Say Sankabalgan a Toon Nambilay ed Kapiganman

Kapitulo 97

Saray Komikimey ed Ubasan

“Dakel ya onaan,” inkuan nen Jesus, “so naonor tan say onor et onaan, NW.” Inyilustra natan iya nen Jesus diad impangisalaysay na sakey ya istorya. “Say panariay tawen,” inggapo to, “[so] miolibay ed sakey a too ya ama na sankabaley [unabong, NW], ya pinmaway a masakbay ed kabuasan ya mangopa na dumaralos ed ubasan to.”

Intuloy nen Jesus: “Sanen [say unabong so] akapipakna’d saray dumaralos ed sakey a denario ed sanagew, sikara’y inbaki to ed ubasan to. Tan pinmaway ed mikatlo ya oras, et anengneng to so saray sananey a wala ra ed plaza ya manalalagey a manmemeneng, et inkuan to ed sikara, Onla kayo met ed ubasan, et say kanepegan sikato so iter ko’d sikayo. Et linma ra. Sikato’y pinmaway lamet ed mikanem tan mikasiam ya oras et ontan met so ginawa to. Tan sanen singa mikalabinsakey ya oras pinmaway, tan aromog to ray arum ya akaalagey, et kuan to’d sikara, Akin et akaalagey kayo dia a sanagew a manmemeneng? Kuan da’d sikato, Lapu’d angapo’y angupa ed sikami. Kuan to’d sikara, Onla kayo met ed ubasan.”

Say unabong, odino akan-kien na ubasan, et si Jehova a Dios, tan say ubasan so nasyon na Israel. Saray komikimey ed ubasan so totoon intarok ed Ganggan a sipanan; sikara iramay diad interamenti et Judion manbibilay ed agew na saray apostol. Saraman lambengat so sanagew iran komikimey so nanggawaan na paknaan ya upa. Say sueldo et sakey a denario parad sanagew a kimey. Lapud say “mikatlo ya oras” et alas 9 ed kabuasan, saramay tinawag ed koma-3, koma-6, koma-9, tan koma-11 ya oras so nankimey, unong ed impantutumbokan, ed 9, 6, 3, tan 1 oras lambengat.

Say 12-oras, odino sanagew, iran komikimey so mangirerepresenta ed Judio iran pangulo a sikaray nantultuloy ya okupado ed relihyoson serbisyo. Sikara so agmipara ed saray babangatan nen Jesus a, diad kaslakan a bilay da, nantrabaho bilang managsigay odino arum nin sekular a trabaho. Aliwan anggad panaoy-loglog na 29 K.P. a say “unabong” so angibaki ed si Jesu-Kristo pian tiponen iraya pian magmaliw a babangatan to. Sikara so nagmaliw sirin ya “onor,” odino say koma-11 oras iran komikimey ed ubasan.

Kaunoran, say simbolikon sanagew a kimey so asumpal diad impatey nen Jesus, tan asabi panaon pian bayaran iray komikimey. Say nikadkaduman totontonen ed panagbayar ed onor so tinumbok, a singa impaliwawa: “Sanen labi la, say makankien na ubasan kuan to’d panagpiaan to, Tawag mo ’ray dumaralos tan bayaran mo’d sikara so upa ra, manlapu’d onor anga ed onaan. Et sanen sinmabi so saray inupaan ed komalabinsakey ya oras sikara inawat da balang sakey a too so sakey a denario. Tan sanen sinmabi so saray akaona, inisip da’n mangawat ira’y dakdakel; et sikara met inawat da balang sakey a too so sakey a denario. Et sanen sikato so naawat da, nantalabotob ira sumpa ed ama na sankabaley, a kuan da, Sarayan onor, sakey oras lambengat so inpankimey da, et inpiparam ira’d sikami, ya sinakbat mi so awit ya sanagew, tan say makaatong ya petang. Sikato balet inmebat tan inkuan to’d sakey ed sikara, Kaaro, ag ko gawaen ed sika so agonkatonongan. Agka ta akipakna ed siak ed sakey a denario? Alam so kayarian mo, tan laka la; labay ko so mangiter ed saya’y onor, na singa say initer ko’d sika. Ag ta onkatonongan ed siak so pangawak na labay ko ed kayarian ko lanlamang? ono say matam so mauges, lapu ed maongak?” Bilang konklusyon, inulit nen Jesus so sakey a punton pinalinew ed asasakbay, ya ibabaga: “Dia ed ontan saray onor sikara naani unona, tan saray unona sikaray naonor.”

Say panangawat na saray denario so agawa, aliwan diad impatey nen Jesus, noagta diad Pentecostes 33 K.P., sanen si Kristo, say “panagpiaan,” so angikalbo na masanton espiritu ed saray babangatan to. Sarayan babangatan nen Jesus so singa “say onor,” odino say koma-11 oras, iran komikimey. Ag-irerepresenta na denario so langkap na masanton espiritu a mismo. Say denario so bengatlan usaren na saray babangatan dia ed dalin. Satan so bengatlan mankabaliksan na panbilay da, say andi-anggaan a bilay da. Saman so pribilihyon pagmaliw ya espiritual ya Israelita, alanaan pian mangipulong ed Panariay Dios.

Agmabayag et naimatonan na saramay inupaan ya onaan iray babangatan nen Jesus a naupaan, tan sikaray nanengneng dan manguusar ed simbolikon denario. Balet kaliktan da ni nagkalalo nen say masanton espiritu tan say katekep to’ran pribilihyo ed Panarian. Say panmemeremere tan isusumpa ra so mamoporma’d pamapasegsegang da ed saray babangatan nen Jesus, “say onor” iran komikimey ed ubasan.

Kasin satan ya inmunan-siglon kasumpalan so mogmon kasumpalan na ilustrasyon nen Jesus? Andi, say klero na Kakristianoan ed sayan koma-20 siglo so, lapud saray posisyon tan saray responsabilidad da, nagmaliw ya “onaan” a naupaan a mankimey ed simbolikon ubasan na Dios. Ipapasen daray dedikadon manangiyabawag a kabiangan na Watch Tower Bible and Tract Society a “say onor” a nawalaan na anggan dinan a makanepegan ya asainmin ed serbisyo’d Dios. Balet, diad katuaan et sarayan mismo, a pabpabandayen na klero, so makakaawat na denario​—say kagalangan na panserbi bilang alanaan iran mananguley ed mangatatawen a Panarian na Dios. Mateo 19:30–20:16.

▪ Anto so irerepresenta na ubasan? Siopa so irerepresenta na akan-kien na ubasan tan say 12-oras tan 1-oras iran komikimey?

▪ Kapigan ya anampot so simbolikon agew na kimey, tan kapigan a ginawa so panagbayar?

▪ Anto so irerepresenta na panagbayar na denario?