Pananumpal ed Dedikasyon Tayo ya “Inagew-agew”
“No siopaman a too so malabay ya ontumbok ed siak, iburi to so inkasikato tan sakbaten to so panamairapan a palitek to ya inagew-agew tan mantultuloy a tumboken toak.”—LUCAS 9:23, NW.
1. Antoy sakey a paraan a nasukat tayoy itatalona tayo bilang Kristianos?
“KASIN sikatayo so peteg a dedikadon totoo?” Say ebat ed sayan tepet, unong ed si John F. Kennedy, say koma-35 a Presidente na Estados Unidos, so sakey a basiyan ed pananukat na itatalona na saramay walaan na posisyon ed gobierno. Say tepet so onkana tekep na araldalem a kabaliksan bilang pananubok ed itatalona tayo bilang Kristianon ministros.
2. Panoy panguuker na sakey a diksyunaryo ed salitan “dedikasyon”?
2 Anto, sirin so dedikasyon? Uukeran itan na Webster’s Ninth New Collegiate Dictionary bilang “sakey a kiwas odino seremonya na panangitalaga ed madibino odino ed sakey a sagradon kimey,” “sakey a panangideboto odino panangigana parad nikabiig a gagala,” “dilin-manangisakripisyon debosyon.” Ompapatnag ya inusar nen John F. Kennedy so salita a mankabaliksan na “dilin-manangisakripisyon debosyon.” Parad sakey a Kristiano, say dedikasyon so mankabaliksan na nagkalalo ni.
3. Anto so Kristianon dedikasyon?
3 Inkuan nen Jesu-Kristo ed saray babangatan to: “No siopaman a too so malabay ya ontumbok ed siak, iburi to so inkasikato tan sakbaten to so panamairapan a palitek to tan mantultuloy toak a tumboken.” (Mateo 16:24, NW) Say kigana parad madibinon kimey so aglabat basta manasaglawi ed panggawa na panagdayew no Simba odino sano ombibisita ed arum a pasen na panagdayewan. Lalanoren toy interon kabibilay na sakey. Say pagmaliw a Kristiano et kabaliksan toy pangiburi odino pangitalirak ed sarili legan a manlilingkor ed Dios a nanlingkoran nen Jesu-Kristo, si Jehova. Niyarum ni, sasakbaten na sakey a Kristiano so “panamairapan a palitek” to diad pantepel ed silong na antokaman a kairapan a nayarin nasagmak lapud pagmamaliw a patumbok nen Kristo.
Say Ayadyarin Ehemplo
4. Antoy isisimbolo na bautismo nen Jesus?
4 Legan a wadiad dalin, impanengneng nen Jesus no antoy lalanoren na pangidedika’d sarili ed si Jehova. Saray balikas to so: “Bagat tan patanir sikara so ag mo ginabay, ingen sakey a laman so iparaan mo ed siak.” Insan inyarum to: “Nia, siak so onsabi (dia ed lokot na libron walan nisulat so nipaakar ed siak), pian gawaen ko, O Dios, so linawam.” (Hebreos 10:5-7) Bilang membro na dedikadon nasyon, sikato so dedikado la ed si Jehova diad inkiyanak. Siansia ni, diad inggapoy ministeryo to ed dalin, inyopresi toy inkasikato parad bautismo bilang simbolo na panangiparungtal toy inkasikato pian gawaen so linawa nen Jehova, a parad sikato et laktipen toy pangiyapay na bilay to bilang dondon bagat. Inletneg to sirin so sakey ya ehemplo parad saray Kristiano pian gawaen so antokaman a linawa nen Jehova.
