Sakey a Baleg ya Ulop a Mangisasaklang na Sagradon Serbisyo
“Sikato so panlinkoran da ed agew tan labi ed templo to.”—APOCALIPSIS 7:15.
1. Anton makatantandan aligwas ed espiritual a pakatalos so adampot nen 1935?
NEN Mayo 31, 1935, wala so baleg a gayaga ed limog na saray delegado ed kumbension na Tastasi nen Jehova diad Washington, D.C. Diman, diad ununan pankanawnawa a malinlinew a nipabidbir so baleg a karaklan (odino, baleg ya ulop) ed Apocalipsis 7:9 a mitunosan ed arum a kabiangan na Biblia tan mitukoyan ed saray ebenton ginmapo lan niparungtal.
2. Anto so angipanengneng a sakey ya ondaraak a bilang so akamorian ag-ira tinawag na Dios ed mangatatawen a bilay?
2 Ngalngali anemiran simba ed asasakbay, diad selebrasyon na Pangdem na Katawan diad saray kongregasyon na Tastasi nen Jehova, 10,681 ed saramay presenti (ngalngali 1 ed kada 6) so ag-akibiang ed saray embleman tinapay tan alak, tan 3,688 ed saraya so aktibon manangiyabawag na Panarian na Dios. Akin a tinmunda iran mangan ed saray emblema? Lapud unong ed naaralan da manlapud Biblia, amoria ran ag-ira tinawag na Dios ed mangatatawen a bilay balet sikaray makapinabang ed saray maaron probisyon nen Jehova diad sananey a paraan. Kanian diad saman a kumbension, sanen tinepet na espiker: “Ipangasin onalagey iramay walaan na ilalon manbilay na ando lan ando ed dalin,” anto so agawa? Nilibo so tinmalindeg, a tinumbokan na abayag ya impantipak na saramay wadman.
3. Akin a say impakabidbir ed baleg ya ulop so angiter na ligsa ed lawak a ministeryo, tan antoy alikna na Tastasi nipaakar ed saya?
3 Say naaralan na saray delegado ed saman a kumbension so angiter ed sikara na ligsa ed ministeryo ra. Naapresya ra la natan, sakbay na anggaan na daan a sistema, ya aliwa lambengat a pigaran libo noagta baleg a karaklan na totoo so naikdan na pankanawnawan miulop ed oksuyan nen Jehova parad kipreserba na bilay, diad paniilalon manbilay na ando lan ando ed paraison dalin. Agaylan makapaliket a mensahe iman a niparungtal ed saray manangaro na katuaan! Amoria na Tastasi nen Jehova a wala so baleg a kimey a kaukolan a nasumpal—sakey a makapagayan kimey. Onia so atandaan, pigaran taon ed saginonor, nen John Booth, a nagmaliw a membro na Mananguley ya Ulop: “Saman ya asamblea so angiter ed sikami na agaylan liket.”
4. (a) Diad anton laknab a walan talaga so pananugyop ed baleg ya ulop nanlapulad 1935? (b) Diad anton dalan a saramay kabiangan na baleg ya ulop so mamapaneknek a say kayarian da et mabilay a pananisia?
4 Legan na saray tinmumbok a taon, say bilang na Tastasi nen Jehova so biglan dinmaak. Anggaman ed mabetbet a maruksan panamasegsegang ya indapo ed sikara legan na Guerra Mundial II, saray bilang da so ngalngalin amitlon danay a dinmaak ed bilang diad loob na sakey a dekada. Tan say 56,153 a manangipalapag a mapublikon mantatasi nen 1935 so dinmaak, nen 1994, ed masulok a 4,900,000 a manangiyabawag na Panarian a walad masulok a 230 a daldalin. Kaslakan ed saraya so maniilalo tekep na gunaet ed pakapisakop ed saramay papaboran nen Jehova na ayadyarin bilay ed paraison dalin. Nipareng ed melag a pulok, talagan sikaray magmamaliw a baleg ya ulop. Aliwa iran totoon mangibabagan walaay pananisia balet ta agmangidedemostra ed satan. (Santiago 1:22; 2:14-17) Amin da so mangipapanabang ed arum na maong a balita nipaakar ed Panarian na Dios. Kasin sakey kayo ed satan a maliket ya ulop? Say pagmaliw ya aktibon Tasi so importantin pakabidbiran a marka, balet nagkalalo ni so nalalanor.
