuloy et aliwan say desinyo ed inka-sangal to nisay kabaleg na paalagey. Imbes, say pandinayewan na dakel ed komunidad et say bengatlan saman so interamentin nipaalagey na saray boluntaryo tan asumpal ed loob lambengat na 48 oras!”

Mapatnag a saray Tasi nen Jehova ed La Línea tan saray lugar ed liber na saya so napapaneknekan a matoor ed saray salita na Galacia 6:10. Ditan et sinimbawa nen apostol Pablo iray kapananisiaan: “Ontan sirin, onong a wala so kiambegia mangawa itayo na maabig ed saray amin, nagkalalo ed saray kaamong na pananisia.”