5. Panon ya impanengneng nen Jesus so ehemplo diad panmoria ed materyal iran bengatla?
5 Kayari na bautismo to, tinumbok nen Jesus so kurso na bilay a diad kaunoran et angitonton ed masakripisyon ipapatey. Sikatoy ag-interesado ed panpayaman odino panbilay a komportabli. Imbes, say ministeryo to so sankaimportantian ed bilay to. Binilin toray babangatan to a “mantultuloy . . . ya anapen ya ununa so panarian tan say inkatunong to,” tan sikaton mismo so anumpal ed sarayan salita. (Mateo 6:33, NW) Agayla, aminsan et inkuanto ni ingen: “Saray kuyangen wala’y balaong da, tan saray manok ed tawen walaan ira’y obong, balet say Anak na too angapo’y pangisaralan to na olo to.” (Mateo 8:20) Nayarian ton ibagay iray bangat to ta pian kuartaan iray patumbok to. Bilang karpentero et nayarian to komon ya itunday ministeryo to pian makapanggawa na marakep a muwebles pian ilako ta pian sikatoy nawalaan na pigaran ekstran piraso na pilak. Balet agto inusar iray dunong to pian panggunaetay iyaligwas ed materyal. Bilang dedikadon ariripen na Dios, kasin aaligen tayoy Jesus ed pakawalaan na suston panmoria ed materyal iran bengatla?—Mateo 6:24-34.
6. Panon tayon naalig si Jesus ed pagmaliw a dilin-managsakripisyo, dedikadon ariripen na Dios?
6 Diad pangiyuuna na serbisyo to’d Dios, agnanggunaetan nen Jesus so dilin intereses to. Say bilay to legan na talora tan kapalduan taon na mapublikon ministeryo to so sakey a dilin-panagsakripisyo. Diad sakey ya inkagawa, kayari okupadon agew, ya agni anggan angan, si Jesus so mabulos a manbangat ed totoo a “maermen tan abuybuyak ira, a singa saray carnero ya angapoy pastol da.” (Mateo 9:36; Marcos 6:31-34) Anggaman ‘naksawan nanlapud impanbaroy,’ sikatoy mabulos ya angigapoy tongtongan ed sakey a Samaritana a linma’d bobon nen Jacob diad Sychar. (Juan 4:6, 7, 13-15) Lawas ton inkonsidera so pankaabigan na arum sakbay na pankaabigan ton dili. (Juan 11:5-15) Naalig tayo si Jesus diad mabunlok a panangisakripisyo tayoy dilin intereses tayo pian manlingkor ed Dios tan ed arum. (Juan 6:38) Diad pannonot ed no panon tayon peteg a napaliket so Dios imbes a gawaen lambengat so sankamelagan a nakakaukolan, sikatayo so makasumpal ed dedikasyon tayo.
7. Panon tayon naalig si Jesus ed lawas pangiter na galang ed si Jehova?
7 Agbalot nanggunaetan nen Jesus ed antokaman a paraan so panagyat na imano ed inkasikato diad panulong ed totoo. Sikatoy dedikado ed Dios a manggawa na linawa To. Kanian lawas ton sineguro a si Jehova, say Ama to, so mangaawat ed amin a gloria parad antokaman ya agawaan. Sanen sakey a manuley so anawag ed sikaton “Maong a Managbangat,” ya inusar so salitan “maong” bilang titulo, sikatoy kinorehi nen Jesus diad pangibabagan: “Angapo so maong, nilikod so sakey, salanti say Dios.” (Lucas 18:18, 19; Juan 5:19, 30) Kasin sikatayo, singa si Jesus, so maples a mangipaarap na galang ed si Jehova imbes ed inkasikatayo?
8. (a) Bilang dedikadon too, panon nen Jesus ya impasen so inkasikato a biig manlapud mundo? (b) Panon so nepeg a pangalig tayo’d sikato?
8 Diad panaon na dedikadon kurang na bilay to ed dalin, impanengneng nen Jesus ya inggana toy inkasikato parad madibinon serbisyo. Impansiansia toy inkasikato a malinis ta pian nayarian ton iyopresi inkasikato bilang “andi dumsis tan tilol” a magmaliw a dondon bagat. (1 Pedro 1:19; Hebreos 7:26) Tinulok ton amin so totontonen ed Mosaikon Ganggan, sirin et sinumpal itan a Ganggan. (Mateo 5:17; 2 Corinto 1:20) Sikatoy anumpal ed dilin bangat to nipaakar ed moral. (Mateo 5:27, 28) Anggapoy anggan sakey a makanepegan a mangakusa ed sikato na mauges iran motibo. On, ‘binusol to so kaugsan.’ (Hebreos 1:9) Bilang ariripen na Dios, aligen tayo si Jesus diad pamasiansia’d bilay tan anggan saray motibo tayo a malinis ed imaton nen Jehova.