‘Manalalagey ed Arap na Trono’
5. Antoy ipapanengneng na katuaan a say baleg ya ulop so “manalalagey irad arap na trono”?
5 Diad pasingawey ya inter ed si apostol Juan, anengneng to a “manalalagey irad arap na trono, tan ed arap na Cordero.” (Apocalipsis 7:9) Say panalalagey da ed arap na trono na Dios, a singa adeskrebi ed sayan konteksto, so mangipapanengneng ed sigpot a panamidbir da ed inkasoberano nen Jehova. Malaknab so lalaktipen na saya. Alimbawa: (1) Bibidbiren da so kanepegan nen Jehova a mandeside parad ariripen to no antoy maong tan no antoy mauges. (Genesis 2:16, 17; Isaias 5:20, 21) (2) Tatalinengen da si Jehova legan a mitotongtong ed sikara diad panamegley na Salita to. (Deuteronomio 6:1-3; 2 Pedro 1:19-21) (3) Aapresyaen da so kaimportantian na panpasakup ed saramay pangimamatalkan nen Jehova na panangasikaso. (1 Corinto 11:3; Efeso 5:22, 23; 6:1-3; Hebreos 13:17) (4) Anggaman ag-ayadyari, siseseet dan panbabanikelan ya onkiwas ed teokratikon panangiwanwan, aliwan napipilitan, balet mabulos, manlapud puso. (Uliran 3:1; Santiago 3:17, 18) Wala ra’d arap na trono pian mangisaklang na sagradon serbisyo ed si Jehova, a sigpot a rerespetoen tan aaroen dan tuloy. Diad kaso na sayan baleg ya ulop, say ‘panalalagey’ da ed arap na trono so mangipapabitar ed panangabobon na samay Sakey ya akayurong ed trono. (Ipareng so Apocalipsis 6:16, 17.) Diad anto so kibabasiyan na panangabobon?
“Nankawes Ira na Kawekawes ya Ampoti”
6. Anto so kabaliksan na say baleg ya ulop so “nankawes ira na kawekawes ya ampoti”? (b) Panon a nagagamoran na baleg ya ulop so matunong a talindeg ed imaton nen Jehova? (c) Diad anton kalaknab a say pananisia ed nipaagos a dala nen Kristo so mangiimpluensya ed saray kabibilay na baleg ya ulop?
6 Say deskripsyon nen apostol Juan ed anengneng to so mangibabagan saray membro na sayan baleg ya ulop so “nankawes ira na kawekawes ya ampoti.” Saraman ya amputin kawes so mangisisimbolo ed malinis, matunong a talindeg da ed arap nen Jehova. Panon dan agamoran so ontan a talindeg? Naimano tayo la diad pansingawey nen Juan a sikaray manalalagey ed “arap na Cordero.” Bibidbiren da si Jesu-Kristo bilang “Cordero’y Dios, ya mangekal na kasalana’y mundo.” (Juan 1:29) Arengel nen Juan so sakey ed mamatatken a presenti ed trono na Dios a mangisasalaysay: “Inorasan da so kawekawes da, tan sikara so pinapoti ra ed dala na Cordero. Lapu ed saya wala ra ed arap na trono na Dios.” (Apocalipsis 7:14, 15) Diad piguratibon paraan, inurasan daray kawes da diad pangaagamil na pananisia ed mananondon a dala nen Kristo. Ag-ira labat miaabobon diad kanonotan ed bangat na Biblia nipaakar ed dondon. Aapektaan na apresasyon ed satan no anton nengneng ira na too ed akindalem; kanian, “ed puso” ya aagamilen day pananisia. (Roma 10:9, 10) Saya so walaan na malaknab a tuloy ya epekto no antoy gagawaen da ed saray bilay da. Diad pananisia, idededika ra so inkasikara ed si Jehova diad basiyan na bagat nen Kristo, ya isisimbolo itan a dedikasyon diad kipalgep ed danum, peteg a manbilay a mitunosan ed dedikasyon da, tan diad ontan et pangayagaan so naabobonan a siglaotan ed Dios. Agaylan maabig a pribilihyo—sakey a siaalwar ya adyaan!—2 Corinto 5:14, 15.
7, 8. Panon a natutulongan na organisasyon nen Jehova so baleg ya ulop diad pamasiansia ran andi-mantsa iray kawes da?
