Say Sankabalgan a Toon Nambilay ed Kapiganman

Kapitulo 98

Nansangsangan Iray Babangatan Legan a Manasingger so Ipapatey nen Jesus

Si Jesus tan saray babangatan to so asingger ed Ilog Jordan, a ditan et sikaray binmeltang manlapud distrito na Perea ya amaarap ed Judea. Dakel iray manbabaroy a kaiba ra parad Paskua na 33 K.P., a sakey simba odino onsulok ni kaarawi to.

Manaakar si Jesus a makakauna nen saray babangatan to, tan sikaray mankelaw ed makpel a determinasyon to. Tandaan a pigaran simba ed asasakbay sanen inatey si Lazaro tan ngalngali la onlay Jesus manlapud Perea a mamaarap ed Judea, pinaseseg nen Tomas iray arum: “Onla itayo met, pian onpatey itayo a midamay ed sikato.” Nonoten met a kayarin pinaoli nen Jesus si Lazaro, say Sanhedrin so angiletneg na plano pian napapatey si Jesus. Agmakapakelaw a gegemgemen na takot iray babangatan legan a sikara natan so onloloob lamet ed Judea.

Pian sikaray iparaan parad nagawa’d arapen, pribadon kinatongtong nen Jesus so 12 tan inkuanto’d sikara: “Nia, ontatdang itayo ed Jerusalem; et say Anak na too niyawat ed saray manonaan a sacerdote tan saray escribas; tan sikato’y dusaen da naani na ipapatey, tan sikato’y yawat da naani ed saray Gentiles. Tan sikato’y ludlureyen da naani, tan sikato’y lupdaan da, tan sikato’y bakbaken da naani, tan sikato’y pateyen da; et kayari talo ra’n agew onoli ed bilay lanlamang.”

Saya so komatlon pankanawnawa ed akadkauna iran bulan ya impaamta nen Jesus ed saray babangatan to so nipaakar ed ipapatey tan kikioli to. Tan anggaman tinmalineng ira ed sikato, sinmaew iran makatebek. Nayarin lapud manisia’ra ed kipawil na panarian na Israel ed dalin, tan sikaray maniilalo’d pakapangayaga ed gloria tan kagalangan ed mangaraldalin a panarian a kaibay Kristo.

Sakey ed saramay mamapaarap ed Paskua a manbabaroy et si Salome, say ina nen apostol Santiago tan Juan. Tinawag nen Jesus irayan lalaki bilang “Anak na Karol,” anggapoy duaruwan lapud masanok a walna ra. Diad loob na pigaran panaon et sarayan dua so angem-em na ambisyon a magmaliw a promeninte ed Panarian nen Kristo, tan impaamta ray pilalek da’d kinen ina ra. Say ina ra natan so inmasingger ed si Jesus nisesengeg ed sikara, tinmalimokor ed arapan to, tan kinmerew na pabor.

“Anto’y labay mo?” intepet nen Jesus.

Inyebat to: “Ibilin mo komon a saraya’y duaran ana’ko makayorong ira komon, sakey ed nikawanan a limam, tan say sakey ed nikawigi a limam, dia ed panarian mo.”

Diad impakamoria ed lapuan na kerew, inkuan nen Jesus ed si Santiago tan Juan: “Ag yo amtay kekerewen yo. Nayarian yo ta ya inumen so copa ya ngalngali ya inumen ko?”

“Nayarian mi,” inyebat da. Anggaman imbaga nen Jesus ed sikara a sikatoy akaarap ed teriblin panamasegsegang tan diad kaunoran et sikatoy pateyen, mapatnag ya agda natatalosan a saya so labay ton ibaga’d ‘say copa’ a ngalngali to lan inuman.

Anggaman ontan, imbaga nen Jesus ed sikara: “Say copak tua ya inumen yo naani, balet say yorong yo ed nikawanan a limak tan dia ed nikawigi a limak, ag ko kien so panangiter, ingen sikato so nipaakar ed saray angiparaanan nen Amak.”

Ag-abayag et say samplora so akaamta ed kinerew nen Santiago tan Juan, tan sikara so maingongot. Anganko ta si Santiago tan Juan so promeninte ed asasakbay a sangsangan ed limog na saray apostol nipaakar ed no siopa so sankabalgan. Say kaplesan a kerew da so mangipapatnag ya agda inyaplika so simbawa nen Jesus ya initer ed sayan pamaakaran. Makapaermen, say pilalek da parad inkapromeninte so mapalalo ni.

Kanian pian arapen iyan sankaonoran a sangsangan tan say inbelan na linawa a pinalesa na satan, tinawag nen Jesus so 12 a mantitipon. Diad maaron panisimbawa ed sikara, inkuanto: “Amta yo ya saray makauley na saray Gentiles sikara so katawan ed sikara, tan saray manonaan agamilen da so pakauley da ed sikara. Aliwan ontan naani dia ed sikayo, noag ingen siopaman a labay toy magmaliw a baleg ed sikayo sikato naani managlinkor yo, tan siopaman a labay to’y onaan ed sikayo sikato naani aripen yo.”

Si Jesus so angiletneg na alimbawa a nepeg dan aligen, a singa ipapaliwawa to: “Singa say Anak na too ya ag dia linma a panlinkoran, noag say manlinkor, tan iter to’y bilay to a panondon ed amayamay.” Aglambengat nanlingkor si Jesus ed biang na arum noagta ginawa to iman anggad ipapatey nisesengeg ed katooan! Kaukolan na saray babangatan so parehon singa-Kriston walna ed panpilalek a manlingkor imbes a panlingkoran tan magmaliw ya abebbeba imbes ya onla’d posisyon na inkapromeninte. Mateo 20:17-28; Marcos 3:17; 9:33-37; 10:32-45; Lucas 18:31-34; Juan 11:16.

▪ Akin a say takot so mangegemgem natan ed saray babangatan?

▪ Panon ya ipaparaan nen Jesus iray babangatan to parad nagawa ed arapen?

▪ Anton kerew so iyarap ed si Jesus, tan panon a naapektoan iray arum ya apostol?

▪ Panon ya impidenengan nen Jesus so problema ed limog na saray apostol to?