Manamasakbay Iran Ehemplo
9. Diad anton manamasakbay ya ehemplo so tinukoy nen Pablo, tan akin a nepeg tayon konsideraen iyan ehemplo?
9 Misunian ed ehemplo nen Jesus, walaan itayo na manamasakbay ya ehemplo na saray Israelita. Anggan kayari impangiyabawag da a gawaen so amin ya imbaga nen Jehova a gawaen da, sikaray sinmaew a manggawa ed linawa to. (Daniel 9:11) Pinaseseg nen apostol Pablo iray Kristiano a manaral manlapud agawa ed saray Israelita. Usisaen tayo pa so pigaran inkagawa a tinukoy nen Pablo ed inmunan sulat to diad saray taga Corinto tan imanoen no antoran kapeligroan so nakaukolan a paliisan na dedikadon ariripen na Dios ed panaon tayo.—1 Corinto 10:1-6, 11.
10. (a) Panon a saray Israelita so ‘nanpilalek ed makaderal a bengabengatla’? (b) Akin a saray Israelita so lalon responsabli ed komaduan impanmeremere ra nipaakar ed tagano, tan anto so naaralan tayo manlapud sayan manamasakbay ya ehemplo?
10 Ununa, papasakbayan itayo nen Pablo ya agmagmaliw a “mapilalek ed makaderal a bengabengatla.” (1 Corinto 10:6, NW) Satan so nayarin mangipanonot ed sikayo ed agawa sanen saray Israelita so nanreklamo nipaakar ed impakawalaan lambengat na mana a kanen. Si Jehova so angibaki na saray sikling ed sikara. Bengatlan miulibay ya agawa ngalngali sakey taon ed asasakbay diad kalawakan na Sin, sakbay lambengat a tuloy na impangiyabawag na saray Israelita ed dedikasyon da ed si Jehova. (Exodo 16:1-3, 12, 13) Balet say kipapasen so aliwan eksakton pareho. Sanen angitarok si Jehova na saray sikling ed inmunan pankanawnawa, agto ginawan responsabli iray Israelita ed panmemeremere ra. Balet, diad sayan pankanawnawa, say kipapasen so duma. “Bangnen wala ni ed leet na saray ngipengipen da so laman ya ag da ni agatgat, dinmalang so pasnok nen Jehova a mangula ed saray katooan, et si Jehova dineria to so katooan ed sakey ya abalbaleg a salot.” (Numeros 11:4-6, 31-34) Anto so impandumaan? Bilang dedikadon nasyon, sikara la ed satan so walaan na eebatan. Say kaandian da na apresasyon ed saray probisyon nen Jehova so angitonton ed sikaran manreklamo sumpad si Jehova, anggaman ed sipan dan gawaen so amin a sinalita nen Jehova! Say panreklamo nipaakar ed dulang nen Jehova natan so miulibay. Say arum so agmangaapresya’d espiritual iran probisyon nen Jehova ed panamegley na “matoor tan makabat ya aripen.” (Mateo 24:45-47) Anggaman kuan, tandaan a say dedikasyon tayo so mankakaukolan na pisasalamat pian lawas nonoten so nagagawaan nen Jehova ed sikatayo tan awaten so espiritual a tagano ya iiter nen Jehova.
11. (a) Panon a dinutakan na Israelitas so panagdayew da ed si Jehova diad panagtalintao? (b) Panon tayon naapektaan ed sakey a nengneng na panagtalintao?