7 Tekep na maaron panagpaga ed magnayon a pankaabigan da, naulit-ulit ya ipapaimano na organisasyon nen Jehova iray awawey tan kondukta a makamatik, odino manutak, ed saray kawes a pakabidbiran ed sakey ta pian anggaman ed mapalaway a pangibabaga et agtalaga ontukoy so sakey ed mapropetikon deskripsyon ed Apocalipsis 7:9, 10. (1 Pedro 1:15, 16) Diad pangidanet ed nipalapag la, say The Watchtower, nen 1941 tan nanlapulad satan, so paulit-ulit ya angipanengneng a seryoson lingo so pangipulong ed arum tan insan, legan na agpanmiministeryon panaon et mangagamil na ontan a kondukta a singa say pilalawanan odino pikakaluguroan. (1 Tesalonica 4:3; Hebreos 13:4) Nidanet nen 1947 a saray Kristianon estandarte nen Jehova ed panamaley so onaaplika ed amin a daldalin; antokaman so nayarin aabobonan na lokal a kustombre, saramay mansiansian mangagamil na poligamya so agnayarin magmaliw a Tastasi nen Jehova.—Mateo 19:4-6; Tito 1:5, 6.
8 Nen 1973, nipanengneng ed saray Tasi nen Jehova ed sankamundoan ya amin da so kaukolan a sigpot ya onarawi ed makarutak ya agagamil a singa say lingon panangusar na tabako, iner man so kawalaan da—aliwa lambengat diad Kingdom Hall odino ed lawak na serbisyo noagta ontan met ed sekular a kimey odino ed arum a niyamot a pasen ed pakanengneng na publiko. (2 Corinto 7:1) Diad saray distriton kumbension na Tastasi nen Jehova nen 1987, mabisbiskeg ya asimbawa iray Kristianon tobonbalo a pian napansiansia ra so malinis a talindeg ed arap na Dios, nepeg da so manadya sumpad doblin panagbilay. (Salmo 26:1, 4) Paulit-ulit, mamapasakbay so Say Panag-Bantayan sumpad nanduruman pamaakaran na espirituy mundo lapud “say religion a malinew tan andi tilol ed arap na Dios tayo tan Ama” et lalaktipen toy pansiansia na sakey ya ‘andi mancha ed mundo.’—Santiago 1:27.
9. Siopan talagay naabobonan ya ontalindeg ed arap na trono na Dios kayari na baleg a kairapan?
9 Saramay pakikiwasen lambengat na pananisia ran manbilay ed ontan a paraan pian mansiansian malinis ed espiritual tan moral a paraan so siansian ‘manalalagey ed arap na trono’ bilang naabobonan ya ariripen na Dios kayari onsasabin baleg a kairapan. Saraya so totoon aglambengat onggagapo ed Kristianon panagbilay noagta sitotoor a mansiansia ed satan.—Efeso 4:24.
“Wala so Palmas ed Saray Kalimaan Da”
10. Antoy kabaliksan na saray sanga na palma ya anengneng nen Juan ed kalimaan na baleg ya ulop?
10 Arum ed matalonggaring a pakapatnagan ed baleg ya ulop, a singa naimatonan nen apostol Juan et “wala so palmas ed saray kalimaan da.” Antoy kabaliksan na satan? Anggapoy duaruwa a saraman a palmas so angipanonot ed si Juan ed Judion piesta na saray tabernakulo, say sankagayagaan a piesta ed Hebreon kalendaryo, ya agawa kayari panagani ed tiagew. Mitunosan ed Ganggan, saray bolong na palmas, pati saray sanga na arum a kiew, so inusar pian gawaen iran kobongkobong a panayaman legan na piesta. (Levitico 23:39-40; Nehemias 8:14-18) Saraya met so impayapay na saray managdayew ed templo legan na pankakanta na say Hallel (Salmos 113-118). Say panangipayapay na baleg ya ulop ed saray sanga na palmas so nayarin angipanonot ed si Juan ed sakey a pankanawnawan inlugan nen Jesus a mamaarap ed Jerusalem legan a say ulop na saray managdayew so sigagayagan angipayapay na sangasangay palmas tan kinmelyaw: “Bendito so onladia ed ngaran na Katawan [Jehova, NW], salanti say Ari na Israel.” (Juan 12:12, 13) Kanian say panangipayapay ed sangasanga na palmas so mangipapabitar a say baleg ya ulop so sigagayagan mangitatandoro ed Panarian nen Jehova tan say nilanaan ton Ari.