11 Komadua, impasakbay nen Pablo: “Nisay, magmaliw a managtalintao, a singa ginawa na arum ed sikara.” (1 Corinto 10:7, NW) Dia et mapatnag a tutukoyen na apostol so panagdayew ed baka ya agawa kayarin tuloy na impamekder na Israelitas ed sipanan da’d si Jehova diad Palandey Sinai. Nayarin ikuan yo, ‘Bilang dedikadon aripen nen Jehova, agak balot nalanor ed panagtalintao.’ Anggaman ontan, imanoen a diad panmoria na saray Israelita et sikaray agtinmunda ed panagdayew ed si Jehova; ingen, sikaray nandayew ed baka—bengatlan makapadimla ed Dios. Antoy nilanor na sayan nengneng na panagdayew? Saray totoo so nanbagat ed arap na baka, tan ‘insan nanyorong ira ya angan tan inminum. Insan ira inmalagey a nangagalaw.’ (Exodo 32:4-6) Natan, arum so nayarin mankuan a sikaray mandadayew ed si Jehova. Balet saray bilay da so nisentro, aliwan diad panagdayew ed si Jehova, noag diad panliket ed saray bengatla ed mundo, tan panggugunaetan dan itukoy ed sarayan bengatla so serbisyo ra ed si Jehova. Tua, saya so aliwan inka-alablabas a singa panagdakmomo ed sakey a bakan balitok, balet agtanton midumaan so prinsipyo. Say panggawa na sakey a dios unong ed pilalek na sakey so arawi’d panumpal ed dedikasyon na sakey ed si Jehova.—Filipos 3:19.
12. Manlapud eksperiensia na saray Israelita ed Baal na Peor, antoy naaralan tayo nipaakar ed panangitalirak ed inkasikatayo?
12 Sakey a nengneng na panligliwaan so asaglawi met ed ontumbok a manamasakbay ya ehemplo a sinalambit nen Pablo. “Nisay abuloyan tayo so pangagamil na pilalawanan, a singa arum ed sikara et akilawanan, pian napelag lambengat, duamplo-tan-talon libo ed sikara ed sanagew.” (1 Corinto 10:8, NW) Saray Israelita, lapud impakasagyat ed imoral a panliliket ya inyopresi na ananak a bibii nen Moab, so nitonton ed panagdayew ed Baal na Peor ed Setim. (Numeros 25:1-3, 9) Say pangitalirak ed inkasikatayo pian gawaen so linawa nen Jehova so mangilalaktip ed pangawat ed saray estandarte to parad no anto so malinis ed moral. (Mateo 5:27-30) Diad sayan panaon na iyaabebay estandarte, sikatayo so napapanonotan ed pankaukolan a pansiansiaen tayoy inkasikatayon malinis manlapud amin a nengneng na imoral a kondukta, a manpasakop ed autoridad nen Jehova diad pandesidi ed no anto so maong tan no anto so mauges.—1 Corinto 6:9-11.
13. Panon a say alimbawa nen Pinehas so ontulong ed sikatayo pian natalosan no antoy lalaktipen na dedikasyon tayo’d si Jehova?
13 Anggan dakel so naplag ed patit na pilalawanan diad Setim, arum so anumpal ed nasyonal a dedikasyon ed si Jehova. Diad sikara, si Pinehas so matalonggaring ed seseg. Sanen apasikmatan toy sakey ya uloen ya Israelita a kaibay sakey a Midianitan onloloob ed tolda to, tampol ya angala na gayang si Pinehas tan linasok to ra. Inkuan nen Jehova ed si Moises: “Si Pinehas . . . impaliis to so sanok ko manlapud ananak na Israel diad ag-impangiyabuloy ed pilalaslasan ed siak ed utel da, ta pian agko sigpot a pinatey so ananak na Israel diad panangipaskar ko’y nikabkabiig a debosyon.” (Numeros 25:11, NW) Say agpangiyabuloy na pilalaslasan ed si Jehova—satan so kabaliksan na dedikasyon. Agtayo naabuloyan so antokaman a mangokupa ed kapusoan tayo a nepeg a kipasenan na dedikasyon tayo ed si Jehova. Say seseg tayo ed si Jehova so mamakiwas met ed sikatayon pansiansiaen a malinis so kongregasyon diad pangireport na graben imoralidad ed mamatatken, ya agpapaulyanan itan.
14. (a) Panon ya inyan na Israelitas si Jehova ed pananubok? (b) Panon a say kompleton dedikasyon ed si Jehova so ontulong ed sikatayon ‘ag-onkesaw’?
14 Tinukoy nen Pablo so sananey nin manamasakbay ya ehemplo: “Ni agtayo iyan ed subok si Jehova, a singa arum ed sikara et inyan da ed pananubok, pian natawtaw lambengat ed panamegley na saray uleg.” (1 Corinto 10:9, NW) Sasaglawien nen Pablo dia so nipaakar ed panaon sanen saray Israelita so nanreklamo sumpad Dios ed si Moises sanen sikaray “ginmapon naksawan lapud dalan.” (Numeros 21:4, NW) Kasin awalaan kayo la na ontan ya awawey? Sanen indedika yoy inkasikayo’d si Jehova, kasin inisip yon asingger lan tuloy so Armagedon? Kasin say anos nen Jehova so andukdukey nen say iilaloan yo? Tandaan, agtayo indedikay inkasikatayo’d si Jehova parad antikey a panat na panaon labat odino angga lambengat ed Armagedon. Say dedikasyon tayo so mantultuloy ed ando lan ando. Kanian, “ag-itayo [sirin] ontunda ed panggawa na maabig, lapud diad suston panaon manani itayo no ag-itayo onkesaw.”—Galacia 6:9, NW.
15. (a) Sumpad siopa so nanmeremerean na Israelitas? (b) Panon a say dedikasyon tayo’d si Jehova so mamakiwas ed sikatayon manrespeto ed teokratikon autoridad?
15 Kaunoran, impasakbay nen Pablo so nipaakar ed “panmeremere” sumpad aturon ariripen nen Jehova. (1 Corinto 10:10) Saray Israelita so mapalalon nanmeremere sumpad si Moises tan Aaron sanen say 10 ed 12 espiya a nibaki a mangusisa ed dalin na Canaan so pinmawil a walaan na mauges iran report. Nantongtongan da ni ingen a salatan si Moises bilang pangulo ra tan ompawil ed Ehipto. (Numeros 14:1-4) Natan, kasin aawaten tayoy panangidaulo a niiter ed sikatayo ed panamegley na kiwas na masanton espiritu nen Jehova? Manlapud pangimano ed daakan ya espiritual a dulang ya itatarya na matoor tan makabat ya aripen a klase, malinew ya uusaren nen Jesus itan diad pangitarya na “tagano ed suston panaon.” (Mateo 24:45) Say sigpot-kamarerwan dedikasyon ed si Jehova so mankakaukolan ed sikatayo na panangipanengneng na respeto ed aturon ariripen to. Komon ta ag-itayon balot magmaliw a singa arum ed modernon-agew a managmeremere a binmaling ed sakey a balon pangulo, diad piguratibon panagsalita, pian itonton iran papawil ed mundo.
Kasin Satan so Anggaay Nayarian Ko?
16. Antoran tepet so nayarin kaliktan ya itepet na dedikadon ariripen na Dios ed inkasikara?
16 Agkomon naplag iray Israelita ed ontan a grabe iran lingo no ninonot da komon a say dedikasyon da ed si Jehova et aliwan kondisyonal. Aliwan singa saramay agmatoor ya Israelita, sinumpal nen Jesu-Kristo so dedikasyon to anggad anggaan. Bilang papatumbok nen Kristo, aligen tayoy ehemplo ton sigpot-kamarerwan debosyon, a manbilay itayon “aliwa lan parad pilpilalek na totoo, noag parad linawa na Dios.” (1 Pedro 4:2, NW; ipareng so 2 Corinto 5:15.) Say linawa nen Jehova natan et “amin a klase na totoo so kaukolan a niliktar tan makarateng ed suston pikakabat ed katuaan.” (1 Timoteo 2:4, NW) Tekep na ontan gagala, kaukolan tayon ipulong “iyan maong a balita na panarian” sakbay ya onsabi anggaan. (Mateo 24:14) Kaunongan a sagpot so uusaren tayo’d sayan serbisyo? Nayarin kaliktan tayon tepetan so inkasikatayo, ‘Kasin satan so anggaay nayarian ko?’ (2 Timoteo 2:15) Mandurumay sirkumstansya. Si Jehova so naliliketan a nalingkoran “unong ed walad sakey a too, aliwan unong ed andi ed sikato.” (2 Corinto 8:12, NW; Lucas 21:1-4) Anggapoy siopaman a mangukom ed kinaaralem tan inkasimoon na dedikasyon na sananey. Balang sakey so nepeg a personal a manukat ed laknab na dili ton debosyon ed si Jehova. (Galacia 6:4) Say aro tayo’d si Jehova so nepeg a mamakiwas ed sikatayon mangitepet, ‘Panon kon napaliket si Jehova?’