11. Akin a talagan nagagayagaan iray aripen na Dios ed panlilingkor ed si Jehova?
11 Ipapatnag na baleg ya ulop so ontan a gayaga anggan natan legan a panlilingkoran da si Jehova. Agkabaliksan na saya a sikaray agnidunget ed saray kairapan odino managmak na ermen odino ot-ot. Balet say pakapenek manlapud panlingkor tan pakapaliket ed si Jehova so ontutulong a mamalemew ed saratan a bengatla. Alimbawa, imbaga na sakey a misioneran nanlingkor a kaibay asawa to ed loob na 45 taon diad Guatemala so nipaakar ed primitibo iran kipapasen ed liber da, say mairap tan mapeligron panagbiahe a kabiangan na bilay da legan na gunaet dan pangipasabi mensahe Panarian ed saray purok na Indian. Kuanto: “Saman so sankaliketan a panaon ed bilay mi.” Anggaman nalilikna to la’d saman iray epekto na itatatken tan ileletey, kabiangay sankaunoran ya insulat to ed diary to et saraya: “Saman so maabig a bilay, ontanlan makagungguna.” Diad interon dalin, ontan met so nalilikna na Tastasi nen Jehova nipaakar ed ministeryo ra.
“Sagradon Serbisyo ed Agew tan Labi”
12. Balanglan legan na agew odino labi, anto so naiimatonan nen Jehova dia ed dalin?
12 Mangisasaklang irayan magayagan managdayew ed si Jehova na “sagradon serbisyo ed agew tan labi ed templo to.” (Apocalipsis 7:15, NW) Diad interon globo, minilyon so mibibiang ed sayan sagradon serbisyo. Sano labi ed pigaran daldalin tan akaugip iray totoo ditan, agew met ed arum a dalin tan okupadon manpupulong iray Tasi nen Jehova. Legan ya ontetelek so globo, agew tan labi ya anggapoy-tunda, idadayew da si Jehova. (Salmo 86:9) Balet say agew-tan-labin serbisyon natutukoy ed Apocalipsis 7:15 so nagkalalon personal.
13. Panon ya ipapanengneng na Kasulatan no antoy kabaliksan na panlingkor ya “agew tan labi”?
13 Saray indibidual a manitibukel ed baleg ya ulop so mangisasaklang na sagradon serbisyo ed agew tan labi. Kasin kabaliksan na saya ya amin a bengatlan gawaen da et nipasen a sagradon serbisyo? Tua ya antokaman so gagawaen da et panggugunaetan da itan ed kirayewan nen Jehova. (1 Corinto 10:31; Colosas 3:23) Anggaman ontan, onaaplika lambengat so “sagradon serbisyo” ed antokaman a direktan mangilalanor ed panagdayew na sakey ed Dios. Say pankimey ya “agew tan labi” so mangipapabitar na inkamaparanay odino anggapoy-pananguman ontan met ed masimoon a sagpot.—Ipareng so Josue 1:8; Lucas 2:37; Gawa 20:31; 2 Tesalonica 3:8.
14. Anto so manggawa ed personal a lawak a serbisyo tayon matukoy ed deskripsyon na “agew tan labi” a serbisyo?
14 Legan a manlilingkor ira diad mangaraldalin a lolooban (courtyard) na baleg ya espiritual a templo nen Jehova, saramay manitibukel na baleg ya ulop so manbabanikel a mibiang a maparanay tan anggapoy-pananguman ed lawak a ministeryo. Ginawa na dakel a kalat da so mibiang ed lawak a ministeryo ed kada simba. Nambanikelan na arum so pagmaliw a regular pioneer odino auxiliary pioneer. Mabetbet a saraya so okupadon manpupulong ed saray lansangan tan diad saray tindaan ed palbangon. Pian natulongan iray interesado, arum a Tastasi so mangikokondukta na saray panangiyaral na Biblia ed lablabi la. Sikaray manpupulong legan a mansasaliw, sano manbibiahe, legan na panangugto, tan diad panamegley na telepono.
15. Nilikud ed lawak a ministeryo, anto so lalaktipen na sagradon serbisyo tayo?
15 Say pibibiang ed saray miting ed kongregasyon so kabiangan met na sagradon serbisyo tayo; ontan met ed kimey a lalanoren to so panangipaalagey tan panangasikaso ed saray pasen na Kristianon pantitipon. Saray sagpot ya isesekar ed pamaseseg tan itulong ed saray Kristianon agagi, diad espiritual tan materyal a paraan pian mansiansian maligsa’d serbisyo ed si Jehova so nilalaktip. Lalaktipen na saya so kimey na saray Hospital Liaison Committee tayo. Say serbisyo ed Bethel ed amin a nanduruman nengneng to, ontan met ed boluntaryon serbisyo ed saray kumbension tayo, so amin et sagradon serbisyo. Peteg, sano saray bilay tayo so nisesentro ed pisiglaotan tayo ed si Jehova, napapano ira na sagradon serbisyo. Unong ya ibabaga na Kasulatan, isasaklang na totoo nen Jehova so “sagradon serbisyo ed agew tan labi,” tan naroromog da so baleg a gayaga ed panggagawa ed satan.—Gawa 20:35; 1 Timoteo 1:11.