17. Antoy pansiglaotan na debosyon tan apresasyon? Iyilustra.
17 Say kinaaralem na debosyon tayo’d si Jehova so napaaralem legan ya ombabaleg so apresasyon tayo’d sikato. Sakey a mantaon na 14 a laki a taga Hapon so angidedikay inkasikato ed si Jehova tan insimbolo iyan dedikasyon diad panamegley na bautismo ed danum. Saginonor, labay toy mangala na atagtagey ya edukasyon tan magmaliw a sakey a sientista. Agton balot ninonot so sigpot-panaon a ministeryo, balet bilang dedikadon aripen, agto labay a taynan si Jehova tan say nanengneng ya organisasyon to. Pian nasumpal so kalat ton karera, sikatoy nanaral ed unibersidad. Diman et anengneng toray nangraduar ed unibersidad a napapaskar a mangidedikay interon bilay da ed saray korporasyon da odino ed panagaral da. Sikatoy nanumameng, ‘Antoy gagawaen ko’d dia? Kasin peteg kon nagegemtan so kabibilay da tan idedikak so inkasiak ed sekular a trabaho? Agta siak la so dedikado’d si Jehova?’ Tekep na apasimbalon apresasyon, sikatoy nagmaliw a regular pioneer. Say pakatalos to’d dedikasyon to so apaaralem tan amakiwas ed sikaton determinadon onla ed inerman a sikato so nakaukolan. Sikatoy nanaral ed Ministerial Training School tan naasain a manlingkor bilang misionero ed biek-taew.
18. (a) Kaunongan so nalalanor ed dedikasyon tayo’d si Jehova? (b) Anton tumang so anien tayo manlapud dedikasyon tayo ed si Jehova?
18 Lalanoren na dedikasyon so interon bilay tayo. Nepeg tayon italirak so inkasikatayo tan “inagew-agew” ya ontumbok ed maabig ya ehemplo nen Jesus. (Lucas 9:23) Diad impangitalirak ed inkasikatayo, ag-itayo onkerew ed si Jehova na iliwat. Saray bilay tayo so mitunosan ed saray prinsipyo ya inletneg nen Jehova parad ariripen to. Anggan ed saray pamaakaran a makapanggawa itayo na personal a panpili, makagungguna parad sikatayo so pangimano no kasin sikatayoy manggagawa na sankaabigan tayo pian manbilay a dedikado ed si Jehova. Legan a manlilingkor itayo ed sikato ya inagew-agew, a gagawaen so anggaay nayarian tayo diad pamaliket ed sikato, sikatayoy ontalona bilang Kristianos tan nabendisyonan na imis na panangabobon manlapud si Jehova, say Sakey a makana ed sigpot-kamarerwan debosyon tayo.
Kasin Nisalaysay Yo?
◻ Antoy lalanoren na dedikasyon parad si Jesu-Kristo?
◻ Akin a nepeg tayon paliisan so panmeremere sumpad si Jehova?
◻ Diad anton paraan a napaliisan tayoy pangiyabuloy ed panagtalintao a sisisilib a mangapekta’d bilay tayo?
◻ Say pannonot ed anto so ontulong ed sikatayon ‘ag-onkesaw’ ed panggaway linawa na Dios?
[Litrato ed pahina 17]
Saray dedikadon Kristiano so ‘ag-ontunda ed panggawa na maabig’