‘Manlapu ed Amin a Nasyon, Tribu, Totoo, tan Pansasalita’
16. Panon a napapaneknekan a tua a say baleg ya ulop so “nanlapud amin a naciones”?
16 Manlapud amin a nasyon so panlalapuay baleg ya ulop. Say Dios so agmangidumaduma, tan say probisyon a dondon diad panamegley nen Jesu-Kristo so magenap a mangungguna ed amin da. Sanen say baleg ya ulop so inmunan Makasulatan ya abidbiran nen 1935, aktibo iray Tasi nen Jehova diad 115 daldalin. Diad saray taon 1990, say pananap parad saray kinmarnero so linmaknab ed masulok a mamiduan danay a kinarakel na daldalin.—Marcos 13:10.
17. Anto so nagagawa pian tulongan so totoo ed amin a ‘tribu, totoo, tan pansasalita’ pian napisakop ed baleg ya ulop?
17 Diad pananap ed saray prospektibon membro na baleg ya ulop, aglambengat iimanoen na Tastasi nen Jehova iray nasyonal a grupo noag ontan met ed saray tribu tan totoo tan lenguahe ed loob na saratan a nasyon. Ta pian nasabi irayan totoo, ipapalapag na Tastasi so literatura na Biblia ed masulok a 300 lenguahe. Lalanoren na saya so panangipasal tan panangipakurang na saray ulop na kualipikadon manangipatalos, pangitatarok na saray computer a makayarin mamawala ed sarayan amin a lenguahe, ontan met ed panggawa na aktual a panag-imprinta. Diad loob lambengat na apalabas a limaran taon, 36 a lenguahe, a sasalitaen na ngalngali 98,000,000 totoo, so niyarum ed listaan. Niarum ni, panbabanikelan na Tastasi so personal ya idalaw ed sarayan totoo pian tulongan iran mantalos ed Salitay Dios.—Mateo 28:19, 20.
“Nanlapu ed Baleg ya Irap”
18. (a) Sano ombetag so baleg a kairapan, sioparay nasalimbengan? (b) Antoran makapaliket a panangiyabawag so nagawa ed satan?
18 Sano bulosan na angheles iray dagem na kadederal ya atukoy ed Apocalipsis 7:1, aliwa lambengat a “saray aripen na Dios tayo” so makaeksperiensia ed maaron pananalimbeng nen Jehova noagta ontan met ed baleg ya ulop ya akiulop ed sikara ed tuan panagdayew. Unong a nibaga ed si apostol Juan, saraman a baleg ya ulop so “nanlapu ed baleg ya irap” bilang saray akaliktar. Agaylan kelyaw na pisasalamat tan panangidayew so iter da diad satan legan ya iyaabawag da: “Say kilalaban [so utang tayo] ed Dios, a manyodyorong ed trono, tan ed Cordero”! Tan amin a matoor ya aripen na Dios ed katawenan so miulop ed baleg ya ulop ed pangiyabawag: “Amen! Say bendicion tan say gloria tan say kakabatan tan say pisasalamat tan say dayew tan say pakayari tan say biskeg so niiter komon ed Dios tayo ed ando lan ando. Amen.”—Apocalipsis 7:10-14, NW.
19. Diad anton magayagan kimey so magunaet a pibiangan na saray makaliktar?
19 Agaylan makapaliket itan a panaon! Amin a manbilay so magmaliw ya ariripen na saksakey a tuan Dios! Say sankabalgan a gayaga ed amin na saraya et say panlingkor ed si Jehova. Dakel ni so gawaen a kimey—magayagan kimey! Say dalin so pagmaliwen a Paraiso. Nilibon minilyon ed inaatey so napaoli tan bangatan ed saray basbas nen Jehova. Agaylan magayagan pribilihyo itan a pibiangan!
Anto so Komento Yo?
◻ Anto so epekto na saray ebento nen 1935 ed lawak a ministeryo na Tastasi nen Jehova?
◻ Anto so ipapanengneng na katuaan a say baleg ya ulop so nipapanengneng a ‘manalalagey ed arap na trono’?
◻ Panon a say apresasyon parad dala na Kordero so mangapekta ed kabibilay tayo?
◻ Anto so kabaliksan na panangipayapay da na sangasanga na palma?
◻ Panon a say baleg ya ulop so mangisasaklang na sagradon serbisyo ed agew tan labi?
[Saray litrato ed pahina 16, 17]
Isisindag na sagradon serbisyo ra so inkaregular, inkakuli, tan magunaet a sagpot